Tag: pakistan Day

  • یومِ پاکستان تجدید عہد وفا کا دن ہے، صادق سنجرانی

    یومِ پاکستان تجدید عہد وفا کا دن ہے، صادق سنجرانی

    اسلام آباد : چیئرمین سینیٹ صادق سنجرانی کا کہنا ہے کہ پاکستان کا قیام جنوبی ایشیا میں پائیدار امن کی ضمانت تھا، یوم پاکستان تجدید عہد وفا کا دن ہے، اختلافات بھلاکر تعمیروترقی کیلئے ملی اتحاد کا مظاہرہ کرنا ہوگا۔

    تفصیلات کے مطابق یوم پاکستان کےحوالے سے چیئرمین سینیٹ صادق سنجرانی نے اپنے پیغام میں کہا کہ 23 مارچ قومی تاریخ کا ایک ناقابل فراموش دن ہے، پاکستان کا قیام جنوبی ایشیا میں پائیدار امن کی ضمانت تھا۔

    صادق سنجرانی کا کہنا تھا کہ یوم پاکستان تجدید عہد وفا کا دن ہے، اختلافات بھلاکرتعمیر وترقی کیلئے ملی اتحاد کا مظاہرہ کرنا ہوگا، ملک کی حفاظت ہمارا قومی فریضہ ہے۔

    چیئرمین سینیٹ نے کہا قوم کوملکی استحکام کی خاطر متحد ہونا ہو گا، وفاق کی مضبوطی کیلئے تمام سیاسی قوتوں کو ذمے داریاں پوری کرنا ہوں گی، جمہوریت کے استحکام کیلئے تمام اداروں کو مشترکہ کاوشیں کرناہوں گی۔

    یومِ پاکستان ہمیں تحریک پاکستان کی قربانیوں کی یاددلاتاہے، ڈپٹی چیئرمین سینیٹ


    دوسری جانب ڈپٹی چیئرمین سینیٹ سلیم مانڈوی والا نے یوم پاکستان پر اپنے پیغام میں کہا کہ یوم پاکستان ہمیں تحریک پاکستان کی قربانیوں کی یاددلاتاہے، ہمارے آباؤ اجداد نے کئی قربانیوں کے بعد پاکستان حاصل کیا۔

    سلیم مانڈوی والا کا کہنا تھا کہ قیام پاکستان کامقصدہرشہری کویکساں حقوق فراہم کرناتھا، قائداعظم نےپہلی تقریرمیں ہی پاکستانی ریاست کامقصدواضح کردیاتھا، یہاں مذہب، رنگ نسل اورمرتبےکی بنیادپرکوئی فرق نہیں ہوناچاہئے، امیراورغریب کے لیے الگ الگ قانون نہیں ہوناچاہئے۔

    خیال رہے کہ ملک بھر میں یوم پاکستان جوش وجذبے سےمنایا جا رہا ہے، 23 مارچ 1940 کو لاہور کے منٹو پارک میں مسلم لیگ نے برصغیر سے علیحدگی کے لیے قرار داد پیش کی تھی، جس میں مطالبہ کیا گیا تھا کہ مسلمانوں کے لیے علیحدہ ملک قائم کیا جائے کیونکہ ہندو اور مسلم علیحدہ نظریات کی حامل اقوام ہیں۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • اللہ تعالٰی ہمیں حضرت عمر خطاب جیسے حکمران سے نوازے، چیف جسٹس

    اللہ تعالٰی ہمیں حضرت عمر خطاب جیسے حکمران سے نوازے، چیف جسٹس

    لاہور : چیف جسٹس ثاقب نثار کا کہنا ہے کہ اللہ کا شکر  ہے آج ہم ایک آزاد قوم ہیں، قائداعظم اور علامہ اقبال کو سلام پیش کرتے ہیں، اللہ تعالٰی ہمیں حضرت عمر خطاب جیسے حکمران سے نوازے، دعاکریں ایسا لیڈر  ملے جو خود  اپنے لیے بھی اصول نافذکرے۔

    تفصیلات کے مطابق لاہور میں کیتھیڈرل چرچ میں چیف جسٹس آف پاکستان جسٹس ثاقب نثار نے تقریب سے خطاب کرتے ہوئے کہ بد نصیب ہیں وہ قومیں جن کا اپنا وطن نہیں ہوتا، میری قوم خوش نصیب ہے کیونکہ ہماراملک پاکستان ہے، اپنی سگی ماں سے بڑھ کر ملک کی عزت کرنی چاہیے۔

    چیف جسٹس کا کہنا تھا کہ میراپیغام ہے کہ تعلیم حاصل کریں اورملک کانام روشن کریں، اللہ کاشکر ہے آج ہم ایک آزاد قوم ہیں، قائداعظم ، علامہ اقبال اور ان ہستیوں کو سلام پیش کرتے ہیں جن کی جدوجہد اور قربانیوں کے باعث ملک وجود میں آیا۔

