Tag: PIA pilot

کابل ایئر پورٹ سے مسافروں کی بحفاظت واپسی : پی آئی اے پائلٹ کیلئے اعزاز

کراچی : کابل ایئرپورٹ سے غیر یقینی صورتحال میں مسافروں کے ساتھ پی آئی اے طیارہ بحفاظت پاکستان لانے والے کیپٹن مقصود بجارانی کو اعزاز سے نوازا گیا ہے۔

صدر مملکت کی جانب سے کیپٹن بجارانی کو ان کی بہادری، پیشہ وارانہ مہارت اور مسافروں کو سلامتی کے ساتھ وطن لانے پر صدارتی گولڈ میڈل سے نوازا گیا

کیپٹن مقصود بجارانی نے کابل سے مسافروں کے انخلا پر مامور ایئر بس 320 طیارے کے ساتھ ایئر ٹریفک کنٹرول کی رہنمائی کے بغیر ایئرپورٹ سے ٹیک آف کیا۔

اس موقع پر طیارے میں مسافروں کے ساتھ ساتھ فضائی عملےکے ارکان بھی موجود تھے، کیپٹن مقصود بجارانی نے انتہائی مہارت کا مظاہرہ کرتے ہوئے آپریشن مکمل کیا۔

ٹیک آف کے لئے تیار کیپٹن بجارانی کو ائرپورٹ کی غیریقینی صورتحال کے باعث اے ٹی سی نے اپنی ذمہ داری پر فیصلہ کرنے کا کہا تھا کیپٹن مقصود نے اعلی پیشہ وارانہ مہارت کا مظاہرہ کرتے ہوئے فائٹرز طیاروں کے پیچھے پیچھے کامیاب ٹیک آف کیا۔

کیپٹن مقصود بجارانی کے اس اقدام کو پی آئی اے سمیت پائلٹس کی بین الاقوامی تنظیم ایفالپا نے بھی تعریفی خطوط جاری کئے ہیں۔

پاکستانی پائلٹ کی مہارت : کابل میں پھنسے مسافروں اور طیارے کو بچا لیا

واضح رہے کہ کیپٹن مقصود بجارانی نے فال آف کابل کے روز پی آئی اے کے طیارے کو بحفاظت پاکستان پہنچانے میں اہم ‏کردار ادا کیا تھا۔ اس روز پی آئی اے کا طیارہ اے 320ہ کابل ایئرپورٹ کے رن وے پر اکیلا رہ گیا اس ‏دوران طالبان کابل ایئرپورٹ میں داخل ہوگئے تھے ۔

اگست 31, 2021
پی آئی اے کا ایک اور پائلٹ کورونا وائرس کا شکار

کراچی : پی آئی اے کے ایک اورپائلٹ میں کورونا وائرس کی تصدیق ہوگئی، جس کے بعد اسلام آباد کے نجی ہوٹل میں رہائش پذیر پائلٹ کو قرنطینہ سینٹر منتقل کردیا گیا ہے۔

تفصیلات کے مطابق جی ایم میڈیکل سروس پی آئی اے نے ایک اورپائلٹ میں کوروناٹیسٹ مثبت آنے کی تصدیق کردی اور کہا پائلٹ 2اپریل کو کراچی سے ٹورنٹو کی خصوصی پروازلے کر گیا تھا۔

جی ایم میڈیکل سروس پی آئی اے کا کہنا تھا کہ خصوصی پرواز 8اپریل کوٹورونٹوسےواپس اسلام آبادپہنچی تھی، پائلٹ اسلام آبادکےنجی ہوٹل میں رہائش پذیر تھا،ٹیسٹ مثبت آنے پر قرنطینہ سینٹر منتقل کردیا گیا ہے۔

جی ایم میڈیکل سروس نے مزید بتایا کہ پائلٹ کا پہلا ٹیسٹ مثبت آیا،دوسرا ٹیسٹ آج رات ہوگا۔

