کراچی : پولیس افسران نے پولیس کمپلینٹ سینٹرز کی ششماہی کارکردگی رپورٹ آئی جی سندھ کلیم امام کو پیش کردی، کارکردگی رپورٹ میں بتایا گیا ہے کہ ایف آئی آرز کے عدم اندراج پر 457 شکایات موصول ہوئیں۔
تفصیلات کے مطابق پولیس اہلکاروں کی کارکردگی سے متعلق سندھ پولیس کے اعلیٰ حکام کی جانب سے کمپلینٹ سینٹرز قائم کیا گیا تھا جہاں عوام پولیس اہلکاروں کے برتاؤ ، کرپشن سمیت دیگر معاملات پر شکایات درج کرواسکتے ہیں۔
ترجمان پولیس کا کہنا ہے کہ پولیس برتاؤ، اختیارات کے تجاوزسے متعلق 1647شکایات موصول ہوئیں جبکہ غیر قانونی حراست سے متعلق270 شکایات اندراج ہوا۔
پولیس اہلکاروں کی کرپشن سے متعلق622شکایات درج کروائی گئیں جبکہ غلط ایف آئی آرز اور انکی تنسیخ سے متعلق 05شکایات موصول ہوئیں۔
ترجمان سندھ پولیس کا کہنا تھا کہ مقدمات کی ناقص تفتیش سے متعلق133 اور مجرمانہ سرگرمیوں میں ملوث اہلکاروں سے متعلق 183 شکایات موصول ہوئیں،۔
ترجمان نے خبررساں اداروں کو بتایا کہ مجموعی شکایات میں سے 8483 شکایات کا ازالہ کردیا گیا ہے کہ جبکہ7679شکایات زیرالتوا،418شکایات جھوٹی 405غیرمتعلقہ تھیں۔
ترجمان سندھ پولیس کے مطابق شکایت میں نامزد کیے گئے 43 پولیس افسران کو معمولی جبکہ7کوسخت سزا دی گئیں۔
اسلام آباد : پی ٹی آئی حکومت کی حالیہ کارکردگی سے متعلق سروے میں پچاس فیصد سے زائد پاکستانیوں نے اطمینان کا اظہار کیا ہے، لوگوں نے موجودہ حکومت کی کارکردگی گزشتہ حکومت سے بہتر قرار دی۔
تفصیلات کے مطابق پاکستان تحریک انصاف کی حکومت نے عوام کی پذیرائی حاصل کرلی،51 فیصد پاکستانی عوام کا خیال ہے کہ حکومت کی کارکردگی اطمینان بخش ہے۔
پی ٹی آئی حکومت کارکردگی کےحوالے سے گیلپ سروے میں کہا گیا ہے کہ38فیصد پاکستانیوں نے عمران خان کی کارکردگی کو اچھا قرار دیا، جبکہ 13فیصد پاکستانیوں نے حکومت کی کارکردگی کو بہت ہی اچھا قرار دیا۔
گیلپ سروے کے مطابق26فیصد شہریوں کی رائے ہے کہ موجودہ حکومت کی کارکردگی اچھی نہیں رہی، اس کے علاوہ20فیصد عوام پی ٹی آئی حکومت کی کارکردگی سے غیر مطمئن نظر آئے۔
مذکورہ سروے عوامی رائے کا جائزہ لینے والے ادارے گیلپ اینڈ گیلانی کی جانب سے کیا گیا ہے، جس میں1141افراد نے حصہ لیا۔ ادارے کا کہنا ہے کہ سروے میں ملک بھر کے مختلف شعبہ جات سے تعلق رکھنے والے افراد سے گفتگو کرکے ان کی رائے کا جائزہ لیا گیا۔
گیلپ اینڈ گیلانی کے زیر اہتمام ملک کے چاروں صوبوں میں کیے جانے والے سروے میں عوام سے سوال پوچھا گیا تھا کہ اُن کی رائے میں وزیر اعظم عمران خان کی 2018 کے انتخابات جیتنے کے بعد اب تک کارکردگی کیسی رہی۔
