اسلام آباد: سابق وزیر اعظم نواز شریف کا کہنا ہے کہ آئین بلاشبہ سب سے مقدس دستاویز ہے مگر اسے پارلیمنٹ بناتی ہے۔ پارلیمنٹ کو دنیا بھر میں تمام اداروں کی ماں بھی سمجھا جاتا ہے۔
تفصیلات کے مطابق سابق وزیر اعظم نواز شریف کا کہنا تھا کہ آئین بلاشبہ سب سے مقدس دستاویز ہے مگر اسے پارلیمنٹ بناتی ہے۔ خوشی ہے جج صاحبان نے آئین کو مقدس اور بالاتر دستاویز کہا۔
انہوں نے کہا کہ عدلیہ آئین کو بالاتر دستاویز سمجھتی تو 70 سال میں جمہوریت رسوا نہیں ہوتی۔ 32 سال آمروں نے آئین کو ردی کی ٹوکری میں ڈالے رکھا۔ ’1973 سے آج تک آئین کو کوئی زخم پارلیمنٹ نے نہیں لگایا‘۔
نواز شریف کا کہنا تھا کہ آئین کو سارے زخم عدلیہ کے کچھ ججز کی مدد سے آمروں نے لگائے۔ پارلیمنٹ بالاتر ادارہ ہے جو تمام اداروں کی حدود کا تعین کرتا ہے۔ کسی قانون میں ابہام ہے تو دور کرنے کے لیے پارلیمنٹ بھیج دیا جائے۔
انہوں نے مزید کہا کہ اداروں کا احترام ان کی کارکردگی اور کردار سے ہوتا ہے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
اسلام آباد: قائد اعظم محمد علی جناح نے بھی انڈونیشیا کی آزادی کی حمایت کی تھی، پاکستان اور انڈونیشیا فلسطین کی آزادی پر یکساں موقف رکھتے ہیں۔
ان خیالات کا اظہار انڈونیشی صدر جوکو ویدودو نے پاکستان کے دورے کے موقع پر پارلیمنٹ کے مشترکہ اجلاس سے خطاب کرتے ہوئے کیا۔
تفصیلات کے مطابق انڈونیشی صدر جوکوویدودو نے مشترکہ اجلاس سے خطاب کرتے ہوئے کہا کہ پاکستان اور انڈونیشیا فلسطین پر یکساں موقف رکھتے ہیں، دنوں ملکوں کی طرف سے فلسطینی بھائیوں کی جدوجہد کی مکمل حمایت جاری رہے گی۔
انڈونیشی صدر نے پارلیمنٹ سے خطاب کرتے ہوئے کہا کہ انڈونیشیا سب سے زیادہ آبادی والا مسلم ملک ہے، انڈونیشیا میں بھی دیگر مذاہب کے لوگ بستے ہیں، قائد اعظم نے بھی انڈونیشیا کی آزادی کے لیے ہماری حمایت کی تھی۔
خطاب کے دوران ان کا کہنا تھا کہ پاکستان اور انڈونیشیا آپس میں اتحاد، بھائی چارگی، ہم آہنگی پر یقین رکھتے ہیں اور یہی ہمارا نصب العین ہے۔
دوسری جانب اسپیکر قومی اسمبلی ایاز صادق نے انڈونیشی صدر کی پاکستان آمد کا شکریہ ادا کرتے ہوئے کہا کہ صدر ویدودو کی پارلیمنٹ آمد ہمارے لیے اعزاز کی بات ہے۔
اسپیکر ایاز صادق نے انڈونیشیا کے کردار کو سراہتے ہوئے کہا کہ انڈونیشی بھائیوں نے ہر مشکل میں پاکستان کا ساتھ دیا۔
یاد رہے گذشتہ سال انڈونیشی حکام نے باہمی تعلقات کو بہتر بنانے کے لیے پاکستانی شہریوں پر عائد ویزا قوانین پر نرمی کا اعلان کیا تھا۔ جس کے بعد پاکستانی حکام کا کہنا تھا کہ ویزا پالیسی میں اس نرمی سے نہ صرف دونوں ممالک کے درمیان باہمی اور معاشی تعلقات میں اضافہ ہوگا بلکہ دونوں ممالک کے عوام میں راوبط مضبوط ہوں گے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں
اسلام آباد : قومی اسمبلی میں قائد حزب اختلاف سید خورشید شاہ نے کہا ہے کہ عمران خان کی پارلیمنٹ پرتنقید بلاجوازہے، پیپلزپارٹی ایوان بالا کے تقدس پر کوئی سمجھوتہ نہیں کرے گی۔
یہ بات انہوں نے اسلام آباد میں عمران خان کے لاہور میں جلسے سے خطاب کے رد عمل می کہی، انہوں نے کہا کہ حکومت کی ناکامی کو پارلیمنٹ کی ناکامی نہیں کہا جاسکتا، نوازشریف اداروں کی توہین کرتےہیں اور عمران خان پارلیمنٹ کی، نواز شریف اورعمران خان میں کوئی فرق نہیں۔
خورشید شاہ نے کہا کہ عمران خان کی اپنے خطاب میں پارلیمنٹ پرتنقید بلاجواز ہے، پیپلزپارٹی پارلیمنٹ کے تقدس پر کوئی سمجھوتہ نہیں کرے گی، پیپلزپارٹی نے ہمیشہ پارلیمنٹ کےتقدس اور بالادستی کی بات کی۔
ایک سوال کے جواب میں ان کا کہنا تھا کہ عوام غلطی پرنہیں ہوتے کسی کو حق نہیں کہ وہ عوام کے شعورکی توہین کرے،حکومت یاحکمران غلطی پر ہوسکتے ہیں مگرعوام نہیں۔
واضح رہے کہ عمران خان نے لاہور میں متحدہ اپوزیشن کے اجتماع سے اپنے خطاب میں کہنا تھا کہ جو پارلیمنٹ انصاف نہ دے سکے اور مجرم کو پارٹی کا صدر بنا دے ایسی پارلیمنٹ پر لعنت بھیجتا ہوں۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔
جیسے جیسے زمانہ آگے کی جانب بڑھ رہا ہے، ویسے ویسے پرانے ادوار کے خیالات و عقائد اور تصورات میں بھی تبدیلی آتی جارہی ہے۔
ایک وقت تھا کہ گھروں سے باہر نکل کر کام کرنے والی خواتین کو حیرت کی نگاہ سے دیکھا جاتا تھا۔ تاہم اب وقت بدل گیا ہے۔ اب خواتین ہر شعبہ زندگی میں مردوں کے شانہ بشانہ کھڑی ہو کر ملک و قوم کی ترقی میں اپنا کردار ادا کر رہی ہیں۔
ایسا ہی کچھ حال سیاست کا بھی ہے۔
اگر آپ پرانے ادوار میں چلنے والی سیاسی تحریکوں کی تصاویر دیکھیں تو ان میں خال ہی کوئی خاتون نظر آئے گی، تاہم خواتین اب سیاست میں بھی فعال کردار ادا کر رہی ہیں اور فی الحال دنیا کے کئی ممالک کی سربراہی خاتون صدر یا وزیر اعظم کے ہاتھ میں ہی ہے۔
سیاست میں خواتین کے اسی کردار کی جانچ کے لیے عالمی اقتصادی فورم نے ایک فہرست مرتب کی جس میں جائزہ لیا گیا ہے کہ کس ملک کی پارلیمنٹ میں خواتین کی کتنی تعداد موجود ہے۔
فہرست میں حیرت انگیز طور پر امریکا، برطانیہ یا کسی دوسرے یورپی ملک کے مقابلے میں افریقی ممالک کے ایوانوں میں خواتین نمائندگان کی زیادہ تعداد دیکھنے میں آئی۔
اس فہرست میں افریقی ملک روانڈا سرفہرست رہا جس کی پارلیمنٹ میں خواتین ارکان اسمبلی کی شرح 63.8 فیصد ہے۔