یاد رہے اس سے قبل قومی ائیرلائن ( پی آئی اے ) کے دو پائلٹ میں کورونا وائرس کی تصدیق ہوئی تھی ،دونوں پائلٹ گزشتہ روز ٹورنٹو سے لاہور آئے تھے، متاثرہ پائلٹس کو اسپتال کےآئیسولیشن وارڈ میں منتقل کردیاگیا تھا۔

محکمہ صحت پنجاب کا کہنا تھا کہ پی آئی اےکےدونوں پائلٹس کواسپتال کےآئسولیشن وارڈمنتقل کردیا گیا ہے جبکہ پائلٹ سمیت پانچ افراد کئی روزسےٹورنٹومیں پھنسے ہوئے تھے۔

اپریل 13, 2020
پی آئی اے پائلٹ نے روزہ رکھنے پر فضائی میزبان کو جہاز سے اتاردیا

کراچی : پی آئی اے کی فضائی میزبان کو روزہ رکھنا مہنگا پڑگیا، پی آئی اے پائلٹ نے روزہ دار فضائی میزبان کو ساتھ لیجانے سے انکار کرتے ہوئے جہاز سے اتار دیا۔

تفصیلات کے مطابق اسلام آباد سے برمنگھم جانیوالی پرواز پی کے 791 پر کپتان اور فضائی میزبان کے درمیان تلخ کلامی ہوئی، کپتان نے فضائی میزبان کے روزہ رکھنے پر اظہار برہمی کرتے ہوئے کہا تم نے روزہ رکھا ہوا ہے، اس لیے میں تمہیں فلائٹ پر نہیں لے جاسکتا۔

فضائی میزبان کا کہنا تھا کہ کسی قانون میں نہیں لکھا کہ روزہ رکھنے پر پابندی ہے، میں نے روزہ اپنے رب کیلئے رکھا ہے، جس پر کپتان نے دعویٰ کیاکہ سرکلر کے مطابق دوران پرواز روزہ نہیں رکھا جا سکتا۔

کپتان نے فضائی میزبان کو ہدایت کی اگر روزہ توڑ دو تو تمھیں پرواز پر لے جایا جاسکتا ہے، ورنہ تم فوری طور پر جہاز سے اتر جاوٴ ، اگر نہیں اترو گے تو میں پرواز نہیں لے جاؤں گا۔ فضائی میزبان مسافروں کا خیال رکھتے ہوئے جہاز سے رضاکارانہ طور پر اتر گیا۔

دوسری جانب ترجمان پی آئی اے کے مطابق روزہ رکھنے پر کوئی پابندی نہیں، کپتان کو روزہ رکھنے پر فضائی میزبان کو آف لوڈ نہیں کر نا چاہیے تھا، پرواز سے واپسی پر کپتان کے خلاف کارروائی ہوگی۔

مئی 17, 2019
پی آئی اے پائلٹوں کے لائسنس کی تجدید نہ ہوسکی، پروازیں تاخیر کا شکار

کراچی : قومی ایئرلائن پی آئی اے کے پائلٹوں کے لائسنس کی تجدید روک کر فضائی میزبانوں کے پرمٹکو بھی واجبات کی ادائیگی سے مشروط کردیا گیا۔

تفصیلات کے مطابق سول ایوی ایشن اتھارٹی کے فلائٹ اسٹیندرڈ نے قومی ایئرلائن کے پائلٹوں کے لائسنس کی تجدید روک دی، سی اے اے نے پائلٹوں کے لائسنس اور فضائی میزبانوں کے پرمٹ کو ادائیگی سے مشروط کر دیا۔

قومی ایئر لائن کے اے 320 اور777طیاروں کے درجنوں پائلٹوں کے لائسنس کی تجدید تعطل کا شکار ہوگئی، پی آئی اے کے ڈائریکٹر فلائٹ آپریشن سی اے اے سے معاملہ حل کیے بغیر ایک روز قبل ہی کینیڈا روانہ ہوگئے۔

