ARYNews.tv | Urdu – Har Lamha Bakhabar

Tag: pakistan floods

Pakistan Floods 2025- سیلاب سے متعلق تمام اپڈیٹس

Pakistan Floods News and Updates

سیلاب سے متعلق خبریں

  • گڈو، سکھر کے مقام پر سیلاب کا خدشہ

    گڈو، سکھر کے مقام پر سیلاب کا خدشہ

    پی ڈی ایم اے سندھ نے 4 سے 5 ستمبر کے دوران گڈو، سکھر کے مقام پر سیلاب کا خدشہ ظاہر کیا ہے۔

    اے آر وائی نیوز کے کے مطابق ڈی جی پی ڈی ایم اے سندھ نے گڈو، سکھر کے مقام پر سیلاب کے خدشے کے پیش نظر متعلقہ اداروں کو پیشگی انتظامات یقینی بنانے کی ہدایت کی ہے۔

    یہ پڑھیں: گھر اور عمر بھر کی کمائی سب بہہ گئی، سوات کے سیلاب متاثرین کھلے آسمان تلے (ویڈیو)

    ترجمان کا کہنا ہے کہ ڈی جی پی ڈی ایم سندھ نے سیلاب سے نمٹنے کی تیاریاں یقینی بنانے پر زور دیا ہے۔

    پی ڈی ایم اے سندھ کے ترجمان کا کہنا ہے کہ ہنگامی صورتحال سے نمٹنے کے لیے امدادی سامان، مشینری، کشتیاں روانہ کریں۔

    ترجمان کا کہنا ہے کہ پروونشل ایمرجنسی آپریشن کا عملہ 24 گھنٹے الرٹ رہے، ضلعی انتظامیہ کو ریلیف اور میڈیکل کیمپ قائم کرنے اور حساس علاقے خالی کرانے کی ہدایت کی ہے۔

  • گھر اور عمر بھر کی کمائی سب بہہ گئی، سوات کے سیلاب متاثرین کھلے آسمان تلے (ویڈیو)

    گھر اور عمر بھر کی کمائی سب بہہ گئی، سوات کے سیلاب متاثرین کھلے آسمان تلے (ویڈیو)

    سوات (29 اگست 2025) کے پی میں آنے والے تباہ کن سیلاب نے بربادی کی نئی داستان رقم کی سوات میں متاثرین کی مشکلات ختم نہ ہوئیں۔

    اے آر وائی نیوز کے مطابق کے پی میں گزشتہ دنوں آنے والے تاریخ کے بدترین سیلاب اور کلاؤڈ برسٹ نے ہر طرف تباہی مچا دی۔ سیاحوں کے لیے پاکستان کا پیرس کہلانے والی وادی سوات کا حسن بھی سیلاب نے ماند کر دیا۔

    اسی سوات کے سیلاب متاثرہ علاقوں میں بربادی کے مناظر آج بھی لوگوں کے دل دہلا رہے ہیں اور لوگ اپنی زندگی بھر کی جمع پونچی سیلاب کی نذر ہونے کے بعد اب کھلے آسمان تلے بیٹھے ہیں۔

    ان ہی میں ایک عمر زادہ ہیں، جنہوں نے دن رات محنت کر کے چار کمروں کا گھر بنا کر اپنے خوابوں کی تعبیر پائی تھی۔ لیکن بے رحم سیلاب کی موجیں اس کا گھر بہا کر لے گئیں، اب یہاں صرف ویران چوکھٹیں بچی ہیں جب کہ دیواریں مٹی میں دب چکی ہیں۔

    سیلاب صرف عمر زادہ کا گھر ہی نہیں بلکہ کمائی کا واحد ذریعہ رکشا، 4 بھینسیں، فرنیچر اور دیگر سامان بھی اپنے ساتھ بہا کر لے گیا۔

    کھلے آسمان تلے اپنے گھر کے ملبے پر ٹینٹ لگا کر بیٹھے عمر زادہ آہ بھر کر کہتے ہیں کہ لوگ تو کبھی ہزار اور کبھی پندرہ سو روپے دے جاتے ہیں، لیکن حکومت کی طرف سے اب تک کوئی امداد نہیں دی گئی ہے۔

