ARYNews.tv | Urdu – Har Lamha Bakhabar

Tag: pakistan

  • آئی ایم ایف مشن مختلف امور کے جائزے کے لیے پاکستان پہنچ گیا

    آئی ایم ایف مشن مختلف امور کے جائزے کے لیے پاکستان پہنچ گیا

    آئی ایم ایف مشن نے مختلف امور کے جائزے کے لیے مشن پاکستان بھیجا ہے جس نے جمعرات 6 فروری کو اپنے کام کا آغاز کیا جو 14 فروری تک جاری رہے گا۔

    ذرائع کے مطابق وزارت قانون آئی ایم ایف وفد کو کرپشن کے خاتمے کے لیے قانون سازی پر بریفنگ دے گی، آئی ایم ایف وفد کو ایف اے ٹی ایف کے اہداف پر عمل درآمد سے آگاہ کیا جائے گا، وفد نیب، عدلیہ سمیت مختلف اداروں اور وزارتوں کے حکام سے ملاقاتیں کرے گا۔

    ذرائع کا کہنا ہے کہ اینٹی کرپشن اور اینٹی منی لانڈرنگ اقدامات بھی 7 ارب ڈالر کے بیل آوٹ پیکیج کا حصہ ہے، وفد کی جوڈیشل کمیشن اور سپریم کورٹ حکام سے بھی ملاقات کا امکان ہے، عدلیہ کی آزادی اور ججوں کی تعیناتی کے طریقہ کار پر بات چیت کا امکان ہے۔

    ذرائع کا کہنا ہے کہ آئی ایم ایف کے اس دورے کا مقصد قانون کی حکمرانی، انسداد بدعنوانی اور منی لانڈرنگ کی روک تھام کیلئے اقدامات کا جائزہ لینا ہے، عدالتی نظام میں آزادی کا جائزہ لینا بھی وفد کے مینڈیٹ میں شامل ہے۔

    وزارت خزانہ کے حکام نے آئی ایم ایف وفد کی آمد پر فی الحال تبصرے سے گریز کیا ہے۔

  • ملک میں سونا مزید مہنگا، قیمت نے تمام ریکارڈ توڑ دیے

    ملک میں سونا مزید مہنگا، قیمت نے تمام ریکارڈ توڑ دیے

    کراچی: پاکستان میں سونے کی قیمتوں میں مسلسل اضافہ ہورہا ہے اور آج سونا ملکی تاریخ میں پہلی بار 3 لاکھ روپے کو عبور کر گیا۔

    آل پاکستان جیمز اینڈ جیولرز ایسوسی ایشن کے مطابق پاکستان میں آج سونے کی فی تولہ قیمت میں 1346 روپے اضافے سے 3 لاکھ 46 روپے کا ہوگیا ہے، اسی طرح 10 گرام سونے کی قیمت 1154روپے اضافے سے 2 لاکھ 57 ہزار 241 روپے کا ہوگیا ہے۔

    عالمی مارکیٹ میں بھی سونے کی قیمت میں اضافے کا رجحان رہا، عالمی مارکیٹ میں سونے کا بھاؤ 10ڈالر اضافے سے 2869 ڈالر فی اونس ہے۔

    رواں سال یکم جنوری کو فی تولہ سونا 2 لاکھ 73 ہزار 600 روپے پر پہنچ گیا تھا تاہم یکم جنوری سے ابتک فی تولہ سونے کی قیمت میں 26 ہزار 440 روپے کا اضافہ ہو چکا ہے۔

    پاکستان میں آج ڈالر اور دیگر کرنسیوں کی قیمت

    یاد رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔

    اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔

    پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔

  • فلسطین پر قائد اعظم کے دور سے پاکستان کی پوزیشن واضح ہے، ترجمان دفتر خارجہ

    فلسطین پر قائد اعظم کے دور سے پاکستان کی پوزیشن واضح ہے، ترجمان دفتر خارجہ

    اسلام آباد: ترجمان دفتر خارجہ نے کہا ہے کہ فلسطین پر قائد اعظم کے دور سے پاکستان کی پوزیشن واضح ہے۔

    ترجمان دفتر خارجہ شفقت علی خان نے ہفتہ وار بریفنگ میں کہا کہ ہم نے امریکی سیکریٹری آف اسٹیٹ سمیت متعدد امریکی حکام کے غزہ پر بیانات دیکھے ہیں، غزہ پر ہمارا اپنا ایک مؤقف ہے۔