    جسٹس ثاقب نثار نے کہا کہ محکوم ہونا اور آزاد ی سے محروم ہونا بدنصیبی ہے، آزادی کی حفاظت کرنابہت اہم ہے، آزادی کاتحفظ اصولوں کی جدوجہد پر ہوتا ہے، آج ہمیں دنیا کو ایک قوم بن کر دکھانا ہے۔

    انکا کہنا تھا کہ ملک کی آزادی برقراررکھنی ہےتوتعلیم لازمی ہے، تعلیم کے ساتھ کوالٹی لیڈر شپ ہونی چاہیئے، اللہ ہمیں حضرت عمر خطاب جیسے حکمران سے نوازے، دعاکریں ایسالیڈرملےجوخود اپنےلیےبھی اصول نافذکرے، جب بہترین لیڈرآئے گا تو اس ملک کی تقدیر بدل جائے گی۔

    چیف جسٹس آف پاکستان نے کہا کہ ملک میں بلاتفریق انصاف کی ضرورت ہے، پاکستان کی اقلیت عدلیہ کی جان ہےتحفظ ہماری ذمہ داری ہے، اس ملک کوآئین اورقانون کےمطابق چلنا ہے، پاکستان میں جمہوریت کو ڈی ریل نہیں ہونے دیں گے۔

    جسٹس ثاقب نثار کا قسم کھاتے ہوئے کہنا کہ ملک میں جمہوریت کو کوئی نقصان نہیں ہے، جوڈیشل مارشل لاء کی کوئی گنجائش ہے نہ جوڈیشل مارشل لاء لگے گا، صرف جمہوریت، جمہوریت اور بس جمہوریت ہو گی۔

    انھوں نے مزید کہا کہ ہمارے دور میں اسکول میں بہنوں کا احترام کیا جاتا تھا، اسکول میں ہر دو مہینے بعد پرنسپل کے سامنے پیشی ہوتی تھی، شرارت کھل کر کرو لیکن دل سے پڑھو۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • یومِ پاکستان: گورنر، وزیر اعلیٰ سندھ  کی مزار قائد پر حاضری

    یومِ پاکستان: گورنر، وزیر اعلیٰ سندھ کی مزار قائد پر حاضری

    کراچی : یوم پاکستان کے موقع پر گورنر، وزیراعلیٰ سندھ، میئر کراچی اور مسلح افواج کے نمائندوں نے مزار قائد پر حاضری دی، فاتحہ خوانی کی اور پھول چڑھائے۔

    تفصیلات کے مطابق ملک بھر میں یوم پاکستان جوش وجذبے سےمنایا جا رہا ہے، یوم پاکستان پر بابائے قوم کو خراج عقیدت پیش کرنے کیلئے گورنرسندھ محمد زبیر ، وزیر اعلی سندھ مراد علی شاہ ، میئر کراچی وسیم اختر، صوبائی کابینہ کے ارکان اور مسلح افواج کےنمائندوں نے مزار قائد پر حاضری دی، پھولوں کی چادر چڑھائی اور فاتحہ خوانی کی۔

    اس موقع پر میڈیا سے گفتگو کرتے ہوئے گورنر سندھ محمد زبیر نے کہا کہ یوم پاکستان اس مرتبہ بھی جوش وخروش سے منایا جارہا ہے، آج قائداعظم کے احکامات پر عمل پیرا ہونے کے عہد کا دن ہے، خوشحال پاکستان کے خواب کوعملی جامہ پہنانے کے لئےمل کر کام کرناہوگا۔

    گورنر سندھ کا کہنا تھا کہ کراچی میں امن کی بحالی کیلئے بہت کام ہوا، قانون نافذ کرنے والے ادارے امن کی بحالی کیلئے کردار ادا کررہے ہیں، امن کی بحالی کی وجہ سے پی ایس ایل کا فائنل کراچی میں ہورہا ہے۔

    وزیراعلی سندھ مراد علی شاہ نے کہا کہ یوم پاکستان پر مزارقائد پر حاضری کیلئے آئےہیں، آج پھر تمام پاکستانی ملک کی ترقی کیلئےعہد کریں، پاکستان کے لیے سب کو اپنا کردار ادا کرنا ہے، متحد ہوکر ملک کو امن کا گہوارہ بنائیں گے۔


    مزید پڑھیں : یوم پاکستان پرپریڈ گراؤنڈ میں مسلح افواج کی مشترکہ پریڈ


    مرادعلی شاہ کا کہنا تھا کہ2018 انتخابات کاسال ہے، متحدہ مجلس عمل کی بحالی کاخیرمقدم کرتے ہیں ، راؤانوار کی گرفتاری اورآئی جی کی تبدیلی کا کوئی تعلق نہیں۔

    دوسری جانب لاہور میں مصور پاکستان علامہ اقبال کے مزار پر گارڈزتبدیلی کی پروقار تقریب ہوئی، پاک فضائیہ کے دستے نے مزار اقبال پر اعزازی گارڈز کے فرائض سنبھال لئے، پنجاب رینجرز کے جوانوں نے مزار اقبال پر سلامی پیش کی۔