    عمر زادہ کا کہنا ہے کہ ہم اپنا سب کچھ سیلاب میں گنوا کر اس ویران جگہ پر بیٹھے ہیں، مگر اب تک حکومت کی جانب سے کوئی امداد نہیں آئی ہے۔

    عمر زادے کا کزن شیر محمد خان بھی اپنی کمائی کا ذریعہ سیلاب کی نذر کر چکا ہے۔ شیر محمد کا کہنا ہے کہ اس کی ایک دکان یہاں تھی، جس میں تقریباً 10 لاکھ روپے کا سامان تھا، سب سیلاب کی لہریں بہا کر لے گئیں۔ حکومت سے اپیل ہے کہ وہ ہماری دادرسی کرے۔

    سیلاب کی ان کی زندگی بھر کی کمائی خوشیاں اور امیدیں سب چھین لیں۔ یہ بے آسرا اور بے چھت متاثرین اب حکومت کی طرف آس لگائے بیٹھے ہیں کہ کوئی آئے اور ان کے زخموں پر مرہم رکھے۔

     

  • ایشیائی ترقیاتی بینک کا سیلاب متاثرین کیلئے ہنگامی امداد کا اعلان

    ایشیائی ترقیاتی بینک کا سیلاب متاثرین کیلئے ہنگامی امداد کا اعلان

    ایشیائی ترقیاتی بینک کے صدر نے سیلاب متاثرین کیلئے 3 ملین ڈالر کی ہنگامی امداد کا اعلان کر دیا۔

    ایشیائی ترقیاتی بینک  کے صدر ماساٹوکانڈا نے پاکستان میں سیلاب سے ہونے والے نقصان پر گہرے دکھ کا اظہار کرتے ہوئے جانی نقصان پر تعزیت کی ہے۔

    اعلامیہ کے مطابق ایشیا پیسفک ڈیزاسٹر رسپانس فنڈ سے 3ملین ڈالر کی گرانٹ فراہم کی جائے گی جو کہ حکومت پاکستان کی جانب سے درخواست پر دی جارہی ہے۔

    صدر ایشیائی ترقیاتی بینک ماساٹوکانڈا کا کہنا ہے کہ پاکستان تباہ کن سیلاب کاسامنا کر رہا ہے سیلاب  نے خاندانوں اور برادریوں کو بےگھر کر دیا ہے، اےڈی بی بحران کےدوران پاکستان کےساتھ مضبوطی سےکھڑا ہے۔

    بل گیٹس

    بل گیٹس کی ’’گیٹس فاؤنڈیشن‘‘ نے پاکستان کے سیلاب متاثرین کے لیے ایک ملین ڈالر امداد کا اعلان کیا ہے۔

    مائیکرو سافٹ کے بانی بل گیٹس کی فلاحی تنظیم ’’گیٹس فاؤنڈیشن‘‘ نے پاکستان کے سیلاب متاثرین کے لیے ایک ملین ڈالر امداد کا اعلان کیا ہے۔ یہ امداد عالمی ادارہ صحت (ڈبلیو ایچ او) کے ذریعہ پاکستان کو فراہم کی جائے گی۔

    گیٹس فاؤنڈیشن کی یہ امداد چاروں صوبوں کے 33 متاثرہ اضلاع کے 4 لاکھ 65 ہزار متاثرین کے لیے ہے۔ اس امداد سے سیلاب متاثرین کو طبی سہولیات فراہم کی جائیں گی۔

    ڈبلیو ایچ او پاکستان کے نمائندہ ڈاپنگ لو نے بروقت امداد فراہمی پر گیٹس فاونڈیشن کا شکریہ ادا کرتے ہوئے کہا ہے کہ اس امداد سے متاثرین کی زندگیاں بچانے میں مدد ملے گی۔ ڈبلیو ایچ او انسانی جانوں کے تحفظ کیلیے پاکستان کے ساتھ کھڑا ہے۔

    ڈاپنگ لو نے سیلاب متاثرہ علاقوں کا دورہ کیا اس موقع پر ان کا کہنا تھا کہ ماحولیاتی تبدیلی سے مون سون شدت اختیار کر رہا ہے اور قدرتی آفات میں تیزی سے اضافہ ہو رہا ہے۔ صحت عامہ کے تحفظ کیلیے بہتر تیاری و بروقت ردعمل ضروری ہے۔