کراچی : نئی حکومت نے اپنے پہلے سو دن میں عوام سے کیے گئے وعدے نبھانے میں کمال کر دکھایا، کرپشن کے خلاف محاذ گرم رکھا، پاکستان سفارتی سطح پر مضبوط اور وزیر اعظم کے غیرملکی دوروں نے معیشت کی ڈوبتی کشتی کو سہارا دیا۔
پی ٹی آئی کے پہلے سو دن کے بڑے اقدامات پر ایک رپورٹ کے مطابق پی ٹی آئی حکومت نے اقتدار سنبھالتے ہی پہلے سو دن کی سمت متعین کرنے کیلئے بڑے اقدامات کیے، ماضی کے حکمرانوں کی ساری شاہ خرچیاں بند کرکے سرکاری اخراجات میں نمایاں کمی کر دی۔
غریبوں کے لیے پچاس لاکھ گھر بنانے کے لیے بڑی پیش رفت کی اور وزیراعظم سے براہ راست رابطے کے لیے بڑا قدم اٹھایا، پہلے سو دنوں میں ہی تبدیلی کا نعرہ سچ کر دکھایا اور پی ٹی آئی حکومت نے عوام کے دل جیت لیے۔
وزیر اعظم بنتے ہی انتخابی نعرے بھلا دینے والے لیڈروں کے برعکس کپتان کرپشن کے خلاف ڈٹ گئے، پہلے دن کے موقف میں معمولی سی لچک بھی نہ دکھائی اور کرپشن کے تمام بڑے بت گرا دینے کا مشن اب بھی جاری ہے۔
وزیراعظم عمران خان نے عہدہ سنبھالا لیکن وزیر اعظم ہاؤس کی شاہ خرچیوں کے قریب نہیں گئے، سرکاری افسران بھی کم کیے، وزیراعظم ہاؤس کی قیمتی گاڑیاں، ہیلی کاپٹر اور بھینسیں تک نیلام کرائیں اور رقم قومی خزانے میں جمع کرائی، وزیراعظم ہاؤس کو یونیورسٹی بنانے کا اعلان کیا اور گورنر ہاؤس ملکی تاریخ میں پہلی بار عوام کے لیے کھول دئیے گئے۔
سرکاری اداروں کے اخراجات میں واضح کمی کر دی گئی، غریبوں کے لیے 50 لاکھ گھر بنانے کا عہد پورا کرنے کے لیے بڑے اقدامات کیے گئے،نہ صرف پالیسی بنالی بلکہ رجسٹریشن فارم جمع کرنے بھی شروع کر دئیے گئے، پہلی بار عوام کا براہ راست وزیراعظم سے رابطہ کرنے کیلئے سیٹیزن پورٹیل کا قیام عمل میں لایا گیا۔ کرپشن، انسانی حقوق اور قبضہ مافیا کیخلاف شکایات پر فوری نوٹس لیا جارہا ہے ۔
اس کے علاوہ وزیر مواصلات کا بڑا کارنامہ بھی عوام کے سامنے ہے، موٹروے اور ہائی ویز پر سفر آسان بنا دیا گیا،12ہزار کلومیٹر شاہراہ کی مکمل تفصیل صرف ایک موبائل ایپ پر دستیاب ہے، سڑک کہاں بند اور کہاں کھلی ہے؟ موسم کیسا ہے؟ مسافر سب جانیں اور شکایت کے لیے حکام سے رابطہ کریں۔
پاکستان کی تاریخ میں پہلی بار سرکاری افسران اور سیاسی شخصیات کے بلاجواز غیرملکی دوروں پر پابندی عائد کی گئی اور بیرون ملک علاج کی سہولت بھی ختم کرکے سرکاری خزانے کو محفوظ بنادیا گیا، اس کے علاوہ کھلے آسمان تلے موجود بے گھر افراد کو پہلی بار حکومت کی جانب سے خیمے اور کھانے کی فراہمی شروع کر دی گئی۔