    پاک فضائیہ کے ایئرکموڈور سید صباحت حسن مہمان خصوصی تھے، انھوں نے مزار اقبال پر پھول چڑھائے اور فاتحہ خوانی کی اور مہمان خصوصی نے مہمانوں کی کتاب میں تاثرات قلم بند کیے۔

    اس موقع پر سیکیورٹی کے سخت انتظامات کئے گئے تھے۔

    یاد رہے 23 مارچ 1940 کو لاہور کے منٹو پارک میں مسلم لیگ نے برصغیر سے علیحدگی کے لیے قرار داد پیش کی تھی، جس میں مطالبہ کیا گیا تھا کہ مسلمانوں کے لیے علیحدہ ملک قائم کیا جائے کیونکہ ہندو اور مسلم علیحدہ نظریات کی حامل اقوام ہیں۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • مینارِپاکستان – قراردادِپاکستان کی یادگار

    مینارِپاکستان – قراردادِپاکستان کی یادگار

    پاکستان کے قلب لاہور میں واقع مینارپاکستان ملک کی ایک اہم قومی یادگار ہے جسے لاہور میں عین اسی جگہ تعمیرکیا گیا ہے جہاں 23 مارچ 1940ء میں قائد اعظم محمد علی جناح کی صدارت میں منعقدہ آل انڈیا مسلم لیگ کے اجلاس میں تاریخی قرارداد پاکستان پیش کی گئی تھی۔

    مینارِ پاکستان کو یادگارِپاکستان بھی کہا جاتا ہے۔ آج اقبال پارک کے نام سے یاد کیا جانے وال یہ پارک برطانوی دورِ حکومت میں منٹو پارک کہلاتا تھا۔

    تعمیر

    مینارکی تعمیرکے لیے 1960ء میں اس وقت کے صدر فیلڈ مارشل ایوب خان نے ایک کمیٹی تشکیل دی جس کی منظور کردہ سفارشات اورڈیزائن پراس مینارکی تشکیل ہوئی تھی۔

    مینارکا ڈیزائن ترک ماہرتعمیرات نصرالدین مرات خان نے تیار کیا تھااورتعمیر کا کام میاں عبدالخالق اینڈ کمپنی نے 23 مارچ 1960ء میں شروع کیا۔ 21 اکتوبر 1968ء میں اس کی تعمیر مکمل ہوئی۔ اس کی تعمیر کی کل لاگت 75 لاکھ روپے تھی۔

    تعمیر سے تکمیل تک

    خصوصیات

    یہ 18 ایکڑرقبے پرمحیط ہے۔ مینار کی بلندی 196 فٹ ہے اورمینار کے اوپر جانے کے لیے 324 سیڑھیاں ہیں جبکہ جدید لفٹ بھی نصب کی گئی ہے۔

    مینارکا نچلا حصہ پھول کی پتیوں سے مشہابہت رکھتا ہے اوراس کی سنگِ مرمر کی دیواروں پرقرآن کی آیات، قائد اعظم محمد علی جناح اورعلامہ محمد اقبال کے اقوال اور برصغیر کے مسلمانوں کی آزادی کی مختصرتاریخ کندہ ہے۔ اس کے علاوہ قراردادِ پاکستان کا مکمل متن بھی اردو اوربنگالی دونوں زبانوں میں مینارکی دیواروں پرکندہ کیا گیا ہے۔

    مینار کے اندرونی مناظر

    پاکستان کے محسن فنکار

    مینار پرجو خطاطی کی گئی ہے وہ حافظ محمد یوسف سدیدی، صوفی خورشید عالم، محمد صدیق الماس رقم، ابن پروین رقم اور محمد اقبال کی مرہونِ منت ہے

    حفیظ جالندھری کا مزار

    مینار پاکستان کے احاطے میں پاکستان کے قومی ترانے کے خالق حفیظ جالندھری کا مزاربھی ہے۔

    قومی ترانے کے خالق حفیظ جالندھری کی آخری آرام گاہ

    مینار کا محلِ وقوع

    مینار پاکستان کے اردگرد واقع اقبال پارک انتہائی خوبصورت سبزہ زار، فواروں، راہداریوں اورایک جھیل سے مزین ہے۔

    مینارِپاکستان قومی اور سیاسی سرگرمیوں کا انتہائی اہم مرکز ہے اور پاکستان کے عوام اسے اپنی قومی شناخت کی علامتوں میں سے ایک علامت بھی سمجھتے ہیں۔

  • یوم پاکستان پرپریڈ گراؤنڈ میں مسلح افواج کی مشترکہ پریڈ

    یوم پاکستان پرپریڈ گراؤنڈ میں مسلح افواج کی مشترکہ پریڈ

    اسلام آباد : ملک بھرمیں یوم پاکستان ملی جوش و جذبے سے منایا جا رہا ہے، وفاقی دارالحکومت میں دن کا آغاز اکتیس اور صوبائی دارالحکومتوں میں اکیس، اکیس توپوں کی سلامی سے ہوا۔

