لاہور: وفاقی وزیر اطلاعات پرویز رشید نے کہا ہے کہ قومی سلامتی کے اداروں کی انٹیلی جنس کی وجہ سے ہی دہشت گردی کے واقعات میں کمی آئی ہے،لوگوں کو تحفظ فراہم کرنا ریاست کی ذمہ داری ہے۔
لاہور میں میڈیا سے گفتگو کرتے ہوئے پرویز رشید نے کہا کہ اگر قومی اداروں کی انٹیلی جنس اتنی مضبوط نہ ہوتی تو زیادہ نقصان اٹھانا پڑتا،انہوں نے کہا کہ امریکا میں بھی سکیورٹی خدشات کے باعث سکولوں کو بند کردیا جاتا ہے،بچوں کی زندگیوں کی حفاظت کرنا حکومت کی ذمہ داری ہے۔
وزیر اطلاعات کا کہنا تھا کہ دہشت گردوں کے بچوں کو بھی سکول لاکر تعلیم دیں گے اور دہشت گردوں سے بڑا انتقام بھی یہی ہے انہوں نے کہا کہ جب بھی کشمیر کے مسئلے پر بھارت کومذاکرات کی میز پر لاتے ہیں تو دہشت گردی کا واقعہ ہوجاتا ہے جو کشمیر کے مسئلے کو پیچھے دھکیل دیتا ہے۔۔جب تک بیرونی ہاتھوں کو اندرونی طور پر مدد فراہم نہ کی جائے ملک میں دہشت گردی کا واقعہ نہیں ہوسکتا۔
انہوں نے کہا کہ پیپلز پارٹی دہشت گردی کے مسئلے میں حکومتی پالیسی کی حمایت کرتی ہے اور قومی پالسیی کا ساتھ دے رہی ہے،نیب کے مقدمات صرف سندھ میں نہیں باقی صوبوں میں بھی ہیں۔