    کے پی

    رواں ماہ خیبر پختونخوا میں آنے والے تباہ کن سیلاب نے تباہی کے ماضی کے تمام ریکارڈ توڑ دیے۔ تاریخ کے بدترین سیلاب نے 400 کے قریب انسانی جانیں نگل لیں۔ ہزاروں مویشی پانی میں بہہ گئے۔ سینکڑوں مکانات، ہوٹلز، اسکولز، مساجد اور سرکاری انفراسٹرکچر بھی سیلابی موجوں کے ساتھ بہہ گیا۔

    صوبے میں سیلاب میں اپنے پیاروں کو کھونے والے اور تباہ حال متاثرین کو کے پی حکومت مالی امداد فراہم کر رہی ہے۔ کس کو کتنی امداد دی جا رہی ہے۔ اس حوالے سے مشیر خزانہ کے پی مزمل اسلم نے اعداد وشمار بتا دیے۔

    مزمل اسلم نے بتایا کہ خیبر پختونخوا کی حکومت سیلاب میں جاں بحق افراد کے لواحقین کو 20 لاکھ روپے کی مالی امداد فراہم کر رہی ہے۔

  • مون سون کا 9 واں اسپیشل شروع، طوفانی بارشوں کی پیشگوئی

    مون سون کا 9 واں اسپیشل شروع، طوفانی بارشوں کی پیشگوئی

    ترجمان پی ڈی ایم اے کا کہنا ہے کہ مون سون کا 9واں اسپیشل شروع ہوگیا ہے۔

    اے آر وائی نیوز کے مطابق ترجمان پی ڈی ایم کا کہنا ہے کہ دریاؤں کے بالائی علاقوں میں شدید بارشوں کی پیشگوئی ہے، آج سے 2 ستمبر تک پنجاب کے بیشتر اضلاع میں شدید طوفانی بارشوں کا امکان ہے۔

    راولپنڈی، مری، گلیات، اٹک، چکوال، جہلم، گوجرانوالہ، لاہور، گجرات اور سیالکوٹ میں بارشیں متوقع ہیں۔

    یہ پڑھیں: پنجاب کے سیلاب متاثرین میں وبائی امراض تیزی سے پھیلنے لگے

    پی ڈی ایم اے کا کہنا ہے کہ لاہور، نارووال، حافظ آباد، منڈٖی بہاؤ الدین، اوکاڑہ میں بارشوں کا امکان ہے، ساہیوال، قصور، جھنگ، سرگودھا اور میانوالی میں بارشوں کی پیشگوئی ہے۔

    ترجمان کے مطابق ڈیرہ غازی خان، ملتان اور راجن پور میں بھی بارشوں کا امکان ہے۔

    ریلیف کمشنر پنجاب نبیل جاوید نے صوبے بھر کے کمشنرز اور ڈپٹی کمشنرز کو الرٹ رہنے کی ہدایت کی ہے۔

    ریلیف کمشنر کا کہنا ہے کہ بڑے شہروں میں مون سون بارشوں کے باعث ندی ندی نالے بپھر سکتے ہیں، ایمرجنسی صورتحال میں پی ڈی ایم اے ہیلپ لائن، 1129 پر رابطہ کریں۔

  • فیلڈ مارشل کا پنجاب کے سیلاب سے متاثرہ علاقوں کا دورہ، سکھ برادری سے ملاقات

    فیلڈ مارشل کا پنجاب کے سیلاب سے متاثرہ علاقوں کا دورہ، سکھ برادری سے ملاقات

    راولپنڈی (29 اگست 2025): فیلڈ مارشل آرمی چیف جنرل عاصم منیر نے پنجاب کے سیلاب سے متاثرہ علاقوں کا دورہ کیا اور سکھ برادری سے ملاقات کی۔

    فوج کے شعبہ تعلقات عامہ (آئی ایس پی آر) کے مطابق فیلڈ مارشل آرمی چیف جنرل عاصم منیر نے پنجاب کے سیلاب سے متاثرہ علاقوں کا دورہ کیا جہاں انہوں نے ریسکیو اور ریلیف آپریشنز میں سول انتظامیہ اور فوجی جوانوں کی مشترکہ و انتھک کوششوں کو سراہا۔

