ARYNews.tv | Urdu – Har Lamha Bakhabar

Tag: Palestinian

  • فلسطین کو معاشی طور پر مستحکم کرنے کا منصوبہ سامنے آگیا

    فلسطین کو معاشی طور پر مستحکم کرنے کا منصوبہ سامنے آگیا

    (20 جولائی 2025): ماہر مصنف مائیکل بیرن نے غزہ کو معاشی طور پر مستحکم کرنے کا منصوبہ پیش کردیا ہے۔

    برطانوی میڈیا دی گارڈین کی رپورٹ کے مطابق فلسطین کے غیر استعمال شدہ گیس کے ذخائر پر ایک نئی کتاب کے مصنف مائیکل بیرن نے تجویز پیش کی ہے کہ فلسطین گیس ذخائر سے معاشی طور پر مستحکم ہوسکتا ہے۔

    غزہ کے گیس ذخائر پر کام کرنے والے ماہر مائیکل بیرون کا کہنا ہے فلسطین کو تسلیم کیا جاتا ہے تو ریاست گیس کے وسائل کو ترقی دے سکتی ہے۔

    انہوں نے کہا کہ گیس کے وسائل سے فائدہ اٹھا کر فلسطین امداد پر انحصارکے بجائے خود مضبوط ہوسکتا ہے، غزہ کی سمندری حدود میں گیس کے ذخائر کا تخمینہ 1.4 ٹریلین کیوبک فٹ لگایا گیا، جس سے فلسطینی اتھارٹی کو ساڑھے 4 ارب ڈالر کی آمدن ہوسکتی ہے اور اس سے غزہ کی اقتصادی حالت پلٹ سکتی ہے۔

    مائیکل بیرن نے کہا کہ آئندہ پندرہ سال میں فلسطین کو گیس سے 100 ملین ڈالر تک آمدن ہوسکتی ہے۔

     اوسلو معاہدے کے تحت فلسطینی انتظامیہ کو بیس ناٹیکل میل کی سمندری حدود تک قدرتی وسائل اور معدنیات پر اختیار دیا گیا تھا لیکن 30 اکتوبر کو اسرائیل نے برٹش پٹرولیم اور اطالوی کمپنی سمیت تیل اور گیس کےکاروبار سے متعلق 6 بین الاقوامی کمپنیوں کو بارہ لائسنس جاری کردیے۔

  • اسرائیلی بمباری کے دوران سائیکل پر بھاگتے فلسطینی نوجوان کی ویڈیو وائرل

    اسرائیلی بمباری کے دوران سائیکل پر بھاگتے فلسطینی نوجوان کی ویڈیو وائرل

    غزہ میں اسرائیلی فوج کی جانب سے بربریت کا سلسلہ جاری ہے، ایسے میں ایک فلسطینی نوجوان کی ویڈیو سوشل میڈیا پر وائرل ہورہی ہے جو اسرائیلی بمباری سے بچنے کے لئے سائیکل پر بھاگ کر اپنی جان بچانے کی کوششوں میں مصروف ہے۔

    الجزیرہ کی جانب سے ایک ویڈیو شیئر کی گئی ہے جس میں واضح طور پر دیکھا جاسکتا ہے کہ اسرائیلی بمباری کے بعد ایک عمارت زمیں بوس ہو جاتی ہے۔ اس دوران ایک ایک فلسطینی نوجوان اپنی سائیکل پر اس جگہ سے گزر رہا ہوتا ہے اور ملبے سے بچنے کی کوشش کرتا ہے، مگر شدید بمباری کے نتیجے میں وہ سائیکل سے نیچے گر جاتا ہے۔

    رپورٹس کے مطابق ویڈیو کے اگلے حصے میں ہر طرف دھواں چھا جاتا ہے اور نوجوان کی حالت واضح نہیں ہو پاتی۔

    رپورٹس کے مطابق یہ حملہ شمالی غزہ کے علاقے ابو اسکندر میں کیا گیا تھا، تاہم ابھی تک یہ معلوم نہیں ہو سکا کہ متاثرہ نوجوان محفوظ رہا یا زخمی ہو گیا۔