پی ٹی آئی حکومت کے سو دن : پاکستان سفارتی سطح پرمضبوط ہوگیا
سو دن میں پاکستان سفارتی سطح پر مضبوط ہوا، وزیر اعظم کے غیرملکی دوروں نے معیشت کی ڈوبتی کشتی کو سہارا دے دیا، ڈو مور کرنے والے امریکا کو وزیر اعظم نے دوٹوک جواب دیا، کرتاپور بارڈر کھولنے کا اعلان کرکے پی ٹی آئی حکومت نے دنیا بھر کے سکھوں کے دل جیت لیے۔
پی ٹی آئی حکومت نے سو دن میں سفارتی سطح پر بھی کامیابی کے جھنڈے گاڑھ دیئے، حکومت نے مشکل وقت میں پاکستان کی معیشت کو سنبھالا دیا، عالمی دنیا سے تعلقات کو مضبوط بنایا۔
وزیر اعظم عمران خان نے اقتدار سنبھالنے کے بعد سب سے پہلے سعودی عرب کا دورہ کیا، سعودی حکومت نے پاکستان کے لئے چھ ارب ڈالر کا بڑا اعلان کیا، متحدہ عرب امارات کی زمین پر قدم رکھا تو ایک اور نئے دور کا آغاز ہوا، وزیر اعظم کے دورہ چین میں معیشت کو بڑا سہارا ملا، پندرہ معاہدوں اور مفاہمت کی یاد داشتوں پر دستخط ہوئے، ڈالر کے بجائے ادائیگیاں یوان میں کرنے پر بھی اتفاق ہوا۔
سی پیک کے جاری منصوبوں کی بروقت تکمیل کے عزم کا اعادہ کیا گیا، عمران خان کے دورہ ملائیشیا میں بھی بڑی کامیابی ملی، جس میں ویزوں کے جزوی خاتمے کا معاہدہ طے پا گیا۔
وزیراعظم عمران خان نے پاکستان مخالف بیان پر امریکی صدر کو بھی دو ٹوک پیغام دیا، جس کے خواجہ سعد رفیق بھی معترف ہیں، پاکستان نے کرتارپور بارڈر کھولنے کا اعلان کرکے ایک بار پھر بھارت کی طرف دوستی کا ہاتھ بڑھادیا ہے جس کی مودی جی کی طرف سے بھی تعریف کی گئی۔
اسلام آباد: چیف جسٹس آف پاکستان جسٹس ثاقب نثار نے سپریم کورٹ کی کارکردگی پر اطمینان کا اظہار کرتے ہوئے انصاف کی فراہمی کو مزید مؤثر بنانے کے لیے تجاویز طلب کرلیں۔
تفصیلات کے مطابق چیف جسٹس آف پاکستان جسٹس میاں ثاقب نثار کی سربراہی میں سپریم کورٹ کا فل کورٹ اجلاس ہوا جس میں ایک سال کے دوران دائر ہونے والے مقدمات کا جائزہ لیا گیا۔
سپریم کورٹ آف پاکستان کی جانب سے جاری اعلامیے کے مطابق اجلاس میں سپریم کورٹ میں تعینات ہونے والے ججز کو خوش آمدید کہا گیا جبکہ انصاف کی فراہمی اور زیر التوا مقدمات کا جائزہ لیا گیا۔
اعلامیے کے مطابق اجلاس میں ستمبر 2017 سے جون 2018 تک کے دائر مقدمات کا جائزہ لیا گیا، ایک سال کے دوران 19ہزار 98 کیسز دائر کیے گئے جبکہ 16ہزار 8سو 97 مقدمات کا فیصلہ سنایا گیا جبکہ مجموعی طور پر سپریم کورٹ میں 39ہزار اور 3 سو 17 کیسز زیر التوا ہیں۔
