تل ابیب : رم اللہ کے علاقے میں فلسطینی نوجوان نے اسرائیلی شہریوں پر حملہ کردیا، جس کے نتیجے میں ایک شخص ہلاک جبکہ دو زخمی ہوگئے۔

تفصیلات کے مطابق مقبوضہ فلسطین کے علاقے رماللہ میں جمعرات کے روز تین اسرائیلی شہریوں کو حملہ کرکے زخمی کردیا تھا، جن میں 31 سالہ اسرائیلی شہری زخموں کی تاب نہ لاتے ہوئے اسپتال میں دم توڑ گیا ہے۔

برطانوی خبر رساں ادارے کا کہنا تھا کہ حملے میں زخمی ہونے والے دیگر دو اسرائیلی بھی اسپتال میں زیر علاج ہیں، جن میں 50 سالہ شخص کی حالت انتہائی تشویش ناک ہے، جبکہ دوسرے شخص کو معمولی زخم آئے تھے۔

اسرائیلی فورسز کے ترجمان کا کہنا ہے کہ حملہ آور نے اسرائیلی شہریوں پر فائرنگ کرکے قتل کرنے کی کوشش کی تھی، جس کے باعث ایک شخص ہلاک جبکہ دیگر دو افراد زخمی ہوگئے۔

غیر ملکی خبر رساں ادارے کا کہنا تھا کہ اسرائیلی فورسز کا خیال ہے کہ 17 سالہ فلسطینی حملہ آور رماللہ کے قریبی گاؤں کوبر میں روپوش ہے، جس کی گرفتاری کے لیے سیکیورٹی اہلکاروں کو کوبر روانہ کردیا ہے۔

برطانوی خبر رساں ادارے کے مطابق فلسطین کے آزادی پسند گروپ حماس کا کہنا ہے کہ اسرائیلی شہریوں پر حملہ کرکے نوجوان نے بہادری کا مظاہرہ کیا ہے، گذشتہ روز اسرائیل کے عام شہریوں پر ہونے والا حملہ بدھ کے روز غزہ میں شہید کیے گئے مجاہدین کا بدلہ تھا۔

اسرائیلی حکام کا کہنا ہے کہ اسرائیلی شہریوں پر چاقو کے وار، فائرنگ اور گاڑی سے کچل کر ہلاک کرنے کے واقعات سنہ 2015 سے اسرائیلی عرب اور فلسطینیوں کی جانب سے کیے جارہے ہیں، جس کے باعث درجنوں اسرائیلی شہری ان حملوں میں ہلاک ہوچکے ہیں۔

اسرائیلی حکام کی جانب سے فلسطین پر الزام عائد کیا گیا ہے کہ فلسطین اسرائیلی شہریوں پر ہونے والے حملوں کو مزید ہوا دے رہا ہے۔ اسرائلی شہریوں پر حملوں کی وجہ فلسطینی علاقوں پر کئی عشروں سے اسرائیلی قبضہ ہے۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں