Tag: pakistani-doctors

ریاض : کورونا وائرس کی تباہ کاریوں سے قبل سعودی عرب سے چھٹیوں پر پاکستان جانے والے ڈاکٹرز اور پیرا میڈیکل اسٹاف اب اپنے اہل خانہ کے ہمراہ واپس سعودی عرب پہنچ گئے۔

تفصیلات کے مطابق سعودی عرب میں پاکستانی سفارت خانے کے مطابق کوورنا وائرس پھیلنے سے پہلے چھٹیوں پر جانے والے پاکستانی ڈاکٹرز اور طبی عملے کے ارکان واپس مملکت پہنچ گئے ہیں۔ یہ ڈاکٹر بین الاقوامی پروازیں معطل ہونے کے بعد باعث پاکستان میں پھنس گئے تھے۔

اس حوالے سے پاکستانی سفارت خانے کے حکام نے تصدیق کی ہے کہ 300 پاکستانی ڈاکٹرز، طبی عملے ا ور ان کے اہل خانہ گزشتہ ہفتے سعودی ائیر لائنز کے ذ ریعے مملکت پہنچے ہیں۔

حکام کے مطابق 200 پاکستانی ڈاکٹرز اور اہل خانہ جولائی کے دوسرے ہفتے واپس آنے والے ہیں۔ یاد رہے کہ اس سے قبل اپریل 2020 میں پاکستانی سفارتخانے نے سعودی عرب کی وزارت خارجہ کے ساتھ یہ مسئلہ اٹھایا تھا کہ وہ کورونا بحران کے سلسلے میں جاری کوششوں میں مدد کے لیے پاکستانی ڈاکٹروں کو سعودی عرب واپس جانے کی اجازت دی جائے۔

پاکستان ڈاکٹرز گروپ ریاض نے کورنا وبا کی وجہ سے پاکستان میں پھنسے ڈاکٹروں کی سعودی عرب واپسی کے لیے کردار ادا کرنے پر ریاض میں پاکستان کے سفیر کا شکریہ ادا کیا ہے۔

پی ڈی آر جی کا ایک بیان میں کہنا تھا کہ سفیر پاکستان کی جانب سے ڈاکٹروں کی واپسی کے لیے کردار قابل تحسین ہے، بیان کے مطابق پاکستان میں پھنسے کچھ ڈاکٹر واپس اپنی ڈیوٹیوں پر آچکے ہیں۔

بیان میں کہا گیا ہے کہ پاکستانی ڈاکٹرز اور ان کے خاندان کی واپسی کے لیے کوششیں کرنے پر سفیر پاکستان کے مشکور ہیں۔
پی ڈی آر جی نے امید ظاہر کی ہے کہ سفیر پاکستان کی کوششوں سے باقی ڈاکٹروں کی واپسی بھی جلد ممکن ہو سکے گی۔