کراچی: پاکستان خواتین کرکٹ ٹیم نے بنگلہ دیش کو جیت کیلئے 215رنز کا ہدف دے دیاہے۔
تفصیلات کے مطابق قومی کرکٹ ٹیم مقررہ اوورز پورے نہیں کھیل سکی جبکہ ایک گیند قبل ہی 214رنز بنا کر آل ٹیم آﺅٹ ہو گئی۔
پاکستانی خواتین ٹیم کی کھلاڑی بسمہ معروف 92رنز کے ساتھ سرفہرست رہیں جبکہ نین عابدی 27سکور کے ساتھ دوسرے نمبر پر رہیں ۔
بنگلہ دیشی ٹیم کی جانب سے سلمیٰ خاتون نے تین کھلاڑیوں کو پولین پہنچایا جبکہ لتامنڈال،جہان آرا،خدیجہ اور فہمیہ خاتون نے ایک ایک وکٹ حاصل کی ۔
کراچی : پاکستان اور بنگلہ دیش ویمنز کرکٹ ٹیم کے درمیان ون ڈے سیریز کا پہلا میچ آج کھیلا جائیگا۔
پاکستان ویمنز کرکٹ ٹیم ٹی ٹوئنٹی سیریز جیتنے کے بعد اب بنگلہ دیش کو ون ڈے میں بھی شکست دینے کا عزم رکھتی ہے۔
ساؤتھ اینڈ کلب میں ون ڈے سیریز کی ٹرافی کی رونمائی کردی گئی۔ میڈیا سے بات کرتے ہوئے پاکستان ٹیم کی کپتان ثنا میر نے کہا کہ بنگلہ دیش کیخلاف ون ڈے سیریز میں مقابلہ آسان ثابت نہیں ہوگا۔ ایک غلطی شکست کا سبب بن سکتی ہے۔
بنگلہ دیشی کپتان سلمہ خاتون کے مطابق انکی ٹیم ٹی ٹوئنٹی کے برعکس ون ڈے میں مضبوط ہے، کوشش یہی ہے کہ دورہ کا اختتام جیت سے کریں۔
کراچی : پاکستان ویمنز ٹیم نے بنگلہ دیش کو دوسرے ٹی ٹوئنٹی میں بھی شکست دےکر سیریز میں کلین سوئپ کرلیا۔پاکستان کی بسمعہ معروف نے سیریز میں شاندار کارکردگی کا مظاہرہ کیا۔
تفصیلات کے مطابق کراچی کے ساؤتھ اینڈ کلب میں کھیلے جانے والے دوسرے ٹی ٹوئنٹی کا میدان بھی پاکستان ویمنز ٹیم کے نام رہا۔
پاکستانی کپتان ثنا میر نے ٹاس جیت کر پہلے بیٹنگ کا فیصلہ کیا۔ پہلے میچ میں عمدہ کارکردگی دکھانے والی بسمعہ معروف دوسرے میچ میں بھی چھائی رہیں۔
بسمعہ معروف نے ناٹ آؤٹ چوالیس رنز کی شانداراننگز کھیلی۔ اوپنر مرینا اقبال نے تنتیس رنز اسکور کئے۔
پاکستان نے مقررہ بیس اوورز میں چھ وکٹوں پر ایک سو چودہ رنزبنائے۔ جواب میں بنگلہ دیش ویمنز ٹیم ابتداء سے ہی مشکلات کا شکار رہی۔
جلد وکٹیں گرنے کے باعث مہمان ٹیم کے لئے ہدف حاصل کرنا مشکل ہوگیا۔ بنگلہ دیش کی ٹیم مقررہ اوورز میں سات وکٹوں پر اسی رنز ہی بناسکی۔
ندا ڈار اور سمیہ صدیقی نے دو دو وکٹیں حاصل کیں۔ بسمعہ معروف کو آل راونڈ کارکردگی پر سیریز کا بہترین کھلاڑی قرار دیا گیا۔
دبئی: آئی سی سی نے ویمنز کرکٹ کی ٹیم رینکنگ متعارف کرادی۔ پاکستان اکیاسی پوائنٹس کے ساتھ ساتویں نمبر پر ہے۔
