ARYNews.tv | Urdu – Har Lamha Bakhabar

Tag: Peru

  • پیرو کے سابق صدر کا قید سے رہائی کے دس ماہ بعد انتقال

    پیرو کے سابق صدر کا قید سے رہائی کے دس ماہ بعد انتقال

    لیما: جنوبی امریکا کے ملک پیرو کے سابق صدر البرٹو فوجیموری کا قید سے رہائی کے دس ماہ بعد انتقال ہو گیا۔

    غیر ملکی میڈیا رپورٹس کے مطابق پیرو کے سابق صدر البرٹو فوجیموری طویل عرصہ کینسر میں مبتلا رہنے کے بعد 86 سال کی عمر میں انتقال کر گئے۔

    سابق صدر البرٹو فوجیموری کی بیٹی نے X پر بتایا کہ ان کے والد دارالحکومت لیما میں طویل علالت کے انتقال کر گئے ہیں، فوجیموری کو گزشتہ دسمبر میں جیل سے رہا کیا گیا تھا، جہاں وہ انسانیت کے خلاف جرائم کے الزام میں 25 سال کی سزا کاٹ رہے تھے۔

    البرٹو فوجیموری 1991 میں ایک کسان کو باغیوں سے لڑنے کے لیے ہتھیار دے رہے ہیں

    فوجیموری نے 1990 اور 2000 کے درمیان پیرو پر حکومت کی تھی، انھیں کرپشن کے الزامات پر عہدے سے ہٹا دیا گیا تھا، ان پر بائیں بازو کی گوریلا شورش کے خلاف سخت مؤقف کے باعث انسانی حقوق کی خلاف ورزیوں کے الزامات بھی لگائے گئے۔ تاہم ان کے حامیوں کا کہنا تھا کہ فوجیموری نے اس وقت باغیوں کو شکست دی جب وہ اقتدار پر قبضہ کرنے ہی والے تھے۔

    اقتدار سے بے دخلی کے بعد وہ بیرون ملک فرار ہو گئے تھے تاہم بعد میں انھیں گرفتار کر کے واپس لایا گیا، اور انھیں عدالت نے سزا سنا کر جیل بھیج دیا، فوجیموری کے ڈاکٹر نے تصدیق کی ہے کہ ان کی موت زبان کے کینسر کی وجہ سے ہوئی ہے۔

  • جرائم اور قتل میں استعمال ہونے والا اسلحہ بچوں کی بھلائی کے لیے استعمال ہونے لگا، مگر کیسے؟

    جرائم اور قتل میں استعمال ہونے والا اسلحہ بچوں کی بھلائی کے لیے استعمال ہونے لگا، مگر کیسے؟

    لیما: لاطینی امریکی ملک پیرو میں بچوں کے لیے کھیلنے کے لیے ایک ایسا پارک بنایا گیا ہے جس میں لگائے گئے جھولے خطرناک آتشیں اسلحے کو پگھلا کر بنائے گئے ہیں۔

    آپ کو یہ جان کر حیرت ہوگی کہ قانون نافذ کرنے والے اداروں نے بہت سارا اسلحہ پکڑا تھا، جسے ایک اسٹیل کمپنی کے حوالے کیا گیا، جہاں یہ اسلحہ پگھلا کر اسے جھولوں کی شکل دی گئی۔

    حکام کے مطابق دارالحکومت لیما کے پارک میں 6 ہزار سے زیادہ آتشیں اسلحے کو پگھلا کر سی سا، منکی بار، جھولے اور ایکسرسائز مشینیں بنائی گئی ہیں، جن سے بچے ہنستے کھیلتے محظوظ ہوتے ہیں۔

    سی سا اور منکی بار

    مقامی حکام نے کہا کہ کھیل کا یہ میدان ایک خواب ہے، ایک ایسا خواب جو اُن بندوقوں کی بدولت شرمندہ تعبیر ہوا جو پہلے جرائم اور قتل کے لیے استعمال ہوتی تھیں، اب یہ بندوقیں بچوں کی بھلائی کے لیے استعمال ہوتی ہیں۔

    یہ انوکھا پارک عوام کے لیے کھول دیا گیا ہے، حکام کا کہنا ہے کہ مزید 2 پارکس اور بنائے جائیں گے، پیرو میں جرائم پیشہ افراد سے ایک سال کے دوروان 21 ہزار سے زائد ہتھیار برآمد کیے گئے ہیں۔

