پاکستان نے اقوام متحدہ کی سلامتی کونسل میں بھارت کو کرارا جواب دیا ہے، سفارتکار ربیعہ اعجاز نے بھارتی ریاستی دہشتگردی کا مکروہ چہرہ بے نقاب کیا۔
سفارتکار ربیعہ اعجاز نے کہا مقبوضہ کشمیر میں معصوم بچے بھارتی جبر و تشدد برداشت کررہے ہیں، کشمیری بچے دہشت، صدمے اور جبر کے سائے تلے پروان چڑھ رہے ہیں۔
انہوں نے کہا کہ بھارت نے پاکستان سمیت دنیا بھر میں دہشتگردی کی سرپرستی کی، آرمی پبلک اسکول اور خضدار میں اسکول وین پر حملے معصوم بچے شہید ہوئے۔
ربیعہ اعجاز نے کہا کہ پاکستان نے بھارتی ریاستی دہشت گردی کے ٹھوس ثبوت فراہم کیے ہیں، اقوام متحدہ کی قراردادوں کے مطابق مسئلہ کشمیر حل کیا جائے۔
واضح رہے کہ سیکنڈ سیکرٹری پاکستان مشن ربیعہ اعجاز نے بھارتی مندوب کے خطاب پر اپنا حق جواب دہی استعمال کیا۔
https://urdu.arynews.tv/pakistan-ready-to-assume-presidency-of-un-security-council/
دوسری جانب پاکستان اگلے ماہ اقوام متحدہ کی سلامتی کونسل کی صدارت سنبھالے گا، سفیر عاصم افتخار احمد نے اقوام متحدہ کے سیکرٹری جنرل سے ملاقات کرکے پاکستان کی سلامتی کونسل کی صدارت کے دوران پروگرام آف ورک سے آگاہ کیا۔
سفیر عاصم افتخار احمد نے مشرق وسطیٰ کی بگڑتی ہوئی صورتحال، افریقہ، یورپ، ایشیا اور لاطینی امریکہ میں ہونے والی پیش رفت اور اقوام متحدہ کی امن مشنز کے ذریعے سلامتی کونسل کے مقاصد کے فروغ میں ان کے کردار پر بھی گفتگو کی۔
اس موقع پر سفیر عاصم افتخار احمد نے کہا کہ تنازعات کے پرامن حل کے ذریعے عالمی امن و سلامتی کے فروغ کے لیے رکن ممالک کے درمیان مضبوط عزم موجود ہے۔
