اسلام آباد : الیکشن کمیشن نے پارٹی فنڈنگ میں مبینہ بے ضابطگیوں کے معاملے پر پی ٹی آئی کو تمام دستاویزات فراہم کرنے کی ہدایت کر دی ۔
تفصیلات کے مطابق پی ٹی آئی پارٹی فنڈنگ میں مبینہ بے ضابطگیوں کے معاملے پر ممبر سندھ غفار سومرو کی صدارت میں 4 رکنی بنچ نے سماعت کی۔ اکبر ایس بابر کے وکیل الیکشن کمیشن میں پیش تاہم تحریک انصاف کے وکیل انور منصور الیکشن کمیشن میں پیش نہ ہوئے۔
تحریک انصاف کے فنانس سیکرٹری سردار اظہر پیش ہوئے اور الیکشن کمیشن کو بتایا کہ انور منصور سپریم کورٹ میں مصروف ہیں۔
اکبر ایس بابر کے وکیل نے بتایا کہ تحریک انصاف ملک سے باہر پیسے اکٹھے کرتی ہے، ملک سے باہر سے فنڈنگ لینا قانون کی خلاف ورزی ہے جبکہ وکیل نے امریکہ اور ڈنمارک سے رقم لینے کے شواہد بھی پیش کیے ہیں۔
تحریک انصاف کی جانب سے کیس ملتوی کرنے کی استدعا کی گئی، جس پر ممبر الیکشن کمیشن نے کہا کہ یہ کیس 2014 سے زیر التوا ہے۔
ممبر الیکشن کمیشن کے پی کے ارشاد قیصر نے کہا کہ سپریم کورٹ میں کیس کا فیصلہ چند ماہ میں ہو جاتا ہے، الیکشن کمیشن پر دھبہ لگ سکتا ہے، انور منصور کب آئیں گے۔
سردار اظہر نے کہا کہ کیس آئندہ ہفتے تک ملتوی کیا جائے جس پر ممبر الیکشن کمیشن پنجاب نے کہا کہ انور منصور سے پوچھ کر بتائیں کب پیش ہو سکتے ہیں۔
وکیل اکبر ایس بابر نے کہا کہ ہائیکورٹ نے تحریک انصاف کی تمام درخواستیں خارج کی ہیں، پی ٹی آئی کی جانب سے جمع کرائی گئی اکاونٹس کی تفصیلات فراہم کی جائیں، الیکشن کمیشن نے تمام دستاویزات فراہم کرنے کی ہدایت کر دی۔