    رپورٹس کے مطابق یہ ویڈیو فلسطینی عوام کی مشکلات اور اسرائیلی جارحیت کی شدت کو دنیا کے سامنے لانے کا ذریعہ بن گئی اور سوشل میڈیا پر شدید ردِ عمل کا سلسلہ شروع ہوگیا ہے۔

    واضح رہے کہ غزہ میں اسرائیلی فوج کی وحشیانہ بمباری کا سلسلہ جاری ہے، تازہ حملوں میں مزید 72 فلسطینی جام شہادت نوش کرگئے۔

    عرب میڈیا کے مطابق گزشتہ روز اسرائیل کی جانب سے شمالی غزہ کے علاقے جبالیہ میں ایک پناہ گزین اسکول پر وحشیانہ بمباری کی گئی، جس کے نتیجے میں متعدد فلسطینی شہید ہوگئے۔

    نیدرلینڈز میں غزہ کے شہید بچوں کے حق میں منفرد احتجاج

    رپورٹس کے مطابق غزہ میں امداد کے منتظر فلسطینیوں پر بھی حملہ ہوا۔ اتوار کو اسرائیلی حملوں میں مجموعی طور پر 72 فلسطینی شہید ہوئے۔

  • اسرائیلی فورسز نے بچے سمیت 2 فلسطینیوں کو گولیاں مار کر شہید کر دیا

    اسرائیلی فورسز نے بچے سمیت 2 فلسطینیوں کو گولیاں مار کر شہید کر دیا

    رام اللہ: اسرائیلی فوجیوں نے مغربی کنارے کے ایک علاقے میں بچے سمیت 2 فلسطینیوں کو گولیاں مار کر شہید کر دیا۔

    تفصیلات کے مطابق صہیونی فورسز نے مغربی کنارے کے شہر أریحا میں پناہ گزین کیمپ عقبۃ جبر پر دھاوا بولا اور گھر گھر تلاشی کی آڑ میں دو نوجوانوں کو انتہائی قریب سے سینے میں گولیاں مار دیں۔

    شہید ہونے والے نوجوانوں کی شناخت 25 سالہ محمد نجوم اور 16 سالہ قصی الولجی کے ناموں سے ہوئی ہے۔

    واضح رہے کہ رواں سال اب تک اسرائیلی فورسز 220 سے زائد فلسطینی نوجوانوں کو شہید کر چکی ہے، جب کہ رواں ماہ اگست میں اب تک 12 فلسطینیوں کو شہید کیا جا چکا ہے۔

  • اسرائیلی فورسز نے 22 سالہ فلسطینی نوجوان کو شہید کردیا

    اسرائیلی فورسز نے 22 سالہ فلسطینی نوجوان کو شہید کردیا

    سیہونی فورسز نے پناہ گزین کیمپ پر تلاشی کے دوران نوجوان پر اندھا دھند فائرنگ کر دی، فائرنگ کے نتیجے میں 22 سالہ نوجوان شہید ہوگیا۔

    غیر ملکی میڈیا رپورٹ کے مطابق مقامی طبی ماہرین نے بتایا کہ 22 سالہ محمد جوابریح کو جمعرات کی سہ پہر ہیبرون کے شمال میں واقع عروب پناہ گزین کیمپ میں تصادم کے دوران سر میں گولی لگی تھی، اور جمعہ کو صبح ہونے سے پہلے زخموں کی تاب نہ لاتے ہوئے چل بسا۔

    مقبوضہ بیتِ المقدِس میں ہزاروں فلسطنیوں نے نوجوان بوابریح کی نمازِ جنازہ میں شرکت کی، دوسری جانب راملہ میں دو فلسطینی نوجوانوں کو زدوکوب کیا۔

    فلسطینی اور اسرائیلی فورسز کے درمیان جھڑپیں بھی ہوئی اس دوران صیہونی فوج نے آنسو گیس کی شیلنگ کر دی، صورتحاک کی وڈیو بنانے پر اسرائیلی فوجیوں نے ایک فلسطینی صحافی پر بندوقیں تان لیں اور  مارنے کی دھمکی دیتے رہے۔

    واضح رہے کہ رواں سال اب تک قابض اسرائیلی فوج 64 فلسطینیوں کو شہید کر چکے ہیں۔

  • اسرائیلی فورسز نے مزید 7 فلسطینیوں کو گولی مار کر شہید کر دیا

    اسرائیلی فورسز نے مزید 7 فلسطینیوں کو گولی مار کر شہید کر دیا

    رام اللہ: اسرائیلی فورسز نے مغربی کنارے میں چھاپے کے دوران مزید 7 فلسطینیوں کو گولی مار کر شہید کر دیا۔

