اسلام آباد: پاکستان کے نقل و حمل کے شعبے میں باہمی تعاون کے لیے این ایل سی اور ڈی پی ورلڈ کے مابین مفاہمت کی یادداشت پر دستخط کیے گئے ہیں۔
تفصیلات کے مطابق ڈائریکٹرجنرل این ایل سی (نیشنل لاجسٹک سیل) اور اماراتی لاجسٹک کمپنی ڈی پی ورلڈ کے چیف ایگزیکٹو آفیسر شیخ سلطان احمد نے ایم او یو پر دستخط کیے، این ایل سی اور ڈی پی ورلڈ کے سینئر حکام، چیمبرز آف کامرس کے نمائندگان اور معروف کمپنیوں کے عہدے داران بھی اس موقع پر موجود تھے۔
ڈی پی ورلڈ اور این ایل سی پاکستان کے نقل و حمل کے شعبے میں باہمی تعاون کے امکانات کا جائزہ لیں گے، جن میں کنٹینر اور بلک ٹرمینلز، رول آن، رول آف خدمات، ڈرائی پورٹس، اندرون ملک کنٹینر ڈپو، ریل اور ٹریکنگ شامل ہیں۔
ڈائریکٹر جنرل این ایل سی نے کہا کہ اداروں میں مفاہمت سے پاکستان کی لاجسٹکس صنعت میں نئے دور کا آغاز ہوگا، سرمایہ کاری اور روزگار کے مواقع پیدا ہونے سمیت کاروباری سرگرمیوں کو بھی فروغ ملے گا۔
اس موقع پر سربراہ ڈی پی ورلڈ کا کہنا تھا کہ پاکستان جغرافیائی محل وقوع کی وجہ سے وسطی ایشیا کے لیے اہم ترین راہداری ہے۔
