ARYNews.tv | Urdu – Har Lamha Bakhabar

Tag: PHC

  • کے پی بلدیاتی الیکشن: سپریم کورٹ نے اہم ترین فیصلہ سنادیا

    کے پی بلدیاتی الیکشن: سپریم کورٹ نے اہم ترین فیصلہ سنادیا

    اسلام آباد: سپریم کورٹ آف پاکستان نے کے پی میں بلدیاتی الیکشن کے دوسرے مرحلے کے انعقاد سے متعلق دائر درخواستوں پر فیصلہ سنادیا ہے۔

    تفصیلات کے مطابق سپریم کورٹ میں کے پی بلدیاتی الیکشن دوسرے مرحلے میں کرانے کےفیصلے پر سماعت ہوئی، جسٹس اعجازالاحسن اور جسٹس عائشہ ملک پر مشتمل دو رکنی بنچ نے سماعت کی۔

    فریقین کے دلائل سننے کے بعد سپریم کورٹ نے پشاور ہائیکورٹ کا فیصلہ معطل کرتے ہوئے فریقین کو نوٹسز جاری کردئیے ہیں۔

    فیصلے سے قبل وکیل الیکشن کمیشن نے سپریم کورٹ میں دلائل دیتے ہوئے کہا کہ پشاورہائیکورٹ ایبٹ آباد بنچ نےالیکشن کمیشن کو نہیں سنا، عدالت نے ہمیں سنےبغیر بلدیاتی انتخابات کاشیڈول مؤخرکیا۔

    وکیل الیکشن کمیشن نے آگاہ کیا کہ یکم فروری کی سماعت کا نوٹس 2 فروری کوموصول ہوا،نوٹس ملنےتک پشاورہائیکورٹ بلدیاتی انتخابات مؤخر کرچکی تھی، پانچ اضلاع کے شیڈول مؤخر کرنےکی درخواست پر 18اضلاع کا الیکشن مؤخر کیا گیا۔

    اس موقع پر وکیل شکایت کنندگان نے عدالت کو بتایا کہ موسمی حالات کے پیش نظر 27 مارچ کو انتخابات نہیں ہو سکتے۔

    بینچ میں شامل جسٹس عائشہ ملک نے اپنے ریمارکس میں کہا کہ ہائیکورٹ کو فیصلے سے پہلےالیکشن کمیشن کا مؤقف سنناچاہیے تھا جبکہ عدالت نے ریمارکس دیئے کہ تصدیق نہیں ہوئی کہ موسمی حالات الیکشن میں رکاوٹ ڈال سکتے ہیں۔

    جسٹس اعجاز الاحسن نے کہا کہ محکمہ موسمیات کی رپورٹ کو الیکشن کمیشن نے دیکھنا تھا عدالت نے نہیں ، ہائیکورٹ کو فیصلہ دینے کی اتنی جلدی کیا تھی؟ بعد ازاں سپریم کورٹ میں کیس کی سماعت 14 فروری تک ملتوی کردی گئی۔

  • قیمتوں میں اضافہ، چکن کی برآمد پر پابندی برقرار رکھنے کا حکم

    قیمتوں میں اضافہ، چکن کی برآمد پر پابندی برقرار رکھنے کا حکم

    پشاور : پشاور ہائی کورٹ  نے چکن کی برآمد پر پابندی برقرار رکھنے کا حکم دیتے ہوئے ایک دن کے چوزے کی برآمد کی اجازت دے دی۔

    تفصیلات کے مطابق پشاور ہائی کورٹ میں چکن کی قیمتوں سے متعلق کیس کی سماعت ہوئی ، سیکرٹری فوڈ نے بتایا چکن کی فی کلو قیمت 231 سے بڑھی تو برآمد پر پابندی لگالی ، چکن کی برآمد پر پابندی لگائی تو قیمت کم ہوکر 236 تک آگئی ہے، عدالتی حکم پر عمل درآمد یقینی بنا رہے ہیں۔

    بابر خان یوسفزئی ایڈوکیٹ کا کہنا تھا کہ چکن کی قیمتیں بڑھنے کی وجہ سے محکمہ خوراک نے ایک دن کے چوزے کی برآمد پر بھی پابندی لگائی ہے، عدالت نے قرار دیا تھا کہ جب ایک دن کے چوزے کی قیمت 70 سے زیادہ ہوجائے تو پھر برآمد پر پابندی ہوگی۔

