Tag: PCB

  • سینٹرل کنٹریکٹ سے فارغ کرکٹرز کے لئے بڑی خوشخبری

    سینٹرل کنٹریکٹ سے فارغ کرکٹرز کے لئے بڑی خوشخبری

    لاہور:  پاکستان کرکٹ بورڈ نے سینٹرل کنٹریکٹ سے فارغ ہونے والے سینئر کھلاڑیوں کو زبردست خوشخبری سنادی ہے۔

    ذرائع کے مطابق پاکستان کرکٹ بورڈ (پی سی بی) نے قومی کرکٹ ٹیم کے تجربہ کار کھلاڑی شعیب ملک، محمد حفیظ، وہاب ریاض اور محمد عامر کی میچ فیس میں اضافہ کردیا ہے۔

    ذرائع کا کہنا ہے کہ یہ چاروں کھلاڑی پی سی بی کے سینٹرل کنٹریکٹ میں شامل نہیں ہے، اسی لئے انہیں اے کیٹیگری کے حامل کھلاڑیوں کے مساوی میچ فیس ملے گی، اس سے قبل چاروں کھلاڑیوں کو سی کٹیگری میں شامل کھلاڑیوں کے برابر رقم ملتی تھی۔

    ذرائع کا کہنا ہے کہ چاروں کھلاڑیوں نے بورڈ کے چیف ایگزیکٹیو وسیم خان کو بتایا تھا کہ سینٹرل کنٹریکٹ میں شامل نہ ہونے کے باعث ہمارے ساتھ غیر منصفانہ سلوک کیا جارہا ہے اور ہمیں سینئر کھلاڑیوں کے درجے والی میچ فیس نہیں دی جا رہی ہے۔

    ذرائع کے مطابق ان کھلاڑیوں کو ایک روزہ میچ کی فیس دو لاکھ دو ہزارروپے جبکہ ایک ٹی ٹوئنٹی کے عوض اس سےکم رقم دی جارہی تھی، تاہم اے کیٹیگری کے برابر میچ فیس ملنے کے بعد اب ان کھلاڑیوں کو ایک ون ڈے میچ پر 4 لاکھ 60 ہزار روپے اور ایک ٹی ٹوئنٹی پر فی میچ 3 لاکھ 30 ہزار روپے دئیے جائیں گے۔واضح رہے کہ پاکستان کرکٹ بورڈ نے چاروں کھلاڑیوں کی ایک درخواست کو مسترد کر دیا تھا جس میں انہیں قومی ٹیم کے ساتھ ہونے کی وجہ سے غیر ملکی ٹی 20 لیگ میں حصہ نہ لینے پر معاوضے کا مطالبہ کیا تھا، پی سی بی کا موقف تھا وہ اس کے لیے کوئی معاوضہ نہیں دے سکتے اور کھلاڑیوں کو قومی فرض کو ترجیح دینا ہوگی۔

    یہ بھی پڑھیں:  شاہد آفریدی ایک اور ٹیم کے کپتان بن گئے

    یاد رہے کہ حالیہ دورہ نیوزی لینڈ کے لیے ٹیم میں شامل کئے جانے کے بعد محمد حفیظ کو سری لنکا پریمیئر لیگ سے دستبردار ہونا پڑا جس کی وجہ سے تقریباً 1 کروڑ روپے کا نقصان ہوا، اس کے علاوہ پاکستان کرکٹ بورڈ نے دورہ نیوزی لینڈ کے موقع پر محمد حفیظ کی جانبسے تاخیر سے ٹیم کو جوائن کرنے کی درخواست کو بھی مسترد کردیا تھا۔

  • آپ کے پسندیدہ کھلاڑی اب پولیو کی اہمیت اجاگر کریں گے

    آپ کے پسندیدہ کھلاڑی اب پولیو کی اہمیت اجاگر کریں گے

    اسلام آباد: پاکستان کرکٹ بورڈ اور قومی ایمرجنسی آپریشنز سینٹر کے درمیان ایک اہم معاہدے پر دستخط ہوئے ہیں۔

