Tag: Pak US relations

امریکا کے پالیسی ساز ادارے نے پاکستان سے تعلقات برقرار رکھنا امریکا کے لیے انتہائی اہم قرار دیا ہے، بھارت سے حالیہ کشیدگی نے پاکستان کی اہمیت اجاگر کی۔

امریکا کے پالیسی ساز ادارے ہڈسن انسٹی ٹیوٹ کی رپورٹ میں تجویز دی گئی ہے کہ انسداد دہشت گردی پر پاکستان اور امریکا کے مشترکہ مفادات ہیں۔

وقت آگیا ہے کہ واشنگٹن اور اسلام آباد باہمی دلچسپی کے امور میں عملی شراکت داری کی بنیاد رکھیں، اسلام آباد اور نئی دہلی کے درمیان تنازعات کسی کے مفاد میں نہیں۔

تفصیلات کے مطابق امریکا کے پالیسی ساز ادارے ہڈسن انسٹی ٹیوٹ نے خارجہ پالیسی سے متعلق پاکستان پر رپورٹ جاری کردی۔

ادارے نے تجویز دی ہے کہ مستحکم جنوبی ایشیا کے لیے مستحکم پاکستان کا ہونا ضروری ہے، امریکا کے پاکستان سے تعلقات بہتر بنانے کا یہ بہترین موقع ہے۔

رپورٹ کے مطابق دونوں ملکوں کو مشترکہ مفادات پر توجہ دینا ہوگی، جنوبی ایشیا کے حالیہ بحران نے پاکستان کی اہمیت اجاگر کی۔ پاکستان کی شکایت ہے کہ امریکا نے پاکستان کے تحفظات اور مفادات نظر انداز کیے۔

ادارے کا کہنا ہے کہ افغانستان اور بھارت سے متعلق پاکستان کا نقطہ نظر امریکا سے مختلف ہوسکتا ہے، اس بات پراصرار نہ کیا جائے کہ پاکستان بھی اپنے ہمسایوں کو مغرب کی نظر سے دیکھے، وقت آگیا ہے کہ دونوں ملک باہمی دلچسپی کے امور میں عملی شراکت داری کی بنیادرکھیں۔

رپورٹ میں یہ بھی بتایا گیا پاکستان چین کے ساتھ بھی گہرے تعلقات رکھنا چاہتا ہے۔ امریکا پاکستان کو چین کے حوالے نہ کرے۔ پاکستان پر اثرو رسوخ کے ذرائع تلاش کرنا دانش مندی ہوگی۔

ہڈسن انسٹی ٹیوٹ کی رپورٹ میں بتایا گیا ہے کہ افغان سرحد سے پاکستان کو شدید سیکورٹی خطرات کاسامنا ہے، افغان طالبان کالعدم ٹی ٹی پی کے خلاف کارروائی سے ہچکچاتے ہیں۔

پاکستان کی انسداد دہشت گرد کارروائیوں سے امریکا فائدہ اٹھاسکتا ہے۔ رپورٹ میں کیمرون منٹر، این پیٹرسن، رابن رافیل، حسین حقانی سمیت امریکا اور پاکستان کے کئی سابق سفیروں کی آراء بھی شامل ہیں۔