    بابر خان یوسفزئی ایڈوکیٹ نے کہا چوزے کی قیمت اب بھی 70 سے کم ہے چوزے کی برآمد کی اجازت دی جائے۔

    اسحاق علی قاضی ایڈوکیٹ کا کہنا تھا کہ چوزے کی قیمت کم ہے چکن پر دیگر اخراجات زیادہ آتے ہیں، ایک دن کے چوزے کو چکن کی قیمت الگ کیا جائے، جب ایک دن کے چوزے کی قیمت بڑھ جائے تو پھر پابندی لگائے، ماہانہ 12 کروڑ چوزے کی پروڈکشن ہوتی ہے، برآمد کرتے ہیں تو اس سے منافع آتا ہے۔

    بہلول خٹک ایڈوکیٹ نے کہا فیڈز کی قیمت بڑھ گئی ہے, جوار اور سویابین کی قیمت کو کنٹرول کیا جائے، چکن پر زیادہ خرچہ فیڈ کا ہے اور فیڈ میں 80 فیصد جوار اور وسویابین کا استعمال ہوتا ہے۔

    عدالت نے چکن کی برآمد پر پابندی برقرار رکھنے کا حکم دیتے ہوئے کہا قیمتیں جب تک کم نہیں ہوتی پابندی برقراررہے گی۔

    عدالت نے ایک دن کے چوزے کی برآمد کی اجازت دیتے ہوئے کہا سب مل بیٹھ کر جو بھی مسائل ہے ان کا کوئی حل نکالیں، ایک دوسرے کو سنے۔

  • پنجاب میں اتائیوں کے خلاف کارروائیاں، 24 ہزار سے زائد علاج گاہیں سیل

    پنجاب میں اتائیوں کے خلاف کارروائیاں، 24 ہزار سے زائد علاج گاہیں سیل

    لاہور: پنجاب ہیلتھ کیئر کمیشن نے صوبے بھر میں اتائیوں کے خلاف کارروائیاں کرتے ہوئے 1 لاکھ 8 ہزار سے زائد علاج گاہوں پر چھاپے مارے اور 34 ہزار سے زائد کاروبار سیل کردیے۔

    تفصیلات کے مطابق پنجاب ہیلتھ کیئر کمیشن نے 28 شہروں میں اتائیوں کے خلاف کارروائیاں کیں، صوبائی دارالحکومت لاہور میں 14 اتائیوں کی دکانیں سیل کردی گئی۔

    ترجمان ہیلتھ کیئر کمیشن کا کہنا ہے کہ 3 ہفتوں میں 1 لاکھ 8 ہزار سے زائد علاج گاہوں پر چھاپے مارے گئے۔

    ترجمان کا کہنا ہے کہ ضلع رحیم یار خان میں 4 اتائیوں کے خلاف مقدمات درج کیے گئے، صوبے بھر میں کی جانے والی کارروائیوں میں 34 ہزار 345 اتائیوں کے کاروبار سیل کیے ہیں۔

  • ٹک ٹاک بند کرنے سے متعلق حکم نامہ جاری

    ٹک ٹاک بند کرنے سے متعلق حکم نامہ جاری

    پشاور:پشاور ہائیکورٹ کا کہنا ہے کہ ٹک ٹاک کا استعمال نوجوان نسل کیلئے نشے کی طرح ہے، پی ٹی اے کو ہدایات کی ہے سینسرطریقہ کار آنے تک ٹک ٹاک کو بند کیا جائے۔

    تفصیلات کے مطابق پشاور ہائیکورٹ نے ٹک ٹاک کی بندش سے متعلق حکم نامہ جاری کردیا ہے، جس میں کہا گیا ہے کہ ٹک ٹاک کا استعمال نوجوان نسل کیلئےنشے کی طرح ہے،ٹک ٹاک پر بہت سی ویڈیوزفحاشی،غیر اخلاقی ،روایات کے برعکس ہیں لیکن ویڈیوز کو جانچنے کے لئے کوئی طریقہ کار موجود نہیں۔

    ،حکم نامے میں کہا گیا ہے کہ کچھ غیراسلامی،غیراخلاقی ویڈیوزپرمتعلقہ اداروں کو کہا گیا مگرمثبت نتائج نہیں آئے، ڈی جی پی ٹی اے نے موقف اپنایا ٹک ٹاک آفس سنگاپور میں ہے یہاں نہیں اور ویڈیوز کو سینسر ،فلٹر یا ہٹانا ہمارے بس میں نہیں۔