اس کے علاوہ پی آئی اے کے پائلٹوں کے لائسنس کی تجدید نہ ہونے سے متعدد پروازیں منسوخی کا شکار ہو گئیں، پی آئی اے نے لائسنس کی تجدید کے لئے سی اے اے کے لاکھوں روپے کے واجبات ادا کرنے ہیں۔

پی آئی اے کے چیف پائلٹ کیپٹن زرک خان سے بھی سی اے اے نے معذرت کرلی، اس حوالے سے ترجمان پی آئی اے کا کہنا ہے کہ سول ایوی ایشن اتھارٹی کو لائسنس کی تجدید کے لیے واجبات کا چیک تیار کر لیا گیا ہے جو آئندہ دو روز میں ادا کر دیا جائے گا۔

اکتوبر 2, 2018
دوران پروازسونے والے پی آئی اے پائلٹ کیخلاف تحقیقات مکمل

کراچی : پی آئی اے کے پائلٹ کی دوران پرواز نیند پوری کرنے کی ابتدائی تحقیقات مکمل کرکے متعلقہ حکام کو بھیج دی گئی، کپتان پر الزام ثابت ہوگیا۔

تفصیلات کے مطابق پی آئی اے کے سینئر پائلٹ کیپٹن عامر ہاشمی جو گزشتہ دنوں دوران پرواز نیند پوری کرتے ہوئے پائے گئے تھے،اس واقعے کی ابتدائی تحقیقات مکمل کرلی گئیں ہیں۔

انکوائری کمیٹی نے ابتدائی تحقیقات مکمل کرکے رپورٹ قائم مقام سی ای او کو ارسال کردی ہے۔ ریکارڈ کئے گئے بیانات کی روشنی میں عامر ہاشمی دوران پرواز سونے کا الزام درست قرار دے دیا گیا۔

پائلٹ کے سونے کی شکایت کمنٹس کارڈ میں درج کرنے والے مسافر کی بھی تصدیق ہوگئی ہے۔ شہزاد چوہان نامی مسافر نے کمنٹس کارڈ میں درج کی جانے والی شکایت کی بذریعہ ای میل تصدیق بھی کردی ہے۔

مزید پڑھیں : دوران پرواز سونے پر پی آئی اے کے کپتان کیخلاف کارروائی کا آغاز

اس کے علاوہ اسلام آباد سے لندن کی پرواز نمبر 785 پر تعینات فضائی میزبانوں کے بیانات سے بھی تصدیق کی گئی، کیپٹن عامر ہاشمی کے خلاف مسافر کی شکایت پر مبنی کمنٹ کارڈ اے آر وائی نیوز کو موصول ہوگیا۔

ابتدائی رپورٹ پر کیپٹن عامر ہاشمی کے خلاف باقاعدہ کارروائی پیرکو ہوگی۔

مئی 12, 2017
پی آئی اے: غیر ملکی خاتون کا پائلٹ کے کاک پٹ میں سفر

کراچی : ٹوکیو سے بیجنگ جانے والی پی آئی اے کی پرواز پی کے ایٹ فائیو ٹو کا پائلٹ غیرملکی لڑکی پر مہربان ہوگیا، مذکورہ لڑکی جہاز کے ٹیک آف سے لے کر لینڈنگ تک کاک پٹ میں رہی۔ سول ایوی ایشن نے واقعے کا نوٹس لے کر تحقیقات کاحکم دے دیا۔

تفصیلات کے مطابق باکمال لوگ لاجواب سروس کے پائلٹ نے باکمال کارنامہ انجام دیتے ہوئے پی آئی اے کے قوانین کی دھجیاں اڑا دیں، پی کے 852 کے کپتان نے جہاز میں بیٹھی غیر ملکی خاتون کو کاک پٹ کا دورہ کرانے کے لیے مسافروں کی جان کو خطرے میں ڈال دیا۔