    غیر ملکی میڈیا رپورٹس کے مطابق مشرقی مقبوضہ مغربی کنارے میں اسرائیلی فورسز نے یریحو پر چھاپے کے دوران سات فلسطینیوں کو گولی مار کر شہید کر دیا ہے۔

    چھاپا پیر کی صبح عاقبت جبر پناہ گزیش کیمپ میں بڑے پیمانے پر مارا گیا، جو کہ ایک ہفتے سے زیادہ عرصے سے اسرائیلی فورسز کے محاصرے میں ہے۔

    اسرائیلی فوج نے ایک بیان میں کہا کہ اس نے مجموعی طور پر سات افراد کو مارا ہے، جن میں 28 جنوری کو یریحو میں فائرنگ کے حملے کی کوشش کے دو ذمہ دار اور پانچ دیگر شامل ہیں۔

    فلسطینی وزارت صحت نے واقعے کی تصدیق کرتے ہوئے کہا ہے کہ پناہ گزین کیمپ میں اسرائیلی فورسز نے چھاپے کے دوران نوجوانوں پر سیدھی گولیاں چلائیں، رواں برس اب تک صہیونی فورسز 43 نہتے فلسطینیوں کو شہید کر چکی ہے۔

    بتایا گیا کہ فلسطینی نوجوان چھاپے کے وقت وہاں کھڑے تھے، فورسز نے انھیں اغوا کیا اور پھر گولیاں ماریں۔ 4 فلسطینی ایک ہی خاندان سے تھے۔

    پانچ شہید فلسطینیوں کی شناخت 21 سالہ رفعت اوادات، 22 سالہ ملک لافی، 22 سال ادھم اویدات، 27 سالہ ابراہیم اویدات، 28 سالہ طاہر اوادات کے ناموں سے ہوئی ہے۔

    یاد رہے کہ 4 فروری کو بھی اسرائیلی فورسز نے یریحو میں عاقبت جبر پناہ گزین کیمپ پر چھاپا مارا تھا، جس پر کیمپ کے مکینوں کے ساتھ جھڑپیں شروع ہوگئیں، فورسز نے گولیاں مار کر 6 فلسطینیوں کو زخمی اور چھ فلسطینیوں کو گرفتار کیا تھا۔

  • جینین میں اسرائیلی فورسز نے فلسطینیوں پر قیامت ڈھا دی، 9 شہید

    رام اللہ: فلسطین میں قابض اسرائیلی فورسز کی جارحیت جاری ہے، جینین میں اسرائیلی فورسز کی فائرنگ سے مزید 9 فلسطینی شہید ہو گئے۔

    تفصیلات کے مطابق اسرائیلی فوجیوں نے شمالی مقبوضہ مغربی کنارے کے جنین پناہ گزین کیمپ میں جاری بڑے پیمانے پر چھاپے اور اس کے نتیجے میں مسلح جھڑپوں کے دوران نو فلسطینیوں کو شہید اور ایک درجن سے زائد کو زخمی کر دیا ہے۔

    فلسطینی حکام کا کہنا ہے کہ صبح کے وقت چھاپے کے دوران فائرنگ سے شہید ہونے والوں میں ایک معمر خاتون بھی شامل ہے، جب کہ 16 افراد گولہ بارود سے زخمی ہو گئے ہیں جن میں سے کئی فلسطینیوں کی حالت نازک ہے۔

    حکام کے مطابق شہید ہونے والے شہید والوں میں سے اب تک صرف دو کی شناخت ہو سکی ہے، جن میں سے ایک 24 سالہ صائب عصام زریقی اور دوسرا 17 سالہ علی تھا، صحت حکام کا کہنا ہے کہ زخمیوں کے اسپتال منتقلی کے دوران اسرائیلی فورسز نے ایمبولینسوں اور طبی عملے کے کام میں رکاوٹیں کھڑی کیں۔