بدقسمتی سے عالمی اقتصادی فورم کی مذکورہ فہرست میں صف اول کے 10 ممالک میں کوئی ایشیائی ملک شامل نہیں۔
اس بارے میں دنیا بھر کی پارلیمان اور ایوانوں کا ریکارڈ مرتب کرنے والے ادارے انٹر پارلیمنٹری یونینکی ویب سائٹ کا جائزہ لیا گیا تو پارلیمنٹ میں خواتین کی تعداد کے حوالے سے موجود فہرست میں پاکستان 89 ویں نمبر پر نظر آیا۔
مذکورہ فہرست کے مطابق پاکستانی پارلیمنٹ میں خواتین کی نمائندگی صرف 20.6 فیصد ہے۔ یعنی 342 نشستوں پر مشتمل پارلیمان میں صرف 70 خواتین موجود ہیں جو ملک بھر کی 10 کروڑ 13 لاکھ سے زائد (مردم شماری کے غیر سرکاری نتائج کے مطابق) خواتین کی نمائندگی کر رہی ہیں۔
اس معاملے میں افغانستان جیسا قدامت پسند ملک بھی ہم سے آگے ہے جو 27.7 فیصد خواتین اراکین پارلیمان کے ساتھ 53 ویں نمبر پر موجود ہے۔
افغان پارلیمان
فہرست میں پڑوسی ملک بھارت 147 ویں نمبر پر موجود ہے جس کی 542 نشستوں پر مشتمل لوک سبھا میں صرف 64 خواتین موجود ہیں۔
صنفی ماہرین کا کہنا ہے کہ پالیسی سازی کے عمل اور قومی اداروں میں خواتین کی شمولیت اس لیے ضروری ہے تاکہ وہ ملک کی ان خواتین کی نمائندگی کرسکیں جو کمزور اور بے سہارا ہیں۔
کسی ملک میں خواتین کو کیا مسائل درپیش ہیں، اور ان سے کیسے نمٹنا ہے، یہ ایک ایسی خاتون سے بہتر کون جانتا ہوگا جو نہ صرف اپنی انتخابی مہم کے دوران ان خواتین سے جا کر ملی ہو اور ان کے مسائل سنے ہوں، بلکہ خود بھی اسی معاشرے کی پروردہ اور انہی مسائل کا شکار ہو۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
اسلام آباد: مسلم لیگ ن کی وفاقی حکومت نے آئین کے آرٹیکل 62‘ 63 میں ترمیم پر غور کرنا شروع کردیا‘ سابق وزیراعظم نواز شریف کو اسی قانون کےتحت نا اہل قراردیا گیا ہے۔
تفصیلات کے مطابق مسلم لیگ ن کے رہنما اور وفاقی وزیر برائے قانون زاہد حامد کہتے ہیں کہ 62‘ 63 کے قانون میں نااہلی کی مدت کا کوئی تذکرہ نہیں ہے۔
وفاقی وزیر برائے قانون زاہد حامد کا کہنا تھا کہ ہم سمجھتے ہیں کہ62‘63 کے تحت ہونے والی نا اہلی کی مدت پانچ سال سے بھی کم ہونی چاہیے۔ زاہد حامد نے یہ بھی کہا کہ ہم اس حوالے سے مسودہ جلد پیش کریں گے۔
یاد رہے کہ پاناما کیس میں سابق وزیر اعظم نوازشریف کو سپریم کورٹ کے پانچ رکنی بنچ نے اسی آئین کی شق کے تحت نا اہل قرار دیا تھا اور نیب کو ان کے خلاف ریفرنس بھیجنے کا حکم بھی دیا تھا۔
سابق وزیراعظم نواز شریف نا اہلی کے بعد جی ٹی رو ڈ کے ذریعے تین دن میں اسلام آباد سے لاہور پہنچے اور راستے میں متعدد مقامات پر خطاب کرتے ہوئے انہوں نے سپریم کورٹ کے ججوں اور آئین کی شق نمبر 62‘ 63 کو بھی تنقید کا نشانہ بنایا تھا۔