آئی سی سی کا ویمنز کرکٹ کی بہتری کے لئے ایک اور اقدام۔ کونسل خواتین ٹیموں کی رینکنگ جاری کردی، آئی سی سی اعلامیہ کے مطابق ویمنز ٹیم رینکنگ تینوں فارمیٹ کی کارکردگی کا مدنظر رکھتے ہوئے جاری کی گئی ہے۔
ملٹی فارمیٹ سسٹم کے مطابق ٹیموں کو ٹیسٹ ون ڈے اور ٹی ٹوئنٹی کے میچز کھیلنے پر یکساں پوائنٹس دیے جائیں گے۔ تازہ رینکنگ کے مطابق آسٹریلیا ویمنز ٹیم ایک سو چونتیس پوائنٹس کے ساتھ پہلے نمبر پر ہے۔
انگلینڈ کا نمبر دوسرے ہے۔ نیوزی لینڈ تیسرے اور بھارت چوتھے نمبر براجمان ہے، پاکستان کا نمبر ساتواں ہے۔
قومی ٹیم کی کپتان ثنا میر کا کہنا ہے کہ ویمنز ٹیم رینکنگ جاری کرنا آئی سی سی کا اچھا اقدام ہے اس سے خواتین کرکٹ کی حوصلہ افزائی ہوگی۔
کراچی : پاکستان ویمنز ٹیم نے پہلے ٹی ٹوئنٹی میچ میں بنگلہ دیش کو انتیس رنز سے شکست دے کر دو میچز کی سیریز میں ایک صفر کی برتری حاصل کرلی۔
کراچی کے ساؤتھ اینڈ کلب میں کھیلے جانے والے میچ کا ٹاس پاکستان ویمنز ٹیم نے جیت کر پہلے بیٹنگ کرنے کا فیصلہ کیا۔
قومی ٹیم کو پہلے ہی اوور میں نقصان کا سامنا کرنا پڑا جب ایک رن پر مرینا اقبال آوٹ ہوگئیں۔ جویریہ خان اور بسمہ معروف نے ستاسی رنز کی شراکت قائم کی۔
جویریہ چوالیس رنز بناکر اسٹمپ ہوگئیں۔ پاکستان نے مقررہ بیس اوورز میں پانچ وکٹوں کے نقصان پر ایک سو چوبیس رنز بنائے۔
بسمہ معروف پینسٹھ رنز کے ساتھ ناقابل شکست رہیں۔ ہدف کے تعاقب میں بنگلہ دیش ویمنز ٹیم خاطر خواہ کارکردگی کا مظاہرہ نہ کرسکی اور مقررہ اوورز میں پچانوے رنز بناکر آوٹ ہوگئی۔
عائشہ رحمان اور فرگانہ حق تئیس تئیس رنز بناکر نمایاں رہیں۔ انعم امین نے دو، سمیہ صدیقی اور بسمہ معروف نے ایک ایک وکٹ حاصل کی۔
آل راؤنڈ کارکردگی پر بسمعہ معروف میچ کی بہترین کھلاڑی قرار پائیں۔
Post-Match ceremony #PAKWVBANW #BackOurGirls @BCBtigers pic.twitter.com/ve378bsMYb
— PCB Official (@TheRealPCB) September 30, 2015
Super fans during #PAKWVBANW #BackOurGirls pic.twitter.com/bw58Dnrnyq
— PCB Official (@TheRealPCB) September 30, 2015
Dugouts #PAKWVBANW #BackOurGirls @BCBtigers pic.twitter.com/GHfcKhfqyG
— PCB Official (@TheRealPCB) September 30, 2015
کراچی : پاکستان اور بنگلہ دیش کی ویمنز ٹیموں کے درمیان ٹی ٹوئنٹی سیریز کی ٹرافی کی رونمائی کردی گئی۔ دونوں ٹیموں کے درمیان پہلا میچ کل ساؤتھ اینڈ کلب میں کھیلا جائےگا۔
