ARYNews.tv | Urdu – Har Lamha Bakhabar

Tag: Pakistan Army

  • یومِ دفاع: پاک فوج کا بے نظیر، سراج رئیسانی اور بشیر بلور سمیت شہدا کو خراج عقیدت

    یومِ دفاع: پاک فوج کا بے نظیر، سراج رئیسانی اور بشیر بلور سمیت شہدا کو خراج عقیدت

    راولپنڈی: پاک فوج نے یومِ دفاع پر بے نظیر بھٹو، سراج رئیسانی اور بشیر بلور سمیت دیگر شہدا کو خراج عقیدت پیش کرنے کے لیے نئی ویڈیو جاری کر دی۔

    تفصیلات کے مطابق پاک فوج نے یومِ دفاع پر شہدا کو خراجِ عقیدت پیش کرنے کا نئے انداز سے عزم کر لیا، ’ہمیں پیار ہے پاکستان سے‘ مہم کے سلسلے میں ایک نئی ویڈیو جاری کر دی۔

    پاک فوج کے شعبۂ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے ایک نئی ویڈیو جاری کی ہے، جس میں پہلی بار ملک کے ان سیاست دانوں کو بھی خراجِ عقیدت پیش کیا گیا ہے جو دہشت گردوں کے حملوں میں شہید ہوئے۔

    آئی ایس پی آر کی جاری کردہ ویڈیو میں سابق وزیرِ اعظم بے نظیر بھٹو، بلوچستان عوامی پارٹی کے میر سراج خان رئیسانی، سابق صوبائی وزیر اور عوامی نیشنل پارٹی کے رہنما بشیر احمد بلور سمیت پولیس افسر چوہدری اسلم خان، ہنگو کے طالب علم اعتزاز حسن بنگش، سابق وزیرِ داخلہ پنجاب شجاع خان زادہ کو خراج عقیدت اور سلام پیش کیا گیا۔

    ’ہمیں پیار ہے پاکستان سے‘ کے نام سے یوم دفاع وشہداء منایا جائے گا ،ڈی جی آئی ایس پی آر

    آئی ایس پی آر نے قوم سے درخواست کی ہے کہ وہ 6 ستمبر یومِ دفاع و شہدا پر تمام شہدا کے گھر جا کر انھیں خراجِ عقیدت پیش کریں۔

    واضح رہے کہ ڈی جی آئی ایس پی آر نے گزشتہ روز کہا تھا کہ یومِ دفاع و شہدا 2018 پر قوم کے شہیدوں اور ان کے گھر والوں کو یاد کیا جائے گا۔

  • پاک فوج مون سون کے دوران ایک کروڑ پودے لگائے گی، ڈی جی آئی ایس پی آر

    پاک فوج مون سون کے دوران ایک کروڑ پودے لگائے گی، ڈی جی آئی ایس پی آر

    راولپنڈی: پاک فوج ارض وطن کو سرسبزوشاداب بنانے کیلئے میدان آگئی، پاک فوج مون سون کے دوران ایک کروڑ پودے لگائے گی جبکہ آرمی چیف کی زیرنگرانی آج 20 لاکھ پودے لگائے جائیں گے۔

    تفصیلات کے مطابق سبزوشاداب پاکستان کے تحت پاک فوج قومی شجرکاری مہم میں شامل ہوگئی ، ڈی جی آئی ایس پی آر میجر جنرل آصف غفور نے سماجی رابطے کی ویب سائٹ ٹوئٹر پر اپنے پیغام میں کہا کہ آرمی چیف جنرل قمر جاوید باجوہ آج بیس لاکھ پودے لگانے کے عمل میں شامل ہوں گے، ان کی اہلیہ بھی شجرکاری مہم کے تحت پودا لگائیں گی ، پاک فوج مون سون کے دوران ایک کروڑ پودے لگائے گی، اس شجرکاری مہم کو ‘سرسبز و شاداب پاکستان’ کا نام رکھا گیا ہے۔

