ایک سو نوے ملکوں کا سفر کرکے گنیز بک آف ریکارڈ میں نام کمانے والی امریکی خاتون نے پاکستان کو دنیا کا سب سے خوبصورت ملک قرار دے دیا، انکا کہنا ہے کہ پاکستان دیکھا تو دنیا ہی بھول گئی۔
امریکی سیاح کیسنڈرا ڈی پیکول جو ان دنوں دنیا کے سفر پر ہیں، سیاحت کی شوقین کیسنڈرا ایک سو نوے ملک گھومتی گھماتی پاکستان پہنچی تو حیران رہ گئیں، انکا کہنا ہے کہ رکشے کا سفر ہو، یا یہاں رہنے والے، پاکستان ہیرا ہے اور یہاں دل والے بستے ہیں۔
امریکی سیاح کیسنڈرا ڈی پیکول نے کہا کہ یہ تو ایک چھپا ہوا جوہر ہے زبان اور ثقافت کا جواب نہیں، پاکستان خود آئی تو خدشات دور ہوگئے، دنیا گھوم لی لیکن پاکستان جیسا ملک کوئی نہیں۔
انھوں نے بتایا پاکستان آنے سے پہلے میں نے اس ملک کے بارے میں بہت کچھ پڑھا اور تحقیق کی لیکن جو کچھ میڈیا دکھاتا ہے پاکستان اس کے بالکل برعکس ہے۔
کیسنڈرا نے اس خواہش کا اظہار کیا کہ پاکستان کی شمالی علاقہ جات اور چھوٹے شہروں اور قصبوں کو دیکھنا چاہتی ہیں لیکن اس بار یہ ممکن نہیں ہو سکا۔ ان کا کہنا تھا کہ وہ بہت جلد پاکستان دوبارہ آئیں گی اور اپنی یہ تمنا پوری کریں گی۔
کیسنڈرا کا کہنا تھا کہ ان کا اگلی منزل افریقی ملک ارٹیریا ہے اور وہ جلد جنگ زدہ یمن کے سفر پر ہوں گی۔
مزید پڑھیں : پوری دنیا کی سیاحت کا عزم لیے امریکی سیاح کراچی پہنچ گئیں
اس سے قبل امریکی سیاح کیسنڈرا ڈی پیکول پاکستان کی سیاحت کے لیے کراچی پہنچی، جہاں انہوں نے میئر وسیم اختر سے ملاقات کی۔
خیال رہے کہ ستائیس سالہ امریکی خاتون کیسنڈرا نے گزشتہ سال جولائی میں سفر کا آغاز کیا، دنیا گھومنے کے بعد تین ملکوں نے زیادہ متاثر کیا ان میں پاکستان، اومان اور بھوٹان سرفہرست ہیں۔
ان کا پہلا پڑاؤ مغربی بحرالکاہل کے ایک چھوٹے سے ملک پلاؤ میں ہوا اور ان کا سفر مسلسل جاری رہا اور 190 ممالک کا سفر کرنے کے بعد وہ پاکستان پہنچیں۔