Tag: PAT

ڈاکٹرطاہرالقادری سمیت دس کارکنان کے وارنٹ گرفتاری جاری

لاہور : انسداد دہشت گردی کی عدالت نے ڈاکٹر طاہر القادری سمیت عوامی تحریک کے دس کارکنوں کے وارنٹ گرفتاری جاری کردیئے۔

تفصیلات کے مطابق لاہور میں انسداد دہشت گردی عدالت میں مقدمےکی سماعت شروع ہوئی تو تفتیشی افسر نے عدالت کو بتایا گیا کہ ڈاکٹر طاہر القادری بار بار طلب کرنےکے باوجود عدالت آئے نہ تفتیش میں مدد دی ، لہذا ان کے وارنٹ گرفتاری جاری کئے جائیں۔

عدالت نے پولیس کی استدعا پر ڈاکٹر طاہر القادری سمیت عوامی تحریک کے دس کارکنوں کے وارنٹ گرفتاری جاری کرتے ہوئے حکم دیا کہ انھیں ستائیس مارچ کو پیش کیا جائے۔

واضح رہے کہ ڈاکٹر طاہر القادری سمیت عوامی تحریک کے دس کارکنان کے خلاف دیپالپور میں ہنگامہ آرائی اور اشتعال انگیز تقاریر پر مقدمہ درج کیا گیاتھا۔

مارچ 21, 2015
پولیس ڈاکٹر طاہرالقادری کو قتل کرنا چاہتی تھی، پاکستان عوامی تحریک

لاہور: پاکستان عوامی تحریک نے آئی جی پنجاب کو جوابی خط بھیج دیا ہے، جس میں کہا گیا ہے پولیس ڈاکٹر طاہر القادری کو قتل کرنے کی نیت سے ماڈل ٹاؤن آئی۔

آئی جی پنجاب کو جوابی خط میں کہا گیا ہے کہ پولیس وزیراعلیٰ پنجاب کی ہدایت پر ڈاکٹر طاہر القادری کو قتل کرنے کی نیت سے ماڈل ٹاؤن آئی، سانحے میں پولیس خود ملزم ہے، پولیس نمائندوں پر مشتمل جے آئی ٹی متعصب ہے۔

خط میں کہا گیا ہے کہ آئی پنجاب کی تعیناتی کے بعد بھی جھوٹے مقدمے درج کیے گئے، جے آئی ٹی کی نیت ٹھیک ہوتی تو جیلوں میں بند کارکنوں کا بیان ریکارڈ کرتی۔

یاد رہے کہ آئی جی پنجاب نے جے آئی ٹی سے تعاون کے لئے عوامی تحریک کے قائدین کو خط لکھا تھا، جس کے جواب میں پاکستان عوامی تحریک نے جے آئی ٹی میں پیش نہ ہونےکی دس وجوہات بتا دیں۔

پیٹ کا کہنا ہے آئی ایس آئی، ایم آئی کے نمائندوں پر مشتمل جے آئی ٹی ہی انصاف دے سکتی ہے۔

مارچ 6, 2015
ڈاکٹرطاہرالقادری چھ ساتھیوں سمیت اشتہاری قرار

لاہور: انسدادِ دہشت گردی کی عدالت نے پاکستان عوامی تحریک کے سربراہ ڈاکٹرطاہرالقادری کو پارٹی کے چھ دیگررہنماوٗں سمیت اشتہاری مجرم قراردے دیا۔

انسدادِ دہشت گردی کی عدالت نے عوامی تحریک کے سربراہ کو گزشتہ سال لاہور میں احتجاج کے دوران توڑپھوڑاورجلاؤگھیراؤ کا مجرم قراردیا۔

عدالت نے مقدمے میں نامزد افراد کے ناقابلِ ضمانت وارنٹ بھی جاری کردیے ہیں۔

عوامی تحریک کے لیڈرخرم نوازگنڈاپور، رحیق عباسی اورڈاکٹرطاہرالقادری کے دونوں صاحبزادے حسن محی الدین اورحسین محی الدین بھی مقدمے میں اشتہاری قرار دیے گئے تھے۔

دوسری جانب رحیق عباسی نےاعلان کیا ہے کہ ڈاکٹر طاہر القادری مارچ میں وطن واپس آئیں گے اور عوامی تحریک کی قیادت اپنے ہاتھوں میں لیں گے۔