    سپہ سالار جنرل عاصم منیر نے کہا کہ مشکل حالات میں عوام کی خدمت اور جان و مال کو محفوظ بنانے کیلیے اٹھائے گئے اقدامات لائقِ تحسین ہیں۔

    یہ بھی پڑھیں: پاک فوج بلوچستان کے عوام کے شانہ بشانہ کھڑی ہے، فیلڈ مارشل عاصم منیر

    انہوں نے سیلاب سے متاثرہ سکھ برادری سے بھی ملاقات کی۔ اس موقع پر انہوں نے یقین دلایا کہ ریاست اقلیتوں اور ان کے مذہبی مقامات کے تحفظ کی ذمہ داری پوری کرے گی۔

    فیلڈ مارشل نے اعلان کیا کہ سیلاب سے متاثرہ تمام مذہبی مقامات، بشمول گوردوارہ دربار صاحب کرتاپور، کو اصل حالت میں ترجیحی بنیادوں پر بحال کیا جائے گا۔

    ان کا کہنا تھا کہ پاکستان کی ریاست اور ادارے اقلیتوں کے حقوق کے نگہبان ہیں اور ان کے مقدس مقامات کے تحفظ کیلیے کوئی کسر نہیں چھوڑی جائے گی۔

    سکھ برادری نے آرمی چیف جنرل عاصم منیر کا پرتپاک استقبال کیا اور اس مشکل وقت میں سول انتظامیہ اور پاک فوج کی خدمات پر شکریہ ادا کیا۔

    آرمی چیف نے گوردوارہ دربار صاحب کرتاپور کا فضائی جائزہ بھی لیا تاکہ سیلاب سے ہونے والے نقصانات کا براہ راست معائنہ کیا جا سکے۔

    بعدازاں، فیلڈ مارشل عاصم منیر نے سول انتظامیہ کے نمائندوں سے ملاقات کی اور ان کے بروقت ردعمل اور اقدامات کی تعریف کی جس سے جانی اور مالی نقصان کم سے کم ہوا۔

    جوانوں سے گفتگو کرتے ہوئے انہوں نے ان کے بلند حوصلے، آپریشنل تیاری اور عوامی خدمت کے جذبے کو سراہا۔ انہوں نے کہا کہ قوم مشکل کی اس گھڑی میں اپنی فوج کو اپنے ساتھ کھڑا پائے گی۔

    دورے کے موقع پر فیلڈ مارشل عاصم منیر کا استقبال کور کمانڈر گوجرانوالہ نے کیا۔

  • پنجاب کے سیلاب متاثرین میں وبائی امراض تیزی سے پھیلنے لگے

    پنجاب کے سیلاب متاثرین میں وبائی امراض تیزی سے پھیلنے لگے

    لاہور (29 اگست 2025): پنجاب میں سیلاب کے باعث متاثرین ایک اور بڑی مشکل کا شکار ہو گئے متاثرہ علاقوں میں وبائی امراض تیزی سے پھیل رہے ہیں۔

    اے آر وائی نیوز کے مطابق بھارت کی جانب سے آبی جارحیت اور ڈیموں سے پانی پاکستان میں چھوڑے جانے کے باعث صوبہ پنجاب کے بیشتر اضلاع اور شہر سیلاب کی زد میں آ چکے ہیں۔ دریائے چناب، ستلج، راوی میں طغیانی کے باعث سیالکوٹ، نارووال سمیت کئی اضلاع میں صورتحال انتہائی خراب ہو چکی ہے۔

    دریائے راوی کا پانی بے قابو ہو کر لاہور کے رہائشی علاقوں میں داخل ہو رہا ہے، جس کے باعث علاقہ مکین موٹر وے پر پناہ لینے پر مجبور ہو گئے ہیں۔ سیلاب کے باعث اب تک درجنوں اموات ہو چکی ہیں اور ہزاروں افراد بے گھر ہو گئے ہیں۔

    سیلاب متاثرین ابھی سیلاب کی تباہ کاریوں اور نقل مکانی کے مشکلات برداشت کر رہے تھے کہ ان کی پریشانی میں مزید اضافہ ہو گیا ہے۔ سیلاب متاثرہ علاقوں میں وبائی امراض ڈینگی، ڈائریا، میلریا اور جلد کے امراض سر اٹھانے لگے ہیں۔

