ماسکو : پاکستان نے انڈونیشیا کو شکست دے کر اسٹریٹ چائلڈ فٹبال ورلڈ کپ کے فائنل کیلئے کوالیفائی کرلیا، فائنل میں پاکستان کا مقابلہ ازبکستان سے ہوگا۔
تفصیلات کے مطابق ماسکو میں کھیلے جانے والے اسٹریٹ چائلڈ ورلڈ کپ 2018 کے سیمی فائنل میں پاکستان نے انڈونیشیا کو پنالٹی شوٹس پر4-5سے شکست دے کر فائنل میں جگہ بنالی، فائنل پاکستان اور ازبکستان کے درمیان کھیلا جائے گا۔
اس سے قبل گزشتہ اتوار کو کھیلے جانے والے میچ میں پاکستان تاجکستان کو صفر کے مقابلے میں دو گول سے ہراکر سیمی فائنل میں پہنچا تھا، جس کے بعد آج پاکستان نے فتح کا سلسہ جاری رکھتے ہوئے انڈونیشیا کو بھی چت کردیا۔
واضح رہے کہ اسٹریٹ چائلڈ ورلڈ کپ روایتی طور پر فیفا ورلڈ کپ کے میزبان ملک میں عالمی کپ سے ایک ماہ قبل کھیلا جا تا ہے۔ سب سے پہلے مذکورہ ورلڈ کپ سال 2010میں جنوبی افریقا میں کھیلا گیا تھا۔
اس سے قبل پاکستان کے پسماندہ علاقوں کے گلی محلوں میں کھیلنے والے یتیم اور بے سہارا بچوں نے سال2014میں دوسرے اسٹریٹ چائلڈ ورلڈ کپ میں تیسری پوزیشن حاصل کرکے پاکستانی قوم کا سر فخر سے بلند کردیا تھا۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
