ہوسٹن: پاکستان عوامی تحریک کے سربراہ علامہ ڈاکٹر طاہرالقادری کی انجیوگرافی امریکی شہر ہوسٹن کے اسپتال میں مکمل کر لی گئی ہے۔
ترجمان عوامی تحریک کے مطابق ڈاکٹر طاہر القادری کا اجیکشن فریکشن کا مسئلہ بدستور جاری ہے۔ انہیں انیس سو بیاسی میں بھی یہ مرض لاحق ہواتھا اور انہیں صحتیابی میں دو سال کا عرصہ لگا تھا۔
ترجمان کا کہنا تھا کہ ڈاکٹرطاہر القادری کا مزید علاج جاری رہے گا۔ اس سلسلے میں ڈاکٹرز کا نیا پینل بھی تشکیل دے دیا گیا ہے۔ ڈاکٹرز نے معمول کی مصروفیات شروع کرنیکی اجازت نہیں دی ہے۔
ترجمان عوامی تحریک کا مزید کہنا تھا کہ ڈاکٹر طاہر القادری کو مکمل آرام کا مشورہ دیا گیا ہے جبکہ ان کی ادویات میں تبدیلی کی جائے گی۔
لاہور:پاکستان عوامی تحریک پنجاب نے مسلم لیگ ن کی پنجاب حکومت کی ڈیڑھ سالہ کارکردگی پروہائٹ پیپرجاری کردیا ہے۔
عوامی تحریک نےاس وہائٹ پیپرمیں حکومت کی کارکردگی کا تنقیدی جائزہ لیا ہے اور اعداد و شمار کے ذریعے ثابت کیا ہے کہ موجودہ حکومت کسی بھی صورت پاکستان کے سب سے بڑے صوبے پر حکمرانی کی اہل نہیں ہے۔
سماجی رابطے کی ویب سائت پر جاری کئے گئے وہائٹ پیپرمیں دئیے گئے اعداد و شمار کے مطابق پنجاب بھرمیں سالانہ چھتیس لاکھ جرائم ہوتے ہیں۔
جرائم میں گینگ ریب کے واقعات 6100 جبکہ قتل چھ ہزار اور اقدام قتل 22 ہزار واقعات کے ساتھ سرِفہرست ہے۔ بچوں کے اغوا کے 12 ہزار واقعات رپورٹ ہوئے۔
رواں سال پنجاب نے 850 ملین ڈالر کے قرضے لئے جنہیں ملا کر صوبے کے کل قرضے 580 ارب روپے ہوگئے ہیں۔
رواں سال کی پہلی ششماہی میں تعلیم اورصحت کے لئے مختص بجٹ کا کل 17 فیصد ریلیز کیا جاسکا۔
حکومت کی نااہلی کے باعث اشیائے خورد ونوش کی قیمتیں آسمان سے باتیں کررہی ہیں۔
رپورٹ کے مطابق گورنر پنجاب نے انکشاف کیا تھا کہ پنجاب میں زرعی ادویات بنانے والی 700 میں سے 650 کمپنیاں جعلی ادویات بناتی ہیں لیکن تاحال کوئی کاروائی نہیں کی گئی جو کہ ناقص حکمرانی کی اعلیٰ مثال ہے۔
رپورٹ میں ریسکیو 1122 جیسے ممتاز ادارے کی مشکلات کا بھی ذکرکیا گیا ہے اور دعویٰ کیا گیا ہے کہ ریسکیو 1122 کے ملازمین تنخواہیں اور دیگر مراعات سے محرومی کے باعث کسی بھی وقت احتجاج کی کال دے سکتے ہیں۔
فیصل آباد: تحریک انصاف کی اپیل پر ٹرانسپورٹرز اور کئی تاجر تنظیموں نے کل کاروبار بندرکھنے کا اعلان کردیا،انتظامیہ بھی احتجاج ناکام بنانے کیلئے سرگرم ہوگئی۔
فیصل آباد کے وکلا ،تاجر ،صنعتکار اور اساتذہ نے تحریک انصاف کے احتجاج کی مکمل حمایت کا اعلان کیا ہے، ٹرانسپورٹرز ایسوسی ایشنز ، پاور لوم ایسوسی ایشن ، ڈسٹرکٹ بار ایسوسی ایشن اور مختلف تاجر تنظیموں نے عمران خان کے پلان سی کے تحت فیصل آباد بند کرنے کی حمایت کردی ہے۔
شکیل شہزاد تاجر رہنما ٹرانسپورٹرز کی جانب سے ہڑتال کے اعلان کے بعد انتظامیہ نےجنرل بس اسٹینڈ میں قائم تین ٹرانسپورٹرز کے دفاتر اور پٹرول پمپ سیل کر دیئے، ٹرانسپورٹرز کے احتجاج پر دفاتر اور پٹرول پمپس کو کھولنا پڑا،پرائیویٹ اسکولز ایسوسی ایشنز نے بھی فیصل آباد کے تمام نجی اسکول بند کرنے کا اعلان کیاہے۔