    عدالت نے کہا کہ اس کو سینسرکرنا مشکل ہے تو واحد حل اس پر پابندی یا بند کرنا ہے، ٹک ٹاک پر ایسے مواد بھی آپلوڈ ہوتے ہیں جو دیکھنے کے قابل بھی نہیں، بعض نوجوانوں نے ٹک ٹاک ویڈیوزبناتے وقت خودکشی بھی کی۔

    ہائی کورٹ نے حکم نامے میں کہا کچھ اسلامی ممالک میں ٹک ٹاک پر پابندی عائد ہے، پی ٹی اے کو ہدایات کی ہے سینسرطریقہ کار آنے تک ٹک ٹاک کو بند کیا جائے اور پی ٹی اے اس حوالے سے اپنا رپورٹ جمع کرائے۔

    یاد رہے پشاور ہائی کورٹ نے ٹک ٹاک ایپلی کیشن بند کرنے کا حکم دیتے ہوئے کہا تھا کہ جب تک ٹک ٹاک کے عہدیدارتعاون نہیں کرتے تب تک ایپلی کیشن بند رکھیں۔

    چیف جسٹس قیصر رشید خان نے مزید کہا ٹک ٹاک پرجوویڈیوزاپ لوڈہوتی ہیں وہ ہمارےمعاشرے کوقبول نہیں، ٹک ٹاک ویڈیوز سے معاشرے میں فحاشی پھیل رہی ہے اور زیادہ نوجوان متاثرہورہےہیں، ٹک ٹاک سےمتعلق جورپورٹ مل رہی ہے یہ افسوسناک ہے۔

  • پاکستانی صارفین کیلئے اہم خبر ، ٹک ٹاک بند کرنے سے متعلق بڑا حکم آگیا

    پاکستانی صارفین کیلئے اہم خبر ، ٹک ٹاک بند کرنے سے متعلق بڑا حکم آگیا

    پشاور : پشاور ہائی کورٹ نے ٹک ٹاک ایپلی کیشن آج سے بند کرنے کا حکم دے دیا اور کہا جب تک ٹک ٹاک کے عہدیدارتعاون نہیں کرتے تب تک ایپلی کیشن بند رکھیں۔

    تفصیلات کے مطابق پشاور ہائی کورٹ میں ٹک ٹاک کے خلاف دائر درخواست پر سماعت ہوئی ، ڈی جی پی ٹی اے ، ڈپٹی اٹارنی جنرل اور درخواست گزار کے وکیل عدالت میں پیش ہوئے۔

    چیف جسٹس قیصررشید نے ریمارکس میں کہا ٹک ٹاک پرجوویڈیوزاپ لوڈہوتی ہیں وہ ہمارےمعاشرے کوقبول نہیں، ٹک ٹاک ویڈیوز سے معاشرے میں فحاشی پھیل رہی ہے، ٹک ٹاک ایپلی کیشن کو فوری طور پر بند کیا جائے۔

    ڈی جی پی ٹی اے کا کہنا تھا کہ ٹک ٹاک عہدیداروں کودرخواست دی ،مثبت جواب نہیں آیا، جس پر عدالت نے کہا جب تک ٹک ٹاک کے عہدیدارتعاون نہیں کرتے تب تک ایپلی کیشن بند رکھیں۔

    چیف جسٹس قیصر رشید خان نے مزید کہا ٹک ٹاک سےزیادہ نوجوان متاثرہورہےہیں، ٹک ٹاک سےمتعلق جورپورٹ مل رہی ہے یہ افسوسناک ہے، جس پر ڈی جی پی ٹی اے نے بتایا کہ ٹک ٹاک پرپاکستان میں روزانہ45 لاکھ ویڈیوزاپ لوڈہوتی ہیں، مختلف زبانوں میں ویڈیوز ہوتی ہیں،سب کو فلٹرکرنا ابھی ممکن نہیں۔

    عدالت نے ڈی جی پی ٹی اے سے استفسار کیا ٹک ٹاک آفس کہاں پرہےجہاں سےیہ کنٹرول ہوتاہے تو انھوں نے بتایا کہ ٹک ٹاک کا ہیڈ آفس سنگاپور میں ہے، پاکستان میں اس کاآفس نہیں،دبئی سے کنٹرول کیا جارہا ہے۔

    نازش مظفر ایڈوکیٹ نے کہا بہت سے مسلم ممالک نے ٹک ٹاک پر پابندی لگائی ہے جبکہ ڈپٹی اٹارنی جنرل اصغر خان کنڈی نے بتایا کہ بنگلہ دیش اور بعض غیر مسلم ممالک میں بھی ٹک ٹاک پر پابندی ہے۔

