Tag: pdm

اسلام آباد: حکومت کے خلاف فیصلہ کن تحریک کے لیے پی ڈی ایم کے اجلاس میں سابق وزیر اعظم نواز شریف نے استعفے مولانا فضل الرحمان کے پاس جمع کرانے کی تجویز دے دی۔

تفصیلات کے مطابق اسلام آباد میں مولانا فضل الرحمان کی زیر صدارت بڑی بیٹھک میں بڑے فیصلوں کا امکان ہے، پی پی چیئرمین بلاول بھٹو اور ن لیگ کی مریم نواز بھی اجلاس میں شریک ہیں۔

اجلاس میں یوسف رضا گیلانی، شیری رحمان، قمر زمان کائرہ، شاہد خاقان عباسی، احسن اقبال، میاں افتخار، امیر حیدر ہوتی، محمود خان اچکزئی، آفتاب شیر پاؤ، پروفیسر ساجد میر و دیگر اپوزیشن رہنما شریک ہیں۔

ذرایع نے بتایا کہ نواز شریف نے استعفے مولانا فضل الرحمان کے پاس جمع کرانے کی تجویز دے دی ہے اور کہا کہ لانگ مارچ کے بعد مولانا فضل الرحمان استعفے اسپیکر کو پیش کر دیں، تمام جماعتوں کی جانب سے نواز شریف کی تجویز کی حمایت کی گئی۔

اپوزیشن سے زیادہ پُر اعتماد ہوں، انھوں نے استعفے دیے تو الیکشن کرا دیں گے: وزیر اعظم

واضح رہے کہ پی ڈی ایم سربراہ اجلاس میں اسمبلیوں سے استعفے، اسلام آباد مارچ، اور پی ڈی ایم کے مستقبل سے متعلق مشاورت کی جا رہی ہے، آصف زرداری بھی اجلاس سے وڈیو لنک کے ذریعے خطاب کریں گے، مریم نواز نے آصف زرداری کو بختاور بھٹو کی منگنی کی مبارک باد دی۔

واضح رہے کہ آج سینئر کالم نگاروں سے ملاقات میں وزیر اعظم عمران خان نے واضح کر دیا ہے کہ اپوزیشن نے استعفے دیے تو ہم الیکشن کرا دیں گے، کہا میں اپوزیشن سے زیادہ پُر اعتماد ہوں، ہر پالیسی پر پاک فوج کی مکمل حمایت حاصل ہے۔

اسلام آباد: مشیر پارلیمانی امور بابر اعوان نے پی ڈی ایم رہنماؤں کے استعفوں سے متعلق بیانات پر رد عمل دیتے ہوئے کہا ہے کہ یہ پی ڈی ایم کی سہ فریقی چکر بازی ہے۔

تفصیلات کے مطابق ڈاکٹر بابر اعوان نے پاکستان ڈیموکریٹک موومنٹ کے استعفوں کے بیانات کو سہ فریقی چکر بازی قرار دے دیا۔

انھوں نے کہا کہ مولانا فضل الرحمان پیپلز پارٹی اور ن لیگ سے استعفے مانگتے ہیں، لیکن جے یو آئی پہلے خود استعفے دے پھر دوسروں سے مانگیں۔

بابر اعوان کا کہنا تھا کہ سندھ حکومت چھوڑ کر استعفوں کی بات ہو تو پی ڈی ایم مؤقف سنجیدہ ہو سکتا ہے، ن لیگ کے مفرور سینیٹر نے استعفٰی نہیں دیا تو اور کون دے گا، مفرور لیگی پارلیمنٹیرینز تو استعفے دیں۔

ادھر پی ڈی ایم کا سر براہی اجلاس 8 دسمبر کو اسلام آباد میں طلب کر لیا گیا ہے، اس اجلاس کے لیے پارٹی رہنماؤں سے تجاویز مانگ لی گئی ہیں، اجلاس میں بیک ڈور رابطوں کے لیے مشترکہ ٹیم تشکیل دینے پر مشاورت متوقع ہے۔