خیال رہے کہ آئین کی شق 62‘ 63 عوامی نمائندگان سے صادق او ر امین ہونے کامطالبہ کرتی ہے اور اس آئین کے مطابق تمام سیاستدا نوں کا اسلام کے بنیادی احکامات پر پورا اترنا لازم ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔
اسلام آباد : قومی اسمبلی میں اجلاس کے دوران موبائل فون سے کسی قسم کی بھی ویڈیو بنانے کی اجازت نہیں ہوگی، فیصلہ کی خلاف ورزی کرنے والے کیخلاف سخت قانونی کارروائی کیجائے گی، حکم نامہ جاری کردیا گیا۔
تفصیلات کے مطابق اسپیکر قومی اسمبلی سردار ایاز صادق نے اراکین پارلیمنٹ اور صحافیوں کو ہدایات جاری کی ہیں کہ قومی اسمبلی کے اجلاس کے دوران وہ کسی قسم کی ویڈیو نہ بنائیں۔
اسپیکر ایاز صادق کی ہدایت پر سرکلرجاری کر دیا گیا، جاری کردہ سرکلر کے مطابق پارلیمنٹ میں موبائل فون سے فوٹیج بنانے پر پابندی عائد کردی گئی ہے۔
صحافی پارلیمنٹ کی کارروائی موبائل سےنہیں دکھائیں گے، پارلیمنٹ کی کارروائی کی ویڈیو بنانا قواعد کی خلاف ورزی ہے،اس کے علاوہ اراکین پارلیمنٹ پر بھی موبائل سے ویڈیوز بنانے کی پابندی عائد کی گئی ہے۔
قواعد کی خلاف ورزی پرمذکورہ اراکین اور صحافیوں کیخلاف سخت تادیبی کارروائی کا فیصلہ کیا گیا ہے، خلاف ورزی کرنے پر پارلیمنٹ میں داخلے پرپابندی عائد کی جائے گی۔
اسلام آباد: تحریک انصاف کے چیئرمین عمران خان نے کل پارلیمنٹ جانے کا فیصلہ کرلیا۔
اس بات کا فیصلہ پی ٹی آئی کے اجلاس میں کیا گیا ہے جس کے مطابق چیئرمین تحریک انصاف عمران خان پارلیمنٹ جائیں گے اور کل قومی اسمبلی کے اجلاس میں شرکت کریں گے۔
اطلاعات ہیں کہ وہ پارلیمنٹ میں پاناما کیس کے معاملے پر بات کریں گے۔
واضح رہے کہ پاناما کیس کا فیصلہ آنے کے بعد سے ن لیگ اپنی اور فریق جماعتیں پی ٹی آئی، جماعت اسلامی و عوامی مسلم لیگ اسے اپنی فتح قرار دے رہی ہیں۔
فیصلے کے بعد عمران خان نے کہا ہے کہ نواز شریف کے پاس وزیراعظم رہنے کا کیا جواز رہ گیا، یہ ایسے ہی ہے جیسے عزیر بلوچ پر جے آئی ٹی بنائی جائے اس لیے وہ فوری طور پر استعفیٰ دیں۔
یروشلم: اسرائیلی پارلیمنٹ میں اذان کے لیے لاؤڈ اسپیکر کی پابندی کے بعد ہیکرز نے 2 نجی ٹی وی چینلز کی نشریات کو ہیک کرکے لائیو اذان نشرکردی، اس دوران ٹی وی اسکرین پر مسجد اقصیٰ سمیت مقدس اسلامی مقامات کی تصاویر بھی نشر کی جاتی رہیں۔
تفصیلات کے مطابق اسرائیلی پارلیمنٹ میں اذان کے لیے لاؤڈ اسپیکر سے متعلق قانون سازی اور پابندی کے فیصلے کے باوجود اسرائیل کی حکومت کو مشکلات کا سامنا کرنا پڑ رہا ہے، دنیا بھر میں بسنے والے مسلمان بھی اس فیصلے پر اپنے غم و غصے کا اظہار کررہے ہیں۔