    اے آر وائی نیوز کے مطابق پی سی بی اور قومی ایمرجنسی آپریشنز سینٹر پولیو ویکسی نیشن کی اہمیت اجاگر کرنے کی آگہی مہم پر مشترکہ کام کریں گے۔

    اس سلسلے میں ایک معاہدے پر دستخط کے بعد اب کھلاڑی پولیو ویکسین کی اہمیت اجا گر کریں گے۔

    کوآرڈینیٹر آپریشنز سینٹر ڈاکٹر رانا صفدر کا کہنا تھا کہ کرکٹرز پاکستانی بچوں اور نوجوانوں کے لیے رول ماڈل ہیں، قومی ہیروز ملک سے پولیو کے خاتمے میں اپنا کردار ادا کریں گے۔

    ملک سے پولیو کے خاتمے کا مشن، لیجنڈ کرکٹر بھی میدان میں آگئے

    پی سی بی کے چیف ایگزیکٹو آفیسر وسیم خان کا کہنا تھا کہ پولیو کے خلاف آگہی بڑھانے کی یہ مہم بہت اہم ہے تاکہ لوگ ویکسین لینے کی طرف راغب ہوں، ہمیں اپنے بچوں کو پولیو سے بچانے کے لیے ہر قدم اٹھانا چاہیے۔

    انھوں نے ایک ویڈیو پیغام میں کہا کہ پولیو کے خاتمے کے پلیٹ فارم کے ساتھ مل کر کرکٹر پولیو کے خلاف آگہی بڑھا سکتے ہیں، ہمارے کھلاڑی قومی سفیر ہیں، ان کی آواز سنی جاتی ہے، اس لیے پولیو کے خاتمے کے لیے ان کی آواز استعمال کرنا اور مل کر کام کرنا بہت اہم ہے۔

  • پی سی بی کا بابر اعظم کو ٹیسٹ ٹیم کی قیادت سونپنے کا فیصلہ

    پی سی بی کا بابر اعظم کو ٹیسٹ ٹیم کی قیادت سونپنے کا فیصلہ

    لاہور: پاکستان کرکٹ بورڈ نے قومی ٹیم کے کپتان بابر اعظم کو ٹیسٹ ٹیم کی قیادت بھی سونپنے کا فیصلہ کر لیا ہے۔

    تفصیلات کے مطابق ذرایع کا کہنا ہے کہ پی سی بی نے ون ڈے اور ٹی 20 ٹیموں کی کپتانی کے بعد بابر اعظم کو ٹیسٹ ٹیم کی قیادت بھی سونپنے کا فیصلہ کیا ہے۔

    ذرایع کا کہنا ہے کہ بابر اعظم قومی ٹیسٹ ٹیم کی قیادت سنبھا لنے پر رضا مند ہو گئے ہیں، قیادت ملنے کے بعد بابر اعظم ورلڈ کپ تک تینوں فارمیٹس میں قومی ٹیم کی قیادت کریں گے۔

    پی سی بی کے اعلیٰ عہدے داران نے بابر اعظم کو مکمل تعاون کی یقین دہانی بھی کرا دی ہے، نئی سلیکشن کمیٹی میں بابر اعظم کی بطور کپتان مشاورت کو اہمیت دی جائے گی۔

    بابر اعظم نے ایک اور اعزاز اپنے نام کرلیا

    چیئرمین پی سی بی کی منظوری کے بعد قومی ٹیسٹ ٹیم کی کپتانی کا اعلان کیا جائے گا، پی سی بی گورننگ بورڈ کے کل کے اجلاس میں کپتانی کا معاملہ زیر بحث آئے گا۔

    ذرایع نے بتایا کہ بابر اعظم کو کپتانی سونپنے کی صورت میں محمد رضوان نائب کپتان ہوں گے۔

    واضح رہے کہ قومی ٹیم کے کپتان بابر اعظم نے رواں سال ٹی 20 انٹرنیشنل میچز میں ایک ہزار رنز مکمل کر کے ایک اور اعزاز اپنے نام کر لیا ہے، وہ مسلسل 2 سال 1 ہزار رنز بنانے والے پاکستان کے پہلے کھلاڑی بن گئے ہیں۔

  • غیر ملکی لیگ کھیلنے والے  کھلاڑیوں کا بورڈ سے رابطہ

    غیر ملکی لیگ کھیلنے والے کھلاڑیوں کا بورڈ سے رابطہ

    لاہور: پاکستان کرکٹ بورڈ (پی سی بی ) کو لنکا پریمئر لیگ میں شرکت کے لئے کھلاڑیوں کی جانب سے این او سی کی درخواستیں موصول ہوئیں ہیں۔

    ذرائع کا کہنا ہے کہ ایل پی ایل میں آٹھ پاکستانی کرکٹرز نے معاہدے کئے، اب تک پانچ کرکٹرز نے پی سی بی سے اجازت مانگی ہے، پی سی بی نے کھلاڑیوں کے این او سی موصول ہونے کی تصدیق کی ہے۔

    پی سی بی حکام کا کہنا ہے کہ بورڈ نے فیصلہ کیا ہے کہ دورہ نیوزی لینڈ کے لئے قومی ٹیم کے اعلان کے بعد لنکا پریمئر لیگ کھیلنے والے کھلاڑیوں کو این او سی جاری کئے جائیں گے۔

    یہ بھی پڑھیں:  پاکستان کے 3 کھلاڑیوں کو اسکواڈ سے ریلیز کر دیا گیا

    واضح رہے کہ نیوزی لینڈ کے خلاف قومی کرکٹ ٹیم کا اعلان گیارہ نومبر کو متوقع ہے، پاکستانی کرکٹ ٹیم نے پی ایس ایل فائیو کے اختتام کے بعد تئیس نومبر کو دورہ نیوزی لینڈ کے لئے روانہ ہونا ہے۔

    یاد رہے کہ لنکا پریمیئر لیگ 21 نومبر تا 13دسمبر کھیلی جائے گی، اس ایونٹ میں 5 ٹیمیں ہیں اور کل 23 میچز کھیلے جائیں گے۔

  • عمر اکمل کیس، عالمی ثالثی عدالت میں کرکٹ بورڈ کی درخواست منظور

    عمر اکمل کیس، عالمی ثالثی عدالت میں کرکٹ بورڈ کی درخواست منظور

    لاہور: کھیلوں کی عالمی ثالثی عدالت نے قومی کرکٹر عمر اکمل کے خلاف پاکستان کرکٹ بورڈ (پی سی بی) کی ویڈیو لنک سماعت کی درخواست منظور کرلی۔

    اے آر وائی نیوز کی رپورٹ کے مطابق قومی کرکٹر عمر اکمل کی مشکلات میں مزید اضافہ ہوگیا، کھیلوں کی عالمی ثالثی عدالت نے عمر اکمل کے خلاف پی سی بی کی ویڈیو لنک سماعت کی درخواست منظور کرلی۔

    ذرائع کا کہنا ہے کہ عمر اکمل کے خلاف سماعت دسمبر میں ہونے کا امکان ہے، عمر اکمل کو 2 نومبر تک اپنی دستیابی کے بارے میں آگاہ کرنا ہوگا۔

    واضح رہے کہ اینٹی کرپشن ٹریبونل نے اسپاٹ فکسنگ کیس میں عمر اکمل کو تین سال کی سزا سنائی تھی جس کو عمراکمل نے چیلنج کیا تھا اور پھر سزا 18 ماہ کردی گئی تھی۔

