آئی ایم ایف کی ڈائریکٹر کمیونی کیشن جولیا کوزک نے کہا ہے کہ دوست ملکوں کی بروقت معاونت سے ہی آئی ایم ایف اسٹاف لیول معاہدہ ممکن ہے، پاکستان معاشی اصلاحات پر عمل کرکے اعتماد بحال کرے۔
نیوز کانفرنس سے خطاب کرتے ہوئے انہوں نے بتایا کہ پاکستان کے ساتھ نویں جائزہ اجلاس کے لیے اسٹاف لیول معاہدے پر بات ہوچکی ہے، دوست ملکوں کی بروقت معاونت سے ہی آئی ایم ایف اسٹاف لیول معاہدہ ممکن ہے۔
انہوں نے واضح کیا کہ حکومت پاکستان سے معاشی اصلاحات پرعمل چاہتے ہیں، پاکستان معاشی اصلاحات پر عمل درآمد کرکے اپنا اعتماد بحال کرے اس کے علاوہ پاکستان دوست ممالک سے معاونت کو بروقت یقینی بنائے۔
جولیا کوزک کا کہنا تھا کہ عالمی بینک اور ایشیائی ترقیاتی بینک سمیت تمام ادارے قرض پروگرام میں اصلاحات چاہتے ہیں، چین، سعودی عرب اور متحدہ عرب امارات بھی پاکستان سے آئی ایم ایف اصلاحات پر عمل چاہتے ہیں، آئی ایم ایف بھی امدادی ملکوں اور اداروں سے فنڈنگ کی یقین دہانی چاہتا ہے۔
ان کا کہنا تھا کہ پاکستانی معیشت کو کئی چیلنجز درپیش ہیں، مہنگائی، پست شرح نمو اور زرمبادلہ کی ضرورت بڑے چیلنجز ہیں، سیلاب نے پاکستان کے معاشی مسائل مزید گھمبیر کیے۔ پاکستان کو سیلاب متاثرین کی مدد اور بینظیر انکم سپورٹ پروگرام کے تحت فنڈزکی تقسیم کی اجازت دی گئی، ہے۔