اسرائیلی نشریاتی ادارے یروشلم پوسٹ کی رپورٹ کے مطابق اسرائیلی ٹی وی چینل 2 اور چینل 10 کی نشریات کو منگل 29 نومبر کی رات 30 سیکنڈز کے لیے ہیک کرلیا گیا تھا۔
حکام نے چینلز کی نشریات ہیک ہونے کی تصدیق کرتے ہوئے کہا ہے کہ ’’اس دوران ٹیلی ویژن پر اذان نشری کی گئی اور ایک پیغام دکھایا گیا جس میں اسرائیل میں لگنے والی حالیہ آگ کو اذان کی پابندی کے باعث آنے والا عذاب قرار دیا۔
اسرائیلی حکام نے ہیکرز کا مبینہ طور پر تعلق سعودی عرب سے بتایا ہے تاہم چینل 2 نے اپنی نشریات ہیک ہونے کے بعد ٹیلی ویژن پر نشر ہونے والی اذان کی ویڈیو سماجی رابطے کی ویب سائٹ پر ٹوئیٹ بھی کی ہے۔
چینل انتظامیہ نے کہا کہ’شمالی اسرائیل میں رہنے والے صارفین نے شکایت درج کی کہ شام کو نشریات کے دوران کسی نے چینل کا کنٹرول سنبھال لیا اور اذان کی آواز سنائی دی جانے لگی’۔
عوامی شکایات کے بعد انتظامیہ نے تحقیقات کا آغاز کیا جس میں ابتدائی طور پر یہ بات سامنے آئی کہ جن ہیکرز نے سیٹلائٹ کا کنٹرول سنھبالا اُن کا تعلق عرب کمیونٹی سے تھا اور ان کی ہیکنگ کا مقصد صرف اذان نشر کرنا تھا۔
خیال رہے اسرائیلی پارلیمنٹ میں ’موذن بل‘ پیش کیا گیا تھا جس میں موقف اختیار کیا گیا تھا کہ اذان کے لیے لاؤڈ اسپیکر کے استعمال سے عوام کو مشکلات پیش آتی ہیں لہذا اس کے استعمال پر پابندی عائد کی جائے، اسمبلی اجلاس کے دوران مسلمان ممبر اسمبلی نے مائیک پر اذان دے کر احتجاج بھی ریکارڈ کروایا تھا۔
اسلام آباد : تحریک انصاف کے چیئرمین عمران خان نے کہا ہے کہ تحریک انصاف پارلیمنٹ کے مشترکہ اجلاس میں شرکت پر غور کررہی ہے۔ نواز شریف نے پاکستان میں کرپشن ایجاد کی، وہ کرپشن کا بادشاہ ہے۔ نواز شریف نے کہا تھا ہم احتساب کے لئے تیار ہیں اور اب وہ وقت مانگ رہے ہیں۔
ان خیالات کا اظہار انہوں نے اے آر وائی نیوز کے پروگرام الیونتھ آور میں میزبان وسیم بادامی سے گفتگو کرتے ہوئے کیا، ایک سوال کے جواب میں عمران خان نے بتایا کہ ترک سفیر کی درخواست پر پارلیمنٹ کے مشترکہ اجلاس میں نہ جانے کے فیصلے پر نظر ثانی کیلئے اہم اجلاس بلالیا ہے۔
انہوں نے کہا کہ آج شام تک شریف خاندان نے ثبوت عدالت میں پیش کرنے تھے ،جو نہیں کئے گئے۔شریف خاندان اگر ثبوت پیش کردے تو عدالت جلد ہی سماعت کرے گی ۔وزیرا عظم اپنی کرپشن بچانے کے لئے ادارے تباہ کرتا ہے،ادارے مضبوط ہوں گے تو ملک بھی خوشحال ہو جائے گا۔
ایک سوال کے جواب میں عمران خان کا کہنا تھا کہ مودی پاکستان کو عالمی سطح پر تنہا کرنے کی کوشش کر رہا ہے،مودی کی کوشش ہے کہ پاکستان کو دباو میں رکھا جائے جبکہ پلانٹڈ خبر کے زریعے مودی کا ہی موقف پیش کیا گیا تھا۔پاکستان کے عوام کو پاک فوج کی جتنی ضرورت آج ہے شاید ہی اس سے پہلے کبھی ہوئی ہو،فوج کو کبھی بھی اپنے لوگوں کے خلاف استعمال نہیں کرنا چاہیے۔
