کولمبو : ٹیسٹ اور ون ڈے کے بعد شاہینوں نے سری لنکا کےشیروں کو ٹی ٹوینٹی سیریز میں بھی دھول چٹا دی، ٹی ٹوینٹی سیریز میں پاکستان نے سری لنکا کو دو صفر سے شکست دے دی۔
پاکستان نےعماد وسیم کے شاندار چھکے کی بدولت کولمبو میں دوسرا ٹی ٹوئنٹی ایک سنسی خیز مقابلے کے بعد ایک وکٹ سےجیت لیا اور دو میچوں کی سیریز دو صفر سے جیت لی۔
تفصیلات کے مطابق انورعلی کی تباہ کن بیٹنگ نے سری لنکا کوچاروں شانے چت کردیا، آل راونڈر انور علی نے تباہ کن بیٹنگ سے سری لنکا سے جیتی ہوئی بازی چھین لی۔
سری لنکا کے ایک سو بہتّر کے جواب میں پاکستانی ٹیم کا آغاز اچھا نہ رہا، دونوں اوپنرز تیسرے اوور میں سولہ کے مجموعی اسکور پر آؤٹ ہوگئے۔
احمد شہزاد اور مختار احمد کو بینورا فرنینڈو نے اپنا شکار بنایا، حفیظ گیارہ اور عمر اکمل چار رنز بنا کر رن آوٹ ہوئے۔ شعیب ملک بھی زیادہ رنز بنانے میں ناکام رہے اور صرف 8رنز بنا سکے اور پویلین جا بیھٹے۔
چالیس رنز پر پانچ وکٹیں گریں تو میچ ہاتھ سےجاتا نظر آیا پر شاھد آفریدی کی زور دارھٹنگ پاکستان کو میچ میں واپس لےآئی۔
شاہد خان آفریدی نے اکیس بولوں پر شاندار پینتالیس رنز بنائے،البتہ انور علی نے بھی پاکستان کے اسکور میں صرف سترہ بولوں پر شاندار چھیالیس رنز کا اضافہ کیا۔
اس سے قبل پاکستان اور سری لنکا کے درمیان کھیلے جانے والے دوسرے ٹی ٹوینٹی میچ میں سری لنکا نے ٹاس جیت کر بیٹنگ کا فیصلہ کیا۔
پاکستان کی طرف سے انور علی نے باؤلنگ کا آغاز کیا۔ پہلے اوور میں سری لنکا نے سات رنز بنائے جبکہ دوسرے اوور میں کوشال پریرہ نے روایتی انداز میں بیٹنگ کرتے ہوئے دو چوکے لگائے۔
سری لنکا کی پہلی وکٹ چوبیس کے سکور پر گری جب دلشان 10 رنز بنا کر انور علی کی گیند پر کیچ آؤٹ ہو گئے۔ سری لنکا کو 32 رنز پر دوسری وکٹ کا نقصان پریرہ کی صورت میں اٹھانا پڑا جب انہیں شعیب ملک نے کلین بولڈ کیا۔
سری لنکا کو 61 رنز پر تیسری وکٹ کا نقصان اٹھانا پڑا جب شاہد آفریدی نے سلوا کو 14 رنزپر آؤٹ کر دیا۔ مجموعی سکور میں تین رنز کے اضافے پر شعیب ملک نے تسارا پریرہ کو آؤٹ کیا اور وہ صرف ایک رن ہی بنا سکے۔
سری لنکا نے پانچویں وکٹ جے سوریا کی صورت میں گری جو عمدہ بیٹنگ کر رہے تھے اور 40 کے سکور پر سہیل تنویر کے ہاتھوں آؤٹ ہو گئے۔ 145 کے مجموعی اسکور پر سری لنکا کی چھٹی گری۔
کپو گیدرا 48 رنز بنا کر نمایاں رہے۔ پاکستان کی جانب سے شعیب ملک نے 2 جب کہ سہیل تنویر، شاہد آفریدی ، انور علی اور محمد عرفان نے ایک ایک وکٹ حاصل کی۔
میچ وننگ کارکردگی پر انور علی کو میچ کا بہترین کھلاڑی قرار دیا گیا۔
واضح رہے پہلے ٹی ٹوئنٹی میچ میں پاکستان نے سری لنکا کو 29 رنز سے شکست دی تھی۔
دو صفر کی کامیابی نے پاکستان کو ٹی ٹوئنٹی رینکنگ میں نمبر تین پر لا کھڑا کیا اور سری لنکا کا ٹیسٹ۔ ون ڈے اور ٹی ٹوئنٹی کا دورہ پاکستان کی کامیابی پر ختم ہوا۔