ایک مسافر نے کپتان شہزاد عزیز کی ’’مہمان نوازی‘‘ کی ویڈیو بنانا چاہی تو عملے نے اس پر پردہ ڈالنے کی پوری کوشش کی۔

مذکورہ مسافر نے لڑکی سے انگزیری میں سوال کیا کہ وہ اندر کیوں اور کیا کرنے گئی تھیں؟ کیا پائلٹ آپ کا دوست یا رشتہ دار ہے ؟ مسافر نے لڑکی سے طنزیہ انداز میں پوچھا کہ کیا آپ نے سفر انجوائے کیا، لڑکی نے کسی سوال کا کوئی جواب نہ دیا۔

سول ایوی ایشن اتھارٹی کا نوٹس، تحقیقات کا حکم

بعد ازاں سول ایوی ایشن اتھارٹی نے غیر ملکی خاتون کو کاک پٹ میں بٹھانے کا سختی سے نوٹس لے کر واقعے کی تحقیقات کاحکم دے دیا ہے۔

ترجمان سول ایوی ایشن نے کہا ہے کہ اتھارٹی نے فیٖکٹ فائنڈنگ آرڈرجاری کردیئے ہیں، رپورٹ آنے اور حقائق معلوم ہونے پر سخت کارروائی کی جائے گی۔

مزید پڑھیں : پی آئی اے کا پائلٹ دوران پرواز سوگیا، کنٹرول جونیئر کے حوالے

طیاروں میں اکثر پائلٹ اپنے مہمانوں کو کاک پٹ کی سیر کراتے ہیں لیکن ٹیک آف اورلینڈنگ کے وقت ایسا کرنا سخت منع ہے۔

یاد رہے کہ اس سے قبل قومی ائیرلائن میں سینئر پائلٹ عامر ہاشمی دوران پرواز سوتے پائے گئے تھے۔ انہوں نے طیارے کا کنٹرول ٹرینی آفیسر کو تھما دیا تھا۔

مئی 9, 2017
پی آئی اے کا پائلٹ دوران پرواز سوگیا، کنٹرول جونیئر کے حوالے

کراچی : پی آئی اے کا کپتان دوران پرواز خواب خرگوش کے مزے لیتا رہا، جونیئر پائلٹ نے جہاز کو آپریٹ کیا، مسافروں نے قوانین کی سنگین خلاف ورزی پر شکایت درج کرادی۔،

تفصیلات کے مطابق باکمال لوگوں کی لاجواب سروس نے مسافروں کو مشکل میں ڈال دیا، پی آئی اے کے کپتان نے دوران پرواز بین الاقوامی سیفٹی قوانین کی دھجیاں اڑادیں۔

اسلام آباد سے لندن جانے والی پی آئی اے کی پرواز پی کے 785 کے کپتان اور پالپا کے سابق صدرعامرہاشمی دوران پرواز سوتے رہے، اس دوران فرسٹ آفیسر پرواز کو آپریٹ کرتے رہے جو قوانین کی سنگین خلاف ورزی ہے۔

کپتان عامر ہاشمی کے بزنس کلاس میں نیند پوری کرنے پر مسافروں نے شدید احتجاج کیا اور انہوں نے کیبن لاگ میں اپنی شکایات درج کرادیں، مسافروں نے اپنی شکایات طیارے میں موجود سینئر پرسر نازنین حیدر کو درج کرائیں۔

مسافروں کا کہنا تھا کہ ہم غیرمحفوظ ہیں، شکایتی بک میں ریمارکس کی کاپی اے آروائی نیوز کو موصول ہوگئی۔ فرسٹ آفیسر یزدانی ٹرینی فرسٹ آفیسراسد علی سے طیارہ آپریٹ کراتے رہے۔

