ARYNews.tv | Urdu – Har Lamha Bakhabar

Tag: PIA plane

  • پی آئی اے طیارے کی فروخت میں ملوث سابق سی ای او واپس پاکستان نہیں آئے

    پی آئی اے طیارے کی فروخت میں ملوث سابق سی ای او واپس پاکستان نہیں آئے

    کراچی : جرمنی کے ائیر پورٹ پر موجود پی آئی اے کا ایئر بس 310 ساختہ طیارہ فروخت کرنے کے ذمہ دار سابق سی ای او  پاکستان واپس نہ آئے، سابق جرمن سی او او ہلڈن برنڈ ایف آئی اے کو مطلوب ہیں۔

    تفصیلات کے مطابق پی آئی اے کے سابق سربراہ جرمن نژاد ہلڈن برینڈ کی منظوری سے پی آئی اے کا ایئر بس 310 ساختہ طیارہ تین سال قبل ایک فلم ساز کمپنی کے لیے بیرون ملک لے جایا گیا تھا جہاں ہالی ووڈ کی ایک متنازعہ فلم کی شوٹنگ میں استعمال کیے جانے کے بعد وہ طیارہ کئی ماہ تک جرمنی کے لزپک ایئر پورٹ پر کھڑا رہا۔

    ذرائع کا کہنا ہے کہ بعد ازاں پارکنگ چارجز کی مد میں انجن اور متعلقہ سامان 13 لاکھ 70 ہزار ڈالرز میں ایک غیر ملکی کمپنی کو فروخت کیا گیا۔

     پیپلزپارٹی کے سینیٹر سلیم مانڈوی والا نے2016میں سینیٹ اجلاس میں مؤقف اختیار کیا تھا کہ پی آئی اے کے قائم مقام سی ای او نے حکومت کی اجازت کے بغیر ایک طیارہ جرمنی کو اونے پونے داموں فروخت کردیا ہے، ان کیخلاف سخت کارروائی کی جائے۔

    مزید پڑھیں : کئی ماہ سے جرمنی کے ایئرپورٹ پر کھڑا پی آئی اے کا طیارہ فروخت

    واضح رہے کہ طیارے کے حوالے سے ایف آئی اے میں 2016سے انکوائری تکمیل کی منتظر ہے، پی آئی اے کے سابق جرمن سی ای او ہلڈن برنڈ چھ مئی2017 کو پاکستان سے چلے گئے تھے، ایف آئی اے کو تحقیقات میں مطلوب ہلڈن برنڈ کو ایک ماہ بعد پاکستان واپس آنا تھا۔

    ہلڈن برنڈ کےعلاوہ جرمن کنسلٹنٹ کو بھی ایف آئی اے نے طلب کر رکھا ہے لیکن پی آئی اے کا طیارہ اے310روانہ کرنے کے ذمہ دار تاحال پاکستان واپس نہ آئے، شروڈکر نامی جرمن کنسلٹنٹ بھی کسی کو اطلاع دئیے بغیر اپنے وطن روانہ ہوگئے تھے۔

  • لاہور سے ابوظہبی جانے والا پی آئی اے کا جہاز حادثے سے بچ گیا

    لاہور سے ابوظہبی جانے والا پی آئی اے کا جہاز حادثے سے بچ گیا

    کراچی : پی آئی اے کا طیارہ حادثہ سے بال بال بچ گیا، لاہور سے ابوظہبی جانے والی پی آئی اے کی پرواز پی کے263لینڈنگ کے کچھ ہی منٹ بعد طیارے کے انجن سے آئل لیک ہونا شروع ہوگیا۔

    تفصیلات کے مطابق لاہور سے ابو ظہبی جانے والی پی آئی اے کی پرواز ٹیک آف کے تھوڑی دیر بعد ہی  ہنگامی طور پر اتارلی گئی،  انجن نمبر ایک کے فلٹر پلانٹ کے چار نٹ بولٹ اچانک ٹوٹ گئے۔

