پشاور : وزیر اعظم شاھد خاقان عباسی نے کہا ہے کہ دھرنوں میں کیا ہوا، کون لوگ ملوث تھے، ان کا کردار کیا تھا یہ تمام حقائق عوام کے سامنے آنے چاہئیں، ماضی کی غلطیاں آج بھی  دہرائی جا رہی ہیں۔

ن لیگ کی حکومت نے پشاور کو عالمی معیار کا ایئرپورٹ دیا، مشکلات کے باوجود منصوبے کو کامیابی سے پایہ تکمیل تک پہنچایا گیا۔ ان خیالات کا اظہار انہوں نے باچا خان ایئرپورٹ پشاور کی تزئین و توسیع کی تقریب سے خطاب کرتے ہوئے کیا۔

وزیراعظم نے کہا کہ آئین کی خلاف ورزی فوج اورسیاستدانوں دونوں نےکی، آج تک اس ملک میں کیا کچھ ہوتا رہا سب عوام کے سامنے لانا ہوگا، چوہدری نثار اور شہباز شریف کی اگر راحیل شریف سے ملاقات ہوئی تھی تو کیا یہ غیرقانونی تھی؟ اگلی حکومت کسی کی بھی آئے، وہ ان تمام معاملات کی تحقیقات کرے۔

ان کا کہنا تھا کہ قومی احتساب بیورو (نیب) نے ملک کا نظام مفلوج کرکے رکھ دیا ہے، چیئرمین نیب کو ہٹانے کا طریقہ کار واضح نہیں ہے انہیں شوکاز نوٹس دے سکتے ہیں، چیئرمین نیب کوہٹانےمیں 10سے15سال لگ جائیں گے۔

شاھد خاقان نے کہا کہ سپریم کورٹ کے کسی بھی عمل سے ملک کا نقصان نہیں ہونا چاہئے، میں نے چیف جسٹس کو خدشات بتائے تو انہوں نے اپنی باتیں کیں، چیف جسٹس کی باتوں پر ان کے خلاف کچھ نہیں کرسکتا، کیاچیف جسٹس اور چیئرمین نیب کی وجہ سے حکومت صحیح چل رہی ہے؟ عدالت اور نیب سے ملک کا بڑانقصان ہو رہا ہے، حکومت مفلوج ہے۔

شاہد خاقان عباسی نے مزید کہا کہ قومی سلامتی کمیٹی کا اجلاس فوج نے نہیں بلایا، قومی سلامتی کمیٹی اجلاس میں نوازشریف کے انٹرویو پربات ہوئی، ڈان اخبار میں تاثردیا کیا گیا کہ جان بوجھ کر لوگ بھیج کرممبئی میں حملہ کیا گیا، نوازشریف کی بات کو غلط انداز میں پیش کیا جاتا ہے جس سے غلط تاثر پھیلاوہ آج بھی اپنےبیان پرقائم ہیں، نوازشریف نے کوئی ایسی بات نہیں کی جس سے حلف کی خلاف ورزی ہوتی ہو، دکھ ہے میڈیا نے بغیر سوچے سمجھے بھارت کا پروپیگنڈا پھیلانا شروع کردیا۔

شاھد خاقان عباسی نے کہا کہ کافی عرصے سے زیر التوا اسلام آباد ایئرپورٹ منصوبہ بھی مکمل کیا، سیالکوٹ، ملتان ایئرپورٹ توسیع منصوبے بھی کامیابی سے مکمل کئے، کوئٹہ ایئرپورٹ توسیع منصوبے کا اگلے ہفتے افتتاح کریں گے۔

وزیراعظم نے بتایا کہ لاہور ایئرپورٹ توسیع منصوبہ تکمیل کے مراحل میں ہے جبکہ کراچی ایئرپورٹ کی تزئین و آرائش کیلئے احکامات جاری کردیئے گئے ہیں۔

ان کا مزید کہنا تھا کہ ملک بھر میں موٹرویز اورہائی ویز کا نیٹ ورک بنایا جارہا ہے، پاکستان میں1700کلومیٹر طویل6رویہ موٹر ویز زیر تکمیل ہیں۔

موجودہ حکومت چھ فیصد اقتصادی شرح نمو حاصل کرنے میں کامیاب رہی، لوڈشیڈنگ ختم کرنے میں کامیابی ملی، معاشی چیلنجز پر قابو پایا۔

خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