    جینین کے سرکاری اسپتال کے سربراہ وسام بکر نے الجزیرہ کو بتایا کہ زخمیوں کی تعداد دیکھ کر لگ رہا ہے کہ اس سے پہلے اتنا بڑا حملہ نہیں کیا گیا، ایمبولینس ڈرائیور نے شہدا کے پاس جانے کی کوشش کی تو اسرائیلی فورسز نے ایمبولینس پر براہ راست گولی چلائی اور اسے قریب آنے سے روک دیا۔

    بکر نے کہا کہ اسرائیلی فورسز نے اسپتال کی طرف بھی آنسو گیس فائر کیے جو بچوں کے حصے میں گرے، جس سے بچوں کی حالت خراب ہو گئی۔

    اسرائیلی فوج نے بھی تصدیق کی ہے کہ جمعرات کو جینین میں ایک آپریشن کیا گیا، اسرائیلی فورسز نے بڑے پیمانے پر چھاپا مارا اور خفیہ فورسز، درجنوں بکتر بند گاڑیوں اور اسنائپرز کے ساتھ صبح سویرے کیمپ کا محاصرہ کیا گیا، شہری آبادی پر ڈرون حملے کی بھی اطلاعات ہیں، اس دوران فلسطینی مزاحمت کاروں کے ساتھ مسلح جھڑپیں شروع ہو گئیں۔

    رپورٹس کے مطابق اسرائیلی فورسز نے بڑے پیمانے پر شفاعت پناہ گزین کیمپ پر دھاوا بولا تھا، اور طاقت کا بے جا استعمال کرتے ہوئے گھروں میں خوب تور پھوڑ کی، جس پر فلسطینی نوجوانوں نے مزاحمت کرتے ہوئے پتھراؤ کیا۔

  • صہیونی فورسز کے ہاتھوں مغربی کنارے میں ایک اور فلسطینی شہید

    رام اللہ: صہیونی فورسز نے مغربی کنارے میں ایک اور فلسطینی کو شہید کر دیا۔

    تفصیلات کے مطابق فلسطینی وزارت صحت نے ہفتے کے روز کہا ہے کہ اسرائیلی فوجیوں نے 42 سالہ طارق معالی کو رام اللہ شہر میں گولی مار دی۔

    مغربی کنارے میں اسرائیلی فورسز کے ظلم میں بے پناہ اضافہ ہو گیا ہے، جہاں رواں ماہ فوج کے ہاتھوں شہید ہونے والوں کی تعداد 18 ہو گئی ہے، جن میں 4 بچے بھی شامل ہیں۔

    اقوامِ متحدہ کی رپورٹ کے مطابق اسرائیلی فورسز نے گزشتہ سال 30 بچوں سمیت 171 فلسطینیوں کو شہید کیا تھا۔

    فلسطینی وزارت صحت کے مطابق طارق معالی فلسطینی گاؤں کفر نامہ کے قریب قابض اسرائیلی فورسز کی فائرنگ سے شہید ہوئے، تاہم اسرائیلی فوج نے دعویٰ کیا ہے کہ فلسطینی شخص نے آبادکار یہودی باشندوں کو چاقو مارنے کی کوشش کی تھی۔

    اسرائیلی فوج کی جانب سے ایک سی سی ٹی وی فوٹیج بھی جاری کی گئی ہے، جس میں ایک شخص کو یہودی آبادکاروں کے ایک فارم کے داخلی دروازے سے بھاگتے ہوئے دکھایا گیا ہے، فورسز نے کہا کہ فلسطینی کو گولی ایک یہودی آبادکار نے ماری۔

    یاد رہے کہ جمعرات کو بھی الجزیرہ کے مطابق، چھ بچوں کے والد اور ایک مقامی اسکول کے استاد 57 سالہ جواد فرید باوقنیہ کو جنین پناہ گزین کیمپ میں ایک 28 سالہ نوجوان ادھم جبارین کے ساتھ گولی مار کر شہید کیا گیا تھا۔

    جیسا کہ اسرائیلی فوج نے دعویٰ کیا ہے کہ طارق معالی کو یہودی آبادکار نے گولی ماری تھی، اسی طرح یہودی آبادکاروں کی جانب سے بھی فلسطینیوں پر حملوں کے واقعات میں اضافہ ہو گیا ہے، 10 دن قبل مغربی کنارے کے العوجہ پہاڑی علاقے میں فلسطینی ہائیکرز پر آبادکاروں نے حملہ کیا تھا، جس کی ویڈیو بھی سوشل میڈیا پر وائرل ہوئی تھی۔