  • پیرو میں ملنے والی ’خلائی مخلوق‘ کی ممیوں کے سائنسی تجزیے میں بڑا انکشاف

    پیرو میں ملنے والی ’خلائی مخلوق‘ کی ممیوں کے سائنسی تجزیے میں بڑا انکشاف

    لیما: جنوبی امریکی ملک پیرو میں ملنے والی ’خلائی مخلوق‘ کی ممیوں کے سائنسی تجزیے میں انکشاف ہوا ہے کہ یہ ہڈیاں زمینی ہیں۔

    روئٹرز کے مطابق پیرو کے دارالحکومت کے ایئرپورٹ پر گزشتہ اکتوبر کو پراسرار طور پر ملنے والی ایلین ممیوں کے ایک جوڑے کے تجزیے کے بعد سائنس دانوں نے جمعہ کو کہا کہ ’خلائی مخلوق کی یہ ممیاں‘ مکمل طور پر زمینی ہیں۔

    لیما میں وزارت ثقافت کی جانب سے ایک پریس کانفرنس میں ماہرین نے بتایا کہ دونوں گڑیاؤں میں انسانی ہڈیوں کا استعمال کیا گیا ہے، کچھ ہڈیاں جانوروں کی بھی استعمال کی گئی ہیں، انھوں نے بتایا کہ پیرو کے شہر نزکا سے تعلق رکھنے والے تین انگلیوں والے ہاتھ کا بھی تجزیہ کیا گیا، اس ہاتھ کا بھی کسی ایلین مخلوق سے کوئی تعلق نہیں ہے۔

    پیرو کے انسٹی ٹیوٹ فار لیگل میڈیسن اینڈ فرانزک سائنسز کے ماہر آثار قدیمہ فلاویو ایسٹراڈا نے کہا کہ یہ کسی ماورائے ارضی مخلوق کی حنوط شدہ لاشیں نہیں ہیں، یہ ’ایلین ممیاں‘ دراصل زمینی ہڈیوں سے بنی گڑیائیں ہیں، جو اسی سیارے یعنی زمین کے جانوروں کی ہڈیوں سے بنائی گئی ہیں، اور ہڈیوں کو جدید مصنوعی گوند سے جوڑا گیا ہے۔

    مقامی حکام کے مطابق یہ دونوں ’ممیاں‘ لیما ایئرپورٹ پر واقع کورئیر ڈی ایچ ایل کے دفتر میں گتے کے ڈبے میں آئی تھیں، ان ممیوں کو کوہ اینڈیز کا روایتی لباس پہنایا گیا تھا، میڈیا نے سنسنی پھیلاتے ہوئے انھیں ممکنہ طور پر ایلین قرار دے دیا تھا۔

    میکسیکو کے صحافی اور UFO کے پرجوش شائق جیمے موسن نے دعویٰ کیا تھا کہ یہ لاشیں تقریباً 1,000 سال پرانی ہیں اور 2017 میں پیرو سے برآمد ہوئیں، اور ان کا تعلق کسی بھی معلوم نسل سے نہیں۔ تاہم ماہرین نے ان کا دعویٰ مسترد کرتے ہوئے کہا کہ انھیں کسی نے فراڈ کے پیش نظر بنایا ہے۔

    سائنس دانوں نے ڈی این اے ٹیسٹ کے نتائج کی بنیاد پر کہا کہ انھیں انسانوں اور جانوروں کی ہڈیوں سے تیار کیا گیا ہے۔

  • انجیکشن کی 8 سوئیاں نگلنے والے بچے کو ڈاکٹروں نے بچا لیا

    انجیکشن کی 8 سوئیاں نگلنے والے بچے کو ڈاکٹروں نے بچا لیا

    لیما: جنوبی امریکی ملک پیرو میں ایک 2 سالہ بچے نے انجیکشن کی 8 سوئیاں نگل کر جان خطرے میں ڈال دی، تاہم ڈاکٹروں نے سرتوڑ کوشش کر کے بچے کو بچا لیا۔

    روئٹرز کے مطابق شمال مشرقی پیرو میں ڈاکٹروں نے ایک ایسے دو سالہ لڑکے کی جان بروقت بچا لی، جس نے کھیلتے ہوئے انجیکشن کی آٹھ سوئیاں نگل لی تھیں۔

