ریاض : سعودی حکومت نے اپنے شہریوں کی صحت پر کوئی بھی سمجھوتہ نہ کرتے ہوئے کورونا وائرس سے بچاؤ کی ویکیسین مفت فراہم کرنے کا اعلان کیا ہے۔
سعودی وزیر صحت ڈاکٹر توفیق الربیعہ نے میڈیا کو بتایا ہے کہ سعودی عرب کورونا وائرس کی ویکسین مملکت بھر کی تمام فارمیسیز میں مفت فراہم کرے گا۔
سعودی ذرائع ابلاغ کے مطابق فوڈ اینڈ ڈرگ اتھارٹی سعودی عرب کے کئی علاقوں میں ویکسینیشن کے عمل کو پھیلانے کے لیے اور دیگر کوویڈ 19 ویکسینز کی جانچ پڑتال کررہی ہے۔
اس حوالے سے وزارت صحت نے نشاندہی کی ہے کہ وہ ویکسینز جن کی سعودی عرب میں منظوری دی جا چکی ہے کم سے کم 16 یا 18 سال کی عمر کے افراد کو لگائی جاسکے گی۔
سعودی عرب کے محکمہ صحت کے ترجمان العبد العلی نے منگل کے روز بتایا تھا کہ حکومت نے ویکسین سنٹرز کو مملکت بھر میں پھیلانے کی منصوبہ بندی کرلی ہے۔
ساتھ ہی العلی نے یہ وضاحت بھی کی کہ ویکسین کے حوالے سے مزید تحقیق ہونے تک حاملہ خواتین اور بچوں کو ویکیسن لگانے کی اجازت نہیں ہوگی۔
وزیر صحت نے یہ اعلان کیا کہ حج کرنے کے خواہشمند افراد کے لیے ویکسینیشن لازمی قرار دی جائے گی۔ سعودی عرب نے حال ہی میں ریاض، مکہ، مدینہ اور ابہا میں ویکسینیشن کی مہم شروع کی ہے۔
یاد رہے کہ کورونا ویکسین حاصل کرنے کے لیے صحتی ایپ پر پہلے رجسٹریشن ہونا ضروری ہے۔