    خیال رہے سرسبز پاکستان پروگرام کے تحت ملک بھر میں مون سون کی شجرکاری مہم جاری ہے، اس سال مو ن سون کے دوران قومی سطح پر چار کروڑ 71 لاکھ 40 ہزار پودے لگانے کا ہدف مقرر کیا گیا ہے۔

    ماحول کو بہتر بنانے، موسمیاتی تبدیلی کے منفی اثرات سے نمٹنے اور غربت کے خاتمے میں جنگلات کی اہمیت کواجاگر کرنے کیلئے باقاعدگی سے شجرکاری مہمات کا انعقاد کیا جاتا ہے۔

    واضح رہے کہ اے آر وائی کے پروگرام سرعام کی ٹیم اور رضا کاروں نے 71ویں یوم آزادی سے قبل ملک بھر میں چودہ لاکھ درخت لگانے کی مہم کا آغاز کیا تھا جس میں معروف شخصیات سمیت عوام نے بڑھ چڑھ کر حصہ لیا۔

  • پاک فوج کا اہم اقدام، جنوبی وزیرستان میں زرعی پارک کا قیام

    پاک فوج کا اہم اقدام، جنوبی وزیرستان میں زرعی پارک کا قیام

    وانا: پاک فوج کی جانب سے جنوبی وزیرستان میں ترقیاتی کام زور شور سے جاری ہے، مقامی زمینداروں اور آڑھتیوں کی معاشی حالت بہتر بنانے اور کاروبار کو وسعت دینے کے لیے افواجِ پاکستان کے تحت زرعی پارک کی تکمیل ہوگئی۔

    تفصیلات کے مطابق پاک فوج کی جانب سے وانا میں تعمیر کیا گیا زرعی پارک 128 دکانوں پر مشتمل ہے جبکہ اس میں 1 ہزار ٹن پھل اور سبزیوں کہ کولڈ اسٹوریج کی صلاحیت موجود ہے۔

    وزیرستان کے چلغوزے ملک بھر میں مشہور ہیں اور  ان کی خرید و فروخت سے سالانہ کروڑوں روپے کا کاروبار ہوتا ہے، زرعی پارک میں چلغوزے کی پراسسینگ کے لیے پلانٹ بھی لگایا گیا ہے۔ مقامی زمینداروں اور آڑھتیوں کو زرعی پارک میں ون ونڈو آپریشن کہ تحت تمام سہولیات میسر ہوں گی۔

    جنوبی وزیر ستان سے تعلق رکھنے والے زمینداروں اور آڑھتیوں نے زرعی پارک کے قیام پر پاک فوج کا شکریہ ادا کیا اور اس عزم کا اظہار کیا کہ پارک کے قیام سے افغانستان کہ ساتھ تجارت کو فروغ حاصل ہو گا اور کاروبار کو بھی مزید وسعت ملے گی۔ وانا میں تعمیر کیا گیا پارک پاکستان کا دوسرا بڑا زرعی پارک ہے جس کی تیاری میں 888 ملین روپے لاگت آئی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پرشیئر کریں۔

  • پاک فوج کا کامیاب آپریشن، 5 غیر ملکی بازیاب، والدین کا پاک فوج کوخراج تحسین

    پاک فوج کا کامیاب آپریشن، 5 غیر ملکی بازیاب، والدین کا پاک فوج کوخراج تحسین

    راولپنڈی: پاک فوج نے ایک اور شاندار کامیاب آپریشن کرتے ہوئے 5 غیر ملکی مغویوں کو بازیاب کروالیا جنہیں سنہ 2012 میں افغانستان سے اغوا کیا گیا تھا,مغویوں کے والدین نے اپنے پیاروں کی بازیابی پر پاک فوج کو خراج تحسین پیش کرتے ہوئے دل کی گہرائیوں سے شکریہ ادا کیا۔

    پاک فوج کے شعبہ تعلقات عامہ آئی ایس پی آر کے مطابق مغویوں میں کینیڈین شہری، اس کی امریکی اہلیہ اور 3 بچے شامل ہیں۔