    پی سی بی نے عمر اکمل کی 18 ماہ کی سزا کو عالمی ثالثی عدالت میں چیلنج کررکھا ہے۔

    یاد رہے کہ کھیلوں کی ثالثی عدالت میں پی سی بی اور عمر اکمل فریقین ہیں، عمر اکمل نے سزا میں کمی کے لیے جبکہ پی سی بی نے سزا کم ہونے پر اپیل دائر کررکھی ہے۔

    رواں سال ستمبر میں پی سی بی نے کھیلوں کی ثالثی عدالت سے عمر اکمل کیس کی سماعت ویڈیو لنک پر کرنے کی درخواست کی تھی، پی سی بی نے درخواست میں موقف اختیار کیا تھا کہ ویڈیو لنک سماعت سے فریقین کے اخراجات کم ہوں گے۔

  • زمبابوے کیخلاف سیریز، پی سی بی نے کھلاڑیوں کو خوشخبری سنادی

    زمبابوے کیخلاف سیریز، پی سی بی نے کھلاڑیوں کو خوشخبری سنادی

    لاہور: پاکستان کرکٹ بورڈ (پی سی بی) نے زمبابوے کے خلاف سیریز کی تیاری کے لیے لگائے جانے والے ٹریننگ کیمپ کے دوران قومی کرکٹرز کو اہلخانہ کو ساتھ رکھنے کی اجازت دے دی۔

    اے آر وائی نیوز کی رپورٹ کے مطابق پی سی بی نے تربیتی کیمپ کے دوران قومی کھلاڑیوں کو فیملیز کو ساتھ رکھنے کی اجازت دے دی، ذرائع کا کہنا ہے کہ کھلاڑی کوویڈ 19 پروٹوکولز مکمل کرکے فیملیز ساتھ رکھ سکتے ہیں۔

    واضح رہے کہ قومی کھلاڑیوں کی پہلی کوویڈ 19 ٹیسٹنگ کل ہوگی اور ٹریننگ کیمپ چار روز پر مشتمل ہوگا۔

    زمبابوے کی ٹیم ون ڈے سیریز کے لیے پاکستان پہنچ چکی ہے، مہمان ٹیم کو کوویڈ 19 پروٹوکولز کے مطابق ایک ہفتے قرنطینہ میں رہنا ہوگا۔

    مزید پڑھیں: زمبابوے کرکٹ ٹیم پاکستان پہنچ گئی 

    یاد رہے کہ پاکستان اور زمبابوے کی ٹیموں کے درمیان پہلا ون ڈے30 اکتوبر کو راولپنڈی میں کھیلا جائے گا، دوسرا ون ڈے یکم نومبر جبکہ تیسرا اورآخری میچ 3 نومبر کو کھیلا جائے گا۔

    زمبابوے کے خلاف سیریز کے لیے گزشتہ روز قومی ٹیم کا اعلان کیا گیا تھا، بابر اعظم کپتان اور شاداب خان نائب کپتان ہوں گے، سابق کپتان شعیب ملک، محمدعامر اور سرفراز کو آرام دیاگیا ہے، دوسری طرف نیشنل ٹی ٹوئنٹی میں سنچری بنانے والے عبداللہ شفیق کو ٹیم میں شامل کیا گیا ہے۔

    آل راونڈر فہیم اشرف کی ٹیم میں واپسی ہوئی ہے، جب کہ ان فٹ نسیم شاہ کی جگہ موسیٰ خان کو موقع دیا گیا ہے۔ نوجوان وکٹ کیپر روحیل نذیر بھی ٹیم میں جگہ بنانے میں کامیاب ہو گئے۔

  • زمبابوے کرکٹ ٹیم پاکستان پہنچ گئی : ایئر پورٹ پر شانداراستقبال

    زمبابوے کرکٹ ٹیم پاکستان پہنچ گئی : ایئر پورٹ پر شانداراستقبال

    اسلام آباد : زمبابوے کی کرکٹ ٹیم اسلام آباد پہنچ گئی، ایئرپورٹ پر پی سی بی حکام نے ٹیم کا استقبال کیا، تمام کھلاڑی ایک ہفتے تک قرنطینہ میں رہیں گے۔