    طیارہ اس وقت 400فٹ کی بلندی پر تھا، اچانک نٹ بولٹ ٹوٹنے کی وجہ سے کاک پٹ میں ایمرجنسی الارم بجنا شروع ہوگئے، ایئربس320،اے پی بی ایل ڈبلیو کے رجسٹریشن کے حامل طیارے کا آئل فلٹر کے نٹ بولٹ ٹوٹنے کی وجہ سے ایک انجن بند ہوگیا۔

    طیارے میں150سے زائد مسافر سوار تھے، کپتان نے لاہور ایئرپورٹ کے کنٹرول ٹاور سے فوری طور پر رابطہ کرتے ہوئے ہیوی ویٹ ایمرجنسی لینڈنگ کی اجازت طلب کی۔

    اجازت ملنے کے بعد کپتان نے حاضر دماغی کا مظاہرہ کرتے ہوئے ایک انجن سے طیارے کو لاہور ایئرپورٹ پر بہ حفاظت اتارلیا، یہ واقعہ جمعہ کی شب پیش آیا تھا۔

    طیارے کے انجن کے آئل فلٹر کے نٹ بولٹ ٹوٹنے کے واقعہ کا سی ای او پی آئی اے ایئر مارشل  ملک ارشد  نے نوٹس لے لیا ہے۔ انہوں نے واقعہ کی تحقیقات کا حکم دیتے ہوئے شعبہ انجینئرنگ سے وضاحت طلب کرلی کہ طیارے کے نٹ بولٹ کیسے ٹوٹے؟

  • پنجگور ایئر پورٹ :کچے میں اترنے والے طیارے کو اڑنے کی اجازت نہ مل سکی

    پنجگور ایئر پورٹ :کچے میں اترنے والے طیارے کو اڑنے کی اجازت نہ مل سکی

    کراچی : پنجگور ایئر پورٹ پر بریک فیل ہونے کے باعث کچے میں اتر جانے والا اے ٹی آر طیارہ تاحال واپس کراچی نہ پہنچ سکا، پی آئی اے طیارہ ساز کمپنی کی اجازت کی منتظر ہے۔

    تفصیلات کے مطابق دو روز قبل پنجگور میں پی آئی اے کے اے ٹی آر طیارہ کے کچے میں اترنے کا معاملہ ابھی تک انجام کو نہ پہنچ سکا، مرمت کے بعد اےٹی آر طیارہ دو روز گزرنے کے باوجود کراچی نہ پہنچ سکا۔

    اس حوالے سے ذرائع کا کہنا ہے کہ پی آئی اے انجینئرز نے اے ٹی آر طیارے کو اڑان بھرنے کے قابل کردیا اور معائنے کے بعد سی اے اے نے بھی طیارے کو اڑان کی اجازت دے دی تاہم طیارہ ساز کمپنی نے تاحال پی آئی اے کو طیارہ اڑانے کی اجازت نہیں دی۔

    ترجمان پی آئی اے کا کہنا ہے کہ حادثے کے بعد طیارہ ساز کمپنی کی اجازت سے ہی طیارہ منتقل کیا جاتا ہے، مرمت کے بعد پی آئی اے انتظامیہ طیارہ ساز کمپنی کی اجازت کی منتظر ہے، اجازت ملتے ہی منگل کو طیارہ کراچی کے لئےروانہ کردیا جائےگا۔

    مزید پڑھیں: پنجگور ایئرپورٹ پر پی آئی اے کا طیارہ بریک فیل ہونے کے باعث حادثے کا شکار ہوا

    واضح رہے کہ پی آئی اے کی پرواز پی کے517رن وے پر لینڈنگ کے دوران کچے میں اترگئی تھی، طیارہ حادثے کے بعد سی ای او نے واقعے کی تحقیقات کاحکم دیا تھا، سول ایوی ایشن اورپی آئی اے انتظامیہ طیارہ حادثے کی مشترکہ تحقیقات کررہی ہے۔

