کراچی : پی آئی اے نے قبل ازحج آپریشن کامیابی سے مکمل کرلیا، آخری پرواز لاہور سے جدہ روانہ ہوئی، تاریخ میں پہلی بار پی آئی اے نے حج آپریشن میں کوئی طیارہ لیز پر حاصل نہیں کیا۔
تفصیلات کے مطابق پی آئی اے نے کامیابی سے قبل از حج آپریشن مکمل کرلیا، پی آئی اے نے ایک ماہ طویل قبل ازحج آپریشن میں292 پروازوں کے ذریعے82300 عازمین کو سعودی عرب پہنچایا۔
پی آئی اے کی آخری حج پرواز لاہور سے جدہ روانہ ہوئی، پرواز پی کے739 کے400 سے زائد عازمین کو اسٹیشن مینجر افسر زیدی نے رخصت کیا۔
پی آئی اے نے حج آپریشن میں اپنے بوئنگ777 اور ایئربس 320طیاروں کے ذریعے آپریشن مکمل کیا، یہ بات یہاں قابل ذکر ہے کہ پی آئی اے کی تاریخ میں پہلی بار حج آپریشن میں کوئی طیارہ لیز پر حاصل نہیں کیا گیا۔
اس حوالے سے سی ای او ایئرمارشل ارشد ملک نے بتایا کہ پی آئی اے نے دس مقامات سے عازمین حج کو سعودی عرب پہنچایا جو ایک مشکل مرحلہ تھا، حج آپریشن کی سب سے بڑی کامیابی حال میں کار آمد بنائے جانے والے طیاروں نے نمایاں کردار ادا کیا۔
ایئرمارشل ارشد ملک کا مزید کہنا تھا کہ حج کے بعد حجاج کرام کی وطن واپسی کیلئے آپریشن17 اگست سے شروع ہو کر14 ستمبر کو اختتام پذیر ہو گا۔
اس سلسلے میں جدہ اور مدینہ کے حج ٹرمینل پر حجاج کرام کی واپسی کیلئے خصوصی انتظامات کیے گئے ہیں، حجاج کرام کی وطن واپسی کے حوالے سے ایئرپورٹس پر پی آئی اے رضاکار اپنے فرائض انجام دیں گے