    آئی ایس پی آر کے مطابق مغویوں کو سنہ 2012 میں افغانستان سے اغوا کیا گیا تھا۔ امریکی ایجنسیاں کئی سال سے یرغمالیوں کی تلاش میں تھیں۔ اس دوران امریکی حکام کی جانب سے اطلاع دی گئی تھی کہ مغویوں کو کرم ایجنسی منتقل کیا جارہا ہے۔

    پاک فوج کی کارروائی مغویوں کی افغانستان سے کرم ایجنسی منتقلی کے دوران پیش آئی۔

    آئی ایس پی آر کے مطابق بازیاب کروائے گئے یرغمالی مکمل طور پر محفوظ ہیں۔ کامیاب کارروائی امریکی اور پاک فوج کی بروقت انٹیلی جنس شیئرنگ کا نتیجہ ہے۔

    آئی ایس پی آر کا مزید کہنا تھا کہ پاک فوج دہشت گردی کے ناسور کے خلاف بھرپور کارروائی کرتی رہے گی۔

    دوسری جانب بازیاب ہونے والے کینیڈین شہری جوشوا کے والدین نے اپنے بیٹے، بہو اور پوتے پوتیوں کی باحفاظت بازیابی پر پاک فوج کیلئےدل کی گہرائیوں سے شکریہ ادا کرتے ہوئے کہا کہ پہلے بازیابی کی خبر ملی تو خوشی کا ٹھکانہ نہ تھا لیکن 20 منٹ بعد دوسری کال آئی تو جوشوا خود لائن پر تھا، 5 سال میں پہلی بار بیٹےکی آواز سنی تو بڑا سکون ملا۔

    جوشوا کی والدہ نے بتایا کہ بچے اپنے دادا اور دادی سے ملنے کے لئے بے چین ہیں اور ہم بھی اپنے پیاروں سے ملنے کے لیے بیتاب ہیں اور ہم ایک بار پھر کینیڈا میں پاکستان کے ہائی کمشنر کے ممنون ہیں اور بالخصوص پاک فوج کے بہادر سپاہیوں کے دل کی گہرائیوں سے شکر گزار ہیں جنہوں نے اپنی جان خطرے میں ڈال کر ہمارے پیارے بازیاب کیے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • پاک فوج کا بھارتی اشتعال انگیزی کا منہ توڑ جواب‘ 4 بھارتی فوجی ہلاک

    پاک فوج کا بھارتی اشتعال انگیزی کا منہ توڑ جواب‘ 4 بھارتی فوجی ہلاک

    راولپنڈی : پاک فوج نےایل او سی پر بھارتی اشتعال انگیزی کا بھرپور جواب دیتےہوئے 4 بھارتی فوجی ہلاک اور2بھارتی چوکیاں تباہ کردیں۔

    آئی ایس پی آرکی جانب سےجاری اعلامیے کےمطابق برہان وانی کی برسی پر بھارتی فوج نے ایل او سی کی خلاف ورزی کرتے ہوئے راولا کوٹ سیکٹر میں عام لوگوں کو نشانہ بنایا تھا جس کے نتیجے میں4 خواتین سمیت 5 افراد جاں بحق ہو گئے تھے۔

    آئی ایس پی آر کے مطابق پاک فوج نے بھارتی اشتعال انگیزی کا منہ توڑ جواب دیا،پاک فوج کی جوابی کارروائی میں 2 بھارتی چیک پوسٹیں تباہ اور4 بھارتی فوجی ہلاک ہوئے۔

    آئی ایس پی آر کی جانب سے بھارتی چوکیوں کو تباہ کرنے کی ویڈیو بھی جاری کی گئی ہے۔

    یاد رہےکہ حریت رہنماؤں نے برہان وانی کی پہلی برسی کے موقع پر بھارت کے خلاف بھرپور احتجاج کا اعلان کیا تھا جس کے بعد مقبوضہ کشمیر میں کرفیو نافذ کرتے ہوئے حریت رہنماؤں کو نظربند و گرفتار کیا گیا تھا۔