عمران خان کا کہنا تھا کہ اگر ہم پاناما کیس جیت گئے تو پاکستان بالکل بدل جائے گا،طاقت ور پہلی بار کٹہرے میں کھڑا ہے جو آج سے پہلے کبھی نہیں ہوا۔ سپریم کورٹ میں نواز شریف کا ابھی تک کوئی ثبوت نہیں آیا،ہمارے وکلاء کی کوشش ہے کہ پاناما کیس جلد از جلد اپنے اختتام تک پہنچے۔ اگر سپریم کورٹ پاناما کیس خود سنتی ہے تو فیصلہ دو ہفتوں میں آجائے گا، اگرسپریم کورٹ نے کمیشن بنادیا تو کیس میں تھوڑا وقت لگ جائے گا۔
پاناما لیکس کے بعد شریف خاندان کہانیاں ہی بناتا آیا ہے، سپریم کورٹ میں مجرم کو پیش کرنے کے لئے ہم نے جو کرنا تھا کیا۔ کیس سپریم کورٹ میں ہے، جو فیصلہ ہوگا ہم قبول کریں گے۔
اسلام آباد:اراکین پارلیمنٹ نے وزیر اعظم کی جانب سے سحرو افطار میں لوڈ شیڈنگ نہ ہونے کے وعدے کو دھوکا قرار دیتے ہوئے حکومت پر کڑی تنقید کی ہے اور مطالبہ کیا ہے کہ حکومت ماہ رمضان میں عوام کی بھلائی کے لیے ہنگامی بنیادوں پر اقدامات کرے۔
ماہ رمضان میں سحرو افطار میں بجلی کی غیر اعلانیہ لوڈ شیڈنگ کا سلسلہ جاری ہے۔پارلیمنٹ کے اجلاس سے قبل اے آر وائی نیوز سے بات کرتے ہوئے جماعت اسلامی کی رکن عائشہ کا کہنا تھا کہ شہری علاقوں میں 14 گھنٹے بجلی بند کی جارہی ہے جب کہ دیہات میں 16تا 18 گھنٹے لوڈشیڈنگ ہورہی ہے، عوام تکلیف سے تڑپ رہے ہیں۔
پیپلز پارٹی کے رکن اسمبلی رحمن ملک کا کہنا تھا کہ حکومت کو کوشش کرنی چاہیئے کہ وہ بجلی کی پیداوار میں جتنا اضافہ کرسکتی ہے کرے،رمضان المبارک میں تھوڑا سا صنعتی علاقوں کا نقصان کرکے شہریوں کی بجلی بڑھا دی جائے۔
پاکستان تحریک انصاف کے رہنما شفقت محمود نے کہا کہ ن لیگ نے انتخابات جیتنے کے لیے جھوٹ بولا، ن لیگ نے انتخابات سے قبل جتنے وعدے کیے سارے جھوٹ ثابت ہوئے اور لوڈ شیڈنگ ان میں سب سے بڑا جھوٹ ہے۔
عوامی مسلم لیگ کے سربراہ شیخ رشید کا کہنا تھا کہ ن لیگ نے کبھی سچ بولا ہے؟ جس دن انہوں نے سچ بولاوہ ان کی سیاست کا آخری دن ہوگا۔
جماعت اسلامی پاکستان کے امیر سراج الحق نے کہا کہ جس طرح حکومت کے تمام وعدے جھوٹے ہیں اسی طرح یہ بھی ایک اور جھوٹ کا اضافہ ہے کہ لوڈ شیڈنگ نہیں ہوگی۔
ارکان پارلیمنٹ نے مزید کہا کہ حکومت کم از کم سحرو افطار میں بجلی فراہم کرنے کے اپنے وعدے پر تو عمل کرے۔
دوسری جانب ن لیگ کے سینیٹر مشاہد اللہ کا کہنا تھا کہ کراچی میں بہت سارے علاقے ایسے ہیں جہاں لوگ کنڈے لگاتے ہیں اور بل کی ادائیگی نہیں کرتے ممکن ہے ایسے علاقوں میں لوڈ شیڈنگ ہوئی ہے۔