ذرایع کا کہنا ہے کہ استعفے دینے، لانگ مارچ یا پھر مذاکرات کا فیصلہ اجلاس ہی میں ہوگا، پی ڈی ایم کا کہنا ہے کہ بے مقصد تنقید بڑھ رہی ہے اس لیے اب اجلاس میں نئی حکمت عملی پر غور ہوگا۔

ذرایع نے بتایا کہ اختر مینگل اور محمود اچکزئی کو الفاظ کا چناؤ بہتر کرنے کا بھی مشورہ دیا جائے گا۔

لاہور: پاکستان ڈیموکریٹک موومنٹ (پی ڈی ایم) کا لاہور میں 13 دسمبر کا جلسہ رکوانے کے لیے لاہور ہائی کورٹ میں دوبارہ درخواست دائر کر دی گئی۔

اے آر وائی نیوز کے مطابق ندیم سرور ایڈووکیٹ نے پی ڈی ایم کا لاہور کا جلسہ رکوانے کے لیے عدالت میں دوبارہ درخواست دائر کر دی، اس سے قبل لاہور ہائی کورٹ نے درخواست کو ناقابل سماعت قرار دے دیا تھا، درخواست گزار نے ترمیم کر کے اسے دوبارہ دائر کر دیا۔

درخواست میں مؤقف اختیار کیا گیا ہے کہ کرونا کی وجہ سے ہیلتھ ایمرجنسی لگائی گئی ہے لیکن پی ڈی ایم لاہور میں جلسہ کر رہی ہے جس سے کرونا کے پھیلنے کا شدید خطرہ ہے۔

درخواست گزار کے مطابق کرونا کے دوران جلسہ کرنا شہریوں کی زندگی سے کھیلنے کے مترادف ہے، درخواست میں استدعا کی گئی ہے کہ پی ڈی ایم کے لاہور جلسے پر پابندی لگائی جائے اور وائرس سے بچاؤ کے لیے ایس او پیز پر عمل نہ کرنے والوں کے خلاف کارروائی کا حکم دیا جائے۔

پی ڈی ایم لاہور جلسہ، ن لیگ نے چندہ مہم شروع کردی

خیال رہے کہ ملک میں کرونا کی دوسری لہر کے باوجود اپوزیشن اتحاد نے جلسے جاری رکھنے کا اعلان کیا ہے، 30 نومبر کو بھی اپوزیشن جماعتوں نے ملتان میں پاور شو کیا تھا، اور اب 13 دسمبر کو لاہور جیسے گنجان آباد شہر میں پی ڈی ایم جلسہ کرنے جا رہی ہے۔

دوسری طرف مسلم لیگ ن کی قیادت نے پی ڈی ایم کے لاہور جلسے کے لیے چندہ مہم کا بھی آغاز کر دیا ہے، اس سلسلے میں پارٹی رہنماؤں، اراکین اسمبلی اور کاروباری شخصیات سے چندہ مانگا گیا۔

ملتان: ضلعی انتظامیہ نے ملتان کرکٹ اسٹیڈیم سے سیاسی جماعتوں کے پرچم اتار دیے۔

تفصیلات کے مطابق ملتان کی ضلعی انتظامیہ نے اسٹیڈیم میں لہرائے گئے سیاسی جماعتوں کے جھنڈوں پر ایکشن لیتے ہوئے تمام جھنڈے اتار دیے۔

اسٹیڈیم کے اندر موجود اسکور بورڈ پر بھی سیاسی کارکنوں کی جانب سے پینا فلیکس لگائے گئے تھے، انتظامیہ نے یہ پینافلیکس بھی ہٹا دیے، اسٹیڈیم کے تمام دروازوں کو تالے بھی لگوا دیے گئے ہیں۔

واضح رہے کہ ڈپٹی کمشنر نے کرونا پھیلاؤ کے خدشے کے پیش نظر پی ڈی ایم کو ملتان جلسے کی اجازت دینے سے انکار کیا تھا، ڈی سی کا کہنا تھا کہ ضلع ملتان میں کرونا وائرس کے کیسز مسلسل بڑھ رہے ہیں، نشتر اسپتال کے اعداد و شمار کے مطابق کرونا کی دوسری لہر میں شرح اموات زیادہ ہے۔