    برہان وانی و دیگر شہدا کی قربانی رائیگاں نہیں جائے گی: آرمی چیف

    واضح رہےکہ 8 جون کو آرمی چیف جنرل قمر جاوید باجوہ کا کہنا تھاکہ کشمیریوں کو حق خوداردیت حاصل ہے۔ برہان وانی سمیت دیگر شہدا کی قربانیاں رائیگاں نہیں جائیں گی۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • یوم پاکستان کی پریڈ کےکامیاب انعقاد پرفوجی جوانوں کو مبارکباد دیتاہوں‘ صدرمملکت

    یوم پاکستان کی پریڈ کےکامیاب انعقاد پرفوجی جوانوں کو مبارکباد دیتاہوں‘ صدرمملکت

    اسلام آباد: صدرمملکت ممنون حسین کا کہنا ہے کہ 23 مارچ کی پریڈ نے قوم کےجذبوں کوجلا بخشی ہے،شاندار پریڈ کےانعقاد پرفوجی جوانوں کومبارکباد پیش کرتا ہوں.

    تفصیلات کےمطابق صدرمملکت ممنون حسین نےکہاکہ افواج پاکستان نےہرمشکل وقت میں قوم کی خدمت کی ہے،انہوں نے23مارچ کی پریڈ کےشاندار انعقاد پر فوجی جوانوں کو مبارکباد پیش کی.

    صدرپاکستان نےکہاکہ پریڈ دفاعی استعداد کاراور نظم وضبط کی ایک مثال ہے،یہ پریڈ اس مظہرکی عکاس ہےکہ فوج ملک کے دفاع کے لیےسینہ سپر ہے.

    صدرمملکت نےکہا کہ پاکستان کی عزت اورسر بلندی کےلیےجذبے بلند رکھیں، پاک فوج کوجدید خطوط سے آراستہ کرکےدشمن کو زیرکیاجاسکتا ہے.

    انہوں نےکہاکہ حکومت مسلح افواج کو جدید حربی صلاحیت سے ہم آہنگ کرنے کےلیے پرعزم ہیں.

    صدر مملکت ممنون حسین نے ملک میں جاری فوجی آپریشن کے معتلق کہا کہ’ردالفساد‘دہشت گردی کے خلاف ہمارے عزم کو ظاہر کرتا ہے.

    مزید پڑھیں: پاک فضائیہ کے جوانوں‌ کا بہترین کارکردگی کا مظاہرہ

    واضح رہےکہ 23مارچ کی تقریب سے خطاب کرتے ہوئےصدر پاکستان کاکہناتھا کہ پاکستان گزشتہ کئی سال سے دہشت گردی کے خلاف لڑرہا ہے،پاک فوج اورعسکری و سیکیورٹی اداروں کی کوششوں سے امن کا قیام ممکن ہوا۔

  • لیفٹیننٹ جنرل نوید مختار ڈی جی آئی ایس آئی مقرر

    لیفٹیننٹ جنرل نوید مختار ڈی جی آئی ایس آئی مقرر

    راولپنڈی: آرمی چیف آف اسٹاف جنرل قمر باجوہ نے عسکری اداروں میں تبادلے و تقرریوں کا عمل مکمل کرتے ہوئے سابق کورکمانڈر کراچی لیفٹیننٹ جنرل نوید مختار کو آئی ایس آئی کا چیف مقرر کردیا۔

    تفصیلات کے مطابق جنرل راحیل شریف کی مدتِ ملازمت مکمل ہونے کے بعد آرمی کی کمان سنبھالنے والے نئے آرمی چیف جنرل قمر باجوہ نے فوج میں اعلیٰ سطح پر تقرریوں و تبادلوں کا کام مکمل کرلیا۔

    آرمی چیف آف اسٹاف نے سابق کورکمانڈر کراچی لیفٹیننٹ جنرل نوید مختار کو ڈی جی آئی ایس آئی کی ذمہ داریاں دینے کی منظوری دے دی جبکہ حال ہی میں میجر جنرل سے لیفٹیننٹ جنرل کے عہدے پر ترقی پانے والے سابق ڈی جی رینجرز سندھ بلال اکبر کو چیف آف جنرل اسٹاف تعینات کردیا گیا ہے۔