    پشاور ہائی کورٹ نے ٹک ٹاک ایپلی کیشن آج سے بند کرنے کا حکم دیتے ہوئے کہا جب تک آپ کی درخواست پر عمل نہیں کرتے ٹک ٹاک کو بند رکھا جائے۔ [

  • مشال خان قتل کیس : مرکزی ملزم عمران علی کی سزائے موت عمر قید میں تبدیل

    مشال خان قتل کیس : مرکزی ملزم عمران علی کی سزائے موت عمر قید میں تبدیل

    پشاور : پشاور ہائی کورٹ نے مشال قتل کیس کے مرکزی ملزم عمران علی کی سزائے موت عمر قید میں تبدیل کرتے ہوئے ضمانت پر رہا ہونے والے 25 ملزمان کی ضمانت مسترد کرتے ہوئے گرفتار کرنے کا حکم دیا۔

    تفصیلات کے مطابق پشاور ہائی کورٹ نے مشال قتل کیس میں انسداد دہشت گردی عدالت فیصلے کے خلاف دائر اپیلوں پر محفوظ فیصلہ سنایا دیا۔

    فیصلے میں عدالت نے مرکزی ملزم عمران علی کی سزائے موت کو عمر قید میں تبدیل کردیا جبکہ ضمانت پر رہا کئے گئے 25 ملزمان کی ضمانت مسترد کردی۔

    عدالت نے تین سال سزا پانے والے 25 ملزمان کو گرفتار کرنے کا بھی حکم دیا اور عمر قید کی سزا پانے والے 7 ملزمان کی سزا کو برقرار رکھا ہے۔

    یاد رہے پشاور ہائی کورٹ نے مشال قتل کیس میں انسداد دہشت گردی عدالت کے فیصلے کے خلاف اپیلوں پر فیصلہ 29 ستمبر کو محفوظ کیا تھا۔

    خیال رہے 13 اپریل 2017 کو عبدالوالی خان یونیورسٹی مردان میں مشال کو ہجوم نے قتل کردیا تھا ، اس کیس میں ٹوٹل 61 ملزمان کو نامزد کیا گیا تھا، کیس میں 4 ملزمان مفرور تھے جن میں ایک پی ٹی آئی کے کونسلر عارف بھی تھا اس کو بعد میں گرفتار کرلیا گیا تھا۔

    بعد ازاں انسداد دہشت گردی عدالت ایبٹ آباد نے 7 فروری 2018 کو 57 ملزمان کے کیس کا فیصلہ جاری کیا، جس میں 31 ملزمان کو سزائیں سنائی ، جن میں ایک کو سزائے موت 5 کو عمرقید اور 25 ملزمان کو 3 تین تین سال قید جبکہ 26 ملزمان کو بری کیا تھا۔

    پشاور ہائیکورٹ ایبٹ آباد بنچ نے تین سال سزا پانے والے 25 ملزمان کو بعد میں ضمانت پر رہا کرنے کا حکم دیا تھا۔

    21 مارچ 2019 کو انسداد دہشت گردی عدالت پشاور نے دو ملزمان کونسلر عارف اور اسد مایار کو عمر قید کی سزا جبکہ دو ملزمان کو بری کیا تھا۔

  • سوشل میڈیا ایپ ٹک ٹاک کے خلاف درخواست دائر

    سوشل میڈیا ایپ ٹک ٹاک کے خلاف درخواست دائر

    پشاور : سوشل میڈیا ایپ ٹک ٹاک کے خلاف درخواست دائر کردی گئی، جس میں ٹک ٹاک اور ان جیسی ایپ پر سینسر شپ عائد کرنے کی استدعا کی گئی ہے۔

    تفصیلات کے مطابق پشاور ہائی کورٹ میں سوشل میڈیا ایپ ٹک ٹاک کے خلاف درخواست دائر کردی گئی ، درخواست شہری عصمت عاصم کی جانب سے دائر کی گئی ہے۔

    درخواست میں کہا گیا ہے کہ ٹک ٹاک پرجو ہورہا ہے، اس کی اسلام اورہمارامعاشرہ اجازت نہیں دیتا، ٹک ٹاک پرلوگ غیراخلاقی ویڈیوز اپ لوڈ کرتے ہیں، اس کی وجہ سے معاشرے میں خودکشی کے واقعات بڑھ رہے ہیں۔