    تفصیلات کےمطابق پاکستانی قوم آج یومِ پاکستان آج جوش وخروش سےمنارہی ہے۔ دن کاآغازوفاقی دارالحکومت میں اکتیس اور صوبائی دارالحکومتوں میں اکیس اکیس توپوں کی سلامی کے ساتھ ہوا۔

    یوم پاکستان پرمساجد میں نمازِفجر کے بعد ملکی ترقی خوشحالی اوریکجہتی کے لیے خصوصی دعائیں کی گئیں۔


    یوم پاکستان کی پروقارتقریب اورفوجی پریڈ


    اسلام آباد کے شکرپڑیاں پریڈ گراؤنڈ کے مقام پر شاندار فوجی پریڈ کا انعقاد کیا گیا، پریڈ میں تینوں مسلح افواج کے چاک وچوبند دستوں نے شاندار پرفارمنس کا مظاہرہ کیا۔

    یوم پاکستان کی مرکزی تقریب میں صدر مملکت ممنون حسین، وزیراعظم شاہد خاقان عباسی، تینوں افواج کے سربراہان، چیئرمین جوائنٹ چیفس آف اسٹاف کمیٹی جنرل زبیرمحمود حیات سمیت دیگرسول وعسکری حکام نے شرکت کی۔


    مکمل پریڈ – اسٹوری کے آخر میں


    سری لنکا کے صدرمتھری پالا سری سینا بطور مہمان خصوصی یوم پاکستان کی مرکزی تقریب میں شریک ہیں جبکہ متحدہ عرب امارات کے فوجی دستے نے پہلی مرتبہ تقریب میں شرکت کی۔

    پریڈ کے مہمان خصوصی صدر مملکت ممنون حسین صدارتی بَگھی پرسوار ہوکر پریڈ گراؤنڈ پہنچے، جہاں وزیر اعظم اور تینوں مسلح افواج کے سربراہان نے ان کا استقبال کیا۔

    یوم پاکستان کی تقریب کا باقاعدہ آغاز قومی ترانے سے کیا گیا جس کے بعد صدر ممنون حسین نے جیپ میں سوارہوکرمسلح افواج کے دستوں کا معائنہ کیا۔


    ایئر چیف مارشل کا شاندار فلائی پاسٹ


    ایئر چیف مارشل مجاہد انور نے شاندار فلائی پاسٹ کا مظاہرہ کرتے ہوئے صدر مملکت ممنون حسین کو سلامی دی۔ انہوں نے ایف 16 طیارے میں فلائی پاسٹ کا مظاہرہ بھی کیا۔

    ایئرچیف مارشل کی جانب سے فلائی پاسٹ کے بعد پاک فضائیہ کے جیٹ طیاروں نے صدر مملکت ممنون حسین کو سلامی دی اور شاندار فلائی پاسٹ کا مظاہرہ کیا۔


    صدرپاکستان کا فوجی پریڈ سے خطاب


    صدرممنون حسین نے یوم پاکستان کی تقریب سے خطاب کرتے ہوئے کہا کہ ہماری تاریخ میں 23 مارچ جیسا کوئی دن نہیں ہے، اس دن قوم نے بیرونی تسلط سے آزاد ہونے کا فیصلہ کیا، ہم شہیدوں اورغازیوں کو خراج تحسین پیش کرتے ہیں۔

    صدر مملکت نے سری لنکا کے صدرمتھری پالا سری سینا کو خوش آمدید کہا اور اس کے ساتھ اردن اورترکی کے فوجی دستوں کی پریڈ میں شرکت پر ان کا خیرمقدم کیا۔

    صدرممنون حسین نے تقریب سے خطاب کرتے ہوئے کہا کہ خطے میں امن اورسلامتی کے مخالفین کو خیرسگالی کا پیغام دیتے ہیں، اس پیغام کوہماری کمزوری سمجھنا غلطی ہوگا۔

    انہوں نے کہا کہا کہ افغانستان میں امن کے لیے پاکستان نے تاریخ سازکردارادا کیا، ہم دیگرشراکت داروں کے ساتھ امن کے لیے اپنا کردارادا کرتے رہیں گے۔

    صدرمملکت ممنون حسین نے بھارت کوخبردارکرتے ہوئے کہا کہ تحریک آزادی کشمیرکو دبانا چھوڑ دے، پاکستان کشمیریوں کے جائزحق کے لیے اپناکردارادا کرتا رہے گا۔

    صدرممنون حسین نے کہا کہ آپریشن ضرب عضب اور ردالفساد نے دہشت گردی کا مقابلہ عزم سے کیا، دہشت گردی کے خلاف قربانیاں دینے والوں کے لیے تمغہ عزم کا اعلان کرتا ہوں۔