    معروف تجزیہ نگار ارشد شریف کے مطابق آرمی چیف کی جانب سے نامزد کردہ نئی افسران کی تقرریوں کا سلسلہ مکمل ہوگیا ہے اور ان ناموں سے معلوم ہوتا ہے کہ جنرل راحیل شریف کی جانب سے اعلان کردہ آپریشن اور پالیسیوں کا تسلسل جاری رہے گا۔

    بیورو چیف اسلام آباد صابر شاکر نے نئے ڈی جی آئی ایس آئی کی تقرری کو اچھی علامت قرار دیتے ہوئے کہا ہے کہ ’’پاک فوج کی جانب سے دہشت گردی اور کرپشن کے خلاف آپریشن اب مزید تیز ہوگا اور ملزمان کو کیفر کردار تک پہنچایا جائے گا‘‘۔

    اسی سے متعلق ’’ پاک فوج میں اعلیٰ سطح پر تقرریاں و تبادلے ‘‘

    قبل ازیں پاک فوج کے چیف نے 6 میجر جنرلز کو لیفٹیننٹ جنرلز کے عہدے پر ترقی دی گئی تھی جبکہ اعلیٰ سطح پر بھی تبادلے و تقرریاں  کی گئی ہیں، جس کے مطابق سابق ڈی جی آئی ایس آئی لیفٹیننٹ جنرل رضوان اختر کو صدر نیشنل ڈیفنس جبکہ لیفٹیننٹ جنرل بلال اکبر کو چیف آف جنرل اسٹاف تعینات کیا گیا ہے۔

    پاک فوج میں نئی تقرریوں و تبادلوں کے بعد لیفٹننٹ جنرل عاصم باجوہ کو انسپیکٹر جنرل آرمز جی ایچ کیو، سابق کورکمانڈر پشاور جنرل ہدایت الرحمان کو آئی جی ٹریننگ اینڈ ایویلیشن، لیفٹننٹ جنرل ہمایوں عزیز کو آئی جی سی این ٹی، لیفٹننٹ جنرل قاضی اکرام کو چیف آف لاجسٹک مقرر کیا گیا ہے۔

    علاوہ ازیں میجر جنرل سے لیفٹیننٹ جنرل بننے والے آئی جی ایف سی بلوچستان لیفٹیننٹ جنرل شیرافگن کو کورکمانڈر بہالپور‘ لیفٹیننٹ جنرل نعیم اشرف کو چیئرمین ایچ آئی ٹی جبکہ ترقی بانے والے لیفٹیننٹ جنرل محمد افضل بطور ڈی جی ایف ڈبلیو او کے عہدوں پر تعینات کیا گیا ہے۔

  • پاک فوج میں اعلیٰ سطح پر تقرریاں و تبادلے

    پاک فوج میں اعلیٰ سطح پر تقرریاں و تبادلے

    راولپنڈی: آرمی چیف جنرل قمر جاوید باجوہ کے تعینات ہونے کے بعد پاک فوج میں اعلیٰ سطح پر تقرری و تبادلوں کا سلسلہ جاری ہے، جس کے تحت ڈی جی آئی ایس آئی لیفٹیننٹ جنرل رضوان اختر کو صدر نیشنل ڈیفنس اور جنرل بلال اکبر کو چیف آف جنرل اسٹاف تعینات کردیا گیا ہے۔

    پاک فوج کے شعبہ تعلقات عامہ ( آئی ایس پی آر) کے مطابق پاک فوج میں اعلیٰٰ سطح پر تقرری و تبادلے کردیے گئے ہیں جس کے تحت ڈی جی آئی ایس آئی رضوان اختر کو صدر نیشنل ڈیفنس یونیو رسٹی تعینات کردیا گیا ہے جبکہ حال ہی میں میجر جنرل کے عہدے سے ترقی حاصل کرکے لیفٹیننٹ جنرل بننے والے سابق ڈی جی رینجرز بلال اکبر کو چیف آف اسٹاف تعینات کردیا گیا ہے۔