    صرف لاہور میں 24 گھنٹے کے دوران مختلف وبائی امراض کے 9 ہزار سے زائد کیس رپورٹ ہو چکے ہیں جب کہ دیگر شدید متاثرہ شہروں اور دیہات کا ڈیٹا صورتحال کو تشویشناک بنا رہا ہے۔

    اس حوالے سے صوبائی وزیر صحت خواجہ عمران نذیر نے محکمہ صحت و آبادی کی ٹیموں کو ہر وقت الرٹ رہنے کی ہدایت کرتے ہوئے کہا ہے کہ پنجاب بھر میں متاثرہ علاقوں میں میڈیکل کیمپس لگا دیے گئے ہیں۔

    وزیر صحت نے بتایا کہ تمام متاثرہ علاقوں میں وبائی امراض کی دوائیں وافر مقدار میں موجود ہیں جب کہ وزیر اعلیٰ مریم نواز ریلیف آپریشن کی خود نگرانی کر رہی ہیں۔

    دوسری جانب فلڈ فور کاسٹنگ نے بتایا ہے کہ بھارت سے ایک اور سیلابی ریلا آج شام دریائے چناب ہیڈ تریموں بیراج پہنچے گا۔ یہ ریلا آنے کے بعد ہیڈ تریموں بیراج پر انتہائی اونچے درجے کا سیلاب ہوگا۔ جب کہ 2 ستمبر کو ہیڈ پنجند کے مقام پر انتہائی اونچے درجے کا سیلابی ریلا پہنچے گا۔

    بھارت سے ایک اور سیلابی ریلا آج شام پاکستان پہنچے گا، نیا مراسلہ جاری

    بھارت کی جانب سے نیا سیلابی ریلا آنے کی اطلاعات پر متاثرین میں تشویش کی لہر دوڑ گئی ہے اور وہ مزید تباہ کاریوں کے خدشات سے خوفزدہ ہیں۔

  • ملک میں سیلابی صورتحال، کونسی ٹرینیں منسوخ کردی گئیں ؟

    ملک میں سیلابی صورتحال، کونسی ٹرینیں منسوخ کردی گئیں ؟

    کراچی: ریلوے حکام نے کہا ہے کہ سیلاب کی سنگین صورتحال کے سبب متعدد ٹرینیں منسوخ ہوگئی ہیں جبکہ ٹرینوں کے شیڈول بھی متاثر ہوئے ہیں۔

    تفصیلات کے مطابق ریلوے حکام کا کہنا ہے کہ سیلاب، بارشوں اور مسافروں کی کمی کے باعث دو ٹرینیں منسوخ کردی گئی ہیں۔ مسافروں کی کمی کے باعث پاک بزنس ایکسپریس کو آج منسوخ کر دیا گیا۔

    ریلوے حکام کے مطابق شاہ حسین ایکسپریس کو 30 اگست سے 2 ستمبر چار دن کیلئے منسوخ کر دیا گیا ہے، مسافروں کو کراچی ایکسپریس اور گرین لائن میں ایڈجسٹ کیا جائیگا۔

    واضح رہے کہ بھارت کی جانب سے دریائے ستلج میں آنے والے پانی میں مسلسل اضافہ ہورہا ہے، جس کے باعث ڈیڑھ لاکھ سے زائد آبادی سیلابی ریلے سے متاثر ہے۔

    ہیڈ گنڈا سنگھ کے مقام پر انتہائی اونچے درجے کا سیلاب ریکارڈ کیا گیا جہاں پانی کی آمد 2 لاکھ 61 ہزار 53 کیوسک تک پہنچ گئی، جبکہ ہیڈ سلیمانکی کے مقام پر درمیانے درجے کا سیلاب ہے جہاں پانی کی آمد ایک لاکھ 13 ہزار 124 کیوسک ریکارڈ کی گئی۔

    محکمہ موسمیات کی بڑی پیش گوئی، کراچی والے تیار ہوجائیں!