    انہوں نے کہا کہ دہشت گردی کےخلاف کامیابیوں کا تسلسل ضروری ہے تاکہ یہ سرنہ اٹھا سکے، یہ امرقابل اطمینا ن ہے ادارے اپنی ذمے داریاں پوری کررہے ہیں۔

    صدرمملکت ممنون حسین نے پریڈ کے شاندارانعقاد پرمسلح افواج اور ضلعی انتظامیہ کومبارکباد پیش کی۔ انہوں نے کہا کہ یہ شاندارپریڈ ہمارے خوابوں کی تعبیرہے۔

    انہوں نے کہا کہ امید ہے مسلح افواج اپنی آئینی ذمے داریاں احسن طریقے سے پوری کرتے رہیں گے، ہمارے جمہوری ادارے فعال ہیں اوراپنا آئینی کردارادا کررہے ہیں، منتخب جمہوری حکومتوں کا مدت پوری کرنا قابل اطمینان ہے۔

    صدر مملکت ممنون حسین نے کہا کہ ہمسایہ ملک اپنی طاقت میں مسلسل اضافہ کررہا ہے، جارحانہ عزائم سے خطے کے امن کوخطرات لاحق ہیں۔


    غیرملکی مسلح افواج کی سلامی


    یوم پاکستان کی تقریب میں پہلی بار متحدہ عرب امارات کے مسلح افواج کے دستے نے شرکت کی، متحدہ عرب امارات کے دستے نے صدرممنون حسین کوسلامی دی۔

    متحدہ عرب امارات کا دستہ اپنا قومی پرچم تھامے سلامی چبوترے کے سامنے سے گزرا جس کی قیادت خالد حامد کررہے ہیں۔

    یواے ای کے دستے کے بعد اردن کے مسلح افواج کے دستے نے بھی سلامی دی، اردن کے عسکری بینڈ نے جیوے جیوے پاکستان کی دھن بجا کر خراج تحسین پیش کیا۔


    چاروں صوبوں کی ثقافت کا عکس


    یوم پاکستان کی پریڈ میں پاکستان کے چاروں صوبوں پنجاب، سندھ، خیبرپختونخوا اور بلوچستان سمیت گلگت بلتستان اور آزاد کشمیر کی روایتی ثقافتی پریڈ بھی پیش کی گئی۔

    چاروں صوبوں کی جانب سے پیش کی جانے والی ثقافتی پریڈ میں جہاں علاقائی ثقافت کو پیش کیا گیا، وہیں صوبے کےمشہور اور تاریخی جگہوں کے ماڈل بھی پیش کیےگئے۔


    پاک فضائیہ کے طیاروں کا شاندار فضائی مظاہرہ


    پریڈ کے دوران فخرپاکستان جےایف 17 تھنڈرطیاروں کا شاندارفضائی مظاہرہ کیا اور اس کے ساتھ پاک فضائیہ کےایف 16 طیاروں نے فلائی پاسٹ کیا۔

    پاک فضائیہ کے طیاروں نے مظاہرے کے دوران فضائوں میں لہراتے ہوئے رنگ بکھیرے اور پریڈ اوینیو سے باہر اور ہزاروں کلو میٹرز کی بلندی تک مظاہرہ کیا۔


    یوم پاکستان پر 141 نامور شخصیات کے لیے سول ایوارڈز کا اعلان


    ایوان صدر میں شام کو تقسیم اعزازات کی تقریب منعقد ہوگی جہاں صدرممنون حسین مختلف شعبوں میں نمایاں کارکردگی کا مظاہرہ کرنے والی شخصیات کو اعزازات اور تمغے دیں گے۔

    واضح رہے کہ رواں سال مجموعی طور پر 141 پاکستانیوں اور غیرملکی شخصیات کو سول اعزازات دیے جائیں گے جن میں کیوبا کے سابق صدر فیڈل کاسترو کو نشان پاکستان جبکہ انسانی حقوق کی علمبردار مرحومہ عاصمہ جہانگیر کو نشان امتیازدیا جائے گا۔


    یوم پاکستان 2018 کی مکمل پریڈ دیکھیں


     


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • یوم پاکستان پرصدرپاکستان اور وزیراعظم کا پیغام

    یوم پاکستان پرصدرپاکستان اور وزیراعظم کا پیغام

    اسلام آباد : صدر پاکستان ممنون حسین اور وزیراعظم شاہد خاقان عباسی نے یوم پاکستان پر اپنے پیغام میں کہا کہ پاکستان کی ترقی اوراستحکام کا رازجمہوریت میں پوشیدہ ہے۔

    تفصیلات کےمطابق ملک بھرمیں یوم پاکستان ملی جوش و جذبے سے منایا جا رہا ہے، اسلام آباد میں دن کا آغاز اکتیس اور صوبائی دارالحکومتوں میں اکیس،اکیس توپوں کی سلامی سے ہوا۔

