لاہور: وزیرِ اعلیٰ پنجاب مریم نواز نے کہا ہے کہ مجھے اس منصب پر آنے کیلئے خود کو ثابت کرنا پڑا، آگ کے دریا سے گزر کر پہنچی ہوں۔
لاہور میں وزیرِ اعلیٰ پنجاب مریم نواز نے پولیس ٹریننگ کالج چوہنگ کی پاسنگ آؤٹ پریڈ سے خطاب کرتے ہوئے کہا کہ آپ سب کی ذمہ داری ہے مظلوم کی داد رسی کریں اور ظالم کو انجام تک پہنچائیں۔
انہوں نے کہا کہ وزیرِاعلیٰ کی کرسی پربیٹھ کر کسی کے خلاف فیصلہ کرنا ہو تو دل پرپتھررکھ کر کرتی ہوں میرے دل میں انتقام کا جذبہ نہیں، لیکن مجھے انصاف کرنا ہے۔
مریم نواز کا کہنا تھا کہ آپ کے دل میں ظالم کیلئے کوئی جگہ نہیں ہونی چاہیئے، مجھے آگ کا دریا عبور کر کے یہاں تک پہنچنا پڑا، اچھا ہوا میری ٹریننگ ہوئی، آج کوئی نہیں کہہ سکتا کہ یہ اس لئے یہاں ہے کہ ان کا باپ وزیراعظم تھا۔
وزیر اعلیٰ پنجاب نے کہا کہ پولیس کے شعبے میں خواتین کی تعداد بڑھا کر نصف کرنا چاہتے ہیں، جب میں نے پولیس یونیفارم پہنا تو احساس ہوا کہ یہ کتنی بڑی ذمہ داری ہے، پولیس کے شعبے میں خدمات انجام دینے والی خواتین پر فخر ہے۔
انہوں نے کہا کہ امید ہے آپ سب اس ذمہ داری کو بخوبی نبھائیں گی کیوںکہ جس معاشرے میں انصاف نہیں ہوتا وہ معاشرہ بگڑ جاتاہے، جو ظالم ہے اسے اس کے انجام تک پہنچایا جانا چاہیے۔
مریم نواز نے مزید کہا کہ نوازشریف اور شہبازشریف کو خراج تحسین پیش کرنا چاہوں گی، پورے ملک میں ترقی کا نام جہاں نظر آئیگا وہ نواز شریف یا شہبازشریف کا ہوگا۔
