چنائے: آل راؤنڈرمحمد حفیظ کا غیر سرکاری بولنگ ایکشن ٹیسٹ بھارت میں مکمل ہو گیا۔
پاکستان ٹیم کے لئے محمد حفیظ کا بولنگ ایکشن کلیئر ہونا بہت اہم ہے تاکہ وہ ورلڈ کپ میں بولنگ کرا سکیں، حفیظ کا غیر سرکاری بولنگ ایکشن ٹیسٹ آج چننئی میں ہوا جسکے دوران آئی سی سی کے حکام بھی شریک تھے،اب حفیظ کا سرکاری ٹیسٹ چھ جنوری کو ہوگا جسکے بعد انکے کلیئر ہونے کا حتمی فیصلہ ہو سکے گا، ورلڈ کپ سے قبل پہلے سعید اجمل اور پھر حفیظ کا معطل ہونا پاکستان ٹیم کے لئے دو بڑے دھچکے ہیں۔
چنائی : محمد حفیظ کے بولنگ ایکشن کی غیر سرکاری جانچ آج چنائی کی بائیو میکنیک لیب میں ہونے کا امکان ہے، محمد حفیظ چنائی پہنچ گئے ہیں جہاں آج ان کا بولنگ ایکشن ٹیسٹ متوقع ہے۔
پی سی بی کے ڈاکٹر سہیل سلیم بھی حفیظ کے ہمراہ ہیں۔ حفیظ کے غیر رسمی جانچ کا نتیجہ مثبت آیا تو آئی سی سی سے باقاعدہ ٹیسٹ کرانے کی درخواست کی جائے گی۔
نیوزی لینڈ کے خلاف ابوظہبی ٹیسٹ میں حفیظ کا ایکشن رپورٹ ہوا تھا جس کے بعد آف اسپنر پر بین الاقوامی میچز میں بولنگ کرنے پر پابندی عائد کردی گئی تھی۔
حفیظ کا ایکشن درست کروانے کے لئے ثقلین مشتاق اور اسپن بولنگ کوچ مشتاق احمد نے کام کیا۔ پابندی کے باعث حفیظ صرف بیٹسمین بن کر رہ گئے ہیں۔
کراچی : پینٹینگولر کپ کرکٹ ٹورنامنٹ کل سے کراچی میں شروع ہوگا۔ قومی کرکٹرز ایکشن میں دکھائی دیں گے۔پینٹینگولر کپ کرکٹ ٹورنامنٹ خراب موسم اور دھند کے باعث ملتان سے کراچی منتقل کردیا گیا تھا۔
ایونٹ کا آغاز بدھ سے نیشنل اسٹیڈیم میں ہوگا۔ پی سی بی نے ٹورنامنٹ کے لئے ٹیمز اور آفیشلز کا اعلان کردیا ہے۔ایونٹ میں ملک بھر سے پانچ ٹیمیں شرکت کریں گی۔
پاکستان کرکٹ بور ڈ نے پنٹنگولر ون ڈے کرکٹ ٹورنامنٹ کی ٹیموں اور آفیشلز کا اعلان کردیا ہے۔ پی سی بی نے پنٹینگولر کرکٹ ٹورنامنٹ کے لئے ٹیموں کا اعلان کردیاہے۔
فواد عالم سندھ نائٹس کی ٹیم کے کپتان ہوں گے جبکہ انور علی نائب کپتانی کریں گے۔ لاہوربادشاہ کی قیادت حارث سہیل کریں گے،عمراکمل نائب کپتان ہوں گے۔
بلوچستان وارئیرز کی کپتانی اظہر علی کریں گے۔ بسمہ اللہ خان ان کے نائب ہوں گے۔فیڈرل یونائیٹڈ کی قیادت عمر امین کو دی گئی ہے۔ زوہیب احمد نائب کپتان ہوں گے۔
خیبر پختونخواہ کی کپتانی جنید خان کریں گے عمران خان ان کے نائب ہوں گے۔ پنٹنگولر کپ ون ڈے کرکٹ ٹورنامنٹ اکتیس دسمبر سے کراچی میں شروع ہوگا،اوردس جنوری تک جاری رہے گا۔
لاہور: پاکستان کرکٹ بورڈ کے چیئرمین شہر یار خان نے کہا ہے کہ آف اسپنر سعید اجمل نے آئندہ برس فروری سے شروع ہونے والے کرکٹ کے عالمی کپ میں شرکت نہ کرنے فیصلہ کیا ہے۔
شہریار خان نے گزشتہ روز برطانوی نشریاتی ادارے سے گفتگو کرتے ہوئے اس بات کی تصدیق کی۔ ان کا مزید کہنا تھا کہ ورلڈ کپ میں حصہ نہ لینے کے حوالے سے آف اسپنر سعید اجمل ایک دو روز میں پریس کانفرنس کریں گے۔
