اسلام آباد(8 اگست 2025): پاکستان پٹرولیم لمٹیڈ کے آئی ٹی انفراسٹرکچر پر سائبر اٹیک کیا گیا۔
پاکستان پٹرولیم لمٹیڈ (پی پی ایل) کے مطابق پی پی ایل کے آئی ٹی انفراسٹرکچر پر تاوان کی غرض سے سائبر اٹیک کیا گیا، پی پی ایل کو تاوان دینے کا ایک نوٹ موصول ہوا تھا۔
پی پی ایل کے مطابق ریگولیٹری اور قانون نافذ کرنے والے اداروں کو سائبر اٹیک رپورٹ کردیا گیا، تاوان کی غرض سے کئے جانے والے سائبر اٹیک کی تحقیقات کی جارہی ہیں جبکہ کمپنی کی جانب سے اب تک ہیکرز سے کوئی رابطہ نہیں کیا گیا ہے۔
پی پی ایل ترجمان کا کہنا ہے کہ سائبر اٹیک سے کمپنی کا حساس ڈیٹا محفوظ رہا ہے تاہم اس اٹیک کے باعث آئی ٹی انفراسٹرکچر کا کچھ حصہ عارضی طور پر معطل کیا گیا۔
یہ اقدام سائبر اٹیک سے بچاؤ کے اقدام کے طور پر کیا گیا ہے، پی پی ایل کے سائبر سیکیورٹی پروٹو کولز کے باعث بروقت اقدامات کئے گئے، پی پی ایل سائبر سیکیورٹی کے حوالے سے جامع فرانزک تجزیہ کررہی ہے۔