    آپریشن کرنے والے ڈاکٹر ایفرین سالزار نے میڈیا کو بتایا کہ جب انھوں نے بچے کا پیٹ چاک کیا، تو انھیں اس میں دھاتی ٹکڑے ملے، اور یہ دیکھ کر وہ حیران رہ گئے کہ وہ میڈیکل سوئیاں تھیں۔

    مقامی میڈیا نے بتایا کہ بچے کی ماں جانوروں کے ایک فارم میں کام کرتی ہے جہاں جانوروں کو ٹیکے لگانے کے لیے انجیکشن استعمال کیے گئے تھے، بچے نے کھیلتے ہوئے وہی سوئیاں اٹھا کر نگل لیں۔

    یہ واقعہ پیرو کے دارالحکومت لیما سے تقریباً 622 کلومیٹر (386 میل) دور تاراٹوپو کے زرعی علاقے میں پیش آیا۔ لڑکے کی ماں نے کہا کہ اس کا بچہ وہاں کھیل رہا تھا شاید اسی دوران اس نے سوئیاں نگل لیں۔

    مقامی میڈیا کے مطابق ڈاکٹروں کا کہنا تھا کہ سرجری کے بعد بچے کی حالت خطرے سے باہر تھی۔

  • پیرو میں تباہ کن لینڈ سلائیڈنگ، دل دہلا دینے والی ویڈیوز سامنے آ گئیں

    پیرو میں تباہ کن لینڈ سلائیڈنگ، دل دہلا دینے والی ویڈیوز سامنے آ گئیں

    لیما: جنوبی پیرو میں شدید بارشوں کے درمیان تباہ کن لینڈ سلائیڈنگ سے 8 افراد ہلاک ہو گئے۔

    تفصیلات کے مطابق پیرو کے جنوبی علاقے میں پیر کو طوفانی بارشوں کے بعد لینڈ سلائیڈنگ کے واقعات رونما ہوئے، مٹی کے تودے گرنے کے نتیجے میں آٹھ افراد ہلاک اور پانچ لاپتا ہو گئے، جب کہ متعدد زخمی ہو گئے ہیں۔

    پیرو کے پہاڑی قصبے سیکوچا میں لینڈ سلائیڈنگ کے بعد فوج نے علاقے میں ہیلی کاپٹر تعینات کر دیے ہیں، جو لوگوں کو امداد اور پینے کا پانی پہنچا رہے ہیں۔

    پہاڑی قصبہ دریائے اوکونا کے کنارے واقع ہے، محکمہ موسمیات نے خبردار کیا ہے کہ علاقے میں مسلسل بارشوں کی وجہ سے پانی کی سطح بلند ہو رہی ہے، جس سے آبادی شدید متاثر ہو سکتی ہے۔

    کچھ مقامی میڈیا رپورٹس میں مرنے والوں کی تعداد 36 بتائی جا رہی ہے، تاہم وزارت دفاع نے اس کی تردید کرتے ہوئے اسے غلط معلومات قرار دیا، اور کہا کہ صرف سرکاری ذرائع سے معلومات حاصل کی جائیں۔

  • پیڈرو کاسٹیلو کی معزولی کے بعد پیرو میں احتجاج میں 7 ہلاک، نیا آئین بنانے کا مطالبہ

    پیڈرو کاسٹیلو کی معزولی کے بعد پیرو میں احتجاج میں 7 ہلاک، نیا آئین بنانے کا مطالبہ

    لیما: پیرو میں سیاسی بحران پر عوامی غصہ بھڑک اٹھا، ملک بھر میں پیڈرو کاسٹیلو کی معزولی کے بعد شدید اور پُر تشدد احتجاج شروع ہو گیا ہے، جس میں 7 افراد ہلاک ہو گئے، عوام نے نیا آئین بنانے کا مطالبہ بھی کر دیا۔

    غیر ملکی میڈیا رپورٹس کے مطابق لاطینی امریکی ملک پیرو میں حکومت مخالف احتجاج نے شدت اختیار کر لی ہے، معزول صدر پیڈرو کاسٹیلو کے حامی سڑکوں پر نکل آئے، مظاہرین اور پولیس میں جھڑپیں ہونے لگی ہیں۔

    پولیس اور مظاہرین میں جھڑپوں کے نتیجے میں 7 افراد ہلاک ہو گئے، دارالحکومت لیما میدانِ جنگ بنا رہا، پولیس اور شہری آمنے سامنے آ گئے اور مشتعل افراد نے سخت مزاحمت کا مظاہرہ کیا۔

