لاہور: پٹرول کی فراہمی میں بہتری آنے کے بعد سوئی نادرن گیس پائپ لائن لمیٹڈ نے سی این جی سیکٹر کو گیس کی فراہمی دوبارہ بند کرنے کا اعلان کردیا ہے۔
تفصیلات کے مطابق پنجاب میں پٹرول کی رسد میں بہتری آنے کے بعد ایس این جی پی ایل نے سی این جی اسٹیشنز کو گیس کی فراہمی بند کرنے کا فیصلہ کرلیا۔
سوئی گیس کمپنی ذرائع کے مطابق آج شام چھ بجے سی این جی اسٹیشنزکو گیس کی فراہمی معطل کردی جائے گی۔
واضح رہے کہ پٹرول بحران کے باعث حکومت کی جانب سے چارروز قبل سی این جی اسٹیشنز کھولنے کا فیصلہ کیا گیا تھا۔
ایس این جی پی ایل سے موصول ہونے والی اطلاعات کے مطابق سی این جی اسٹیشنز کو گیس کی فراہمی تاحکم ثانی بند رہے گی۔
دوسری جانب پاکستان اکانومی واچ کے صدرڈاکٹرمرتضیٰ مغل نے کہا ہے کہ پٹرول کے بحران نے حکومت کے گڈ گورننس کے دعووں کی قلعی کھول دی ہے، اپنے ایک بیان میں انہوں نے کہا کہ ملک کی نصف سے زیادہ آبادی اورمعیشت بحران سے بری طرح متاثر ہوئی ہے ، مگر حکومت اب بھی سنجیدہ نہیں۔
ان کا کہنا تھا کہ بدانتظامی کو پٹرول کی طلب میں اضافے کی آڑمیں چھپانے کی کوشش کی جارہی ہے،ہنگامی اقدامات کی صورت میں بھی صورتحال کو معمول پرآنے میں دوماہ لگیں گے۔