فیصل آباد: پاکستان عوامی تحریک اور مسلم لیگ ق نے فیصل آباد میں پی ٹی آئی کے احتجا ج کی بھر پور حما یت کا اعلان کیا ہے۔
آٹھ دسمبر عمران خا ن کے پلا ن سی کے احتجاج کی بھر پور کامیابی کیلئے پی ٹی آئی پنجاب کے صدر اعجاز چوہدری نے کپتان کی ہدایت پر پاکستانی عوامی تحریک سے رابطہ کیا اور انھیں کل کے احتجاج میں شرکت کی دعوت دی۔
پاکستان عوامی تحریک کے رہنما خرام نواز گنڈا پور کپتان کی آواز پر لبیک کہتے ہو ئے احتجاج کی حمایت کا اعلان کرتے ہوئے کہا کہ دونوں جما عتوں کی منزل ایک ہے ہم مل کر قوم کو موجودہ نظام سے نجات دلائیں گے، ساتھ ساتھ پا کستان مسلم لیگ ق کے رہنما اور سابق اسپیکر پنجاب اسمبلی چوہدری ظہیر نے بھی پی ٹی آئی کی فیصل آباد میں احتجاج کی بھر پور حمایت کی ہے۔
پاکستان تحریک انصاف نے فیصل آباد کے احتجاج میں شرکت کے لیے سنی تحریک جو بھی دعوت دی ہے، اب دیکھنا یہ ہے کپتان فیصل آباد میں اپنہ اننگ کیسے اوپن کر تے ہیں پا کستان کا ما نچسٹر سمجھے جا نے والے فیصل آباد کو پا کستانی سیاست کے چند اہم شہروں میں شما ر کیا جا تا ہے۔
لاہور: پاکستان عوامی تحریک نے حکومتی کارکردگی پر وائٹ پیپر جاری کردیا ہے، عوامی تحریک کے وائٹ پیپر میں کہا گیا ہے کہ کشکول توڑنے کے دعویداروں نے آٹھ سو پچاس ملین ڈالر کا نیا قرضہ لے لیا جس سے پنجاب کے ذمہ واجب الادا قرضے پانچ سو اسی ارب روپے سے بڑھ گئے ہیں۔
وائٹ پیپر میں یہ بھی بتایا گیا ہے کہ صوبہ کی پچاس فیصد آبادی بھوک کا شکار ہے اور سرپلس گندم غریبوں کو دینے کے بجائے تاجروں کو سبسڈی دیکر ایکسپورٹ کی جارہی ہے۔
لاہور: پانچ امریکی ڈاکٹرز نے طاہرالقادری کا طبی معائنہ شروع کردیا ہے، طاہر القادری کی شدید علالت کے سبب ایک ڈاکٹر امریکہ سے ہنگامی طورپر رات گئے لاہور پہنچے ہیں۔
تفصیلات کے مطابق پاکستان عوامی تحریک کے سربراہ ڈاکٹر طاہر القادری کا امریکی معالج پر مبنی پانچ رکنی ڈاکٹرز کے پینل نے معائنہ شروع کردیا ہے۔ سربراہ عوامی تحریک کے ڈاکٹروں کے مطابق علاج شروع کرنے میں تاخیر سے مزید پیچیدگیاں بڑھ سکتی ہیں۔
ڈاکٹروں کے پینل کا کہنا ہے کہ دو بجے تک معائنہ مکمل ہو جائے گا۔
دوسری جانب طاہر القادری کے میڈیا ایڈوائزر کی طرف سے طبی معائنے کی تصدیق کر دی گئی ہے۔ ترجمان کا کہنا ہے کہ علاج سے متعلق حتمی فیصلہ ڈاکٹرز کریں گے۔ ترجمان نے مزید بتایا ہے کہ ایک ڈاکٹر امریکہ سے ہنگامی طور پر رات گئے لاہور پہنچے ہیں۔
لاہور: پاکستان عوامی تحریک اوراس کی اتحادی جماعتوں نے تحریک انصاف کے 30 نومبر کے جلسے میں شرکت نہ کرنے کا فیصلہ کیا ہے۔ خرم نواز گنڈاپور کا کہنا ہے کہ پی ٹی آئی کے مؤقف کی حمایت کرتے ہیں، نواز شریف جعلی انتخابات کے ذریعے اقتدار میں آئے ہیں۔
لاہور میں پاکستان عوامی تحریک اور اس کی اتحادی جماعتوں، مسلم لیگ قاف، مجلس وحدت مسلمین اور سنی اتحاد کونسل کا مشترکہ اجلاس ہوا، جس میں تحریک انصاف کے کل اسلام آباد جلسے میں شرکت نہ کرنے کا فیصلہ کیا گیا۔