    مظاہرین نے سرکاری عمارتوں کو آگ لگائی، جن پر فورسز نے آنسو گیس کی شیلنگ کر دی، احتجاج کرنے والوں نے موجودہ صدر سے اسمبلی اور کانگریس کو تحلیل کر کے نئے انتخابات کے ساتھ ساتھ نیا آئین بنانے کا بھی مطالبہ کیا ہے۔

    پارلیمنٹ تحلیل کرنے کی کوشش مہنگی پڑ گئی، پیرو کے صدر تھانے میں‌ بند

    واضح رہے کہ پیرو ایک سیاسی بحران سے دوسرے سیاسی بحران کی طرف گامزن ہے، گزشتہ ہفتے میں کم از کم سات افراد ہلاک ہوئے اور شہر کی سڑکوں پر آگ اور آنسو گیس کا دھواں چھایا رہا۔ موجودہ بدامنی کی چنگاری بائیں بازو کے رہنما پیڈرو کاسٹیلو کی اقتدار سے بے دخلی اور ان کی گرفتاری کے بعد اٹھی ہے، پیڈرو کاسٹیلو نے کانگریس کو غیر قانونی طور پر تحلیل کرنے کی کوشش کی تھی، اس سے قبل مخالف قانون سازوں نے انھیں ہٹانے کے لیے تین بار ان کا مواخذہ کیا تھا، بالآخر آخری بار انھیں عہدے سے ہٹا دیا گیا۔

    سری لنکا کی ناکامی، آئی ایم ایف نے بڑا قدم اٹھا لیا

    پیرو 21 ویں صدی میں لاطینی امریکا کے معاشی طور پر نہایت نمایاں ممالک میں سے ایک رہا ہے، جس کی مضبوط ترقی نے لاکھوں لوگوں کو غربت سے نکالا، لیکن اب سیاسی انتشار تیزی سے اس کے معاشی استحکام کو پٹڑی سے اتارنے میں لگا ہوا ہے۔

    روئٹرز کے مطابق پیرو کے حالات قریب سے دیکھنے والوں کے لیے یہ صورت حال زیادہ باعث حیرت نہیں ہونی چاہیے، کیوں کہ ووٹر اس مسلسل سیاسی لڑائی سے تنگ آ چکے ہیں، جنھوں نے پچھلے 5 سالوں میں 6 صدور اور 7 مواخذے کی کوششیں دیکھے ہیں۔

  • کھدائی کے دوران رسیوں سے بندھا 800 سال قدیم انسان برآمد (ویڈیو دیکھیں)

    کھدائی کے دوران رسیوں سے بندھا 800 سال قدیم انسان برآمد (ویڈیو دیکھیں)

    جنوبی امریکا کے ایک ملک پیرو میں کھدائی کے دوران رسیوں سے بندھا 800 سال قدیم انسان برآمد ہوا ہے۔

    تفصیلات کے مطابق ماہرین آثار قدیمہ نے جمعے کو بتایا کہ ان کی ایک ٹیم کو پیرو کے وسطی ساحل پر ایک ممی ملی ہے، جس کی قدامت کا اندازہ کم از کم آٹھ سو سال لگایا گیا ہے۔

    سان مارکوس کی اسٹیٹ یونیورسٹی سے تعلق رکھنے والے ماہر آثار قدیمہ وان ڈیلن لونا نے کہا کہ ممی کی بنیادی خصوصیت یہ ہے کہ اس کے پورے جسم کو رسیوں سے باندھا گیا تھا، اور اس نے ہاتھوں سے چہرے کو ڈھانپ رکھا ہے، ہو سکتا ہے کہ اُس وقت مقامی طور پر مردوں کا اسی طرح کفن دفن کیا جاتا ہو۔

    ماہرین کے مطابق ممی شدہ باقیات اُس ثقافت سے تعلق رکھنے والے ایک شخص کی تھیں، جو جنوبی امریکی ملک کے ساحل اور پہاڑوں کے درمیان پروان چڑھی تھی۔

    ماہر آثار قدیمہ پیٹر وان ڈیلن لونا نے بتایا کہ یہ ممی، جس کی جنس کی شناخت نہیں ہو سکی ہے، لیما کے علاقے میں دریافت ہوئی۔