  • قبلہ اول میں اسرائیلی بربریت جاری، 2 اور نوجوان شہید کر دیے

    قبلہ اول میں اسرائیلی بربریت جاری، 2 اور نوجوان شہید کر دیے

    مغربی کنارہ: قبلہ اول میں اسرائیلی بربریت جاری ہے، اسرائیلی فورسز نے 2 اور فلسطینی نوجوانوں کو شہید کر دیا۔

    الجزیرہ کے مطابق فلسطینی وزارت صحت نے کہا ہے کہ اسرائیلی فورسز نے مقبوضہ مغربی کنارے میں الگ الگ واقعات میں دو فلسطینی نوجوانوں کو گولی مار کر شہید کر دیا ہے۔

    وزارت صحت نے جمعے کے روز بتایا کہ ایک 14 سالہ نوجوان عادل ابراہیم داؤد کو شمالی مغربی کنارے کے شہر قلقیلیہ میں گولی مار دی گئی اور دوسرے 17 سالہ نوجوان مہدی لدادویہ کو رام اللہ کے قریب المزرعہ الغربیہ گاؤں میں گولی ماری گئی۔

    اسرائیلی فورسز نے زخمی ہونے والے نوجوان کو طبی امداد دینے پر پیرامیڈکل اسٹاف کو بھی تشدد کا نشانہ بنایا۔

    دوسری جانب اسرائیلی فوج نے دعویٰ کیا ہے کہ وہ جمعہ کے روز قلقیلیہ کے قریب معمول کی سرگرمیاں کر رہی تھی، جب ایک مشتبہ شخص نے فورسز پر آتش گیر مادے سے بھری بوتل پھینک دی، جس کا جواب میں اس پر براہ راست فائرنگ کی گئی۔

    فلسطینی خبر رساں ایجنسی وفا نے اطلاع دی ہے کہ علاقے میں فلسطینیوں اور اسرائیلی فوج کے درمیان جھڑپیں ہوئیں، المزرعہ الغربیہ میں عینی شاہدین نے بتایا کہ اسرائیلی فوجیوں نے اسرائیلی آباد کاروں کے ساتھ تصادم کے دوران رہائشیوں پر فائرنگ کی جس سے ایک 17 سالہ فلسطینی پیٹ میں گولی لگنے سے شہید اور دوسرا زخمی ہو گیا۔

  • غزہ میں تباہی : ہزاروں فلسطینی اسکولوں میں پناہ لینے پر مجبور

    غزہ میں تباہی : ہزاروں فلسطینی اسکولوں میں پناہ لینے پر مجبور

    غزہ سٹی : اسرائیلی جنگی طیاروں نے رات کی تاریکی میں غزہ کے علاقوں کو اپنے میزائلوں کا نشانہ بنایا، فوج نے وحشیانہ کارروائی کے بعد مغربی کنارے کو ہلا کر رکھ دیا۔ بے آسرا لوگ اسکولوں اور مساجد میں پناہ لینے پر مجبور ہوگئے۔

    اقوام متحدہ کی ایک رپورٹ میں انکشاف کیا گیا ہے کہ 52،000 فلسطینی اقوام متحدہ کی ریلیف اینڈ ورک ایجنسی کے زیر انتظام اسکولوں میں پناہ لے چکے ہیں۔ اقوام متحدہ کی رابطہ برائے انسانی امور آفس (او سی ایچ اے) نے بتایا کہ اسرائیل کے جنگی طیاروں 10 مئی سے اب تک غزہ میں 448 تعمیرات کو تباہ کر چکے ہیں۔

    اقوام متحدہ کے ایک ادارے نے کہا ہے کہ غزہ میں اسرائیل کی بمباری کے نتیجے میں اب تک 52 ہزار سے زیادہ فلسطینی بے گھر ہو چکے ہیں۔ یہ تمام افراد اقوام متحدہ کی ریلیف اینڈ ورک ایجنسی کے زیر انتظام اسکولوں میں پناہ لئے ہوئے ہیں۔