اجلاس کے بعد میڈیا سے گفتگو کرتے ہوئے خرم نواز گنڈاپور نے کہا کہ تحریک انصاف کے موقف سے مکمل اتفاق ہے، مکمل مشاورت نہ ہونے کے باعث اسلام آباد جلسے میں شرکت نہیں کریں گے۔ مشاورت مکمل نہ ہونے کی ایک وجہ ڈاکٹر طاہرالقادری کی علالت اور علامہ راجہ ناصر عباس کا غیر ملکی دورہ ہے۔
انہوں نے کہا کہ نوازشریف باطل الیکشن کے ذریعے وزیر اعظم بنے، انہیں تسلیم نہیں کرتے، پرویز رشید کی زبان اُن کے کنٹرول میں نہیں، وہ بتائیں کہ گلگت بلتستان پاکستان کا حصہ نہیں تو کس کا ہے، نوازشریف اس بیان کا نوٹس لینا چاہیئے۔
لاہور: ڈاکٹرطاہرالقادری کی طبیعت ناساز ہونے پر پی اے ٹی کا پانچ دسمبر کو سرگودھا اسٹیڈیم میں ہونے والا جلسہ ملتوی کردیا گیا ہے۔
پاکستان عوامی تحریک کے ترجمان نے ایک بیان میں کہا کہ علاقائی قیادت کی ہدایت پر علاقہ بھرمیں لگائے جانے والے جلسے کے حوالے سے بورڈز اُتارنا شروع کردئیے گئے ہیں۔
ڈاکٹر طاہرالقادری کو عارضہ قلب اور بولنے میں دقت کی تکلیف پر معالجین نے باہتر گھنٹے مکمل آرام کا مشورہ دیا ہے۔ آج پانچ ڈاکٹرز نے ڈاکٹر طاہر القادری کا معائنہ بھی کیا ہے۔
ذرائع کے مطابق طاہرالقادری کواسپتال داخل ہونےکاکہا گیا لیکن اُنھوں نے مریضوں کے معمولات متاثر ہونے کے خدشے پرانکارکردیا ہے۔
بھکر: علامہ طاہر القادری کا کہنا ہےخرابی صحت کےباوجود عوام کا ساتھ نہیں چھوڑوں گا۔زندگی کی آخری سانس تک غریب کی جنگ لڑتارہوں گا۔
بھکر میں میڈیا سے بات کرتے ہوئے انہوں نے کہا ان کی حالت ایسی ہو گئی ہے جیسے موت کو چھو کر آئے ہوں ۔ ڈاکٹر طاہر القادری نے کہا مزار قائد کے 25 دسمبر تک پروگراموں کا ناغہ نہیں کرنا چاہتا ، مارچ اپریل میں سرائیکی وسیب کو کور کروں گا ۔ ڈاکٹر طاہر القادری نے کہا ڈاکٹروں نے دل کی مرض کی تشخیض کر دی تھی لیکن علاج نہیں کرایا ۔ علاج کراتا تو 4 ماہ انتظار کرنا پڑتا۔ طاہر القادری نے کہا پی ٹی آئی نے 30نومبر کے جلسے کی دعوت دی ہے ، شرکت کا حتمی فیصلہ مشاورت سے کریں گے۔
بھکر: ڈاکٹر طاہرالقادری کی طبیعت ناساز ہوگئی، ماہر امراض قلب نے ان کا معائنہ اور ای سی جی بھی کیا۔
پاکستان عوامی تحریک کے سربراہ طاہرالقادری کے لئے دورہ بکھر اچھا ثابت نہ ہوا، ڈاکٹر طاہرلقادری نے بھکر میں شہدا کے گھروں پر لواحقین سے ملاقات کی، واپسی پر طاہر القادری کی گاڑی پنکچر ہو گئی، پھر ان کی طبیعت مزید بگڑ گئی، ڈاکٹرز نے طاہر القادری کا تفصیلی معائنہ کیا اور ای سی جی بھی ہوا۔
اس سے پہلے ڈاکٹر طاہرالقادری سے چلا بھی نہ جا رہا تھا، وہ کارکنان کا ہاتھ تھامے گاڑی تک پہنچے اور مشکل سے گاڑی میں بیٹھے، بجھے بجھے طاہر لقادری کہتے ہیں کہ انیس سو بیاسی سے دل کی تکلیف میں مبتلا ہوں۔
ڈاکٹر طاہرالقاری کاکہنا تھا کہ امریکا میں ڈاکٹرز نے وطن واپس آنے سے منع کیا تھااگر پاکستان نہ آتا تو ،لوگ دل کی تکلیف کو، نہ آنے کا بہانہ قرار دیتے، بھکر میں جامعہ مسجد نورسلطان القادری کے افتتاح کے موقع پر ڈاکٹر طاہرالقادری بہت بیمار دکھائی دیئے، ڈاکٹر طاہرالقادری کی طبیعت ناساز ہونے کے سبب ان کے صاحبزادے ڈاکٹر حسن شیڈول کے بقیہ پروگرامز میں شرکت کریں گے۔
