ARYNews.tv | Urdu – Har Lamha Bakhabar

Tag: PHILADELPHIA

  • امریکا: پل کے نیچے ٹرک میں آگ لگنے سے ہائی وے کا پُل گر گیا

    امریکا: پل کے نیچے ٹرک میں آگ لگنے سے ہائی وے کا پُل گر گیا

    فلاڈیلفیا: امریکی ریاست فلاڈیلفیا میں ایک ہائی وے پر پُل کے نیچے ٹرک میں شدید آگ لگنے کے باعث پُل کا ایک بڑا حصہ گر گیا۔

    تفصیلات کے مطابق امریکی ریاست فلاڈیلفیا کی مصروف ترین ہائی وے کا پُل گر گیا ہے، پل کے نیچے آتش گیر مادہ لے جانے والے ایک ٹینکر ٹرک میں آگ لگ گئی تھی، آگ کی شدت اتنی زیادہ تھی کہ اس سے پل متاثر ہو کر منہدم ہو گیا۔

    انتظامیہ کا کہنا ہے کہ آگ کی شدت کے نتیجے میں گرنے والے پُل کی مرمت میں کئی ہفتے لگ سکتے ہیں۔

    فلاڈیلفیا فائر ڈپارٹمنٹ کے مطابق انھیں اتوار کی صبح ساڑھے چھ بجے ہائی وے پر کسی گاڑی میں آتش زدگی کی اطلاع ملی تھی، ابتدائی اطلاعات میں بتایا گیا تھا کہ آگ ایک ٹینکر ٹرک میں لگی ہے، فائر ڈیپارٹمنٹ کے عملے نے موقع پر پہنچ کر آگ پر قابو پایا۔

    واضح رہے کہ انٹراسٹیٹ 95 مشرقی امریکا کی مرکزی شاہراہ ہے، جو بڑے مراکز جیسے نیویارک سٹی، فلاڈیلفیا اور واشنگٹن ڈی سی کو جوڑتی ہے، اور جنوب میں فلوریڈا ریاست تک چلتی ہے۔

    مقامی حکام کا کہنا تھا کہ حادثے میں کسی کے زخمی ہونے ہونے کی اطلاع نہیں، جب کہ منہدم پل کے ملبے کے نیچے ٹرک اب بھی دبا ہوا ہے۔ پیٹرولیم مصنوعات لے جانے والے تجارتی ٹینکر ٹرک میں 87 آکٹین فیول کے 8,500 گیلن موجود تھے۔

    پولیس ذرائع کا کہنا تھا کہ اتوار کی رات تک ٹرک ڈرائیور لاپتا تھا، ڈرائیور کی شناخت کے بارے میں بھی ابھی تک کوئی تفصیل سامنے نہیں آئی ہے تاہم یہ بتایا گیا ہے کہ وہ ایک تجربہ کار ڈرائیور تھا۔

  • امریکا: 8 بچوں سمیت 12 افراد جل کر ہلاک

    امریکا: 8 بچوں سمیت 12 افراد جل کر ہلاک

    پینسلوینیا: امریکی شہر فلاڈیلفیا میں خوف ناک آتش زدگی میں 8 بچوں سمیت 12 افراد جل کر ہلاک ہو گئے۔

    تفصیلات کے مطابق امریکی ریاست پینسلوینیا کے شہر فلاڈیلفیا میں واقع ایک عمارت میں آگ لگنے کے باعث آٹھ بچوں سمیت بارہ افراد ہلاک ہو گئے۔

    فائر حکام کے مطابق آگ بدھ کی صبح فلاڈیلفیا کے علاقے فیئرماؤنٹ میں این 23 اسٹریٹ پر ایک رہائشی اپارٹمنٹ میں لگی، مرنے والوں کی عمریں 2 سے 33 سال کے درمیان بتائی گئی ہے۔

    فائر فائٹرز کو عمارت میں داخل ہونے پر تمام منزلوں پر شدید دھوئیں اور تپش کا سامنا کرنا پڑا، اور وہ ایک بچے کو بچانے میں کامیاب رہے لیکن بعد ازاں وہ بھی جاں بر نہ ہو سکا۔

    فائر حکام کے مطابق گھر کو آگ لگنے کے بارے میں آگاہ کرنے والا الارم کام نہیں کر رہا تھا، بدھ کی علی الصبح لگنے والی آگ کی وجہ بھی معلوم نہیں ہو سکی ہے، لیکن یہ شہر میں اب تک کا سب سے بڑا حادثہ ہے جس میں آگ لگنے سے اتنے لوگ اپنی جانوں سے ہاتھ دھو بیٹھے۔