  • پی آئی اے نے چیف جسٹس کے احکامات ہوا میں اڑا دیے

    پی آئی اے نے چیف جسٹس کے احکامات ہوا میں اڑا دیے

    کراچی:  پی آئی اے  طیارے پر  سے مارخور کا نشان ہٹانے کے احکامات پر  عملدرآمد کرنے میں ناکام ہوگئی اور  مارخور کی تصویر والے طیارے کا استعمال جاری ہے، سپریم کورٹ نے طیارے پر سے مارخورکا نشان ہٹانے کا حکم دیا تھا۔

    تفصیلات کے مطابق سپریم کورٹ کے حکم کے باوجود قومی ایئر لائن پی آئی اے کے طیارے پر سے مارخور کا نشان نہیں ہٹایا جاسکا، مارخور کی تصویر کا حامل پروازوں کے لیے بدستور استعمال کیا جارہا ہے جبکہ قومی ایئر لائن انتظامیہ کی ویب سائٹ اور اسٹیشنری پر بھی مارخور کا نشان موجود ہے۔

    ترجمان پی آئی اے کا کہنا ہے کہ طیارے کی دُم پر سے مارخور کی تصویر ہٹانے کے لیے وقت درکار ہے۔

    یاد رہے کہ سپریم کورٹ نے قومی ایئرلائن پی آئی اے کے جہازوں پر قومی پرچم کی جگہ مارخور کی تصویرلگانے پر پابندی عائد کی تھی، چیف جسٹس نے حکم دیا تھا کہ آئندہ کسی جہاز سے قومی پرچم نہیں ہٹایا جائے گا، کسی جہازسے قومی پرچم ہٹایا گیا تو حکم عدولی سمجھا جائے گا۔

    مزید پڑھیں : پی آئی اے کے جہازوں پرقومی پرچم کی جگہ مارخورکی تصویرلگانے پرپابندی عائد

    گذشتہ ماہ پی آئی اے کے طیارے کی دُم سے قومی پرچم ہٹا کر مارخور کا ایک اسٹیکر لگا دیا گیا تھا، صرف ایک جہاز کی دُم پر مارخور پینٹ کرنے سے پی آئی اے کے ایک طیارے پر پچاس ہزار ڈالر کے اخراجات آئے تھے جبکہ ڈیزائنر کو ڈیزائن بنانے کی مد میں پی آئی اے نے تین کروڑ پچاس لاکھ روپے بھی ادا کئے گئے تھے۔

    خیال رہے کہ قومی ایئر لائن کی ناقص حکمت عملی کے باعث خسارے میں بے تحاشہ اضافہ ہوا، جس کے بعد پی آئی اے کو 9 ماہ کے دوران 41 ارب 25 کروڑ سے زائد کا خسارہ ہوا، جو پچھلے سال کی نسبت پونے 7 ارب سے زائد ہے۔

    خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

  • لاکھوں روپے لاگت سے تیار پی آئی اے جہاز کی کلر اسکیم خراب ہوگئی

    لاکھوں روپے لاگت سے تیار پی آئی اے جہاز کی کلر اسکیم خراب ہوگئی

    کراچی : باکمال ائر لائن انتظامیہ کا ایک اور لاجواب کارنامہ سامنے آیا ہے، لاکھوں روپے مالیت سے جہاز کی ہونے والی کلر اسکیم کی تبدیلی چند دن میں ہی خراب ہوگئی۔

    تفصیلات کے مطابق لاکھوں روپے کی لاگت سے پی آئی اے کے طیارے پر تبدیل کردہ کلر اسکیم چند دن میں ہی خراب ہوگئی، ائیر بس 320طیارے کی کلر اسکیم تبدیلی کے علاوہ طیارے کی دم پر مار خور بھی پینٹ کیا گیا تھا۔

