کوئٹہ: جماعت اسلامی کے امیرسینیٹرسراج الحق نے کہا ہے کہ کرپشن کے خلاف آپریشن صرف سندھ نہیں چاروں صوبوں میں کی جائے، اسٹیل مل، پی آئی اے اورواپڈا کی نجکاری کے خلاف ہیں، بلوچستان کے عوام کو حقوق دئیے جائیں۔
کوئٹہ میں جماعت اسلامی کے امیر سینیٹرسراج الحق ورکرز کنونشن سے کارکنوں اور جماعت میں نئے شمولیت کرنے والوں سے خطاب کررہے تھے، اپنے خطاب میں امیر جماعت اسلامی نے موجودہ حکمرانوں کو ناکام قرار دیتے ہوئے کہا کہ ڈھائی سال میں کوئی بہتری نہیں آئی۔
ان کا کہنا تھا کہ اہم قومی اداروں کو کسی صورت جاگیرداروں پر فروخت ہونے نہیں دیں گے انہوں نے کہا کہ ملک میں بھوک اورخوف کا عالم ہے امیرجماعت اسلامی نے ملک میں رائج نظام کو تنقید کا نشانہ بناتے ہوئے کہاکہ 68سالوں میں 40سال مارشل لاءجبکہ باقی عرصہ وڈیرے نواب خان اور جاگیردار نام نہاد جمہوریت کے نام پر ملک پر مسلط رہے۔
امیرجماعت اسلامی کا کہنا تھا کہ ملک میں ایک ہزارارب روپے کاکرپشن ہوتا ہے کرپشن اور استحصال کا خاتمہ ہو تو تمام مسائل حل ہوں گے جو کہ صرف اسلامی نظام کے نفاذ سے ہی ممکن ہے ، جماعت اسلامی اقتدار میں آئی تو عدل و انصاف قائم کرتے ہوئے قوم کا پیسہ لوٹنے والوں کو گریبان سے پکڑے گا۔
انہوں نے سرحدوں کی صورتحال کو تشویشناک قرار دیتے ہوئے کہا کہ بھارت ہمارے سرحدوں پر جارحانہ رویہ اپنائے ہوئے ہے مگر ہمارے حکمران مصلحت سے کام لے رہے ہیں۔
امیر جماعت اسلامی نے کہا کہ مرکز کے ساتھ صوبے کے اپنے لوگوں نے بھی غریبوں کے ساتھ نا انصافی کی، گوادرتا کاشغر روٹ کسی صورت تبدیل نہیں ہوں دیں گے، گوادر میگا پراجیکٹ میں روزگار ملنے کا حق صرف بلوچستان کے لوگوں کا ہے۔