تفصیلات کے مطابق بنگلہ دیش کی ویمنز کرکٹ ٹیم دو ٹی ٹوئنٹی اور دو ون ڈے میچز کی سیریز کے لئے پاکستان کے دورہ پر کراچی پہنچ گئی ہے۔ دونوں ٹیموں کے درمیان ٹی ٹوئنٹی سیریز کا آغاز بدھ سے ہورہا ہے جس کی ٹرافی کی رونمائی کردی گئی۔
اس موقع پر پاکستان ویمنز ٹیم کی کپتان ثناء میر کا کہنا تھا کہ بنگلہ دیش کی ٹیم کو آسان حریف نہیں سمجھتے۔ سیریز میں کانٹے کا مقابلہ ہوگا۔
جبکہ بنگلہ دیشی کپتان سلمیٰ خاتون نے کہا کہ پاکستان آکر خوشی ہوئی جانتے ہیں پاکستان مضبوط ٹیم ہے اس لئے بھرپور تیاری کے ساتھ آئیں ہیں۔
دونوں ٹیموں نے سیریز کی تیاری کے لئے ساؤتھ اینڈ کلب میں بھرپور پریکٹس کی۔ سیریز کے لئے سیکیورٹی کے سخت انتظامات کئے گئے ہیں۔
لاہور: دورہ سری لنکا کیلئے قومی ٹیم کا غیر رسمی تریبتی کیمپ لاہور میں جاری ہے، پاکستان کرکٹ ٹیم کل کولمبو روانہ ہوگی۔
سری لنکا کیخلاف ٹیسٹ سریز کیلئے قومی ٹیم کا غیر رسمی تربیتی کیمپ قذافی اسٹیڈیم میں جاری ہے، مصباح الحق سمیت دس کھلاڑی پہلے سے ہی کیمپ میں پریکٹس کا حصہ ہے۔
اسکواڈ میں شامل دیگر پانچ کھلاڑی بھی آج کیمپ جوائن کرلیں گے، بیٹنگ، بولنگ اور فیلڈنگ کوچز کی زیر نگرانی قومی کھلاڑی گذشتہ تین روز سے نیٹ پریکٹس میں مصروف ہے۔
ہیڈ کوچ وقار یونس چھٹیاں منا کر آسٹریلیا سے وطن واپس پہنچ چکے ہیں، غیر رسمی کیمپ میں فزیکل فٹنس کے ساتھ کھلاڑیوں کی تکنیکی خامیوں کو دور کرنے کی کوشش کی جارہی ہے۔
تین ٹیسٹ میچز کی سیریز کیلئے قومی ٹیم کل کولمبو روانہ ہوگی، تین روزہ وارم اپ میچ گیارہ جون کو ہوگا۔ جبکہ ٹیسٹ سیریز کا آغاز سترہ جون سے گال میں ہوگا۔
ڈھاکا : بنگلہ دیش اور پاکستان کے مابین ڈھاکہ میں کھیلے جانے والے دوسرے ٹیسٹ میچ میں پاکستان نے اپنی گرفت مضبوط کرلی، پانچ سو پچاس رنز کے تعاقب میں بنگلہ دیش نے کھیل کے اختتام پر ایک وکٹ کے نقصان پر ترسٹھ رنز بنالئے۔
ڈھاکا ٹیسٹ کا تیسرا روز بھی شاہینوں کے نام رہا۔ میزبان ٹیم نے پہلی نامکمل اننگز پانچ کھلاڑی آؤٹ ایک سو سات رنز پر شروع کی تو یاسر شاہ اور وہاب ریاض نے بنگال ٹائیگرز کا ڈبہ دوسو تین رنز گول کردیا۔
تین سو چوون رنز کی برتری کے باوجود مصباح کی دفاعی کپتانی نے سب کو حیران کردیا۔ فالو آن کی بجائے خودبیٹنگ کرکے مصباح نے بنگلہ دیش کو اننگز سے شکست دینے کا آپشن ختم کردیا۔
پاکستان کی دوسری اننگز کا آغاز مایوس کن رہا، پروفیسر کھاتہ کھولے بغیر ہی پویلین لوٹ گئے۔ پہلی اننگز کے سنچری میکر یونس خان، اظہرعلی اور اسد شفیق خاطر خواہ کارکردگی نہ دکھاسکے۔