ذرائع کے مطابق ٹرینی کپتان اسد علی کچھ ہی دنوں قبل میڈیکل گراؤنڈ ہونے کے بعد بحال ہوئے تھے۔ اس حوالے سے ترجمان پی آئی اے کا کہنا ہے کہ معاملے کی تحقیقات کررہے ہیں۔

یاد رہے کہ قوانین کے مطابق پائلٹ بوقت ضرورت دس سے پندرہ منٹ کاک پٹ میں صرف اپنی سیٹ پر آرام کرسکتا ہے، اس کے علاوہ کسی قسم کی اجازت نہیں، جونئیر پائلٹ سے جہاز کو آپریٹ کروانا مسافروں کی جان کو خطرے میں ڈالنے کے مترادف ہے۔

مئی 5, 2017
ان فٹ طیارہ اڑان کے لیے مختص، پائلٹ کا پرواز سے انکار

کراچی: پی آئی اے کی انتظامیہ نے حادثے کے بعد بھی بے حسی اور غفلت کا مظاہرہ کرتے ہوئے ان فٹ طیارہ اڑان کے لیے پائلٹ کے حوالے کردیا تاہم پائلٹ نے اس اے ٹی آر طیارے کو اڑانے سے انکار کردیا۔

اے آر وائی نیوز کے نمائندے صلاح الدین کے مطابق حویلیاں میں طیارہ حادثے کے بعد پی آئی اے کے ایک پائلٹ چاکر علی شاہ نے اے ٹی آر طیارہ اڑانے سے انکار کردیا، طیارے کو کراچی سے موہنجو دڑو کے لیے پرواز کرنی تھی لیکن طیارے کا اے پی او سسٹم خراب تھا جس پر پائلٹ نے اپنے تحفظات کا اظہار کرتے ہوئے اڑان سے انکار کردیا اور کہا کہ جب تک یہ سسٹم ٹھیک نہیں ہوگا میں یہ جہاز نہیں اڑائوں گا۔

یہ پڑھیں : پی آئی اے کا ایک اور طیارہ حادثے سے بچ گیا

پائلٹ کے انکار کے بعد پی آئی اے انتظامیہ نے انہیں طیارہ تبدیل کرکے دیا جس کے بعد ہی پائلٹ نے طیارہ پرواز کے لیے حاصل کیا مسافروں کو لے کر موہن جو دڑو روانہ ہوا۔

رپورٹر صلاح الدین نے اینکر پرسن کے ایک سوال پر کہا کہ حادثے کے بعد پی آئی اے انتظامیہ نے انجینئرنگ ڈپارٹمنٹ کو خاص طور پر ہدایات جاری کی ہیں کہ سیفٹی معیار کو لازمی چیک جائے،پی آئی اے انتظامیہ کا کہنا ہے کہ ادارے نے کبھی بھی مسافروں کی زندگیوں پر کوئی سمجھوتا نہیں کیا اور ان کی اولین ترجیح مسافروں کی جان و مال کی حفاظت ہے اس حوالے سے چیف آپریٹنگ آفیسر کی جانب سے خاص ہدایات جاری کی گئی ہیں کہ طیارے میں ذرا سی بھی خرابی ہو تو اسے اڑان کے لیے نہ بھیجا جائے۔

یہ بھی پڑھیں: حادثے کا شکار طیارے کا انجن پہلے ہی خراب ہونے کا انکشاف

ہدایات کے باوجود طیارہ کراچی سے موہنجو دڑو پرواز کے لیے مخصوص کردیا گیا تاہم پائلٹ کے انکار پر اسے تبدیل کیا گیا، اگر پائلٹ انکار نہ کرتا تو جہاز پرواز کرجاتا۔

دسمبر 8, 2016

Tag: PIA pilot

یہ پڑھیں : پی آئی اے کا ایک اور طیارہ حادثے سے بچ گیا