شہریار خان کا کہنا تھا ’آسٹریلیا اور نیوزی لینڈ میں ہونے والے کرکٹ ورلڈ کپ میں اور اپنا بائیو مکینک ٹیسٹ نہ کروانے کا فیصلہ سعید اجمل کا اپنا ہے اور اس وقت ان کے ساتھ ثقلین مشتاق اور دیگر ماہرین بھی موجود تھے۔
ابھی سعید اجمل کو اپنے بولنگ ایکشن کو ری ماڈل کرنے کے لئے تھوڑا اور وقت چاہیئے۔‘ برطانوی نشریاتی ادارے نے جب شہر یار خان سے پوچھا کہ کیا اس دوران سعید اجمل ثقلین مشتاق کے ساتھ ہی پریکٹس کرتے رہیں گے تو انھوں نے کہا سعید اجمل ثقلین مشتاق کے ساتھ پریکٹس کر رہے ہیں۔
انھوں نے مزید کہا کہ سعید اجمل کی کوشش ہو گی کہ جس طرح ثقلین مشتاق نے انھیں بتایا ہے اس طرح وہ اپنے بولنگ ایکشن کو ری ماڈل کریں۔
لاہور: پاکستان کرکٹ بورڈ نے معین خان کو چیف سلیکٹر برقرار رکھتے ہوئے ایک عہدہ واپس لے لیا،نوید اکرم چیمہ کو ورلڈ کپ کے لئے قومی ٹیم کا مینجر مقرر کردیا گیا۔
پی سی بی نے معین خان سے ایک عہدہ واپس لے لیا ہے، معین خان ورلڈ کپ میں بطور چیف سلیکٹر ٹیم کے ہمراہ جائیں گے، چیف سیکرٹری پنجاب نوید اکرم چیمہ کو میگاایونٹ کے لئے ٹیم کا مینجر مقرر کیا گیا ہے، نوید اکرم چیمہ اپنے موجودہ عہدے سے جنوری میں ریٹائر ہورہے ہیں، نوید اکرم چیمہ اسپاٹ فکسنگ کیس کے بعد تین سال تک ٹیم کے مینجر رہے،ان کی موجودگی میں کبھی کوئی تنازع سامنے نہیں آیا۔
لاہور: آف اسپنر سعید اجمل کی ورلڈ کپ میں شرکت مشکوک ہوگئی،پاکستان کرکٹ بورڈ نے سعید اجمل کو بولنگ ایکشن کی غیر سرکاری جانچ کے لئے بھارت نہ بھیجنے کا فیصلہ کرلیا۔
آئی سی سی کو ورلڈ کپ کے لئے حتمی ٹیم کے نام 7 جنوری تک بھجوانے ہیں، اجمل کا ایکشن اب تک ٹھیک نہ ہوسکا، بازو کا خم پندرہ ڈگری کے اندر نہ آسکا۔ بورڈ نے تمام ترکیبیں لڑا کر دیکھ لیں، ڈومیسٹک میچ بھی کھلالیا، برطانیہ میں غیر سرکاری ٹیسٹ بھی ہوگئے، لیکن ثقلین مشتاق اجمل کا ایکشن درست نہ کرسکے،ایسے میں پی سی بی نے کم وقت میں مشکل فیصلہ کرلیا۔
آف اسپنر کو بالنگ ایکشن کی غیر سرکاری جانچ کے لئے بھارت نہیں بھیجا جائے گا، اس فیصلے کے بعد اجمل کی ورلڈ کپ میں شرکت کے امکانات نہ ہونے کے برابر رہ گئے، پاکستان کرکٹ بورڈ کا کہنا ہے کہ سعید اجمل ایکشن کی بہتری کے لئے مزید کام جاری رکھیں گے، وہ ایکشن کی جانچ کے لئے بھارت نہیں جارہے، بورڈ کا کہنا ہے کہ آل راؤنڈر محمد حفیظ کا آئندہ ہفتے چنائی میں غیر سرکاری بولنگ ایکشن ٹیسٹ ہوگا۔
تاہم چیئرمین شہریارخان نے کھل کربتادیاکہ سعیداجمل ورلڈکپ نہیں کھیلیں گے، انہوں نے کہا کہ سعیداجمل نے ورلڈکپ نہیں کھیلنےکافیصلہ خودکیا۔
سکھر: ٹی 20میچ رمضان البارک میں کھیلا جاتا تھا لیکن اب اسے انٹرنیشنل کر دیا گیا ہے جس سے کھلاڑیوں میں امپروومنٹ نہیں آئے گی۔
سکھر میں میڈیا سے بات چیت کرتے ہوئے کہا کہ کرکٹر محمد یوسف نے کہا ہے کہ ورلڈ کپ میں 16ملکوں کی ٹیمیں حصہ لیں گی ،دیکھیں کون جیتتا ہے پاکستان ٹیم کی موجودہ پرفامنس دوسری ٹیمیوں کے لئے مشکلات کا سامنا بنیں پاکستان کا نیو زی لینڈ سے میچ ڈرا کرنا بڑا نقصان تھا پاکستان ابو ظہبی اور دبئی میں اچھی کر کٹ نہیں کھیل سکا جو کہیں نہ کہیں خرابی کے باعث انکو شکست کا سامنا کرنا پڑا محمد یوسف نے کہا کہ ٹی 20میچ رمضان المبارک میں کھیلا جاتا تھا مگر اب تو اسے انٹر نیشنل کر دیا گیا ہے آئے روز ٹی 20کھیلنے سے امپروومنٹ نہیں آئے گی ۔