    فائر محکمے کے پہلے ڈپٹی کمشنر کریگ مرفی نے کہا، یہ اب تک کا بدترین حادثہ ہے، میں نے اپنی زندگی میں ایسا حادثہ نہیں دیکھا تھا۔

    صدر جو بائیڈن اور خاتون اول جِل بائیڈن کا اس جگہ سے گہرا تعلق رہا ہے، اس واقعے پر تعزیت کرتے ہوئے جل بائیڈن نے ٹویٹ کیا، فلاڈیلفیا میں آتش زدگی میں ہلاک ہونے والوں کے اہل خانہ اور پیاروں سے میری تعزیت۔

  • انجام سے بے خبر لڑکا اپنا نام سن کر دروازے پر آیا تو …

    انجام سے بے خبر لڑکا اپنا نام سن کر دروازے پر آیا تو …

    فلاڈیلفیا: امریکی ریاست پنسلوانیا کے شہر فلاڈیلفیا میں ایک لڑکے کے افسوس ناک قتل کی خبر کی گونج دو دن گزرنے کے بعد اب بھی سنائی دے رہی ہے۔

    امریکی میڈیا کے مطابق اتوار کو فلاڈیلفیا کے علاقے فرینکفرڈ میں 12 سال کے ایک لڑکے کو اس وقت سر میں گولی مار کر قتل کیا گیا جب وہ آدھی رات کو اپنے نام کی پکار سن کر دروازے پر آیا، نامعلوم شخص نے دروازہ کھلنے کا انتظار کیے بغیر شیشے ہی میں گولی مار دی جو لڑکے کے سر میں لگی۔

    پولیس کا کہنا ہے کہ گولی مارنے والے نے رات کے اندھیرے میں دروازے کے سامنے سے فائر کیا، گولی بارہ سالہ صدیق کلارک کے سر میں لگی اور وہ موقع ہی پر مر گیا۔

    پولیس کے مطابق یہ واقعہ ڈٹمین اسٹریٹ کے ایک بلاک میں رات کو دو بج کر پینتالیس منٹ پر پیش آیا تھا، ڈپٹی کمشنر میلون سنگلٹن کا کہنا تھا کہ دروازے پر دستک کے بعد جب صدیق کلارک دروازے پر آیا تو شوٹر نے ایک ہی فائر کیا اور بھاگ گیا، پولیس چند ہی منٹ بعد جائے وقوع پر پہنچ گئی تھی۔

    فرینکفرڈ، فلاڈیلفیا کا رہائشی 12 سالہ صدیق کلارک جسے سر میں گولی ماری گئی

    رپورٹس کے مطابق صدیق موت کے وقت گھر پر اپنی دادی اور دس سالہ بہن کے ساتھ موجود تھا، ڈپٹی کمشنر کا کہنا تھا کہ قاتل کو یقیناً یہ بھی پتا نہیں تھا کہ بند دروازے کے پیچھے کون ہے۔ واقعے کے بعد رات ہی کو گھر کے دیگر افراد بھی پہنچ گئے اور لڑکے کی موت پر گھر کے باہر صف ماتم بچھ گیا، پڑوسی بھی لڑکے کی موت پر دکھی تھے۔

    صدیق کی فیملی کا کہنا تھا کہ انھیں قاتل کا نہیں پتا تاہم آواز سے پتا چلتا تھا کہ کوئی بالغ آدمی تھا، اس نے بار بار صدیق کا نام پکارا تھا۔

    صدیق کلارک کی غم زدہ ماں

    لڑکے کی غم زدہ ماں نے میڈیا سے گفتگو کرتے ہوئے کہا کہ میرا بیٹا چھیننے والوں نے میری دنیا میں اندھیرا کر دیا ہے، میرا بیٹا تو لوگوں کی مدد کے لیے مشہور تھا، وہ دوسروں کے لیے سودا سلف لایا کرتا تھا، چرچ جانے والوں اور ہر ایک کی مدد کرتا تھا۔

    پڑوسی ٹونی کولن نے میڈیا کو بتایا کہ ایک بار صدیق نے ایک میڈیکل ایمرجنسی میں اس کی جان بچائی تھی۔

    رپورٹس کے مطابق صدیق کی موت فلاڈیلفیا میں رواں سال کا 437 واں قتل ہے، گزشتہ برس یہاں 118 لوگوں کو قتل کیا گیا تھا۔