Tag: PCB

پاکستان کرکٹ بورڈ (پی سی بی) نے 2025-26 سیزن کا ڈومیسٹک کیلنڈر جاری کر دیا۔

پی سی بی ڈومیسٹک کیلنڈر کے مطابق قائد اعظم ٹرافی 22 ستمبر سے 7 نومبر تک کھیلی جائے گی، جب کہ سیزن کا آغاز 15 اگست سے حنیف محمد ٹرافی سے ہوگا۔

قومی ٹی ٹوئنٹی ٹورنامنٹ یکم سے 12 مارچ تک فیصل آباد میں ہوگا، انڈر 15، انڈر 17 اور انڈر 19 ریجنل ٹورنامنٹس بھی شیڈول کا حصہ ہوں گے، حنیف محمد ٹرافی میں 12 ٹیمیں شامل ہوں گی، میچز کراچی، ملتان، بہاولپور اور رحیم یار خان میں ہوں گے، ٹاپ 2 ٹیمیں قائداعظم ٹرافی کے لیے کوالیفائی کریں گی۔

قائد اعظم ٹرافی میں 8 ٹیمیں شامل ہوں گی، یہ 29 میچز پر مشتمل لیگ فارمیٹ ہے، ٹرافی کے میچز اسلام آباد اور راولپنڈی میں ہوں گے۔

دورۂ بنگلادیش سے قبل پاکستانی ٹیم کے لیے بری خبر

نیشنل ٹی ٹوئنٹی کے لیے کوالیفائنگ راؤنڈ بھی متعارف کرایا گیا ہے، نیشنل ٹی ٹوئنٹی کوالیفائر میں 10 ٹیمیں حصہ لیں گی، ٹاپ 2 ٹیمیں سپر 10 میں جائیں گی۔ سپر 10 مرحلے میں 8 ٹیمیں براہِ راست شامل ہو چکی ہیں جن میں کراچی وائٹس، لاہور وائٹس، پشاور، کراچی بلیوز، سیالکوٹ، اسلام آباد، فیصل آباد شامل ہیں۔

4 ڈیپارٹمنٹل ٹورنامنٹس بھی سیزن کا حصہ ہیں جن میں پریذیڈنٹ ٹرافی، پریذیڈنٹ کپ، گریڈ II اور گریڈ III شامل ہیں۔

چیف آپریٹنگ آفیسر پی سی بی سمیر احمد سید کا کہنا ہے کہ 2025-26 کا ڈومیسٹک اسٹرکچر میرٹ، مواقع اور مقابلے کی بنیاد پر تیار کیا گیا ہے، قائد اعظم ٹرافی اور نیشنل ٹی ٹوئنٹی میں کوالیفائر کا نظام شامل کیا گیا ہے، ہر میچ کی اہمیت بڑھا دی گئی، کارکردگی کو بنیاد بنایا گیا ہے۔

انھوں نے کہا حنیف محمد ٹرافی میں 12 ریجنز کے لیے خود کو منوانے کا سنہری موقع ہے، نیشنل ٹی ٹوئنٹی کا سپر 10 فارمیٹ معیاری اور سنسنی خیز کرکٹ کو فروغ دے گا، ہمارا مقصد کارکردگی کو دیکھنا اور مستقبل کے عالمی اسٹارز تیار کرنا ہے۔

ڈائریکٹر ڈومیسٹک کرکٹ آپریشنز عبداللہ خرم نیازی نے کہا ریجنل اور ڈیپارٹمنٹل کرکٹ کو یکساں اہمیت دی گئی ہے، انڈر 15، انڈر 17 اور انڈر 19 ٹورنامنٹس نوجوان ٹیلنٹ کے لیے نیا پلیٹ فارم فراہم کریں گے۔

انھوں نے کہا حنیف محمد ٹرافی کے نمایاں کھلاڑی قائد اعظم ٹرافی میں گیسٹ پلیئرز کے طور پر شامل ہو سکیں گے، ان کھلاڑیوں کو ڈومیسٹک کنٹریکٹس میں شامل کیا جائے گا جس سے ان کی کارکردگی میں بہتری آئے گی۔