لاہور: پاکستان کرکٹ بورڈ کے چیئرمین شہریار خان اور قومی کرکٹ ٹیم کے مینجر معین خان میں ون آن ون ملاقات ہوئی، ملاقات میں ورلڈ کپ کےلئے نوید اکرم چیمہ کو چیف ڈی مشن مقرر کرنے کا فیصلہ کیا گیا ہے۔
ذرائع کے مطابق نوید اکرم چیمہ کو یہ ذمہ داری حکومت پنجاب کے دباو پر سونپی گئی ہے ،صوبائی حکومت نے نوید اکرم چیمہ کو این او سی اور پی سی بی نے تقرری کا خط بھی جاری کردیا ہے جبکہ معین خان ٹیم کے ساتھ مینجر کی حیثیت سے اپنا کام جاری رکھے گے۔
نوید اکرم چیمہ کی تقرری کی خبر جہاں معین خان کے لئے پریشانی کا باعث ہے وہیں کرکٹ ٹیم کے کھلاڑیوں میں بھی بے چینی پائی جارہی ہے، نوید اکرم چیمہ ٹیم کے ڈسپلن کے حوالے سے کافی سخت ہیں جس وجہ سے کھلاڑی پریشان ہیں۔
لاہور: چیئرمین پی سی بی شہریار خان نے کہا ہے کہ سیکیورٹی خدشات بدستور ملک میں انٹرنیشنل کرکٹ کی بحالی میں سب سے بڑی رکاوٹ ہیں، انہوں نے کہا کہ بڑی ٹیموں کے آنے میں اب بھی دو سے تین سال لگ سکتے ہیں۔
کراچی میں میڈیا سے گفتگو کرتے ہوئے چیئرمین پی سی بی شہریار خان نے کہا کہ سیکیورٹی خدشات کے پیش نظر ٹیمیں پاکستان آنے کو تیار نہیں ہیں، انکا کہنا تھا کہ پاک بھارت کرکٹ روابط حالیہ تنازعات کی وجہ سے کمزور نہیں ہونگے۔
چئیرمین پی سی بی نے اعتراف کیا کہ ون ڈے میں قومی ٹیم مضبوط نہیں لیکن انہیں یقین ہے کہ میگا ایونٹ میں ٹیم عمدہ کھیل پیش کرے گی، انہوں نے کہاکہ اجمل اور حفیظ کو ورلڈ کپ میں ٹیم کا حصہ دیکھنا چاہتے ہیں۔
ایک سوال پر چئیرمین پی سی بی نے کہا کہ مصباح الحق کی انجری شدید نوعیت کی نہیں، مصباح ہی میگا ایونٹ میں ٹیم کی قیادت کریں گے،آفریدی کا ریٹائرمنٹ لینے کا فیصلہ ان کا ذاتی ہے۔
لاہور: ورلڈ کپ کے لئے پندرہ رکنی حتمی اسکواڈ میں کون کون شامل ہوگا۔ٹیم کے انتخاب کےلئے سلیکٹرز نے مشاورت شروع کردی ہے۔ورلڈ کپ کے لئے آئی سی سی کو حتمی کھلاڑیوں کی فہرست بھجوانے کی آخری تاریخ سات جنوری ہے۔
پی سی بی نے پندرہ کھلاڑیوں کے انتخاب کے لئے مشاورت تیز کردی ہے۔ نیوزی لینڈ سے ون ڈے سیریز میں شکست نے سلیکشن کمیٹی کو تشویش میں مبتلا کردیا ہے۔
اسد شفیق سمیت کئی کھلاڑی کیویز کے خلاف خاطرخواہ کارکردگی کا مظاہرہ نہ کرسکے۔ کھلاڑیوں کی انجری اور پابندی نے پی سی بی کی پریشانی میں اور بھی اضافہ کردیا ہے۔
ٹیم کا انتخاب بورڈ کے لئے چیلنج بن گیا گیا ہے۔ مایہ ناز آف اسپنر سعید اجمل پر پابندی بورڈ کے لئے سب سے بڑا دھچکا ہے۔ادھر حفیظ کے بولنگ کرنے پر پابندی عائد کی جاچکی ہے۔
ایسے میں نوجوان لیگ اسپنر یاسر شاہ کی ٹیم میں شمولیت کا امکان ہے۔ کچھ کھلاڑیوں کی فارم اور فٹنس کا جائزہ آئندہ ہفتے سے شروع ہونے والے پینٹاگولر کپ کرکٹ ٹورنامنٹ میں لیا جائے گا جس کے بعد ہی حتمی ٹیم کا اعلان ہوگا۔