فل کورٹ اعلامیے کے مطابق کیسزدائر ہونےکی شرح میں اضافہ عوام کا عدالت پراعتماد ہے، اجلاس میں کیس مینجمنٹ کی حکمت عملی کو موثر بنانے کے حوالے سے تجاویز بھی طلب کی گئیں۔
اعلامیے کے مطابق سپریم کورٹ رولز 1980 میں ترامیم کے لیے بار ایسوسی ایشن کی تجاویز پرغور کیا جارہا ہے جبکہ ترامیم کے لیے جسٹس گلزاراحمد،جسٹس اعجازالاحسن،جسٹس منیب اخترپرمشتمل کمیٹی تشکیل دی گئی۔
فل کورٹ اعلامیے کے مطابق چیف جسٹس نےعوام کوانصاف کی فراہمی میں ججزکےکردارکی تعریف کی جبکہ اجلاس میں سپریم کورٹ کے انتظامی اورعدالتی اموربھی زیربحث آئے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
اسلام آباد: اسحاق ڈار کا بحثیت وزیر خزانہ دور آخر کار اپنے اختتام کو پہنچا، بہترین معاشی مینجمنٹ کا دعویٰ کرنے والے اسحاق ڈار نے پاکستانی معشیت کو تشویشناک حالت تک پہنچا دیا اور ہر شہری کو ایک لاکھ بائیس ہزار روپے کا مقروض کردیا۔
تفصیلات کے مطابق اسحاق ڈار نے بحثیت وزیر خزانہ ملک پرغیر ملکی قرضوں میں پینتس ارب ڈالر کا اضافہ کیا جبکہ مالی مسائل سے بچنے کیلئے حکومت نے مزید تین ارب ڈالر قرضہ لینے کی تیاری کر رکھی ہے۔
مقامی قرضوں کی داستان بھی خوب ہے، رواں مالی سال کے پہلے چار ماہ میں مقامی قرضے تین سو چھ ارب روپے بڑھ گئے، قرضوں میں اضافے کے باعث پاکستان کا ہر شہری جو دوہزار تیرہ میں اکانوے ہزار روپے کا مقروض تھا اب ایک لاکھ بائیس ہزار روپےکا مقروض ہے۔
گردشی قرضوں کو یکمشت ختم کرنے کیلئے اربوں روپے جاری کرنے کے باوجود مسئلہ جوں کا توں ہے۔
انڈسٹری زرائع کے مطابق گردشی قرضوں کا حجم سات سو ارب سےتجاوز کرگیا ۔
ڈار صاحب کی ہٹ دھرمی کےباعث روپے کی قدر میں کمی کیلئے مسلسل دباوبڑھ رہا ہے، تجارتی خسارہ تاریخ کی بلند ترین سطح پر ہے۔جاری کھاتوں کےخسارے کی کہانی بھی کچھ مختلف نہیں۔۔
ڈار صاحب کی پالیسیوں نے زراعت کی شرح نمو بھی منفی ریکارڈ کی گئی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہےتو اسے اپنی فیس بک وال پر شیئر کریں۔
دبئی: ایئرشومیں پاک فضائیہ کا جےایف17تھنڈرطیارہ توجہ کامرکز بن گیا، دبئی ورلڈسینٹرایئرپورٹ پر جےایف17تھنڈرطیارے کی شاندار پر فارمنس پر پُر جوش شائقین نے تالیاں بجا کر داد دی۔
تفصیلات کے مطابق شائقین کی ایک بہت بڑی تعداد کی موجودگی میں 16ویں دوبئی ائیر شو کی افتتاحی تقریب کا انعقاد ہوا، جس میں پاک فضائیہ کے جے ایف 17 تھنڈر نے اپنی فضائی کارکردگی کا شاندار مظاہرہ کیا، جےایف 17تھنڈر نے مسحور کن فضائی مظاہرہ کیا، جس میں غیر معمولی کرتب دکھائے۔