    غزہ میں اسرائیل کی جانب سے حالیہ بمباری 2014 کے بعد سے سب سے شدید حملہ ہے۔ حماس اور اسرائیل کے درمیان شروع ہوئے تازہ لڑائی کے 9 دن مکمل ہو چکے ہیں۔

    اقوام متحدہ کی رابطہ برائے انسانی امور آفس (او سی ایچ اے) نے بتایا کہ اسرائیل کے فضائی حملوں میں غزہ میں 448 عمارتیں یا تو مکمل طور پر تباہ ہوچکی ہیں یا انہیں بری طرح نقصان پہنچا ہے۔

    او سی ایچ اے کے ترجمان جینس لاؤرکے نے ایک بیان میں کہا ہے کہ 132 عمارتیں مکمل طور پر تباہ ہو چکی ہیں جب کہ 316 عمارتوں کو جزوی طور پر نقصان پہنچا ہے۔حملوں میں تباہ ہونے والی عمارتوں میں 6 اسپتال اور 9 طبی مراکز بھی شامل ہیں۔

    دریں اثنا غزہ میں سرکاری پریس دفتر نے بتایا کہ اسرائیلی جنگی طیاروں نے غزہ پٹی پر گذشتہ نو دنوں میں کم از کم 1،615 فضائی حملے کیے ہیں جن میں گھروں، عمارتوں، سرکاری اداروں اور بنیادی ڈھانچے کو نشانہ بنایا گیا۔

    اسرائیلی فوج نے ایک بیان میں کہا ہے کہ غزہ میں حماس کی زیر زمین سرنگوں پر بمباری کے لیے 60 لڑاکا طیارے بھیجے گئے۔ منگل کی صبح 35 منٹ کے اندر اسرائیلی طیاروں نے 100 سے زائد میزائل داغے۔

    اسی دوران غزہ سے حماس کے جنگجوؤں نے اسرائیلی قصبوں پر 100 سے زیادہ راکٹ فائر کیے، لیکن ان میں سے 70 راکٹوں کو اسرائیلی فضائی نظام نے ہدف تک پہنچنے سے قبل ہی تباہ کردیا۔

  • زخمیوں کی اسپتال منتقلی، مصر نے انسانیت کی اعلیٰ مثال قائم کردی

    زخمیوں کی اسپتال منتقلی، مصر نے انسانیت کی اعلیٰ مثال قائم کردی

    غزہ: مصر غزہ کے معصوم اور نہتے شہریوں کی مدد کے لئے سامنے آگیا، مصر نےانسانی ہمدردی کی بنیاد پر مظلوم فلسطینوں کیلئےاپنی سرحد کو کھول دیا ہے۔

    مصری میڈیا کے مطابق غزہ میں اسرائیل کے زمینی وفضائی حملوں میں زخمی فلسطینیوں کو مصر کےاسپتالوں میں منتقل کرنے کیلئے رفاہ بارڈر کھول دیا گیا ہے۔

    مصری حکام کےمطابق سرحد کھولنےکا فیصلہ فلسطینیوں سےاظہاریکجہتی کیلئےکیاگیا، سرحد کھولنے کے بعد مصر کی درجنوں ایمبولنسز غزہ میں موجود ہیں ،جو شدید زخمیوں کو مصر کے اسپتال منتقل کررہی ہیں۔

    واضح رہے کہ مصر سے فلسطینی خطے کو ملانے والی رفاہ بارڈر کراسنگ اکثر بند رکھی جاتی ہے، لیکن وقفے وقفے سے اسے ضرورت مندوں کیلئے کھول دیا جاتا ہے۔

    یہ بھی پڑھیں: غزہ: 10 سالہ فلسطینی بچی کی فریاد نے سب کو رُلا دیا

    دوسری جانب قابض اسرائیلی فورسز نے بربریت کا مظاہرہ کرتے ہوئے مزید 35 فلسطینیوں کو شہید کردیا ہے، جس کے بعد اسرائیلی جارحیت سے شہید فلسطینیوں کی تعداد 181 ہو گئی ہے۔

    اسرائیل کی وحشیانہ بمباری اور شیلنگ کے نتیجے میں اب تک 47 بچے اور 22 خواتین بھی شہید ہوچکے ہیں، گزشتہ روز غزہ کے الشاطی کیمپ پر اسرائیلی حملے میں ایک ہی خاندان کے 10 افراد شہید ہوئے تھے۔