Tag: Panahgah

لاہور: وزیر اعظم عمران خان کی ہدایات پر بے سہارا افراد کے لیے پنجاب کے 36 اضلاع میں 92 عارضی پناہ گاہیں قائم کردی گئیں جن میں 15 سو سے زائد بے گھر افراد کو منتقل کردیا گیا۔

تفصیلات کے مطابق وزیر اعظم عمران خان اور وزیر اعلیٰ پنجاب سردار عثمان بزدار کی ہدایات پر بے سہارا افراد کے لیے اقدامات کرتے ہوئے پنجاب کے 36 اضلاع میں 92 عارضی پناہ گاہیں قائم کردی گئیں۔

92 عارضی پناہ گاہوں میں 17 سو افراد کو منتقل کیا جا چکا ہے جنہیں کھانے پینے کی سہولت بھی دی جا رہی ہے۔ بہاولپور ڈویژن کے 3 اضلاع میں 8 پناہ گاہیں قائم کی گئی ہیں جن میں 241 افراد کو منتقل کیا گیا ہے۔

A temporary Panahgah has been setup urgently in Barakahu, on Prime Minister Imran Khan directive to provide shelter to the homeless people In this frigid weather.#PrimeMinisterImranKhan #PanahGah pic.twitter.com/mdvjFjLtaa

— Govt of Pakistan (@pid_gov) December 29, 2019

ڈیرہ غازی خان ڈویژن کے 4 اضلاع میں 5 پناہ گاہیں قائم کی ہیں، ان پناہ گاہوں میں 60 افراد کو منتقل کیا گیا ہے۔ فیصل آباد ڈویژن کے 4 اضلاع میں قائم کی جانے والی 16 پناہ گاہوں میں 563 افراد اور گوجرانوالہ ڈویژن کے 6 اضلاع میں قائم کی جانے والی 10 پناہ گاہوں میں 108 افراد کو منتقل کیا گیا ہے۔

اسی طرح لاہور ڈویژن کے 4 اضلاع میں 11 پناہ گاہیں قائم کی گئی ہیں جن میں 157 افراد کو منتقل کیا گیا ہے۔ ملتان ڈویژن کے 4 اضلاع کی 8 پناہ گاہوں میں 280 اور راولپنڈی ڈویژن کے 4 اضلاع کی 5 پناہ گاہوں میں 127 افراد کو منتقل کیا گیا ہے۔

ساہیوال ڈویژن کے 3 اضلاع میں 5 پناہ گاہیں قائم کی گئی ہیں جن میں 64 افراد کو رکھا گیا ہے جبکہ سرگودھا ڈویژن کے 4 اضلاع میں 24 پناہ گاہیں قائم کی گئی ہیں جن میں 100 افراد کو منتقل کر دیا گیا ہے۔

خیال رہے کہ وزیر اعظم عمران خان نے گزشتہ روز ہدایت کی تھی کہ شدید سردی میں کوئی بھی شخص بغیر شیلٹر کے نہ رہے۔ پنجاب اور پختونخواہ کے وزرائے اعلیٰ اس بات کو یقینی بنائیں۔

وزیر اعظم نے کہا تھا کہ جو افراد پناہ گاہوں میں نہیں انتظامیہ ان کو کھانا اور عارضی پناہ گاہیں فراہم کرے۔