    انھوں نے کہا کہ باقیات ایک ایسے شخص کی ہیں جو ملک کے اونچے پہاڑی علاقے میں رہتا تھا، اس کی ریڈیو کاربن ڈیٹنگ کی جائے گی تاکہ زیادہ درست طور پر یہ معلوم ہو کہ یہ کتنی پرانی لاش ہے۔

    یہ ممی لیما شہر کے مضافات میں ایک زیر زمین جگہ کے اندر سے ملی تھی، قبر میں مٹی کے برتن، سبزیوں کی باقیات اور پتھر کے اوزار بھی موجود تھے۔

    واضح رہے کہ پیرو ایک مشہور سیاحتی مقام ماچو پچو کا گھر ہے، سلطنتِ اِنکا سے پہلے اور بعد میں جنم لینے والی ثقافتوں کے سیکڑوں آثار قدیمہ یہاں موجود ہیں، سلطنتِ اِنکا کا 500 سال قبل جنوبی امریکا کے جنوبی حصے پر غلبہ تھا، اور یہ سلطنت جنوبی ایکواڈور اور کولمبیا سے لے کر وسطی چلی تک پھیلی ہوئی تھی۔

  • پیرو میں دیوتاؤں کی بھینٹ چڑھائے گئے 227 بچوں کی قدیم قبریں دریافت

    پیرو میں دیوتاؤں کی بھینٹ چڑھائے گئے 227 بچوں کی قدیم قبریں دریافت

    لیما:جنوبی امریکی ملک پیرو میں چیموز دیوتاؤں کے لیے بھینٹ چڑھائے جانے والے بچوں کی قدیم اجتماعی قبریں دریافت ہوگئیں، رپورٹ میں انکشاف ہوا ہے کہ قبریں کم از کم 500 سال پرانی ہیں جن میں سے 227 بچوں کی لاشیں برآمد ہوئیں۔

    تفصیلات کے مطابق براعظم امریکا کے جنوب میں واقع ملک پیرو کے دارالحکومت لیما کے ساحلی علاقے ہونیچوکو میں 227 بچوں کی لاشیں برآمد ہوئیں، جن کی عمریں 5 سے 14 برس تھیں،آثار قدیمہ ماہرین کے مطابق دریافت کی گئی قبریں کم از کم 500 سال پرانی ہیں۔

    واضح رہے کہ گزشتہ برس پیرو کے دو مختلف مقامات پر مجموعی طور پر 200 بچوں کی مسخ شدہ لاشیں ملی تھیں،ماہرین نے بتایا تھا کہ جب کھدائی کی گئی تو بعض بچوں کی لاشوں کے بال اور کھال موجود تھی۔

    اس حوالے سے ماہرینِ آثار قدیمہ نے بتایا کہ بچوں کو برسات کے موسم میں قتل کیا گیا اور دفن کرتے وقت ان کے چہرے سمندر کی جانب موڑ دیے گئے، جس سے ظاہر ہوتا ہے کہ بچوں کو چیموز کے دیوتاؤں کو خوش کرنے کے لیے بھینٹ چڑھایا گیا تاہم یہ واضح نہیں ہوسکا کہ ان بچوں کو کس سال قتل کیا گیا۔

    واضح رہے کہ چیموز کے باشندے پیرو کے شمالی ساحلی علاقے میں برسوں سے رہائش پذیر ہیں اور خطے کی انتہائی طاقتور ثقافت کے حامل ہیں۔

    اس حوالے سے بتایا گیا کہ چیموز باشندوں نے 1200 سے 1400 کے درمیانی عرصے میں مقبولیت حاصل کی اور انکائی باشندوں پر قبضہ کرلیا جس کے بعد اسپین نے حملہ کرکے خطے کو فتح کیا۔

    غیر ملکی خبر رساں ادارے کے مطابق چیموز چاند کو خدا مانتے تھے اور اسے شی پکارتے تھے جبکہ انکائی کے باشندے سورج کو سب سے زیادہ طاقتور سمجھتے تھےعلاوہ ازیں ماہر آثار قدیم کے مطابق کھدائی کا عمل جاری ہے تاہم مزید قبریں دریافت ہوسکتی ہیں۔

  • پیرو میں شدید زلزلے کے جھٹکے، شہری عمارتوں سے باہر نکل آئے

    پیرو میں شدید زلزلے کے جھٹکے، شہری عمارتوں سے باہر نکل آئے

    لیما: جنوبی امریکی ملک پیرو میں شدید زلزلے کے جھٹکے محسوس کیے گئے، خوف وہراس کے باعث بلندوبالا عمارتوں میں موجود شہری باہر نکل آئے۔