    ترجمان نے کہا غزہ ہماری بریفنگ کا باقاعدہ حصہ رہا ہے، قائد اعظم کے دور سے ہماری پوزیشن فلسطین پر واضح ہے، پاکستان فلسطینیوں کی حق خود ارادیت کی جدوجہد کی حمایت جاری رکھے گا۔

    انھوں نے کہا غزہ کے عوام کی منتقلی نامنصفانہ، تکلیف دہ اور تشویش ناک ہے، غزہ سے قیدیوں کی منتقلی کے حوالے سے ہمارے پاس کوئی تجویز نہیں آئی، فلسطینیوں کی خواہش کے مطابق دو ریاستی حل کے حامی ہیں، فلسطینی جو چاہتے ہیں ہم اس کی حمایت کرتے ہیں۔

    دفتر خارجہ کے ترجمان نے ایک سوال پر کہا کہ بلاول بھٹو کا امریکا کا دورہ دفتر خارجہ کے ذریعے طے نہیں ہوا ہے، ان کے دورے کے حوالے سے ان کی جماعت کے ترجمان بہتر بتا سکتے ہیں۔

    انھوں نے بتایا کہ محمد بن سلمان کے دورہ پاکستان سے متعلق فی الحال کوئی پیشرفت نہیں ہوئی، ایک سوال پر کہا غیر قانونی مقیم افغان شہریوں کی واپسی غیر قانونی نہیں ہے، راولپنڈی اور اسلام آباد میں تمام 20 لاکھ افغان مقیم نہیں ہیں۔

    فرینکفرٹ میں قونصل خانے پر حملے کے حوالے سے ترجمان نے کہا قومی جھنڈے کی بے حرمتی اہم معاملہ ہے، فرینکفرٹ واقعے سے پاکستانیوں کو دلی تکلیف ہوئی، ہم جرمن حکومت اور جرمنی سفارت خانہ سے اس سلسلے میں رابطے میں ہیں۔

  • ملک میں سونے کی قیمت کو پر لگ گئے، نیا ریکارڈ قائم

    ملک میں سونے کی قیمت کو پر لگ گئے، نیا ریکارڈ قائم

    کراچی: پاکستان میں سونے کی قیمت میں آج بھی اضافہ ریکارڈ کیا گیا ہے جس کے بعد قیمت تاریخ کی بلند ترین سطح پر پہنچ گئی۔

    آل پاکستان جیمز اینڈ جیولرز ایسوسی ایشن کے مطابق پاکستان میں آج سونے کی فی تولہ قیمت میں 200 روپے اضافے سے 2 لاکھ 92 ہزار 400 روپے ہوگئی، اسی طرح 10 گرام سونے کی قیمت 171 روپے اضافے سے 2 لاکھ 50 ہزار 685 روپے ہوگئی۔

    عالمی مارکیٹ میں بھی سونے کی قیمت میں اضافے کا رجحان رہا، عالمی مارکیٹ میں سونے کا بھاؤ 2 ڈالر اضافے سے 2799 ڈالر فی اونس ہے۔

    واضح رہے کہ یکم فروری کو بھی فی تولہ سونا 400 روپے مہنگا ہوگیا تھا ، جس کے بعد فی تولہ گولڈ کی قیمت 2 لاکھ 92 ہزار 200 روپے پر پہنچ گئی تھی، اسی طرح 10 گرام گولڈ 343 روپے اضافے سے 2 لاکھ 50 ہزار 514 روپے کا ہوگیا تھا۔

    پاکستان میں آج ڈالر اور دیگر کرنسیوں کی قیمت

    یاد رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔

    اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔

    پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔

  • پاکستان میں عدالت کے علاوہ تنازعات کے حل کے متبادل راستے کیا ہیں؟ جسٹس منصور بتاتے ہیں

    پاکستان میں عدالت کے علاوہ تنازعات کے حل کے متبادل راستے کیا ہیں؟ جسٹس منصور بتاتے ہیں

    کراچی: تنازعات کے متبادل حل کے موضوع پر آئی بی اے میں آج ایک سیمینار ہوا، جس میں سپریم کورٹ کے سینیئر جج جسٹس منصور علی شاہ اور لاہور ہائی کورٹ کے جسٹس جواد حسن شریک ہوئے۔