مصباح نے بیاسی رنز کی جارحانہ اننگز کھیلی۔ پاکستان نے دوسری اننگز چھ کھلاڑی آؤٹ ایک سو پچانوے رنز پر ڈیکلیئر کرکے بنگلہ دیش کو جیت کیلئے ساڑھے پانچ سو رنز کا ہدف دیا۔ تیسرے روز کھیل کے اختتام پر میزبان ٹیم نے ایک وکٹ پر ترسٹھ رنز بنالئے،قومی ٹیم کو جیت کیلئے نو وکٹیں درکار ہیں۔
ڈھاکہ ٹیسٹ کا دوسرا روز پاکستان کے نام رہا، پاکستان نے پہلی اننگز پانچ سو ستاون رنز پر ڈکلئیر کی اور پھر بولرز نے بنگلہ دیش کی آدھی ٹیم کو پویلین بھیج دیا، میزبان ٹیم کو فالو آن سے بچنے کے لئے دو سو اکیاون رنز درکار ہیں۔
ڈھاکا ٹیسٹ کے دوسرے روز پاکستان نے پہلی نامکمل اننگز تین سو تئیس رنز تین کھلاڑی آؤٹ سے دوبارہ شروع کی، کپتان مصباح الحق نو رنز پرپویلین واپس لوٹ گئے، اظہر علی اور اسد شفیق نے پراعتماد انداز سے اسکور میں اضافہ کیا اور پانچویں وکٹ پر دو سو سات رنز کی شراکت قائم کی۔
اظہر علی کیرئیر کی پہلی ڈبل سنچری بنانے میں کامیاب رہے اور دو سو چھبیس رنز بنا کر آؤٹ ہوئے،اسد شفیق نےایک سو سات رنز بنائے، پانچ سو ستاون رنز آٹھ کھلاڑی آؤٹ پر پاکستان کی اننگز ڈکلیئر کر دی گئی۔ تیجل السلام نے بنگلہ دیش کیجانب سے تین کھلاڑیوں کو آؤٹ کیا۔
جواب میں بنگلہ دیش کا آغاز مایوس کن رہا، پہلے ہی اوور میں جنید خان نے تمیم اقبال کو پویلین بھیجچ دیا جس کے بعد میزبان ٹیم کے مزید چار مہرے کھسکا کر میچ میں پوزیشن مستحکم کرلی۔
بنگلہ دیش کو پاکستان کی پہلی اننگز کی برتری ختم کرنے کے لئے مزید چار سو پچاس رنز درکار ہیں۔
کھلنا: پاکستان اور بنگلہ دیش کے درمیان پہلے ٹیسٹ میں میچ ریفری نے وہاب ریاض اور شکیب الحسن کے درمیان گرماگرمی کا نوٹس لے لیا، دونوں کھلاڑیوں پر میچ فیس کا تیس تیس فیصد جرمانہ عائد کردیاگیا۔
وہاب ریاض اور شکیب الحسن پہلے ٹیسٹ کے آخری روز گرما گرمی کا واقع ہوا، وہاب ریاض نے وکٹ نہ لینے کا سارا غصہ بنگلادیشی کھلاڑی پر نکال دیا،دونوں کے درمیان سخت جملوں کا تبادلہ ہوا، تو تو میں میں اتنی بڑھ گئی کہ دونوں کھلاڑیوں نے ایک دوسرے کو انگلیاں دکھانے لگے۔
کھلنا ٹیسٹ کے میچ ریفری جیف کرو نے رپورٹ کی روشنی میں دونوں پر میچ فیس کا تیس تیس فیصد جرمانہ لگادیا۔
ذرائع کے مطابق شکیب الحسن نے جنید خان کو چیٹر کہا جس پر وہاب ریاض آگ بگولہ ہوگئے اور شکیب پر برس پڑے، مصباح الحق نے معاملہ رفع دفع کرایا۔
وہاب ریاض پر اس سے قبل ورلڈ کپ کوارٹرفائنل میں بھی شین واٹسن سے نوک جھونک کا چارج لگاکر پچاس فیصد جرمانہ عائد کیا تھا۔