واضح رہے کہ دسمبر 2014 میں عوامی تحریک کے سربراہ اور دیگر چھ افراد کے خلاف مقدمہ انسدادِ دہشت گردی کے سیکشن 7 اور پاکستان پینل کورٹ کے آرٹیکل 325،365 بی اور 395 کے تحت مقدمہ درج کیا گیا تھا۔

مدقدمے میں کہا گیا تھا کہ سیاسی کارکن ڈاکٹرطاہرالقادری کے حکم پراکھٹے ہوئے تھے۔

فروری 25, 2015
پاکستان عوامی تحریک اور تحریک صوبہ ہزارہ کا بلدیاتی انتخابات کیلئے اتحاد ہوگیا

ایبٹ آباد: پاکستان عوامی تحریک اور تحریک صوبہ ہزارہ کا بلدیاتی انتخابات کیلئے اتحاد ہوگیا ہے۔

پاکستان عوامی تحریک کے مرکزی صدر رحیق عباسی نے کہا ہے کہ پاکستان عوامی تحریک کے پی کے میں بلدیاتی انتخابات میں بھرپور حصہ لے گی، تحریکِ انصاف کی حکومت صوبہ میں بلدیاتی انتخابات کے دوران حکومتی مشینری کواستعمال کرنے سے روکنے میں اپنا کردار ادا کرے۔

،پی ٹی آئی کی حکومت کے پی کے میں دوسال کے دوران عوام کو کوئی ریلیف نہیں دے سکی ، پیمرا کو حکومتی تسلط سے آزاد کرنا ہو گا اگر اے آروائی نیوز کو بند کیا گیا تو ملک گیر احتجاج کریں گے۔

ایبٹ آباد میں بابا حیدرزمان کی رہائش گاہ پر میڈیا سے گفتگو میں رحیق عباسی کا کہنا تھا کہ ہزارہ صوبہ پاکستان عوامی تحریک کے منشور میں شامل ہے، شہدائے ماڈل ٹاؤن کیساتھ ساتھ حکومت سانحہ بارہ اپریل کے شہداء کے قاتلوں کو بھی منطقی انجام تک پہنچائے۔

رحیق عباسی کا کہنا تھا کہ اے آروائی نیوز نے موٹروے سمیت دیگر اداروں میں ہونے والی کرپشن کو بے نقاب کیا ، پیمرا میں پرویز راٹھور نواز شریف خاندان کا آدمی ہے، اسے اس سیٹ پر بٹھا کر صرف اور صرف میڈیا اور بالخصوص اے آروائی نیوز پر پابندی لگانا ہے،حکومت اور پیمرا اے آروائی نیوز کو بند کرنے سے باز رہیں، بصورت دیگر ملک گیر شدید احتجاج کیا جائے گا۔

اس موقع پر بابا حیدرزمان کا کہنا تھا کہ حکومت بلدیاتی انتخابات سے قبل مکمل خود مختاری دے تاکہ اس کے نتائج عوام تک صیحح معنوں میں پہنچ سکیں۔

فروری 23, 2015
ماڈل ٹاؤن شہداء کی قربانی رائیگاں نہیں جائیگی، رحیق عباسی

رینالہ خورد: پاکستان عوامی تحریک کے صدر ڈاکٹر رحیق عباسی نے کہا ہے کہ پاکستان کے ظالمانہ نظام کو بدلنے کی ضرورت ہے۔

تفصیلات کے مطابق نیشنل ایکشن پلان کے تحت دہشت گردی، انتہاپسندوں رینالہ خورد میں پاکستان عوامی تحریک کے دفتر کے افتتاح کے بعد پریس کانفرنس کرتے ہوئے رحیق عباسی نے کہا کہ نیشنل ایکشن پلان پُرامن لوگوں کے خلاف ہے۔

حکومت دہشت گردوں کا سیاسی گروہ ہے یہ دہشت گردوں کی بجائے پُرامن لوگوں کے خلاف کام کر رہے ہیں ،انہوں نے کہا کہ 22شہداء کی قربانی رائیگاں نہیں جائیگی۔

جو لوگ ظلم وستم اور بربریت کا شکار ہوئے ہیں انکی جدوجہد رنگ لائے گی انہوں نے کہا کہ ہم تحریک انصاف سے مکمل رابطے میں ہیں ہماری انقلابی جدوجہد جاری رہے گی۔

انہوں نے کہا کہ ڈاکٹر طاہر القادری مارچ میں واپس آکر اپنے دس نکاتی ایجنڈے پر عمل کروانے کے لیے جدوجہد جاری رکھیں گے چونکہ ان حکمرا نوں کے ہا تھ ہمارے شہیدوں کے خون سے رنگے ہو ئے ہیں۔