    طیارے پر پینٹ کردہ پاکستانی پرچم کا رنگ اکھڑنے لگا جبکہ انگریزی میں لکھا گیا لفظ بھی کریک کی نذر ہورہا ہے، ذرائع کے مطابق کلر اسکیم اور دم کی تبدیلی پر فی طیارہ 35 لاکھ روپے سے زائد کی ادائیگی کی جائے گی۔

    اس کے علاوہ ائر بس طیارے کے پر کا رنگ بھی خراب ہونے لگا، پرواز سے قبل انجینئرنگ میں طیارے کے نقائص ٹھیک کرنے کی کوشش بھی کی گی، لاکھوں کے اخراجات کے باوجود متعلقہ کمپنی کے غیر معیاری رنگ کے باعث اڑان پر مزید خراب ہو نے کا خدشہ ہے۔

    پی آئی اے کے پہلے طیارے کی کلراسکیم کی تبدیلی کا کام مکمل

    معاہدے کے مطابق مذکورہ طیارے سمیت مزید چار طیاروں کی کلر اسکیم اور دم کی تبدیلی باقی ہے تاہم ایک طیارے کے بعد دیگر طیاروں کی دم پر مارخور لگانے سمیت دیگر کارروائی سپریم کورٹ کے حکم پر روک دی گئی ہے۔

    خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔ 

  • ابوظہبی سےلاہور آنے والی پی آئی اے کی پرواز خوفناک حادثے سے بال بال بچ گئی

    ابوظہبی سےلاہور آنے والی پی آئی اے کی پرواز خوفناک حادثے سے بال بال بچ گئی

    لاہور: پی آئی اے کی ابوظہبی سےلاہور آنے والی پرواز خوفناک حادثے سے بال بال بچ گئی۔

    ذرائع کے مطابق ابوظہبی سے لاہور آنے والی پی آئی اے کی پرواز خوفناک حادثے سے بال بال بچ گئی، دوران لینڈنگ پی کے 296 کا ہائیڈرولک سسٹم میں خرابی پیدا ہوئی اور طیارے کے ایک انجن کے کور فضا ہی میں کھل گئے۔

    جس پر پائلٹ نے جان خطرے میں ڈال کر مہارت سے جہاز لینڈ کرایا۔ دوران لینڈنگ جھٹکے لگنے سے مسافروں کی چیخیں نکل گئیں۔

    ایئر پورٹ حکام کے مطابق رن وے پر جہاز رکنے سے رن وے 30 منٹ تک بند رہا، رن وے پر موجود جہاز کو جدید مشینری کی مدد سے ہٹایا گیا۔

    ترجمان کے مطابق پی آئی اے حکام نے طیارہ ٹھیک کرنے کیلئے پی آئی اے ماہرین کی ٹیم کراچی سے طلب کی ، جس کے بعد جہاز کو مرمت کے بعد ٹھیک کرلیا گیا ہے اور اب پرواز کے لیے تیار ہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • پی آئی اے کی ایک اور پرواز بال بال بچ گئی

    پی آئی اے کی ایک اور پرواز بال بال بچ گئی

    کراچی: پی آئی اے کی پرواز فنی خرابی کے سبب حادثےکا شکار ہونے سے بال بال بچ گئی ‘ کپتان نے جہاز کو ایئرپورٹ پر باحفاظت اتار لیا۔

    تفصیلات کے مطابق پی آئی اے کی ابوظہبی سے پشاور آنیوالی پرواز کو کپتان نے حاضر دماغی کا مظاہرہ کرتے ہوئے طیارے کو پشاور کے باچا خان ایئرپورٹ پر باحفاظت اتار لیا۔

    ذرائع کے مطابق ایئربس320کے طیارے کو پی آئی اے کے کپتان علی منصور آپریٹ کررہے تھے ‘ طیارے کا رجسٹریشن نمبرAP-BLB ہے۔

