Tag: pakistan

لاہور : عمران خان حملہ کیس کی جے آئی ٹی فعال ہوگئی ، سی سی پی او لاہور کی معطلی کے بعد عمران خان پر قاتلانہ حملے کی تحقیقات کرنے والی جے آئی ٹی نے کام روک دیا تھا۔

تفصیلات کے مطابق سپریم کورٹ کی جانب سے سی سی پی او لاہور کی بحالی کے بعد عمران خان حملہ کیس کی جے آئی ٹی فعال ہوگئی۔

یاد رہے غلام محمودڈوگر عمران خان حملہ کیس کی جے آئی ٹی کے سربراہ ہیں، پنجاب حکومت نے انھیں جے آئی ٹی کا سربراہ مقررکیا تھا۔

گذشتہ ماہ کے آخر میں سی سی پی او لاہور کی معطلی کا نوٹیفکیشن بحال ہونے پر ٹیم نے کام روک دیا تھا۔

وفاقی سروس ٹریبونل نے سی سی پی اوغلام محمودڈوگر کو معطل کرنے کا نوٹی فکیشن بحال کیا ، غلام محمود ڈوگرکو وفاقی حکومت نے 5 نومبر کومعطل کرنے کا نوٹی فکیشن جاری کیا تھا۔

بعد ازاں قانونی ماہرین کا کہنا ہے کہ غلام محمود ڈوگر معطل آفیسر ہیں، جو جے آئی ٹی کے سربراہ نہیں رہ سکتے۔

واضح رہے آج سپریم کورٹ نے سی سی پی او لاہور غلام محمود ڈوگر کو بحال کرتے ہوئے سروس ٹریبونل کے خصوصی بنچ کے فیصلے کیخلاف اپیل پر وفاقی حکومت کو نوٹس جاری کردیا تھا۔

اسلام آباد : پولی کلینک اسپتال میں ڈینگی کی ایکسپائرٹیسٹ کٹس استعمال کرانے کا انکشاف ہوا ، 2021 میں تمام ٹیسٹ کٹس کی معیاد ختم ہوگئی تھی۔

تفصیلات کے مطابق پولی کلینک اسپتال میں ڈینگی کی ایکسپائرٹیسٹ کٹس استعمال کرانے کا انکشاف سامنے آیا ، جس کے بعد ایکسپائر کٹس دینے پر ڈپٹی ایگزیکٹو ڈائریکٹر سمیت 4 افراد کیخلاف مقدمہ درج کرلیا گیا۔

مقدمہ ایف آئی اے اینٹی کرپشن نے جونینئراسسٹنٹ کی مدعیت میں درج کیا ، مقدمے میں کہا گیا کہ 2019میں آئیڈیل ڈائیگنوسٹک راولپنڈی نے ٹیسٹ کٹس فراہم کیں، پولی کلینک اسپتال کو 27 ہزار 960 ڈینگی ٹیسٹ کٹس فراہم کی گئی تھیں۔

مقدمے کے متن میں کہنا تھا کہ آئیڈیل ڈائیگنوسٹک راولپنڈی نے 7 ہزار 200 سیرولوجی ٹیسٹ کٹس بھی دیں ، 2021 میں تمام ٹیسٹ کٹس کی معیاد ختم ہوگئی ہے۔

مقدمے کے متن میں کہا گیا ہے کہ ٹینڈر کی شرائط کے مطابق ٹھیکیدار نے میعاد ختم ہونے پر نئی ٹیسٹ آلات دینے تھے۔

مقدمے کے مطابق ڈپٹی ایگزیکٹو ڈائریکٹر ڈاکٹر امان اللہ ، عابد حسین ڈسپنسر نے ایکسپائر کٹس استعمال کیں، ملزمان نے آئیڈیل ڈائیگنوسٹک کے مالک کو 55لاکھ 96 ہزار کا فائدہ پہنچایا۔

اسلام آباد : پاکستان تحریک انصاف کے سینیٹر اعظم سواتی کو بلوچستان پولیس کے حوالے کر دیا گیا، اعظم سواتی کے خلاف بلوچستان کے مختلف اضلاع میں مقدمات درج ہیں۔

تفصیلات کے مطابق متنازعہ ٹویٹس کے معاملے پر پاکستان تحریک انصاف کے سینیٹر اعظم سواتی کو بلوچستان پولیس کے حوالے کر دیا گیا۔

ذرائع نے بتایا کہ اعظم سواتی کی گرفتاری بلوچستان پولیس کی جانب سے کی گئی، پولیس اعظم سواتی کو لیکر کوئٹہ روانہ ہوگئی ، جہاں اعظم سواتی کو کچلاک جیل میں رکھا جائے گا۔

بلوچستان پولیس نے اعظم سواتی کو گرفتار کرنے کی درخواست کی تھی، اعظم سواتی کے خلاف بلوچستان کے مختلف اضلاع میں مقدمات درج ہیں۔

یہاں یہ بات قابل ذکر ہے کہ سواتی کو دارالحکومت کی ایک عدالت سے بعد از گرفتاری ضمانت کے بعد ایک ماہ کے دوران اسی کیس میں دوسری مرتبہ گرفتار کیا گیا تھا۔

دوسری جانب اسلام آباد ہائی کورٹ نے اعظم سواتی کی ملک بھر میں درج مقدمات کی تفصیل کے حصول کی درخواست پر فیصلہ محفوظ کرلیا۔

چیف جسٹس نے ریمارکس دیے کہ ہم کسی صوبے کو ڈائریکشن نہیں دے سکتے، وزارت داخلہ سے کیسز کی تفصیل مانگ رہے ہیں۔۔ پوچھا تھا کہ کون سے قانون کے تحت ایسا کر سکتے ہیں۔

کراچی : شاہین فورس اہلکار کے قتل کیس میں جائے وقوعہ سے ملنے والے خول ملزم کی پستول سے میچ کر گئے، ڈسٹرکٹ ساؤتھ ٹیم نے ملزم خرم نثار کا اسلحہ برآمد کیا تھا۔

تفصیلات کے مطابق پاکستانی نژاد سوئیڈش باشندے کے ہاتھوں کراچی میں شاہین فورس اہلکار عبدالرحمان کے قتل کی تحقیقات کے دوران ایک اور اہم پیش رفت سامنے آئی۔

تفتیشی حکام کا کہنا تھا کہ جائے وقوعہ سے ملنے والے دونوں خول خرم نثار کی پستول سے میچ کر گئے ہیں، ڈسٹرکٹ ساوتھ پولیس کی خصوصی ٹیم نے ملزم خرم نثار کا اسلحہ برآمد کیا تھا جس کے ساتھ پولیس کو 6 گولیاں بھی ملی تھی۔

تفتیشی پولیس نے کہا کہ خرم نثار کے نائن ایم ایم پستول سے ہی عبدالرحمان شہید ہوا جو اب برآمد کرلیا گیا ہے، جبکہ خرم جس کار میں سوار ہوا وہ بھی پولیس نے قبضے میں لے لی تھی۔

حکام کا کہنا تھا کہ کار سے واردات میں استعمال کار کی نمبرپلیٹیں بھی مل گئی تھی، گرفتار ملزمان عامر اور اورنگزیب کا مزید 5 روزہ ریمانڈ حاصل کیا ہے۔

تفتیشی پولیس کے مطابق ملزمان نے خرم نثار کو فرار کروانے میں سہولت کاری کی، جس کے ٹھوس ثبوت موجود ہیں اور کیس پر مزید کام کیا جارہا ہے۔