    جسٹس منصور علی شاہ نے خطاب میں کہا کہ پاکستان میں 24 لاکھ کیسز زیر التوا ہیں، اور 86 فی صد زیر التوا کیسز ضلعی عدالتوں میں ہیں، ملک میں یہ ایک طریقہ رائج ہو گیا ہے کہ کسی کو بھی مسئلہ ہوتا ہے تو عدالت آتا ہے، حالاں کہ ثالثی سمیت دیگر مختلف راستے بھی موجود ہیں۔

    انھوں نے کہا ہمارے پاس ججز کی تعداد کم ہے، پاکستان میں اوسطاً 13 ججز فی ملین ہیں، جب کہ دنیا میں 90 ججز فی ملین ہیں، اس لیے تنازعے کی صورت میں فوری طور پر عدالت آنے کی بجائے ثالثی کی کوشش کی جانی چاہیے، اگر ثالثی سے مسئلہ حل نہ ہو تو عدالت سے رجوع کیا جانا چاہیے۔

    جسٹس منصور علی شاہ نے کہا کمپنیوں کو پہلے داخلی طور پر تنازعات حل کرنے کی کوشش کرنی چاہیے، اس سے عدالتوں پر دباؤ بڑھتا ہے، انصاف تک رسائی تمام شہریوں کا حق ہے لیکن اس کا مطلب یہ نہیں کہ عدالت سے رجوع کیا جائے، اس کا مطلب یہ ہے کہ ایسا فورم ہو جہاں مسائل حل ہو سکیں۔

    انھوں نے کہا ’’میڈیئیشن اور آربٹریشن سمیت دیگر آپشن بھی موجود ہیں، تنازعات کا یہ متبادل حل عدالتی نظام ہی کا حصہ ہے، عدالتی سسٹم عدالت سمیت دیگر طریقہ کار فراہم کرتا ہے، صرف عدالتوں کو ہی انصاف کی فراہمی کا ذمہ دار نہیں سمجھنا چاہیے، اگر ہر کوئی عدالت سے رجوع کر کے حکم امتناع حاصل کرے گا تو معیشت کیسے چلے گی، حکم امتناع اور ضمانتوں کی بنیاد پر قومیں ترقی نہیں کرتیں۔‘‘

    سیمینار سے جسٹس جواد حسن نے خطاب میں کہا ’’پاکستان دنیا کے ان ممالک میں شامل ہے جہاں تنازعات کے متبادل حل کا قانون موجود ہے، جسٹس منصور علی شاہ نے ثالثی کے موضوع پر تفصیلی فیصلے تحریر کیے ہیں، پاکستان دنیا کے 3 ممالک میں شامل ہے جہاں ثالثی کے عدالتی احکامات موجود ہیں۔‘‘

    جسٹس جواد نے مزید کہا ’’دنیا میں ثالثی رضاکارانہ بنیادوں پر ہوتی ہے، آئین کے مطابق سپریم کورٹ کے احکامات تمام ماتحت عدالتوں پر لاگو ہوتے ہیں، عدالتوں کا کام ہے کہ غیر ملکی سرمایہ کاروں کو غیر ضروری مقدمہ سازی سے بچاتے ہوئے ثالثی کے ذریعے اعتماد فراہم کریں۔‘‘

  • پاکستان بھر میں غیر قانونی پٹرول پمپس کی روک تھام کے لیے اوگرا کا انقلابی قدم

    پاکستان بھر میں غیر قانونی پٹرول پمپس کی روک تھام کے لیے اوگرا کا انقلابی قدم

    پاکستان میں جدید ترین موبائل ایپلی کیشن راہ گزر کا آغاز کر دیا گیا ہے جس سے ملک بھر میں قانونی پٹرول پمپس اور آؤٹ لیٹس کی نشاندہی ہوسکے گی۔

    اے آر وائی نیوز کے مطابق اوگرا، ایف بی آر اور آئل کمپنیز ایڈوائزری کونسل کی مشترکہ کاوشوں سے جدید ترین موبائل ایپلی کیشن ’’راہ گزر‘‘ کا آغاز کر دیا گیا ہے۔ یہ ایپ صارفین کو ملک بھر میں قانونی پٹرول پمپس اور آؤٹ لیٹس کی نشاندہی کرے گی۔

    اس حوالے سے ایپ کی لانچنگ تقریب اوگرا کے ہیڈ آفس اسلام آباد میں منعقد کی گئی جس کی صدارت چیئرمین اوگرا مسرور خان ممبر آئل اینڈ فنانس نے کی۔ تقریب میں وزارت توانائی، ایف بی آر، کسٹمز، ایکسپلوسیو ڈیپارٹمنٹ کے سینئر حکام، او سی اے کے نمائندوں نے شرکت کی۔

