اسلام آباد : پی ٹی آئی رہنماؤں شوکت ترین، عمرایوب اور مزمل اسلم نے کہا ہے کہ حکومت کس کو بے وقوف بنارہی ہے، پیٹرول 300سے310روپے فی لیٹر تک جائے گا۔
اسلام آباد میں پریس کانفرنس سے خطاب کرتے ہوئے شوکت ترین نے کہا کہ بجٹ خسارہ 4.2ٹریلین روپے ہے، نمبرکبھی جھوٹ نہیں بولتے یہ ان کا منہ چڑائیں گے، اپنے دور حکومت میں ہم نے سب سے زیادہ 5.5ملین افراد کو روزگاردیا۔
شوکت ترین کا کہنا تھا کہ حکومت کس کو بےوقوف بنارہی ہے، گروتھ پرانہوں نے5فیصدکی بات کی ہے، ہم نے6فیصدکی بات ہے، ڈیزل کی قیمت بہت زیادہ بڑھادی ہے، انہوں نے کہا کہ صنعتی ترقی ہم نے7.2فیصد کی جو30سال میں سب سے زیادہ تھی۔
سابق وزیر خزانہ نے کہا کہ یہ کہہ رہے ہیں کہ صنعتی ترقی 7.1فیصد کریں گے لیکن کیسے کریں گے، بینکوں پر ٹیکس ریٹ 12،12فیصد بڑھادیے ہیں، ترقی سے متعلق ان کےاعداد وشمار غیرسنجیدگی کا شکار ہیں۔
ان کا کہنا تھا کہ یہ سیلزٹیکس بڑھائیں گے، پیٹرولیم لیوی اور بڑھائیں گے، پیٹرولیم لیوی 35روپے سےشروع کرنی پڑےگی، مہنگائی کا طوفان آئے گا، پاور سبسڈی ہم نے ایک ٹریلین کی دی کیونکہ یہ لوگ مہنگے معاہدے کرکے گئےتھے۔
شوکت ترین نے کہا کہ بجٹ میں بہت سے ایسی چیزیں ہیں جوانہوں نے کم ظاہر کی ہیں، ہم نے ایک سال میں بجٹ میں 1400ارب شامل کیے، یہ لوگ پرانےپاکستان کےطریقےپرہی چل رہےہیں۔
انہوں نے کہا کہ 43ملین ٹیکس دہندہ افراد کا ڈیٹا چھوڑ کر آیا ہوں جو یہ استعمال نہیں کررہے، مجھے سمجھ نہیں آتاکہ آئی ایم ایف اسے کیسےمنظور کرےگا؟
بجلی 39سے40روپے فی یونٹ ہوجائےگی . عمر ایوب
سابق وفاقی وزیر عمرایوب نے کہا کہ اب اشیائے خورونوش کی قیمتیں آسمان سے باتیں کریں گی، بجلی کی قیمت ہم 16روپے چھوڑ کرگئے ہیں، یہ چند ماہ میں 39سے40روپے ہوجائے گی،
لگتا ہےامپورٹڈحکومت نے دو مہینے میں خودکشی کرلینی ہے یا عوام نے پتھر مارنے ہیں کیونکہ جب بجلی 39سے40روپے فی یونٹ ہوگی توکیا عوام ان کو پتھر نہیں ماریں گے؟
امپورٹڈ حکومت مراسلے کی بنیاد پر لائی گئی، جب سے یہ آئےاس دن سے ہمارے بینکنگ رینکنگ کم ہوگئی ،جون جولائی میں بجلی کی کمی 7ہزارمیگاواٹ ہوجائےگی،
یہ لوگ کاروباری افراد کا بیٹرہ غرق کرنے جارہےہیں، امپورٹڈ حکومت لانے کا مقصد تھا معیشت جو درست ڈگر میں تھی اس کوخراب کیا جائے۔
عام آدمی کے گیس بل میں 400فیصد اضافہ ہونے جارہا ہے، بجلی ہے نہیں، گیس کی لوڈشیڈنگ ہے وہ بھی گرمیوں میں، جوبھی صنعت ہے وہ بند ہونے جارہی ہے، پیسہ کیسے کمائیں گے تنخواہیں کیسے ملیں گی۔
