فلپائن کے شہر مکاتی میں ایک عورت کے گٹر سے رینگتے ہوئے نکلنے کی ویڈیو اور تصاویر نے دیکھنے والوں کو خوف اور حیرت میں مبتلا کردیا۔
سوشل میڈیا پر وائرل ہونے والا یہ واقعہ نہ صرف چونکا دینے والا تھا بلکہ اس نے ایک ایسی پوشیدہ حقیقت کو بھی بے نقاب کردیا جو اب تک دنیا کی نظروں سے اوجھل تھی۔
دن کی روشنی میں نالے سے باہر نکل کر آنے والی اس خاتون کو فلپائن میں مول وومن کا لقب دیا گیا تھا جسے بعد ازاں میڈیا نے "روز” کا نام دیا۔
گٹر سے اچانک ایک عورت کے نکلنے کا یہ منظر وہاں سے اتفاقیہ پیدل گزرنے والے فوٹوگرافر ویلیم رابرٹس نے اپنے کیمرے میں محفوظ کرلیا تھا۔
اس عورت کی تصاویر سوشل میڈیا پر وائرل ہوئیں تو لوگوں نے اس پر طرح طرح کے تبصرے اور قیاس آرائیاں شروع کردیں۔
تصویر کی اصل حقیقت :
یہ واقعہ محض ایک عجیب و غریب اتفاق نہیں بلکہ ایک حقیقی بحران کی علامت تھا جس نے دیکھنے والوں کو ہلا کر رکھ دیا۔ کیونکہ فلپائن کے بڑے شہروں میں ایسے بہت سے لوگ ہیں جو زیر زمین نالوں اور سیوریج لائنوں میں زندگی گزار رہے ہیں۔
ان کے بارے میں علم ہوا کہ یہ خاتون ان 15 افراد میں شامل ہے جو مکاتی شہر کے مہنگے علاقوں کے نیچے واقع سیوریج نالے میں رہائش پذیر تھے۔
واقعہ منظر عام پر آنے کے بعد حکومت نے اس خاتون کو ڈھونڈ کر 80ہزار فلپائنی پیسو (تقریباً 1435امریکی ڈالر) کی مالی امداد دی اور ساتھ ہی اعزازی "سوشل ورکر” کا لقب بھی دیا تاکہ وہ دوسرے بے گھر افراد سے رابطہ کرکے ان کی مدد کرسکیں۔
دوسری جانب اس واقعے کے فوری بعد ان سیوریج لائنوں میں رہائش پذیر دیگر افراد پولیس کے گشت اور کارروائی کے خوف سے فرار ہوگئے۔
