کراچی : اسٹیٹ بینک نے شعبہ بینکاری کی ششماہی کارکردگی کی جائزہ رپورٹ جاری کردی، جس میں انکی کارکردگی اور مضبوطی کا احاطہ کیا گیا ہے۔
اسٹیٹ بینک کی جاری رپورٹ میں کہا گیا ہے کہ بینکاری شعبے نے2023 کی پہلی ششماہی میں مستحکم کارکردگی اور لچک کامظاہرہ کیا۔
جائزہ رپورٹ میں جنوری تاجون2023مدت کیلئے بینکاری شعبے کی کارکردگی، مضبوطی کا احاطہ کیا گیا
رپورٹ میں مالی مارکیٹوں کی کارکردگی کے مختصر جائزے اور نظامیاتی خطرے کے سروے نتائج بھی شامل کیے گئے ہیں۔
سال2023کی پہلی ششماہی میں معاشی ماحول کی دشواری کا تسلسل جاری رہا، ملکی مالی حالات سخت، مہنگائی، طویل بےیقینی کے سبب آپریٹنگ کا ماحول دباؤ میں رہا۔
جائزہ رپورٹ کے مطابق 2023کی پہلی ششماہی میں بینکاری شعبے کی بیلنس شیٹ میں14فیصد توسیع ہوئی، اثاثہ جاتی بنیاد میں توسیع کا اہم محرک حکومتی تمسکات میں سرمایہ کاریاں تھیں۔
اس کے علاوہ اثاثوں کے معیار اور منافع کے اظہاریوں میں بھی نمایاں بہتری دیکھنے میں آئی، ادائیگی قرض کی صلاحیت میں مزید بہتری آئی، اثاثوں پرمنافع2023کی پہلی ششماہی میں بہترہوکر 1.5فیصد ہوگیا۔