    تقریب میں بتایا گیا کہ جدید ترین موبائل ایپلی کیشن کا آغاز پاکستان کی آئل سپلائی چین کی ڈیجیٹلائزیشن میں ایک اہم قدم ہے۔ یہ ایپ قانون نافذ کرنیوالے اداروں کو غیر قانونی دکانوں یا ’’باکس اسٹیشنز‘‘کی نشاندہی کرنے کیلیے پلیٹ فارم پیش کرے گی۔

    پاکستانی صارفین اس ایپ کا استعمال کر کے غیر قانونی آؤٹ لیٹس، اوور چارجنگ یا معیار سے متعلق خدشات، شفافیت کو یقینی بنانے اور اسٹیک ہولڈرز کو با اختیار بنانے سے متعلق شکایات درج کرنے کیلیے استعمال کر سکیں گے۔

    تقریب سے خطاب کرتے ہوئے چیئرمین اوگرا مسرور خان نے کہا کہ اس سفر کا آغاز اگست 2024 میں اوگرا اور ایف بی آر کے درمیان بات چیت کیساتھ ہوا۔ راہ گزر ایپ کا آغاز ایک وسیع تر ٹریک اینڈ ٹریس سسٹم کا پہلا مرحلہ ہے۔ اس کا مقصد احتساب کو فروغ دینا، غیر قانونی سرگرمیوں کو روکنا اور تیل کی صنعت کی سالمیت کو بڑھانا ہے۔

    ان کا کہنا تھا کہ ’’راہ گزر ‘‘ ایپ کا آغاز اوگرا کے موثر طرز حکمرانی اور شفاف جوابدہ توانائی کے ماحولیاتی نظام کی عکاسی کرتا ہے۔ یہ قدم غیر قانونی پٹرول پمپس اور بدعنوانی سے متعلق درپیش چیلنجوں سے نمٹنے کیلیے گیم چینجر کا کام کرے گا۔

  • قومی اسمبلی میں پیکا ایکٹ میں ترمیم کا متنازع بل منظور کر لیا گیا

    قومی اسمبلی میں پیکا ایکٹ میں ترمیم کا متنازع بل منظور کر لیا گیا

    اسلام آباد: قومی اسمبلی میں پیکا ایکٹ میں ترمیم کا متنازع بل منظور کر لیا گیا۔

    پیکا ایکٹ میں ترمیم کا متنازع بل وفاقی وزیر رانا تنویر نے پیش کیا تھا، نئی شق 1 اے کے تحت سوشل میڈیا پروٹیکشن اینڈ ریگولیٹری اتھارٹی قائم ہوگی، جو سوشل میڈیا کے پلیٹ فارم کی سہولت کاری کرے گی۔

    متنازع ترمیمی بل کے مطابق یہ اتھارٹی سوشل میڈیا صارفین کے تحفظ اور حقوق کو یقینی بنائے گی، اور سوشل میڈیا پلیٹ فارمز کی رجسٹریشن، اس کی منسوخی اور معیارات کی مجاز ہوگی۔

    ترمیمی بل کے مطابق پیکا ایکٹ خلاف ورزی پر اتھارٹی سوشل میڈیا پلیٹ فارم کے خلاف تادیبی کارروائی کر سکے گی، اور متعلقہ اداروں کو سوشل میڈیا سے غیر قانونی مواد ہٹانے کی ہدایت کی مجاز ہوگی، اور سوشل میڈیا پر غیر قانونی سرگرمیوں پر متعلقہ فرد 24 گھنٹے میں درخواست دینے کا پابند ہوگا۔

    بانی پی ٹی آئی نے مذاکرات ختم کرنے کا اعلان کر دیا ہے، بیرسٹر گوہر

    اتھارٹی کل 9 اراکین پر مشتمل ہوگی، سیکریٹری داخلہ، چیئرمین پی ٹی اے، چیئرمین پیمرا کے ایکس آفیشو اراکین ہوں گے، بیچلرز ڈگری ہولڈر، متعلقہ فیلڈ میں 15 سالہ تجربہ کار اتھارٹی کا چیئرمین تعینات کیا جا سکے گا، چیئرمین اور 5 اراکین کی تعیناتی 5 سالہ مدت کے لیے جائے گی۔