دوسری طرف ملتان میں وسیع پیمانے پر گرفتاریاں بھی کی گئی ہیں، ضلعی انتظامیہ نے کسی بھی ہنگامی صورت حال سے نمٹنے کے لیے بھی پوری تیاری کر لی، ڈپٹی کمشنر کی ہدایت پر ایک ایمرجنسی پلان تیار کیا گیا ہے، جس کے تحت اسٹیڈیم اور اس کے اطراف میں 3 ہیلی پیڈ تیار کر لیے گئے ہیں۔

اپوزیشن نے طبل جنگ بجا دیا

ادھر سندھ سے آنے والے کارکنوں کو کوٹ سبزل بارڈر پر روکنے کا فیصلہ بھی کیا گیا ہے، سندھ پنجاب بارڈر پر کنٹینر پہنچا دیے گئے اور پولیس کی نفری بھی تعینات کر دی گئی، سندھ سے آنے والی گاڑیوں کی مکمل چیکنگ کی جا رہی ہے۔

ملتان: آج ملتان میں پی ڈی ایم اجلاس کے بعد مولانا فضل الرحمان نے پریس کانفرنس میں کارکنوں کو مخاطب کرتے ہوئے کہا کہ جلسہ روکنے کے لیے اگر ڈنڈے کا استعمال کیا گیا تو آپ کو بھی ڈنڈا استعمال کرنے کی اجازت ہے۔

تفصیلات کے مطابق ملتان جلسے کے سلسلے میں لائحہ عمل طے کرنے کے لیے پی ڈی ایم اجلاس کی صدارت کے بعد جمعیت علمائے اسلام ف کے سربراہ نے پریس کانفرنس میں طبل جنگ بجا دیا ہے۔

انھوں نے کہا کہ کل 30 نومبر کو ملتان میں عظیم الشان جلسہ ہونے جا رہا ہے، اس جلسے سے روکا گیا تو عوام کا سیلاب بہا کر لے جائے گا، کارکنوں کو مخاطب کرتے ہوئے انھوں نے ڈنڈے کے جواب میں ڈنڈا استعمال کرنے کی اجازت دیتے ہوئے کہا پولیس یا کوئی بھی قوت راستے میں آئے توان کی قوت توڑ دیں۔

مولانا نے کہا کہ ہم لاقانونیت اور پولیس گردی کو قبول نہیں کریں گے، اگر ہم جلسے کا رخ نہ کر سکے تو جیلوں کا رخ کریں گے، میں جمعہ اور اتوار کو پورے ملک کے ضلعی ہیڈکوارٹرز پر احتجاج کا اعلان کرتا ہوں۔

کسی بھی ہنگامی صورت حال سے نمٹنے کے لیے ملتان انتظامیہ نے تیاری کر لی

انھوں نے کہا ہم ہر صورت حال کا مقابلہ کرنے کو تیار ہیں، کل میدان گرم ہو جائےگا، انھوں نے جنگ چھیڑ دی اور ہم نے بھی جنگ چھیڑ دی ہے۔

فضل الرحمان کا کہنا تھا ملتان میں ہمارے لیے کرونا ہو رہا ہے لیکن دیر اور لاہور میں جلسہ ہو رہا ہے کیا وہاں کرونا نہیں، کو وِڈ 19 سے زیادہ کو وِڈ 18 خطرناک ہے، کل ملتان میں جلسہ نہ کرنے دیا گیا تو پاکستان کا ہر ضلع جلسہ گاہ بن جائے گا۔

سابق وزیر اعظم یوسف رضا گیلانی نے کہا کہ آصف زرداری اور بلاول بھٹو علیل ہیں، تاہم آصفہ بھٹو کل ملتان جلسے میں شرکت اور خطاب کریں گی، حکومت کا مشکور ہوں ملتان جلسے سے پہلے ہی جلسہ کامیاب کر دیا، عمران خان نے کہا تھا جلسے کریں کنٹینر اور کھانا دیں گے، ملتان میں کنٹینر پہنچا کر حکومت نے آدھا وعدہ پورا کر دیا۔