    سیلابی ریلوں کے باعث بابا فرید پل اور بھوکاں پتن پل کے نیچے پانی کی سطح مسلسل بلند ہورہی ہے، جس کے باعث دریائی بیلٹ سے ملحقہ 109 مواضعات متاثر ہوئے ہیں جبکہ سیکڑوں بستیاں اور آبادیاں پانی کی لپیٹ میں آگئی ہیں۔

    انتظامیہ کی جانب سے کہا گیا کہ دریائی بیلٹ کی ڈیڑھ لاکھ سے زائد آبادی متاثر ہوئی ہے اور ایک لاکھ سے زائد افراد اپنی مدد آپ کے تحت نقل مکانی کرچکے ہیں۔

  • سیلاب سے تباہی ، ترک صدر کی پاکستان کو ہر ممکن مدد کی پیشکش

    سیلاب سے تباہی ، ترک صدر کی پاکستان کو ہر ممکن مدد کی پیشکش

    اسلام آباد : ترک صدر رجب طیب اردوان  نے پاکستان میں سیلاب سے نقصان پر اظہار افسوس کرتے ہوئے ہر ممکن مدد کی پیشکش کردی۔

    تفصیلات کے مطابق وزیراعظم شہباز شریف اور ترک صدر رجب طیب ایردوان کے درمیان ٹیلیفونک رابطہ ہوا، جس میں انہوں نے پاکستان میں حالیہ سیلاب سے ہونے والی تباہ کاریوں پر گہرے دکھ اور افسوس کا اظہار کیا۔

    ترک صدر نے قیمتی جانوں اور املاک کے نقصان پر دلی ہمدردی اور تعزیت کا اظہار کرتے ہوئے کہا کہ ترکی پاکستان کے ساتھ ہے اور ریسکیو و ریلیف آپریشن سمیت ہر ممکن مدد فراہم کرنے کی پیشکش کردی۔

    وزیراعظم شہباز شریف نے ترک صدر کے جذبات اور تعاون کی پیشکش پر ان کا شکریہ ادا کرتے ہوئے کہا کہ یہ ٹیلیفونک رابطہ پاکستان اور ترکی کے دیرینہ برادرانہ تعلقات کی عکاسی کرتا ہے۔

    دونوں رہنماؤں نے اس بات پر زور دیا کہ پاکستان اور ترکی ہمیشہ ایک دوسرے کے ساتھ مشکل گھڑی میں کھڑے رہے ہیں۔

    اس موقع پر انہوں نے رواں سال ہونے والی اپنی ملاقاتوں کو یاد کیا اور آئندہ چین میں شنگھائی تعاون تنظیم (ایس سی او) کے سربراہی اجلاس کے موقع پر دوبارہ ملاقات کی امید ظاہر کی۔

  • فلڈ ریلیف چیریٹی میچ کا انعقاد، بابر اعظم کی شائقین سے اسٹیڈیم آنے کی اپیل

    فلڈ ریلیف چیریٹی میچ کا انعقاد، بابر اعظم کی شائقین سے اسٹیڈیم آنے کی اپیل

    سیلاب متاثرین کی مدد کیلئے پاکستانی کرکٹرز بھی میدان میں آگئے، کے پی حکومت کی جانب سے فلڈ ریلیف نمائشی میچ کا انعقاد کیا جائے گا۔

    پشاور زلمی نے ڈائریکٹوریٹ جنرل آف اسپورٹس خیبر پختونخوا اور صوبائی حکومت کے تعاون سے فلڈ ریلیف ایگزیبیشن میچ کے لیے ایک شاندار ٹیم کا اعلان کیا ہے، جس میں پاکستان کے کچھ بڑے کھلاڑی ان ایکشن ہوں گے۔

    نمائشی میچ کے 22 رکنی ٹیم میں لیجنڈری سابق کپتانوں سمیت پاکستان کے نامور موجودہ کرکٹرز ان ایکشن ہوں گے، جس میں کہ شاہد آفریدی، یونس خان، محمد حفیظ، راشد لطیف اور بابر اعظم شامل ہیں۔

    سابق فاسٹ بولر وقار یونس، شعیب اختر اور محمد عرفان کے ساتھ ساتھ آل راؤنڈر اظہر محمود بھی اس میچ میں حصہ لیں گے، اسپن کے ماہرین سعید اجمل، عبدالرحمن اور ذوالفقار بابر دیگر مشہور کھلاڑیوں بھی اس چیریٹی میچ کا حصہ ہوں گے۔

     

    View this post on Instagram

     

    A post shared by Peshawar Zalmi (@peshawarzalmipk)