پاک فضائیہ کے پائلٹ نے اپنی کارکردگی سے تماشائیوں پر سحر طاری کر دیا، مظاہرے کے بعد جب طیارہ واپس آیا تو پر جوش شائقین نے تالیاں بجا کر داد دی ۔ فضائی مظاہرے کے ساتھ ساتھ ایک جےایف 17 طیارہ تمام ہتھیاروں سے لیس زمین پر شائقین کے لیے مرکز نگاہ بنا رہا، جس میں خریداروں اور شائقین نے گہری دلچسپی کا اظہار کیا۔
دلکش اور مہلک لڑاکا طیارے جے ایف 17تھنڈر کے علاوہ جدید ترین تربیتی طیارہ سُپر مشاق بھی پانچ روز جاری رہنے والے اس ائیر شو میں نمائش کے لیے پیش کیا گیا ہے۔
ائیر مارشل احمر شہزاد،چیئرمین پاکستان ائیروناٹیکل کمپلیکس کامرہ نے بھی اس افتتاحی تقریب میں شرکت کی۔
پاک فضائیہ ترجمان کا کہنا ہے کہ جنگی جہازوں میں جے ایف17تھنڈرکوایک نمایاں حیثیت حاصل ہے، پاکستان ائیروناٹیکل کمپلیکس کی کاوش جے ایف 17 تھنڈر ایک کم قیمت ، بہت طاقتور ، ہمہ جہت ، کم وزن اور جدید ترین ایویانکس سسٹم سے مزین ہونے کے ساتھ ساتھ ہر قسم کے جدید ہتھیاروں ، بمبوں ، فضا سے فضا اور فضا سے زمین پر اور اینٹی شپ میزائل سے لیس جنگی جہاز ہے ۔
ترجمان نے مزید کہا کہ جہاز کے اندرڈیجیٹل فلائی بائی وائیر فلا ئٹ کنٹرول سسٹم لگا ہوا ہے جو اسے ہر قسم کے مشن میں فوقیت دلاتا ہے، اس طیارے کی چھوٹے رن وے سے ٹیک آف اور لینڈنگ کی صلاحیت اسے ہر قسم کے فضائی آپریشن میں معاون ثابت ہوتی ہے، جو کہ حال اور مستقبل کی فضائی طاقت کے چیلنجز کو پورا کرنے کی صلاحیت رکھتا ہے۔
پاک فضائیہ کا کہنا تھا کہ پاکستانی ساختہ سپر مشاق طیارہ جدید آلات اور سہولیات سے لیس ہے جس کی وجہ سے ابتدائی فضائی تربیت کے لئے بہترین خیال کیا جاتا ہے ، سپر مشاق طیارہ جدیدابتدائی فضائی تربیت کی تمام ضروریات کو پورا کرتاہے۔
پاکستان ائیر وناٹیکل کمپلیکس نے بھی اپنی عالمی معیار کے عین مطابق تیار کردہ مصنوعات کی نمائش کے سلسلے میں دبئی ائیر شو میں ایک اسٹال لگایا ہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہےتو اسے اپنی فیس بک وال پر شیئر کریں۔
کراچی : حالیہ ہفتے شدید چھان بین کرنے والی وفاقی حکومت کی بنیادی ایجنسیوں میں سے ایک ایجنسی کسٹم انٹیلی جنس کی کارکردگی پر سوال اٹھ گئے ہیں۔
تفصیلات کے مطابق متعدد واقعات میں کسٹم انٹیلی جنس اپنی قانونی ذمہ داریوں کو بہتر طریقے سے ادا نہیں کر سکا، جس کے باعث کسٹم اور درآمدی ڈیوٹی کی مد میں ملک کو مالی تقصان کا سامنا کرنا پڑا ۔
