قاہرہ: جماعت اسلامی کے رہنما سینیٹر مشتاق احمد نے دورہ مصر کے دوران اقوام متحدہ کے ادارہ برائے فلسطینی مہاجرین کی سربراہ سے ملاقات کی ہے۔
تفصیلات کے مطابق جماعت اسلامی کے رہنما سینیٹر مشتاق احمد خان فلسطینی شہریوں کی امداد کے سلسلے میں دورہ مصر پر ہیں، جہاں انھوں نے اقوام متحدہ کے ادارہ برائے فلسطینی مہاجرین کی سربراہ سحر الجبوری سے ملاقات کی، جس میں غزہ میں ریلیف سرگرمیوں پر تبادلہ خیال کیا گیا۔
مشتاق احمد خان نے کہا کہ غزہ میں 14 لاکھ افراد بے گھر اور ہزاروں محاصرے میں ہیں، ادارہ برائے فلسطینی مہاجرین کے 72 اہلکار مارے جا چکے ہیں۔
انھوں نے کہا کہ اقوام متحدہ کا ادارہ غزہ میں 23 لاکھ افراد کو خوراک فراہم کرتا تھا، اسرائیلی وحشیانہ کارروائیوں کے باعث غزہ کے عوام کے لیے امداد رک گئی ہے، سینیٹر مشتاق نے کہا کہ ہم نے ادارہ برائے مہاجرین کو بتایا کہ ہم پاکستان سے مدد لانا چاہتے ہیں، جس پر انھوں نے یقین دہانی کرائی کہ حالات بہتر ہوتے ہی پاکستان کی امداد وصول کی جائے گی۔
سینیٹر مشتاق احمد نے ہلال احمر مصر کے سی ای او ڈاکٹر رامی سے بھی ملاقات کی، سی ای او نے کہا کہ انسانی امداد پہنچانے کے لیے فوری سیز فائر ناگزیر ہے۔