    درخواست میں استدعا کی گئی کہ ٹک ٹاک کی وجہ سے فحاشی بڑھ رہی ہے، ٹک ٹاک اور ان جیسی ایپ پر سینسرشپ عائدکی جائے۔

    یاد رہے پاکستانی ٹیلی کمیونی کیشن اتھارٹی (پی ٹی اے) نے ویڈیو شیئرنگ ایپلی کیشن ٹک ٹاک سے غیراخلاقی مواد ہٹانے کا مطالبہ کیا تھا

    پی ٹی اے نے ویڈیو شیئرنگ پلیٹ فارم کی جانب سے غیراخلاقی مواد کو ہٹانے سے متعلق حالیہ کوششوں کا اعتراف کرتے ہوئے چیئرمین پی ٹی اے نے ٹک ٹاک سے مطالبہ کیا تھا کہ مواد کی نگرانی کے لیے مضبوط اور معتدل طریقہ کار اختیار کیا جائے تاکہ پاکستان میں غیر قانونی مواد تک رسائی نہ ہوسکے۔

  • سرکاری ملازمین کی ریٹائرمنٹ کی عمر کیا ہوگی ؟ فیصلہ ہوگیا

    سرکاری ملازمین کی ریٹائرمنٹ کی عمر کیا ہوگی ؟ فیصلہ ہوگیا

    پشاور : پشاور ہائی کورٹ نے ریٹائرمنٹ کی عمر 63سال کرنے کے فیصلے کو کالعدم قرار دے دیا ہے، کے پی حکومت نے سرکاری ملازمین کی ریٹائرمنٹ کی عمر60 سے بڑھا کر63سال کی تھی۔

    تفصیلات کے مطابق پشاور ہائی کورٹ میں ریٹائرمنٹ کی عمر سےمتعلق درخواستوں پر سماعت ہوئی ، سماعت میں عدالت نے سرکاری ملازمین کی ریٹائرمنٹ کی عمر 63سال کرنے کے فیصلے کو کالعدم قرار دے دیا۔

    چیف جسٹس وقار احمد سیٹھ نے ایڈووکیٹ جنرل شمائل احمدبٹ سے مکالمے میں کہا ریٹائرمنٹ63 سال کرنےکی سمری پنجاب کوبھیجی،اس نےکیوں نہیں کیا؟ جس پر ایڈووکیٹ جنرل کا کہنا تھا پنجاب کی اپنی مرضی ہےوہ نہیں کرتے،کے پی نےکردیا۔

    چیف جسٹس نے ریمارکس میں کہا خیبر پختونخواکوتجربہ گاہ بنادیاہے،صرف خیبر پختونخوا کے لیےکیوں؟پورے ملک کےلیےکیوں نہیں ، ایڈووکیٹ جنرل نے بتایا کےپی کوفائدہ ہوگا،پنشن کی رقم ترقیاتی کاموں پرخرچ ہوگی۔

    جسٹس وقار احمد سیٹھ کا کہنا تھا کہ چیف سیکرٹری نےبھی اعتراض کیاکہ فیصلہ وقتی فائدہ دےگا 3سال بعدپھرمسئلہ ہوگا، جس پر ایڈووکیٹ جنرل نے کہا الیکشن کےسال کیاکرناہےیہ سیاستدانوں کاکام ہےافسرکانہیں۔

    مزید پڑھیں : سرکاری ملازمین کی ریٹائرمنٹ کی عمرمیں توسیع کا معاملہ، وزیراعظم نے کمیٹی قائم کردی

    خیال رہے سرکاری ملازمین 60 سال کی عمر میں ریٹائر ہوجاتے ہیں لیکن خیبرپختونخوا حکومت نے سرکاری ملازمین کی ریٹائرمنٹ کی عمر 60 سے بڑھا کر 63سال کردی تھی۔

    واضح رہے وزیر اعظم عمران خان بھی سرکاری ملازمین کی ریٹائرمنٹ کی عمر میں توسیع کے معاملے پر 7 رکنی کمیٹی قائم کرچکے ہیں، وزیر اعظم کے مشیر برائے ادارہ جاتی اصلاحات کمیٹی کے سربراہ ہیں جبکہ سیکریٹری خزانہ، اسٹیبلشمنٹ، دفاع، قانون اور آڈیٹر جنرل کمیٹی کا حصہ ہیں۔

    ذرائع کے مطابق کمیٹی ریٹائرمنٹ کی عمر میں اضافہ کرنے یا نہ کرنے سے متعلق اور ریٹائرمنٹ کی عمر بڑھانے پر قانونی، معاشی اور انتظامی تجاویز دے گی۔