    تفصیلات کے مطابق پاکستان اور زمبابوے کی ٹیموں کے درمیان ہونے والی سیریز کیلئے زمبابوے کی کرکٹ ٹیم پاکستان پہنچ گئی، اس سے قبل گزشتہ رات زمبابوے کرکٹ بورڈ کے چیئرمین اور منیجنگ ڈائریکٹر اسلام آباد پہنچے تھے۔

    کرکٹ ٹیم کے اسلام آباد ایئر پورٹ پہنچنے پر پی سی بی کے متعلقہ حکام نے کھلاڑیوں کا استقبال کیا، کورونا ایس او پیز پر عمل درآمد کے پیش نظر زمبابوے کی ٹیم ایک ہفتہ قرنطینہ میں رہے گی۔

    اس حولے سے ذرائع کا کہنا ہے کہ مہمان ٹیم اسکواڈ آج سے اپنی7روزہ آئسولیشن کی مدت پوری کرے گا، ایئرپورٹ حکام کے مطابق زمبابوے کی ٹیم ایئرپورٹ سے ہوٹل روانہ ہوگئی ہے، ہوٹل پہنچنےپر زمبابوے کےکھلاڑیوں کے کورونا ٹیسٹ کیے جائیں گے۔

    یاد رہے کہ پاکستان اور زمبابوے کی ٹیموں کے درمیان پہلاون ڈے30اکتوبر کو راولپنڈی میں کھیلاجائے گا، دوسراون ڈے یکم نومبر جبکہ تیسرا اورآخری میچ3نومبر کو کھیلا جائے گا۔

    مزید پڑھیں: زمبابوے کے خلاف ون ڈے، ٹی ٹونٹی سیریز کے لیے 22 رکنی ٹیم کا اعلان

    یاد رہے کہ زمبابوے کے خلاف سیریز کے لیے قومی ٹیم کا اعلان کردیا گیا ہے، بابر اعظم کپتان اور شاداب خان نائب کپتان ہوں گے، سابق کپتان شعیب ملک، محمدعامر اور سرفراز کو آرام دیاگیا ہے،  دوسری طرف نیشنل ٹی ٹوئنٹی میں سنچری بنانے والے عبداللہ شفیق کو ٹیم میں شامل کیا گیا ہے۔

    آل راونڈر فہیم اشرف کی ٹیم میں واپسی ہوئی ہے، جب کہ ان فٹ نسیم شاہ کی جگہ موسیٰ خان کو موقع دیا گیا ہے۔ نوجوان وکٹ کیپر روحیل نذیر بھی ٹیم میں جگہ بنانے میں کامیاب ہو گئے۔

  • ٹی 20 ورلڈ کپ، پی سی بی نے آئی سی سی کو خدشات سے آگاہ کردیا

    ٹی 20 ورلڈ کپ، پی سی بی نے آئی سی سی کو خدشات سے آگاہ کردیا

    لاہور: پاکستان کرکٹ بورڈ (پی سی بی) نے آئندہ سال بھارت میں ہونے والے ٹی 20 ورلڈ کپ کے لیے آئی سی سی سے ویزوں کی یقین دہانی مانگ لی۔

    اے آر وائی نیوز کی رپورٹ کے مطابق پی سی بی چیف ایگزیکٹو وسیم خان کا کہنا ہے کہ آئی سی سی جنوری تک پاکستانی کھلاڑیوں کو ویزے سے متعلق آگاہ کرے، دونوں ملکوں کے حالات کشیدہ ہیں، اس لیے ویزوں کی یقین دہانی چاہتے ہیں۔

    بین الاقوامی میڈیا سے گفتگو کرتے ہوئے وسیم خان نے کہا کہ یہ آئی سی سی کا معاملہ ہے، ہم نے خدشات سے آگاہ کردیا، میزبان ملک کے ساتھ معاہدے میں یہ واضح ہے کہ ایونٹ میں شریک ٹیموں کو ویزے اور رہائش دے گا۔

