اسلام آباد : تحریک انصاف نے قومی ایئرلائن میں کرپشن کے معاملے پر حکومت کو خط لکھ دیا ہے، وزیراعظم کے پرنسپل سیکریٹری کو لکھے گئے خط میں پی ٹی آئی رہنما عندلیب عباس نے کہا ہے چوہدری نثار نے قومی ایئر لائن کے سی ای او پر بدعنوانی کے الزامات لگائے ہیں۔
تفصیلات کے مطابق قومی ایئرلائن میں کرپشن کے معاملے پر تحریک انصاف نے حکومت کو خط لکھ دیا ہے، خط کے متن میں کہا گیا ہے کہ پریمیئر سروس کیلئے سری لنکا سے مہنگے داموں جہاز کرائے پر لیا گیا، جس میں بے ضابطگیوں کا ارتکاب کیا گیا۔
خط میں استفسار کیا گیا ہے کہ بتایا جائے اس جرمن باشندے کو تیس لاکھ سے زائد کی بھاری تنخواہ پر پی آئی اے کا سی ای او کیوں لگایا گیا؟ سی ای او کا نام اب ای سی ایل میں ہے؟
خط میں مزید استفسار کیا گیا ہے کہ قابلیت پر پورا نہ اترنے کے باوجود کیوں اسے قومی ایئرلائن میں ذمہ داری دی گئی؟خط میں وضاحت مانگی گئی کہ خزانہ اور ہوا بازی کی وزارتوں کے سیکریٹریز کے نام ای سی ایل میں کیوں شامل نہیں کئے گئے؟ اور معاملے کی پڑتال اورآڈٹ کیلئے ابتک کیوں اقدامات نہیں کئے گئے؟
مزید پڑھیں : پی آئی اے : مہنگی لیزپر لئے گئے طیاروں کا معاملہ گھمبیرہوگی
یاد رہے کہ پی آئی اے کے سی ای او پر پریمیئر سروس کیلئے لئے گئے جہاز کے معاہدے میں کرپشن کرنے کے الزامات ہیں۔
قومی ایئر لائن پی آئی اے کے لیے مہنگی لیز پر لیے گئے طیاروں کے حوالے سے وفاقی تحقیقاتی ادارے ایف آئی اے کی تفتیش میں اہم پیشرفت سامنے آئی، ویٹ لیز پرحا صل کیے گئے طیارے کے لیے پی آئی اے بورڈ سے منظوری بھی حا صل نہیں کی گئی تھی۔
علاوہ ازیں پی آئی اے کے چیف ایگزیکٹو آفیسر برنڈ ہلڈن برانڈ ای سی ایل میں نام ہونے کے باوجود تاحال عہدے پر برقرار ہیں۔ ہلڈن برانڈ پہلے کی طرح تنخواہ اور مراعات بھی وصول کررہے ہیں۔
