کراچی : قومی کرکٹ ٹیم کے بلے باز امام الحق نے نیوزی لینڈ سے سیریز جیتنے کے بعد ٹیم کی کمزوری کی نشاندہی کردی انہوں نے کہا کہ مجھے لگتا ہے کہ ہماری مڈل اوورز کی بولنگ کمزور ہے، ہمارے اسپنرز وکٹ نہیں لے پارہے۔
پاک نیوزی لینڈ ون ڈے سیریز میں مین آف دی میچ کا اعزاز حاصل کرنے والے امام الحق نے میچ کے بعد پریس کانفرنس میں تفصیلی گفتگو کی۔
انہوں نے کہا کہ گزشتہ میچز میں ہم اچھی فیلڈنگ نہیں کررہے تھے، آج ہم نے اچھی فیلڈنگ کی اور اس میں مزید بہتری لانا ہے، ہم فیلڈنگ بہتر کرلیں گے تو اہم موقع پر کیچ نہیں چھوڑیں گے۔ اب زیادہ چینجز نہیں کرسکتے کیونکہ ہمارے پاس میچز کم ہیں۔
ان کا کہنا تھا کہ مجھے لگتا ہے کہ ہماری مڈل اوورز کی بولنگ کمزور ہے، ہمارے اسپنرز وکٹ نہیں لے پارہے ، ہمیں اسپن ڈپارٹمنٹ میں بہتری لانی پڑے گی۔
Imam-ul-Haq’s press conference following the third ODI in Karachi.#PAKvNZ | #CricketMubarak https://t.co/2EUldjZ2VA
— Pakistan Cricket (@TheRealPCB) May 3, 2023
انہوں نے کہا کہ سنچری نہ کرنے کا افسوس ہوتا ہے لیکن مجموعی طور پر پاکستان کے جیتنے کی خوشی ہے، میری یہی خواہش ہے کہ ٹیم کی جیت میں اپنا بھرپور کردار ادا کروں۔
امام الحق کا کہنا تھا کہ پاکستان کے لیے جب کھیلتے ہیں تو پریشر تو ہوتا ہے، نوجوان کھلاڑیوں کے ہونے سے ٹیم میں مقابلہ بڑھ جاتا ہے، اب ہم دونوں اوپنرز100کے اسٹرائیک ریٹ سے اوپر کھیل رہے ہیں۔
ایک سوال کے جواب میں ان کا کہنا تھا کہ آج کی کنڈیشن کافی مختلف تھی، اگر آج ہم تھوڑا اور اچھا کھیلتے تو300 رنز سے اوپر جاسکتے تھے۔
قومی بلے باز نے کہا کہ فخر زمان اور بابر اعظم کے ساتھ کھیلنا تھوڑا مختلف ہے، بابر بہت بولتا ہے جبکہ فخر زمان خاموش رہتا ہے، بابر سے اچھی دوستی ہے لیکن فخر کے ساتھ بھی مزہ آتا ہے۔