    تفصیلات کے مطابق پیرو میں اس زلزلے کے باعث شہری خوف وہراس میں مبتلا ہیں، تاہم کسی جانی یا مالی نقصانات کی کوئی اطلاعات نہیں ہیں۔

    امریکی زلزلہ کوہ پیما مرکز کا کہنا ہے کہ ریکٹر اسکیل پر ان زلزلے کے جھٹکوں کی شدت 7.1 ریکارڈ کی گئی، زلزلہ پیرو کے جنوبی شہر خُولیاکا سے تقریباﹰ 70 کلومیٹر شمال مغرب میں آیا۔

    زلزلے کا مرکز 250 کلومیٹر زمین کی گہرائی میں تھا، جبکہ ان زلزلوں کے نتیجے میں سونامی کی وارننگ جاری نہیں کی گئی۔

    یاد رہے کہ گذشتہ دنوں جنوبی امریکی ملک ایکواڈور کے مشرقی علاقوں میں آنے والے شدید زلزلے کے باعث 6 افراد زخمی ہوئے تھے۔

    ایکواڈور میں شدید زلزلے کے جھٹکے، 6 افراد زخمی

    خیال رہے کہ گذشتہ ماہ میکسیکو میں شدید زلزلے کے جھٹکے محسوس کیے گئے تھے جس کے باعث عمارتیں لرز اٹھی تھیں۔

    قبل ازیں نومبر 2016 میں لاطینی امریکا کے ممالک ایل سلواڈور اور نکارا گوا میں زلزلے کے جھٹکے محسوس کیے گئے تھے، امریکی جیالوجیکل سروے کے مطابق زلزلے کی گہرائی 10 کلومیٹر اور مرکز 150 کلومیٹر دور تھا۔

  • چاند تاروں کا رقص دکھاتا شیشے کا کمرہ

    چاند تاروں کا رقص دکھاتا شیشے کا کمرہ

    کیسا لگے گا آپ کو جب آپ زمین سے کئی فٹ اوپر فضا میں معلق ہوں اور سورج کے طلوع ہونے، غروب ہونے اور چاند تاروں کے سفر کو اپنے بالکل قریب سے دیکھ سکیں۔

    جنوبی امریکی ملک پیرو میں بھی ایسے ہی ہینگنگ لاجز بنائے گئے ہیں جہاں رہنا تو بڑا دل گردے کا کام ہے، تاہم وہاں وقت گزارنا زندگی کے بہترین تجربات میں سے ایک ہوسکتا ہے۔

    پیرو کے شہر کزکو میں ایک پہاڑ پر معلق شیشے کے کیپسولز بنائے گئے ہیں۔ یہ کیپسولز زمین سے 12 سو فٹ اونچائی پر واقع ہیں۔

    یہاں تک پہنچنے کے لیے آپ کو باقاعدہ کوہ پیمائی کر کے پہاڑ کے اوپر چڑھنا ہوگا۔

    زمین سے کئی سو فٹ اوپر شیشے سے بنے اس عارضی کمرے میں آپ طلوع آفتاب کے ساتھ ناشتہ اور غروب آفتاب کے وقت چائے پی سکتے ہیں۔ چاروں طرف قدرت کے شاندار مناظر بکھرے ہوئے ہیں جنہیں دیکھ کر آپ دنگ رہ جائیں گے۔

    رات میں سوتے ہوئے چاند اور تارے آپ کے اوپر رقص کرتے دکھائی دیں گے اور آپ اندھیری رات کو صبح کاذب اور پھر صبح کے خوبصورت رنگوں میں ڈھلتا ہوا دیکھ سکیں گے۔

    یہاں پر آپ کو پیرو کے مقامی کھانے بھی پیش کیے جائیں گے۔

    واپسی کے وقت ایک اور ایکسائٹمنٹ آپ کی منتظر ہوگی۔ واپس جانے والوں کے لیے یہاں 7 طویل زپ لائنز لگائی گئی ہیں جن کے ذریعے آپ چند منٹوں میں واپس زمین پر پہنچ جائیں گے۔

    اس انوکھے اور حسین لاج میں وقت گزارنا زندگی کا شاندار تجربہ ہوسکتا ہے۔