انہوں نے کہا کہ ہم اس وقت سکون سے نہیں بیٹھیں گے جب تک ملزمان کو پھا نسی تک نہ پہنچا لیں، انہوں نے مزید کہا کہ بے گھروں کو گھر دلانا ، تعلیم و صحت کی بنیادی سہولیات فراہم کرنا ، بے زمین کسانوں کو زمین دلانا، عزت کی روٹی فراہم کرناہمارا منشور ہے۔

انہوں نے کہا کہ دہشت گردی اور فرقہ واریت کے خاتمہ تک ہماری جدوجہد جاری رہے گی۔

فروری 10, 2015
ڈاکٹرطاہرالقادری کاعلامہ امین شہیدی کوفون، شکارپورواقعےکی مذمت

کراچی: پاکستان عوامی تحریک کے سربراہ ڈاکٹر طاہرالقادری نے مجلس وحدت مسلمین کے علامہ امین شہیدی کو فون کرکےشکارپورمیں ہونےوالے دہشتگردی کےواقعے کی مذمت کی ہے۔

پاکستان عوامی تحریک کے سربراہ علامہ طاہر القادری نے مجلس وحدت مسلمین کےآغا امین شہیدی کو فون کرکے شکارپوردہشت گردی کےواقعے کی شدید مذمت کی اور سانحے میں زخمی ہونےوالے افراد کی جلد صحت یابی کےلئےدعاکی ۔

اس موقع پر علامہ طاہرالقادری کا کہناتھا کہ یورپ میں دہشت گردی کے خاتمے کےلئے بنیادی انسانی حقوق معطل کئےگئے لیکن وہاں کسی نے شور نہیں مچایا تاہم پاکستان میں جو حکمران شادی بیاہ کے ضابطوں پر عمل درآمد نہیں کروا سکے وہ قومی ایکشن پلان پر کیاعمل کروائیں گے۔ان کا کہناتھا کہ اگر ملک سے دہشت گردی ختم نہ ہوئی تو ملک کا اللہ حافظ ہے۔

جنوری 31, 2015
طاہرالقادری کیخلاف اخبارمیں اشتہار دینے کا حکم جاری

لاہور:انسداد دہشت گردی نے عدم پیشی پر عوامی تحریک کے سربراہ ڈاکٹر طاہر القادری سمیت چار افراد کےلیے اخبار اشتہار جاری کرنے کا حکم دے دیا۔

عدالت میں کیس کی سماعت شروع ہوئی تو ڈاکٹر طاہر القادری ، خرم نواز گنڈا پور ،حسین محی الدین اور رحیق عباسی عدالتی نوٹسز کے باوجود پیش نہ ہوئے جس پر عدالت نے حکم دیا کہ چاروں افراد کے لیے اخبار میں اشتہار جاری کیا جائے ۔

چاروں افراد کے خلاف اشتعال انگیز تقاریر کے ذریعے عوام کو ریاست کےخلاف اکسانے کے الزام میں مقدمہ انسداد دہشت گردی عدالت میں زیر سماعت ہے ۔

عدالت نے اخبار اشتہار کا حکم دیتے ہوئے کیس کی مزید سماعت چھ فروری تک ملتوی کر دی ۔

جنوری 26, 2015
توہین رسالت آزادی اظہار نہیں، مسلمانوں کی حق تلفی ہے، طاہرالقادری

لاہور: ڈاکٹر طاہر القادری نےبارک اوباما اور بان کی مون سمیت عالمی رہنمائوں کو خط لکھ دیا، جس میں کہاگیا ہےکہ توہین رسالت آزادی اظہار نہیں ،ڈیڑھ ارب مسلمانوں کے بنیادی حق سے انحراف ہے۔

پاکستان عوامی تحریک کے سربراہ ڈاکٹر علامہ طاہر القادری نے اپنے خط میں توہین آمیز خاکوں کی اشاعت پر افسوس کا اظہار کرتے ہوئے کہا ہے کہ اقوام متحدہ اور عالمی برادری توہین آمیز خاکوں کی اشاعت کامسئلہ حل کرنے میں ناکام رہی ہے۔