    صدرمملکت نے یوم پاکستان کے پروقار موقع پر قوم کے نام اپنے پیغام میں کہا ہے کہ 23 مارچ ہماری تاریخ میں سنگ میل کی حیثیت رکھتا ہے، قرارداد لاہور نے برصغیر کے مسلمانوں کو عظیم مقصد کے لیے متحد کیا۔

    صدرممنون حسین نے کہا کہ قائد اعظم محمد علی جناح، علامہ اقبال اور تحریک آزادی کے قائدین کی قربانیوں سے حصول پاکستان کی راہ ہموار ہوئی۔

    انہوں نے کہا کہ گزشتہ چند دہائیوں میں دہشت گردی نے خطے اور پاکستان کوبری طرح متاثرکیا، خوشی ہے کہ پوری قوم نے یکجان ہوکردہشت گردی کا مقابلہ کیا، دہشت گردی کے خاتمے سے ملک میں امن وامان بحال ہوچکا ہے۔

    صدرِ پاکستان نے اپنے پیغام میں کہا کہ پاکستانی معیشت ترقی کی راہ پرگامزن ہے، اقتصادی راہداری سمیت دیگر منصوبے ترقی کے واضح ثبو ت ہیں۔

    انہوں نے کہا کہ آج کے دن ہمیں اس عہد کی تجدید کرنا ہوگی کہ ہم بزرگوں کے نقشے قدم پر چلتے ہوئے پاکستان کو عظیم ترملک بنائیں گے، دعا ہے اللہ تعالیٰ پاکستان کوترقی وخوشحالی کی راہ پرگامزن کرے۔

    صدرمملکت نے مزید کہا کہ پاکستان کی ترقی اور استحکام کا راز جمہوریت میں پوشیدہ ہے، جمہوری روایات سے رواداری، ہم آہنگی اور برداشت کو فروغ ملے گا۔


    یوم پاکستان پر وزیراعظم کا پیغام


    دوسری جانب یوم پاکستان کے موقع پر وزیراعظم شاہد خاقان عباسی نے اپنے پیغام میں کہا کہ یوم پاکستان 78سال پہلے کے عظیم دن کی یاد دلاتا ہے، 23 مارچ 1940 کو مسلمانوں نے الگ ریاست کے قیام کا فیصلہ کیا۔

    انہوں نے کہا کہ آج ہم 23 مارچ کو یوم پاکستان کے طورپرمنا رہے ہیں، ہمیں ماضی پر نظر ڈالتے ہوئے مستقبل کی فکر کرنی ہوگی، ہمیں کامیابیوں کے ساتھ ساتھ کوتاہیوں کا جائزہ بھی لینا ہوگا۔

    وزیراعظم پاکستان نے کہا کہ پاکستان ایک جمہوری جدوجہد کے ذریعے وجود میں آیا، پاکستان کی سلامتی، ترقی وخوشحالی کا رازجمہوریت میں پوشیدہ ہے، آئینی وقانونی بالادستی کے بغیرہم آبرومند نہیں ہوسکتے۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • یوم پاکستان پرتوپوں کی سلامی سے دن کاآغاز

    یوم پاکستان پرتوپوں کی سلامی سے دن کاآغاز

    اسلام آباد: ملک بھر میں یوم پاکستان ملی جوش و جذبے سےمنایا جا ر ہا ہے۔ اسلام آباد اور چاروں صوبائی دارالحکومتوں میں توپوں کی سلامی سے دن کا آغازہوا۔

    تفصیلات کےمطابق وفاقی دارالحکومت اسلام آباد میں یوم پاکستان کے دن کا آغاز 31 توپوں جبکہ صوبائی دارالحکومتوں میں21،21 توپوں کی سلامی سے ہوا۔ اس موقع پر ملک کی سلامتی اور یکجہتی کے لیے خصوصی دعائیں بھی کی گئیں۔

    یوم پاکستان پرلاہور کےمحفوظ شہید گیریژن میں پاک فوج کی جانب سے 21 توپوں کی سلامی اور پشاور کے کرنل شیرخان اسٹیڈیم میں 21 توپوں کی سلامی سے دن کا آغاز کیا گیا۔

    دوسری جانب وفاقی دارالحکومت اسلام آباد کے شکرپڑیاں پریڈ گراؤنڈ میں یوم پاکستان کی روایتی پریڈ ہوگی جہاں مسلح افواج کے دستے مارچ کریں گے اور پاک فضائیہ کے شاہین فضائی مظاہرہ پیش کریں گے۔

    صدر مملکت ممنون حسین پاک فوج کے دستوں سے سلامی لیں گے جبکہ وزیراعظم شاہد خاقان عباسی اور تینوں مسلح افواج کے سربراہان بھی تقریب میں موجود ہوں گے۔

    سری لنکا کے صدرمتھری پالا سری سینا شکرپڑیاں پریڈ گراؤنڈ میں ہونے والی یوم پاکستان کی تقریب میں خصوصی مہمان ہوں گے۔