  • پشاور ہائیکورٹ پارکنگ میں دھماکا کرنے والا مرکزی ملزم گرفتار

    پشاور ہائیکورٹ پارکنگ میں دھماکا کرنے والا مرکزی ملزم گرفتار

    پشاور: پشاور ہائیکورٹ پارکنگ میں دھماکے سے متعلق تحقیقات میں اہم پیشرفت سامنے آگئی، دھماکا کرنے والا مرکزی ملزم گرفتار ہوگیا۔

    تفصیلات کے مطابق پشاور پولیس کا کہنا ہے کہ ہائیکورٹ کی پارکنگ میں دھماکا کرنے والا ملزم افغانستان کا رہائشی ہے، گرفتار ملزم 12 دسمبر2019 کو براستہ چمن پاکستان میں داخل ہوا۔

    پولیس نے کہا ہے کہ ملزم اکرام اللہ حاجی کیمپ اڈا پشاور کے قریب ہوٹل میں قیام پذیر تھا، ملزم نے کالعدم تحریک طالبان پاکستان (ٹی ٹی پی) کے کمانڈر کے کہنے پر رقم کے عوض جرم کیا، ملزم سے 29100 پاکستانی روپے اور 100امریکی ڈالر اور افغان دستاویزات برآمد ہوئیں۔

    پشاورہائی کورٹ کے باہر دھماکا، تحقیقات میں پیش رفت

    خیال رہے کہ دو روز قبل پشاور ہائی کورٹ کے باہر رکشے میں دھماکے کے باعث متعدد گاڑیوں کو نقصان پہنچا تھا اور 11 افراد زخمی ہوئے تھے، پولیس کا ابتدائی طور پر کہنا تھا کہ دھماکا سلنڈر پھٹنے سے ہوا۔

    گزشتہ روز رکشا ڈرائیور کا اپنے بیان میں کہنا تھا کہ ایک شخص سامان سمیت ہشت نگری سے ہائی کورٹ تک آیا، رکشے میں سوار شخص نے بتایا کہ کچھ کاغذات ہائی کورٹ تک پہنچانے ہیں، پارکنگ پہنچتے ہی اس نے مجھے رکنے اور کچھ دیر میں آنے کا کہا، مشکوک شخص کے جانے کے چند لمحے بعد ہی دھماکا ہو گیا۔

    گرفتار ملزم سے تفتیش کے بعد مزید حقائق سامنے آئیں گے۔

  • قربانی کے جانور افغانستان غیر قانونی طریقے سے لے جانے پر پابندی عائد

    قربانی کے جانور افغانستان غیر قانونی طریقے سے لے جانے پر پابندی عائد

    پشاور : پشاور ہائی کورٹ نے قربانی کے جانور افغانستان غیر قانونی طریقے سے لے جانے پر پابندی عائد کردی اور صوبائی و وفاقی حکومت سمیت پولیس کو نوٹس جاری کردیا۔

    تفصیلات کے مطابق پشاور ہائی کورٹ میں قربانی کے جانور کے غیر قانونی ایکسپور سے متعلق کیس کی سماعت ہوئی ، سماعت جسٹس ابراہیم اور جسٹس عبدالشکور نے کی۔

    ایڈیشنل ایڈووکیٹ جنرل سکندر شاہ بھی عدالت میں پیش ہوئے ، دوران سماعت وکیل یاسرخٹک نے عدالت کو بتایا کہ مویشیوں کی مصنوعی مہنگائی پیدا کی جارہی ہے اور بڑے جانور افغانستان لے جائے جارہے ہیں تاکہ لوگ قربانی نہیں کرسکیں۔

    اس موقع پر جسٹس ابراہیم نے ریمارکس دئیے کہ جس طرح کے حالات ہیں عید پر بڑے مرغ حلال کریں۔

    پٹیشنر نے کیس میں پرنٹ کے ذریعے جانوروں کے افغانستان لے جانے پر پابندی لگانے کی استدعا کی، دلائل سننے کے بعد عدالت نے جانوروں کے افغانستان  غیر  قانونی کاروبار پر مکمل پابندی عائد کرتے ہوئے صوبائی و وفاقی حکومت سمیت پولیس کو نوٹس جاری کردیا۔

    درخواست گزار اشفاق خلیل نے عید الضحی پر قربانی کے جانور کے غیر قانونی ایکسپورٹ کیخلاف عدالت سے رجوع کیا تھا۔