پیرس : فرانس کے مختلف شہروں میں پنشن اصلاحات کیخلاف لاکھوں لوگ سڑکوں پر نکل آئے، مشتعل مظاہرین نے جلاؤ گھیراؤ اور حکومت کیخلاف شدید نعرے بازی کی۔
پیرس میں لاکھوں افراد نے پنشن اصلاحات کے خلاف مارچ کیا، مظاہرین نے گاڑی اور کچرے کے ڈبے جلادیے جبکہ فرانس کے دیگر شہروں میں بھی احتجاج مظاہرے کیے جارہے ہیں، پولیس نے کئی شہروں میں تشدد میں ملوث مظاہرین کو حراست میں لے لیا ہے۔
ہونے والے مظاہروں سے کشیدگی میں مسلسل اضافہ ہوتا جا رہا ہے جبکہ پولیس کی مداخلت کے نتیجے میں ایک شخص کی انگلی کے ٹوٹ جانے کی اطلاع ملی ہے۔ ذرائع کے مطابق اب تک 7 افراد زخمی ہوچکے ہیں۔ زخمیوں میں ایک شخص کا انگوٹھا پلاسٹک کے دستی بم سے کٹ گیا۔
ملک کے دارالحکومت پیرس میں احتجاج کے دوران پولیس اور مظاہرین کے درمیان متعدد جھڑپیں ہونے کی بھی اطلاع ملی ہے۔ کچھ مظاہرین نے کچرے اور کچرے کے ڈرموں کو نذر آتش کردیا اور بس اسٹاپوں کو نقصان پہنچایا ہے۔
پولیس کی جانب سے آنسو گیس کے استعمال کے جواب میں مظاہرین نے پولیس پر پتھراو کیا اور اور شیشے کی بوتلیں پھینکیں۔ اطلاع کے مطابق مظاہرے کے دوران ایک پتھر لگنے سے ایک پولیس اہلکار زخمی ہوگیا ہے۔
مخالفین نے بورڈو میں سٹی ہال کے دروازے کو نذر آتش کردیا جبکہ ڈیجون اور رینس میں پولیس اور مظاہرین کے درمیان جھڑپیں ہونے کی اطلاع ملی ہے۔
پیرس شہر کی سڑکوں اور گلیوں میں پولیس اور مظاہرین میں جھڑپیں ہوئیں جہاں اہلکاروں نے آنسو گیس کے شیل پھینکے اور احتجاج کرنے والوں پر لاٹھی چارج کیا۔ بعض جگہوں پر مظاہرین نے گلیوں میں کوڑے کو آگ لگائی جس کے بعد فائر فائٹرز کو بجھانے کیلئے آنا پڑا۔
وزیر داخلہ گیرالڈ درمانین نے کہا کہ ملک بھر میں سکیورٹی فورسز کے 150 اہلکار زخمی ہوئے جبکہ 172 افراد کو حراست میں لیا گیا جن میں سے 72 کو پیرس شہر میں گرفتار کیا گیا۔
انہوں نے بتایا کہ پیرس شہر میں 140 مقامات پر آگ لگائی گئی۔ یہ تشدد پیرس آنے والے ٹھگوں نے کیا جو پولیس اہلکاروں اور سرکاری عمارتوں پر حملہ آور ہوئے۔