    حکومت نے سوشل میڈیا پروٹیکشن اینڈ ریگولیٹری اتھارٹی میں صحافیوں کو بھی نمائندگی دینے کا فیصلہ کیا ہے، 5 اراکین میں 10 سالہ تجربہ رکھنے والا صحافی، سافٹ ویئر انجینئر بھی شامل ہوں گے، اتھارٹی میں وکیل، سوشل میڈیا پروفیشنل نجی شعبے سے آئی ٹی ایکسپرٹ بھی شامل ہوگا، جب کہ اتھارٹی کا مرکزی دفتر اسلام آباد میں ہوگا جب کہ صوبائی دارالحکومتوں میں بھی دفتر قائم ہوگا۔

  • پاکستان چلی جاؤں گی! راکھی ساونت کی مودی کو دھمکی

    پاکستان چلی جاؤں گی! راکھی ساونت کی مودی کو دھمکی

    بھارتی اداکارہ راکھی ساونت نے نریندر مودی کو دھمکی دی ہے کہ اگر بھارت میں ٹک ٹاک سے پابندی نہیں ہٹائی تو پاکستان چلی جاؤں گی۔

    بھارتی میڈیا رپورٹس کے مطابق راکھی ساونت نے اپنے انسٹاگرام اکاؤنٹ پر ایک ویڈیو جاری کی جس میں وہ سوٹ کیس لیے ائیرپورٹ پر موجود ہیں۔ ویڈیو میں راکھی نے وزیر اعظم مودی کو مخاطب کرتے ہوئے کہا اگر بھارت میں ٹک ٹاک سے پابندی نہیں ہٹائی گئی تو میں پاکستان چلی جاؤں گی۔

    اداکارہ کا کہنا تھا کہ میں پاکستان جا کرشادی کرلوں گی، وہاں حلوہ پوری کھاؤں گی، اُنہوں نے کہا کہ پوری دنیا ٹک ٹاک سے پیسہ کما رہی ہے، بھارت میں لوگ بے روزگار بیٹھے ہیں۔

    اداکارہ نے کہا کہ مودی جی آپ بھی ٹرمپ کی طرح ٹک ٹاک سے پابندی ہٹائیں۔

    واضح رہے کہ 2020 میں مودی حکومت نے ڈیٹا سکیورٹی کے خدشات کے پیش نظر ٹک ٹاک سمیت 58 دیگر چینی ملکیتی ایپس پر پابندی عائد کر دی تھی۔

    اس سے قبل بھارتی اداکارہ راکھی کے اوپن چیلنج پر پاکستانی اداکارہ ہانیہ عامر کا ’کیوٹ‘ ردعمل آگیا ہے۔

    بالی وڈ کی متنازع اداکارہ نے پاکستانی اداکارہ ہانیہ عامر دیدار اور نرگس کو ڈانس چیلنج کیا تھا، راکھی نے کہا تھا کہ پاکستانی اداکارہ ہانیہ عامر، نرگس اور دیدار کو اوپن ڈانس چیلنچ کرتی ہوں۔

    راکھی نے انٹرویو میں کہا تھا کہ میں انڈیا کی نمبر ون ڈانسر ہوں میں ہانیہ عامر دیدار اور نرگس کو ڈانس میں شکست دے سکتی ہوں کیونکہ میں 24 گھنٹے ڈانس کرسکتی ہوں۔

    راکھی کا انٹرویو سوشل میڈیا پر خوب وائرل ہوا جس کے بعد پاکستانی اداکارہ ہانیہ عامر پر اس پر رعمل دیے بغیر نہیں رہ سکیں اور راکھی کی آواز میں ریل بنا ڈالا۔

    پاکستانی اداکارہ ہانیہ عامر نے راکھی ساونت کے چیلنج سے نمٹنے کا سب سے مشہور طریقہ استعمال کیا، ہانیہ عامر نے ہمیشہ کی طرح میک اپ کرواتے ہوئے ویڈیو بنائی اور راکھی کے الفاظ پر بھرپور ایکسپریشن دیتی نظر آئیں۔

    پوسٹ کے کیپشن میں ہانیہ عامر نے راکھی کیلئے محبت بھرا پیغام لکھا کہ ’راکھی جی ایک آئیکون ہیں‘، ہانیہ عامر کی اس ویڈیو کے کمنٹ سیکشن میں پاکستانی اور بھارتی فینز کی جانب سے دلچسپ تبصروں کا سلسلہ جاری ہے۔

  • سرحد پر سیکیورٹی فورسز کی بڑی کامیابی، افغانستان سے غیرملکی اسلحے کی بڑی کھیپ اسمگل کرنے کی کوشش ناکام