انہوں نے کہا ہے کہ عالمی امن کا تقاضہ ہے کہ اقوام متحدہ توہین مذہب اور مقدس ہستیوں کے خلاف قابل اعتراض مواد کی اشاعت قابل تعزیر جرم ٹھہرائے ۔ یورپ کے بعض ممالک میں ہولو کاسٹ کا انکار جرم ہے تو کہیں عیسائیت کے خلاف بات کرنا جرم ہے ۔

طاہرالقادری نے بتایا کہ اگر دنیا نے توہین رسالت پر ذمہ داری نہ دکھائی تو تہذیبوں کے تصادم سے بچنا ممکن نہیں رہے گا۔

جنوری 20, 2015
طاہرالقادری اورعمران خان کی سعودی عرب میں ملاقات کا امکان

اسلام آباد: ڈاکٹر طاہرالقادری اور عمران خان کی سعودی عرب میں ملاقات کا امکان ہے، جس میں موجودہ حالات میں حکومت مخالف تحریک کے دوسرے دور کا فیصلہ کیا جاسکتا ہے۔

پاکستان عوامی تحریک کے سربراہ ڈاکٹر طاہرالقادری پیر کے روز سے مدینہ منورہ میں موجود ہیں۔جبکہ پاکستان تحریک انصاف کے چیرمین عمران خان اپنی نئی دلہن ریحام خان کے ہمراہ آج عمرہ کے لئے روانہ ہورہے ہیں۔ جہا ں دونوں رہنماوں کے درمیان ملاقات کا قوی امکان ہے۔

ملاقات میں موجودہ حالات میں پیٹرول، لوڈ شیڈنگ اور گیس کے بحران اور انتخابی دھاندلی کی تحقیقات کے لئے جوڈیشل کمیشن کی تشکیل نہ دینے کے تناظر میں عمران خان اور طاہرالقادری کے درمیان حکومت مخالف تحریک کے لئے تبادلہ خیال ہوسکتا ہے۔

پاکستان عوامی تحریک کے ترجمان نوراللہ صدیقی نے عمران خان سے طاہرالقادری کی کسی طے شدہ ملاقات کی تردید کرتے ہوئے اس کے امکان کو مسترد نہیں کیا۔

واضح رہے اس سے قبل جب دونوں پارٹیوں نے حکومت مخالف دھرنوں کا آغازکیا تھا تو حکومتی حلقوں کی طرف سے ان کی لندن میں ہونے والے ملاقات کا تذکرہ کیا جاتا تھا، یہ بھی یاد رہے کہ ابتدائی تردید کے بعد دونوں قائدین نے لندن میں ہونے والی ملاقات کی حقیقت کی بھی تسلیم کر لی تھی۔

جنوری 20, 2015
قوم انقلاب کیلئے نکلتی تو آج پٹرول کیلئے لائنوں میں نہ لگتی، طاہرالقادری

لاہور: ڈاکٹر طاہر القادری نے کہا ہے کہ قوم کو دہشتگردی کےخلاف یکجا کرنے کے مرحلہ پر بجلی، گیس ، پٹرول کے بحران میں الجھا دیا گیا، قوم انقلاب کیلئے نکلتی تو آج پٹرول کیلئے لائنوں میں نہ لگتی۔

میڈیا کو جاری بیان میں پاکستان عوامی تحریک کے سربراہ علامہ ڈاکٹر طاہر القادری کا کہنا تھا کہ پٹرول کی قلت کے باعث طالبعلم سکول نہیں جا سکتے،ایمبولینسزتک رک گئی ہیں۔

انہوں نے کہا کہ بدانتظامی اور نااہلی کا اعتراف کرنے والے اپنی سزا بھی تجویز کریں صرف سیکرٹری پٹرولیم کو قربانی کا بکرا بنایا گیا جبکہ اس بحران کے پیچھے بڑے مگر مچھ ہیں۔

انہوں نے کہا کہ پٹرول کے حالیہ بحران کے ذمہ دار وزیراعظم، وزیرخزانہ اور وزیرپٹرولیم ہیں۔

ڈاکٹر طاہر القادری نے کہا کہ جس مرحلہ پر قوم کو دہشتگردی کے خلاف یکجا کرنے کی ضرورت تھی عین اس موقع پر قوم کو بجلی، گیس ، پٹرول کے بحران میں الجھا دیا گیا۔

طاہرالقادری کا کہنا تھا کہ پاکستان کو ایشیاءکا ٹائیگر بنانے کا دعوی کرنے والوں نے اسے پتھر کے زمانے کی طرف دھکیل دیا۔

جنوری 19, 2015