کراچی: سال 2013ء کے دوران پاکستان ورلڈ فوڈ پروگرام کی معاونت کرنے والا دوسرا بڑا ملک بن گیا ، جس نے خوراک کے عالمی پروگرام کو ایک لاکھ 50 ہزار میٹرک ٹن گندم کا عطیہ فراہم کیا، اس گندم کی قیمت 5 ارب 50 کروڑ روپے سے زائد تھی، ورلڈ فوڈ پروگرام پاکستان کے ترجمان امجد جمال کے مطابق حکومت کی جانب سے گندم کے عطیہ سے عوام کی مدد کے حکومتی عزم کی عکاسی ہوتی ہے۔
انہوں نے کہا کہ حکومت نے اس وقت گندم فراہم کی جب ڈبلیو ایف پی کو فنڈز کی کمی کے باعث ہنگامی حالات میں مشکلات درپیش تھیں، انہوں نے کہاکہ ملک کے دور درازعلاقوں، فاٹا اور دیگر مختلف علاقوں میں لاکھوں لوگوں کو خوراک کی فراہمی کے پروگرام پرعمل درآمد کیا جارہا ہے۔