    ان کا کہنا تھا کہ بھارت کے ساتھ باہمی سیریز اگلے 4 سال تک نہیں ہو سکتی، بھارت سے کرکٹ ہمارے اختیار میں نہیں، یہ فیصلہ بھارت کو کرنا ہے۔

    خیال رہے کہ عالمی وبا کورونا کے باعث اب نومبر میں آسٹریلیا میں شیڈول ٹی ٹوئنٹی ورلڈ کپ ملتوی ہو چکا ہے۔

    2021 میں ہونے والا ٹی ٹوئنٹی ورلڈ کپ بھارت میں شیڈول ہے تاہم ابھی تک آئی سی سی کی جانب سے 22-2021 میں ہونے والے ٹی ٹوئنٹی ورلڈ کپ کے میزبان کا اعلان نہیں کیا گیا ہے۔

  • زمبابوے کیخلاف سیریز، روحیل کی شمولیت، سرفراز کے باہر ہونے کا امکان

    زمبابوے کیخلاف سیریز، روحیل کی شمولیت، سرفراز کے باہر ہونے کا امکان

    لاہور: زمبابوے کے خلاف سیریز کے لیے قومی ٹیم کے اسکواڈ کا اعلان کل کیے جانے کا امکان ہے، ٹیم میں نوجوان کھلاڑی خوشدل شاہ اور عبداللہ شفیق کی شمولیت کا امکان ہے۔

    اے آر وائی نیوز کی رپورٹ کے مطابق سابق چیف سلیکٹر مصباح الحق نے نیشنل ٹی 20 کپ کے بعد اسکواڈ کا اعلان کرنے کا فیصلہ کیا تھا مگر وہ اپنے عہدے سے مستعفی ہوگئے، امکان ہے کہ پی سی بی پریس ریلیز کے ذریعے ٹیم کا اعلان کرے گا۔

    ذرائع کے مطابق ون ڈے اور ٹی ٹوئنٹی سیریز کے لیے22 سے 23 کھلاڑیوں کے ناموں کا اعلان کیا جا سکتا ہے، سیریز سے قبل انٹرا سکواڈ ون ڈے میچز بھی پلان کیئے جا رہے ہیں۔

    سیریز میں سابق کپتان شعیب ملک کو آرام دینے پر اتفاق کیا گیا ہے ، آل راؤنڈر فہیم اشرف کی شمولیت کے علاوہ عبد اللہ شفیق اور خوشدل شاہ کی بھی ٹیم میں شمولیت کا قوی امکان ہے۔

    ذرائع کا کہنا ہے کہ نسیم شاہ کو فٹنس مسائل کے باعث آرام دیا جا رہا ہے، ان کی جگہ موسی خان کو اسکواڈ میں شامل کیا جا سکتا ہے، اس کے علاوہ تجربہ اور فارم کی بنیاد پر وہاب ریاض ٹیم میں برقرار رہ سکتے ہیں۔

    ٹیم میں دوسرے وکٹ کیپر کے طور روحیل نذیر کا نام زیر غور ہے، جبکہ سرفراز احمد کا جگہ برقرار رکھنا مشکل ہے، سیریز میں بابر اعظم پہلی مرتبہ ون ڈے کرکٹ میں بھی قیادت کریں گے ۔

    واضح رہے کہ پاکستان اور زمبابوے کی ٹیموں کے درمیان تین ون ڈے اور تین ٹی ٹوئنٹی میچز ہوں گے ، جبکہ زمبابوے ٹیم 20 اکتوبر کو پاکستان پہنچے گی۔

