پشاور: پارہ چنار میں زوردار دھماکہ سے 14 افراد جاں بحق ہوگئے، دھماکے میں ساٹھ سے زائد افراد کے زخمی ہونے کی اطلاعات ملی ہیں۔
تفصیلات کے مطابق پارہ چنار کے علاقے ٹل اڈہ کے لنڈا بازار میں زوردار دھماکے کے نتیجے میں چودہ افراد موقع پر جاں بحق ہوگئے.
مذکورہ علاقہ کرم ایجنسی میں شامل ہے اور اس علاقے میں اس سے قبل بھی دہشت گردی کی وارداتیں ہو چکی ہیں۔
دھماکہ کے وقت لوگوں کی بڑی تعداد چھٹی کے دن کی وجہ سے خریداری کیلئے وہاں موجود تھی۔
دھماکہ اتنا شدید تھا کہ اس کی آواز دور دور تک سنی گئی،ہر طرف افرا تفری مچ گئی امدادی ٹیمیں جائے وقوعہ پر پہنچ گئیں ہیں، زخمیوں کو طبی امداد کیلئے قریبی اسپتال منتقل کیا گیا ہے.
زخمیوں میں سے بیس کی حالت انتہائی تشویشناک بتائی جارہی ہے، ذرائع کے مطابق ہلاکتوں میں مزید اضافے کا خدشہ ہے۔
اسپتالوں میں ایمر جنسی نافذ کردی گئی ہے، علاقے میں سرچ آپریشن جاری ہے،
واقعے کے بعد سیکیورٹی فرسز نے علاقے کو گھیرے میں لے لیا، اور شواہد اکھٹے کئے جا رہے ہیں۔
دھماکہ کی نوعیت کا تاحال تعین نہیں کیا جاسکا کہ آیا یہ دھماکہ خود کش تھا یا بارودی مواد نصب کیا گیا تھا۔