    سرحد پر سیکیورٹی فورسز کی بڑی کامیابی، افغانستان سے غیرملکی اسلحے کی بڑی کھیپ اسمگل کرنے کی کوشش ناکام

    پاک افغان سرحد پر سیکیورٹی فورسز نے افغانستان سے غیر ملکی اسلحے کی بڑی کھیپ پاکستان میں اسمگل کرنے کی کوشش ناکام بنا دی۔

    سیکیورٹی ذرائع نے پاک افغان سرحد پر سیکیورٹی فورسز نے بڑی کارروائی کرتے ہوئے افغانستان سے غیر ملکی اسلحے کی بڑی کھیپ پاکستان میں اسمگل کرنے کی کوشش ناکام بنا دی۔

    ذرائع کے مطابق سیکیورٹی فورسز نے 8 جنوری 2025 کو پاک افغان سرحد سے متصل غلام خان بارڈر ٹرمینل پر اسلحہ بردار ٹرک قبضے میں لیا تھا جس سے جدید ساخت کا غیر ملکی اسلحہ اور میگزین برآمد کر لیے گئے۔

    سیکیورٹی ذرائع کے مطابق 26ایم 16 رائفلیں، ایم16 اور ایم 4 رائفلز کے 292 میگزین شامل ہیں، برآمد اسلحہ کیساتھ 10 ہزار سے زائد گولیاں بھی شامل ہیں، اس کے علاوہ لائٹ مشین گن کی 744گولیاں اور بڑی تعداد میں لنکرز بھی برآمد کر لیے گئے۔

    سیکیورٹی ذرائع کا کہنا ہے کہ برآمد کیا گیا اسلحہ ٹرک میں ڈرائیور کیبن میں خفیہ طور پر چھپایا گیا تھا، افغان ٹرک میں پوشیدہ کمپارٹمنٹس، سامان کی پیکنگ افغانستان میں ہوئی، برآمد ہتھیار،گولہ بارود پاکستان میں دہشتگردی کیلئے استعمال ہونا تھا۔

    ذرائع کے مطابق اس سے پہلے بھی فتنہ الخوارج کے خارجیوں سے غیر ملکی اسلحہ برآمد ہوا، غیر ملکی اسلحہ افغان سرزمین کے پاکستان کیخلاف استعمال ہونے کا ثبوت ہے۔

  • پاکستان میں قحط پڑنے کا خطرہ ہے، سرکاری ادارے نے خبردار کر دیا

    پاکستان میں قحط پڑنے کا خطرہ ہے، سرکاری ادارے نے خبردار کر دیا

    اسلام آباد: پاکستان میں معمول سے کم بارشوں کے باعث خشک سالی کے خطرے کا انتباہ جاری کیا گیا ہے۔

    تفصیلات کے مطابق محکمہ موسمیات نے ملک کے بیش تر علاقوں میں کم بارشوں کی وجہ سے خشک سالی جیسی صورت حال کا انتباہ جاری کر دیا ہے۔

    محکمہ موسمیات کے مطابق یکم ستمبر 2024 سے 15 جنوری 2025 کے درمیان معمول سے 40 فی صد کم بارشیں ہوئیں، سندھ میں بارشیں معمول سے 52 فی صد، بلوچستان میں 45 فی صد اور پنجاب میں 42 فیصد کم بارشیں ہوئیں۔

    معمول سے کم بارشوں کے باعث ملک میں خشک سالی کا خدشہ پیدا ہو گیا ہے، اگر جلد بارشوں کا سلسلہ شروع نہ ہوا تو خشک سالی کے حالات مزید بڑھنے کا خدشہ ہے۔

    دوسری طرف ملک بھر میں سردی کی لہر برقرار ہے، محکمہ موسمیات نے کشمیر اور بلتستان میں بارش اور پہا ڑوں پر برف باری کی پیش گوئی کی ہے، بالائی علاقوں میں بارش اور برف باری سے سردی بڑھ گئی ہے۔

    اسکردو میں درجہ حرارت منفی 5 ریکارڈ کیا گیا۔ کالام میں 9 انچ تک برف پڑ چکی ہے۔ مالم جبہ میں 7 انچ تک برف باری نے پارہ منفی 4 تک گرا دیا۔ گلگت میں درجہ حرارت صفر، کوئٹہ میں 1، مظفر آباد 3، اسلام آباد 4، پشاور 5 اور لاہور میں 10 ڈگری ریکارڈ کیا گیا۔ کراچی میں درجہ حرارت 13.5 ڈگری سینٹی گریڈ رہا۔