    اسلام آباد میں پریڈ کے دوران شکرپڑیاں پریڈ گراؤنڈ کے اطراف کی سڑکوں کو بھی بند رکھا جائے گا، ٹریفک کی روانی برقرار رکھنے کے لیے متبادل پلان جاری کردیا گیا ہے۔


    یوم پاکستان پر 141 نامور شخصیات کے لیے سول ایوارڈز کا اعلان


    ایوان صدر میں شام کو تقسیم اعزازات کی تقریب منعقد ہوگی جہاں صدرممنون حسین مختلف شعبوں میں نمایاں کارکردگی کا مظاہرہ کرنے والی شخصیات کو اعزازات اور تمغے دیں گے۔

    واضح رہے کہ رواں سال مجموعی طور پر 141 پاکستانیوں اور غیرملکی شخصیات کو سول اعزازات دیے جائیں گے جن میں کیوبا کے سابق صدر فیڈل کاسترو کو نشان پاکستان جبکہ انسانی حقوق کی علمبردار مرحومہ عاصمہ جہانگیر کو نشان امتیازدیا جائے گا۔


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • چاروں صوبوں کے گورنروں کا پیغام، امن کا نشان، ہمارا پاکستان

    چاروں صوبوں کے گورنروں کا پیغام، امن کا نشان، ہمارا پاکستان

    راولپنڈی : یوم پاکستان کی مناسبت سے آئی ایس پی آر حب الوطنی سے سرشار نغمے ’امن کا نشان ، ہمارا پاکستان‘ کا ایک اور ٹریلر جاری کردیا، جس میں  چاروں صوبوں کے گورنر سمیت گورنر گلگت بلتستان نے اپنے پیغامات ریکارڈ کرائے ہیں۔

    تفصیلات کے مطابق یوم پاکستان کے موقع پاک فوج کے شعبہ تعلقاتِ عامہ آئی ایس پی آر کی جانب سے نئے نغمے ’امن کا نشان، ہمارا پاکستان‘ کی مختلف ویڈیوز ریلیز کی جارہی ہیں۔

    ڈی جی آئی ایس پی آر میجر جنرل آصف غفور نے سماجی رابطے کی ویب سائٹ ٹوئٹر پر ایک نئی ویڈیو شیئر کی، جس میں 78 ویں یوم پاکستان کے موقع پر چاروں صوبوں کے گورنروں کے علاوہ گلگت بلتستان کے گورنر اور صدر آزاد کشمیر وطن سے عقیدت و محبت کا والہانہ اظہارکر رہے ہیں۔

    گورنر پنجاب رفیق رجوانہ نے وطن سے محبت کا اظہار کرتے ہوئے اپنے پیغام میں کہا ہے کہ الحمداللہ پاکستان نےہمیں شناخت دی جبکہ گورنرسندھ محمد زبیر نے پیغام دیا کہ پاکستان امن کاگہوارہ ہے۔

    گورنر بلوچستان محمد خان اچکزئی نے یوم پاکستان پر اپنے پیغام میں کہا کہ وطن سے محبت ایک انمول جذبہ ہے اور خیبر پختونخواہ کے گورنر ظفر اقبال جھگڑا کا اپنے پیغام میں کہنا تھا کہ پاکستانی قوم کاکردارلاجواب دنیاکیلئےمثال ہے۔

    گورنرگلگت بلتستان میرغضنفر علی خان نے کہا کہ ہمارا مستقبل روشن ہے جبکہ صدر آزاد کشمیر کا کہنا تھا کہ 23مارچ کادن ایک سنگ میل،ایک عہدبھی ہے۔

    گذشتہ روز آئی ایس پی آر کی جانب سے نغمے کی ایک ویڈیو جاری کی گئی تھی، جس میں چاروں صوبوں اور گلگت بلتستان کے منتخب وزرائے اعلیٰ نے یوم پاکستان پر قوم کو مبارک باد پیش کی اور وطن کی اہمیت و افادیت کے بارے میں آگاہ کرتے ہوئے اس عزم کا اظہار کیاکہ ملک کی ترقی کے لیے ہم سب کو مل کر چلنا ہوگا۔

    قبل ازیں آئی ایس پی آر کی جانب سے نغمے کی پہلی ویڈیو جاری کی گئی تھی جس میں ملک کے نامور صحافیوں نے اپنے پیغامات ریکارڈ کرائے تھے، ان نامور صحافیوں میں اے آر وائی کے نامور صحافی ارشد شریف نے بھی وطن سے محبت کا اظہار کیا تھا۔


    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • یوم پاکستان: سندھ بھر میں تعطیل کا اعلان، نوٹی فکیشن جاری

    یوم پاکستان: سندھ بھر میں تعطیل کا اعلان، نوٹی فکیشن جاری

    کراچی: سندھ حکومت نے یومِ پاکستان کی مناسبت سے صوبے بھر میں سرکاری تعطیل کا اعلان کردیا، 23 مارچ کو سرکاری دفاتر اور تمام تعلیمی ادارے بند رہیں گے۔