    پڑھیں: ’’ جنرل قمر جاوید باجوہ نے پاک فوج کی کمان سنبھال لی ‘‘

    پاک فوج کے شعبہ تعلقات عامہ (آئی ایس پی آر) کی جانب سے جاری کردہ اعلامیے میں کہا گیا ہے کہ سابق ڈی جی آئی ایس پی آر لیفٹیننٹ جنرل عاصم باجوہ کو انسپیکٹر جنرل آرمز جی ایچ کیو تعینات کردیا گیا ہے جبکہ کورکمانڈر پشاور کے عہدے پرجنرل ہدایت الرحمان کی جگہ لیفٹیننٹ جنرل نذیر بٹ کو ذمہ داریاں سونپ دی گئیں ہیں۔

    مزید پڑھیں: ’’ آئی ایس آئی نے قومی دفاع میں اہم کردار ادا کیا، قمر باجوہ ‘‘

    ترجمان پاک فوج کے مطابق سابق کورکمانڈر پشاور لیفٹیننٹ جنرل ہدایت الرحمان کو آئی جی ٹریننگ اینڈ ایویلیوایشن تعینات کردیا گیا ہے جبکہ لیفٹیننٹ جنرل ہمایوں عزیز کو آئی جی سی این ٹی آئی، لیفٹیننٹ جنرل قاضی اکرام کو چیف آف لاجسٹک مقرر کردیا گیا ہے۔

    اسی سے متعلق : ’’ لیفٹننٹ جنرل شاہد بیگ مرزا کورکمانڈر کراچی مقرر ‘‘

    میجر جنرل سے لیفٹیننٹ جنرل بننے والے آئی جی ایف سی بلوچستان لیفٹیننٹ جنرل شیرافگن کو کورکمانڈر بہالپور ‘ لیفٹیننٹ جنرل نعیم اشرف کو چیئرمین ایچ آئی ٹی جبکہ ترقی بانے والے لیفٹیننٹ جنرل محمد افضل بطور ڈی جی ایف ڈبلیو او اپنے امورسرانجام دیتے رہیں گے۔

  • پاک فوج نے 140 ممالک کو شکست دے کرطلائی تمغہ جیت لیا

    پاک فوج نے 140 ممالک کو شکست دے کرطلائی تمغہ جیت لیا

    ویلز: پاکستان کی افواج نے اقوامِ عالم کے درمیان میں ایک بار پھر اپنا لوہا مواتے ہوئے سالانہ عالمی ملٹری پٹرولنگ ایکسرسائز میں گولڈ میڈل اپنے نام کرلیا ہے۔

    تفصیلات کے مطابق برطانوی ریاست ویلز میں ہونے والی ’ ایکسرسائز کیمبرین پٹرول‘ کے نام سے ہونے والی مشقوں میں حصہ لینے والی پاک فوج کی ٹیم نےطلائی تمغہ حاصل کرلیا ہے۔

    کیمبرین پٹرول کا شمار دنیا کی مشکل ترین فوجی مشقوں میں ہوتا ہے جس میں حصہ لینے والے فوجیوں کو مشکل ترین حالات میں انتہائی دشواریوں کا سامنا کرنے کی مشقیں کرنا ہوتی ہیں۔

    ویلز آرمی نے اپنے ٹویٹ میں کہا ہے کہ ’’ پاکستان ایک بار پھر سرِ فہرست رہا ۔ ہر سال یہ پہلے سے زیادہ عمدہ پرفارمنس کا مظاہرہ کرتے ہیں ۔ ایک اور مشکل گزارطلائی تمغہ پاک فوج کے نام‘‘۔

    گزشتہ سال بھی دنیا کے 140 ممالک کو شکست دے کر پاکستانی فوج کی ٹیم‘ رائل نیوزی لینڈ آرمی کے ساتھ مشترکہ طور پر پہلے نمبر پر براجمان تھی جبکہ بھارت چاندی کا تمغہ جیت کر دوسرے نمبر پر تھا۔