  • کوچنگ پر توجہ دینا چاہتا ہوں، کسی سے سے کوئی اختلاف نہیں، مصباح الحق

    کوچنگ پر توجہ دینا چاہتا ہوں، کسی سے سے کوئی اختلاف نہیں، مصباح الحق

    لاہور : قومی کرکٹ ٹیم کے چیف سلیکٹر اور ہیڈ کوچ مصباح الحق نے چیف سلیکٹر کے عہدے سے مستعفی ہونے کا اعلان کردیا، ان کا کہنا ہے کہ کوئی دباؤ نہیں تھا ٹیم پر فوکس کرنا چاہتا ہوں۔

    یہ بات انہوں نے لاہور میں پریس کانفرنس سے خطاب کرتے ہوئے کہی، ان کا کہنا تھا کہ وزیراعظم عمران خان سے ملاقات کے موقع پر بھی بی سی بی سے کوئی اختلاف نہیں تھا۔

    سابق ٹیسٹ ٹیم کے کپتان نے کہا کہ اکثر بیرون ملک ہونے کے باعث دوہری ذمہ داریاں عائد ہوتی ہیں جن کو پورا کرنے میں مشکلات کا سامنا ہے اسی لیے چیف سلیکٹر کا عہدہ چھوڑنا پڑا، کسی سے کوئی اختلاف نہیں۔

    پریس کانفرنس میں مصباح الحق کا کہنا تھا کہ زمبابوے کے خلاف ہوم سیریز اور دورہ نیوزی لینڈ کی ٹیمیں میں منتخب کروں گا اور بحیثیت چیف سلیکٹر کی ذمہ داری 30 نومبر تک ادا کرتا رہوں گا۔ نئے چیف سلیکٹر کا انتخاب بورڈ کا استحقاق ہے، نیا چیف سلیکٹر جنوبی افریقہ کے خلاف سیریز سے ذمہ داریاں سنبھالے گا۔

    ان کا کہنا تھا کہ میں اب کوچنگ پر بھرپور توجہ دینا چاہتا ہوں اور اس حوالے سے بورڈ کو بھی آگاہ کردیا ہے، آج کل کی کوچنگ کے لئے فٹنس کی ضرورت ہے اور مجھ میں ابھی انرجی ہے.

    انہوں نے کہا کہ ہیڈ کوچ کے طور پر ہار اور جیت کا ذمہ دار ہوں گا، میری نظریں اگلے دو برس کی کمٹمنٹ پر ہیں، ہمارا سب سے بڑا ہدف تینوں فارمیٹس میں پاکستان کو نمبر ون ٹیم بنانا ہے۔

    اس حوالے سے تجزیہ نگاروں کا کہنا ہے کہ مصباح الحق کا ایک سال بعد چیف سلیکٹر کے عہدے سے دستبردار ہونے کی وجہ پی سی بی کا نیا قانون ہے جس کے تحت ایک ساتھ دو عہدے نہیں رکھے جاسکتے۔

    بحیثیت چیف سلیکٹر مصباح الحق نے نوجوان کھلاڑیوں کو مواقع فراہم کیے لیکن بد قسمتی سے اس کے نتائج اچھے نہیں رہے، مصباح الحق نے پہلی سیریز میں عمراکمل اور احمد شہزاد کو سری لنکا کے خلاف کھیلنے کا موقع دیا۔

    آسٹریلیا جیسے مشکل دورے پر بھی نوجوانوں کو آزمایا، ٹی ٹوئنٹی میں خوشدل شاہ، موسیٰ خان، احسان علی، حارث رؤف اورحیدر علی کو ڈیبیو کرایا۔

    ٹیسٹ میں عثمان شنواری، موسیٰ اور نسیم شاہ آزمائے، ان کی کوچنگ میں قومی ٹیم نے 8 ٹیسٹ سیریز کھیلیں، جن میں دو جیتے تین ہارے اور تین ہی ڈرا ہوئے جبکہ ٹی ٹوئنٹی فارمیٹ میں قومی ٹیم پہلے سے چوتھے نمبر پر آگئی، بارہ ٹی ٹوئنٹی میچز کھیلے، تین جیتے، چھ ہارے اور تین بے نتیجہ رہے۔