    تفصیلات کے مطابق ہر سال کی طرح امسال بھی 23 مارچ کو یوم پاکستان ملک بھر میں سرکاری سطح پر قومی جوش و خروش سے منایا جائے گا، اس ضمن میں سندھ حکومت نے صوبے بھر میں تعطیل کا نوٹی فکیشن جاری کردیا۔

    سندھ حکومت کے نوٹی فکیشن کے مطابق 23 مارچ یعنی جمعے کے روز صوبے بھر کے تعلیمی ادارے اور صوبائی حکومت کے ماتحت سرکاری اداروں بند رہیں گے۔

    خیال رہے کہ 23 مارچ یوم پاکستان بھرپور قومی جذبے منایا جاتا ہے، دارالحکومت اسلام آباد میں مسلح افواج کی جانب سے شان دار مشترکہ پریڈ کی تقریب منعقد کی جاتی ہے، جس میں تمام معزز شخصیات شرکت کرتی ہیں۔


    یوم پاکستان، برج خلیفہ پاکستانی پرچم کے رنگوں سے روشن


    علاوہ ازیں وفاقی اور صوبائی سطح پر سرکاری تقاریب کا اہتمام کیا جاتا ہے، جن میں عوام بڑی تعداد میں‌ شریک ہوتے ہیں اور قرارداد پاکستان پیش کرنے والوں کو خراج تحسین پیش کرتے ہیں۔

    یاد رہے کہ یومِ پاکستان کی مناسبت سے پاک فوجِ کے شعبہ تعلقات عامہ آئی ایس پی آر کی جانب سے قومی نغمے ’امن کا نشان، ہمارا پاکستان‘ کا دوسرا حصہ جاری کیا گیا ہے، جس میں پنجاب، خیبرپختونخواہ، بلوچستان، سندھ اور گلگت بلتستان کے وزرائے اعلیٰ نے اپنے پیغامات ریکارڈ کرائے اور 23 مارچ کی مبارک باد پیش کی۔


    یوم پاکستان پر 141 نامور شخصیات کے لیے سول ایوارڈز کا اعلان


    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

  • یومِ پاکستان، پاکستانی خاتون نےملکی پرچم آسمانوں میں لہرا دیا

    یومِ پاکستان، پاکستانی خاتون نےملکی پرچم آسمانوں میں لہرا دیا

    جدہ : پاکستانی خاتون عظمیٰ طاہر  نے ایک اور اعزاز اپنے نام کرلیا،  یوم پاکستان کی مناسبت سے نیا انداز اپناتے ہوئے عظمیٰ طاہر  گائروکاپٹر کو دو ہزار فٹ کی بلندی پر اڑاتے ہوئے پاکستان کے پرچم کو تقریباً ایک گھنٹے تک فضا میں بلند رکھا۔

    تفصیلات کے مطابق پاکستانی جرآت و حوصلے میں پوری دنیا میں پہچانے جاتے ہیں اور اس خاصیت میں پاکستان کی خواتین بھی کم نہیں، ایسی ہی ایک جرآت مند پاکستانی پہلی خاتون نے اس بار پھر سے ایک انوکھا کارنامہ انجام دیا۔

    پاکستان خاتون عظمی طاہر  نے  یوم پاکستان کے حوالے سے سعودی شہر جدہ میں گائرو کاپٹر کو2 ہزارفٹ کی بلندی پر لے گئیں  اور  تقریباً ایک گھنٹے تک قومی پرچم کو فضا میں بلند رکھا۔

    یوم پاکستان کو اس انوکھے انداز میں منانے ، وطن سے اس بے لوث محبت کی پرواز میں ان کا ساتھ قاضی اجمل نے دیا اور بحیرہ احمر کی فضاؤں میں پاکستانی پرچم ، اپنی پوری آن، شان اور بان کے ساتھ لہراتا رہا۔


    مزید پڑھیں : پاکستانی خاتون کا قائد اعظم کو خراج تحسین، سمندر کی گہرائی میں‌ پرچم لہرا دیا


    اس سے قبل پاکستانی خاتون عظمی طاہر نے قائد اعظم کو یومِ ولادت کے موقع پر  انہیں انوکھے انداز میں خراج تحسین پیش کرتے ہوئے  اپنے دو ساتھیوں سمیت سمندر کی گہرائی میں پاکستان کا جھنڈا لہرا کر ریکارڈ قائم کیا تھا۔

    خاتون ایک گھنٹے تک سبز ہلالی پرچم کو  ہاتھوں میں تھامے گہرے سمندر میں رہیں اور  انہوں نے پاکستان زندہ باد کا نعرہ بھی لگایا۔

    خیال رہے کہ  23 مارچ یوم پاکستان بھرپورقومی جذبے منایا جاتا ہے اور دارالحکومت اسلام آباد میں مسلح افواج کی جانب سے شاندار مشترکہ پریڈ کا مظاہرہ  بھی کیا جاتا ہے۔


    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