    اس زبردست مقابلے میں پشاور زلمی کا مقابلہ لیجنڈز الیون سے ہوگا، جو موجودہ ٹاپ کھلاڑیوں اور سابق عظیم کھلاڑیوں پر مشتمل ہوگا، ٹکٹوں کی فروخت سے حاصل ہونے والی تمام آمدنی خیبر پختونخوا میں سیلاب سے متاثرہ افراد کے لیے امداد اور بحالی کے کاموں کے لیے عطیہ کی جائے گی۔

    یہ نمائشی میچ کل پشاور میں کھیلا جائے گا، میچ سے قبل وسیم اکرم، شاہد آفریدی اور بابراعظم نے شائقین کے لیے اہم پیغام جاری کیا ہے اور اسٹیڈیم میں آنے اپیل کی ہے۔

    چیریٹی میچ کے حوالے سے بابر اعظم نے ویڈیو پیغام میں کہا کہ چیریٹی میچ میں آپ کے ہیروز آرہے ہیں، آپ بھی میچ دیکھنے کے لیے آئیں، اسٹیڈیم میں مجھے آپ کا انتظار رہے گا۔

    وسیم اکرم نے ویڈیو پیغام میں کہا کہ پشاور کے شہریوں کو طویل مدت کے بعد قومی ہیروز کو کھیلتے دیکھنے کا موقع ملے گا، شہریوں کو ٹکٹ خرید کر میچ دیکھنا چاہیے کیونکہ میچ کی آمدنی سے سیلاب زدہ متاثرین کی امداد ہوگی۔

  • دریائے راوی میں آنے والا سیلابی ریلہ قریبی آبادیوں میں داخل، متاثرین موٹر وے پر پناہ لینے پر مجبور

    دریائے راوی میں آنے والا سیلابی ریلہ قریبی آبادیوں میں داخل، متاثرین موٹر وے پر پناہ لینے پر مجبور

    لاہور : دریائے راوی میں آنے والا سیلابی ریلہ قریبی آبادیوں میں داخل ہوگیا ، جس کے باعث متاثرین موٹروے پر پناہ لینے پر مجبور ہوگئے۔

    تفصیلات کے مطابق دریائے راوی میں آنے والا سیلابی ریلہ قریبی آبادیوں میں داخل ہوگیا جس کے باعث بدروپنڈ، تعلق پورہ، مہنوال، چوہنگ، تھم پارک، برج اٹاری اور سادھاں ٹوری سمیت متعدد علاقے زیرِ آب آگئے۔

    سیلابی صورتحال کے باعث متاثرہ افراد اپنے خاندانوں اور سامان کے ساتھ لاہور۔اسلام آباد موٹروے پر پناہ لینے پر مجبور ہوگئے۔

    ٹھوکر نیاز بیگ سے موٹروے کے نیچے بیشتر آبادیوں میں پانی داخل ہونے کے بعد کئی خاندان رات بھر کھلے آسمان تلے موٹروے پر مقیم رہے۔

    پاکستان میں سیلاب سے متعلق خبریں

    دوسری جانب، دریائے راوی میں شاہدرہ کے مقام پر سیلابی پانی میں بتدریج کمی ہونا شروع ہوگئی ہے، ترجمان پی ڈی ایم اے پنجاب کے مطابق دریائے راوی میں پانی کا بہاؤ 2 لاکھ 20 ہزار کیوسک تک پہنچ گیا تھا تاہم چند گھنٹوں میں اس میں 9 ہزار کیوسک کمی ریکارڈ کی گئی جس کے بعد موجودہ بہاؤ 2 لاکھ 11 ہزار کیوسک رہ گیا ہے۔

    ڈی جی پی ڈی ایم اے عرفان علی کاٹھیا کا کہنا تھا کہ شاہدرہ کے مقام پر پانی کے بہاؤ میں کمی آرہی ہے اور تمام اداروں کے درمیان بہتر کوآرڈینیشن کے باعث جانی نقصان سے بچا گیا ہے۔

    سیلابی ریلے سے متاثرہ علاقوں میں اب بھی پانی کھڑا ہے جس کے باعث لوگوں کو نقل مکانی اور بنیادی ضروریات کی شدید مشکلات کا سامنا ہے۔