ملک کے مالیاتی اور تجارتی دارالحکومت کراچی میں کاروباری اور تجارتی حلقوں کا کہنا ہے کہ ایسے کئی واقعات دیکھینے میں آئے ہیں کہ جس میں افسران نے ممنوعہ یا غیر قانونی اشیاء کی درآمد کی اجازت دی یا پھر درآمد کنندہ سے کوئی ڈیوٹی وصول نہیں کی۔
متعدد بار بڑے تاجروں کا یہ بھی تجربہ رہا ہے کہ ان کی درآمدی اشیاء اور سامان کو روک دیا گیا اور ان سے پیسے طلب کئے گئے جبکہ انٹیلی جنس افسران نے بلیک مارکیٹ سامان کو آزادانہ طور پر جانے دیا۔
تاجروں کا کہنا تھا کہ ایسے واقعات کے سبب قومی خزانے کو نقصان پہنچا اور اس پر ستم ضریفی یہ کہ کسٹم انٹیلی جنس فیڈرل بورڈ آف ریونیو کے ماتحت کام کرتا ہے اور اس کا بنیادی کام ٹیکس اور ڈیوٹی کی وصولی ہے ۔
ان کا یہ بھی کہنا تھا کہ ایسے بھی واقعات ہوئے ہیں جس میں کسٹم انٹیلی جنس کی جانب سے ان کی شپمنٹس کو روکا گیا باوجود اس کے کہ اس ضمن میں انہوں نے تمام قانونی اور مالیاتی تقاضوں کو پورا کیا تھا ۔
ان کے مطابق ایسا کرنا ملکی تجارتی سرگرمیوں کو متاثر کرنے اور قانونی تقاضوں کو پورا کرنے والی کمپنیز کو سزا دینے کے مترادف ہے جو کہ در حقیقت اس سامان کی درآمد کررہی ہوتی ہیں جس کی کہ اس ملک کو صنعتی و معاشی ترقی کے لئے ضرورت ہے ۔
تجارتی اور کاروباری حلقوں کا کہنا تھا کہ یہ جانتے ہوئے کہ کسٹم انٹیلی جنس فیڈرل بورڈ آف ریونیو کے ٹیکس اور ڈیوٹی وصول کرنے کے نظام کا اہم حصہ ہے، اس لئے وفاقی محکمہ خزانہ کی جانب سے اس پر باقاعدہ نظر رکھنا ضروری ہے ، تاکہ اس طرح کی واقعات کی روک تھام کی جاسکے۔
کراچی :روشنیوں کا شہر کراچی ایک بار پھر تاریکی میں ڈوب گیا۔ نیشنل گرڈ سےبجلی کی فراہمی معطل ہونے سے کے الیکٹرک کے تمام پاور پلانٹ بند ہو گئے۔
کراچی ہفتہ اور اتوار کی درمیانی شب تاریکی میں ڈوب گیا۔ تقریباًتمام علاقوں میں اچانک بجلی غائب ہوگئی۔ کے کراچی الیکٹرک کا کہنا ہے کہ پانچ کے وی کی ٹرانسمشن لائن ٹرپ ہونے کے باعث کراچی کے اسیّ فیصد حصے کو بجلی کی فراہمی بند ہوئی۔
کے الیکٹرک کے مطابق بجلی کی فراہمی منقطع ہونے کے باعث متعدد اسپتالوں کو بھی بجلی کی فراہمی متاثر ہوئی ہے۔ترجمان کےالیکٹرک احمد فرازکا کہنا ہے کہ نمی اور دھند کے باعث ٹرانسمیشن لائن ٹرپ ہوئی۔
گھاروسمیت نواحی علاقوں میں بھی بجلی کی فراہمی معطل ہوئی ہے۔ ساٹ۔۔ گورنر سندھ ڈاکٹر عشرت العباد خان نے بریک ڈاؤن کا نوٹس لیتے ہوئے کے الیکٹرک حکام کو جلد بجلی بحال کرنے کی ہدایت کی ہے۔
جبکہ کے الیکٹرک کمپنی کا کہنا ہے کہ خرابی دور کرنے کے لیے اقدامات کیے جا رہے ہیں۔