    واضح رہے کہ یہ مشقیں دنیا بھر میں انتہائی اہم تصور کی جاتی ہیں جن میں 140 ممالک حصہ لیتے ہیں اور ان کا انعقاد ویلز ہیڈ کوارٹر اور 160 انفنٹری بریگیڈ کی جانب سے کیا جاتا ہے۔کیمبرین پٹرول نامی ان مشقوں کا آغاز دور دراز کے علاقوں میں حملہ کرنے والے فوجیوں کی استعداد بہتر بنانے کے لیے 1959 میں کیا گیا تھا۔

  • پاک فوج نے ’’یوٹیوب چینل‘‘ لانچ کردیا

    پاک فوج نے ’’یوٹیوب چینل‘‘ لانچ کردیا

    راولپنڈی:  پاک فوج کے شعبہ تعلقات عامہ (آئی ایس پی آر) نے سائبر ورلڈ میں نیا سنگین میل عبور کرتے ہوئے آفیشل یو ٹیوب چینل لانچ کردیا۔ اب پاک فوج سے متعلق تازہ ترین ویڈیوز، ملکی اور دفاعی نغمے آپ سے صرف ایک کلک کی دوری پر ہوں گے۔

    تفصیلات کے مطابق فیس بک پر پیجز سے ابتدا اور پھر وہاں سے ٹوئٹر تک کا سفر پاک فوج کے لیے آسان نہ تھا تاہم عوام کی محبت اور پاک افواج کے میڈیا ونگ کی کاوشوں نے یہ سفر کامیاب بنا دیا، انہیں کامرانیوں اور بدلتے وقت کے ساتھ خود کو ڈھالنے اور معلومات کے بہتے دریا میں پیش پیش رہنے کے لیے پاک فوج کے شعبہ تعلقات عامہ (آئی ایس پی آر) اور سائبر ونگ کی جانب سے یوٹیوب پر اب آئی ایس پی آر کا آفیشل چینل بھی لانچ کردیا گیا ہے۔

    یوٹیوب چینل پر آرمی چیف، پاک فوج، آپریشن، آئی ایس پی آر پروڈکشن کی وڈیوز اور دیگر مواد موجود ہے۔ چینل کے لانچ ہوتے ہی عوام کی بڑی تعداد نے آئی ایس پی آر کے اس اقدام کو سراہا اور مختصر وقت میں ہی ہزاروں افراد نے اس تک رسائی حاصل کرتے ہوئے سبسکرائب کرلیا۔

    اب پاکستانی عوام سمیت دنیا بھر کو سرحدی تنازع، آرمی چیف کے پیغامات، مختلف دوروں کی تفصیلات یا پھر آرمی کی کامیاب کارروائی کے لیے ادھر اُدھر نہیں جانا پڑے گا۔

    انٹر نیٹ نے جہاں لوگوں کی زندگی آسان بنائی ہے، وہی مختلف زاویوں سے پیدا کردہ جدت نے لوگوں کو اپنی جانب غیر معمولی انداز میں متوجہ بھی کیا ہے،موجودہ ترقیاتی یافتہ دور میں جہاں صرف سرحدوں ہی نہیں بلکہ انٹرنیٹ اور سوشل میڈیا پر بھی لڑی جاتی ہیں،انٹرنیٹ پر جاری سائبر وار، میڈیا وار نے دورِ حاضر میں جنگوں کے روایتی اصولوں کو ہر لحاظ سے تبدیل کردیا ہے۔

    واضح رہے کہ قبل ازیں فیس بک اور ٹوئٹر پر بھی پاک افواج، ڈی جی آئی ایس پی آر اور آئی ایس پی آر کے آفیشل پیجز موجود ہیں تاہم عوام کو پاک فوج کی کارروائیوں کے حوالے سے رسائی دینے کے لیے اس چینل کا باقاعدہ اعلان کیا گیا ہے۔