    دوران پرواز طیارے کے الٹے ہاتھ کے پر میں خرابی کی اطلاع موصول ہوئی۔ لینڈنگ کے بعد معائنہ کرنے پر پتا چلا کہ طیارے کے بائیں پر کے زیریں حصے میں نصب تین اسکرو بھی غائب ہیں اور پر کے پاس سے طیارے کی اسکن بھی ادھڑی ہوئی ہے۔

    کپتان نے پشاور ایئرپورٹ اترنے کے بعد واقعے کی تمام تر صورتحال لاگ بک میں درج کردی ہے۔

    اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔

  • پی آئی اے کا پرانا جہاز خوبصورت ریسٹورنٹ میں تبدیل

    پی آئی اے کا پرانا جہاز خوبصورت ریسٹورنٹ میں تبدیل

    کراچی : شہریوں کیلئے منفرد اقدام ، پی آئی اے کے پرانے جہاز کو خوبصورت ریسٹورنٹ میں تبدیل کردیا گیا۔

    تفصیلات کے مطابق ایئرپورٹ سکیورٹی فورس نے پی آئی اے کے پرانے طیارے کو ایسے انداز میں تبدیل کیا کہ وہ ایک خوبصورت اور شاہانہ ریسٹورنٹ کا منظر پیش کرنے لگا۔

     

    پی آئی اے ترجمان دانیال گیلانی نے سماجی رابطے کی ویب سائٹ ٹوئٹر پر اپنے پیغام میں اس بات کی تصدیق کرتے ہوئے کہا تھا کہ نیا ریسٹورنٹ شروع کر دیا گیا ہے۔

    پی آئی اے نے جمبو جیٹ 747-300 اے پی بی ایف وی کو 2014 میں اپنے بیڑے سے ہٹالیا تھا، جس کو بعد میں کراچی کے جناح انٹرنیشنل ائرپورٹ منتقل کردیا گیا اور انسداد دہشت گردی کی تربیت کی غرض سے اے ایس ایف کو عطیہ کیا گیا تھا۔

    جہاز میں بیٹھنے کا انتظام ، دیواروں ، چھت اور فرش کی سجاوٹ نئے انداز میں کی گئی ہے۔

    خیال رہے یہ یہ پہلی بار نہیں جب پی آئی اے کے پرانے جہاز کو کسی اور کام کیلئے زیرِ استعمال لایا گیا ہو، اس سے قبل ایک طیارے کو بھارت میں ریسٹورنٹ میں تبدیل کردیا گیا تھا۔

    یہ نیا ریسٹورنٹ خاص طور پر رمضان کے مہینے میں افطار کے اوقات میں کراچی کی ایک مقبول جگہ ثابت ہو سکتا ہے۔

    اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔

  • لندن میں پی آئی اے کے طیارے سے مبینہ طورپرمنشیات برآمد

    لندن میں پی آئی اے کے طیارے سے مبینہ طورپرمنشیات برآمد

    لندن : پی آئی اے کی پرواز پی کے758 کو برطانوی کسٹم حکام منشیات کی موجودگی کے شبے میں تلاشی کے بعد کلیئر قرار دے دیا، طیارہ اسلام آباد سے لندن پہنچا تو کسٹم حکام نے طیارے کے عملے کو روک لیا تھا، پی آئی اے حکام کا کہنا ہے کہ برطانوی حکام نے تحریری طور پرآگاہ نہیں کیا۔

    تفصیلات کے مطابق لندن سے لاہور کی پی آئی اے کی پرواز پی کے 758 کے طیارے میں منشیات کی موجودگی کے شبے میں برطانوی کسٹم حکام نے تلاشی لی، پرواز جیسے ہی لندن پہنچی کسٹم حکام نے طیارے کو گھیرے میں لے لیا۔

    ترجمان پی آئی اے کا کہنا ہے شک کی بنیاد پربرطانوی حکام نے عملے کے تیرہ ارکان کو اپنی تحویل میں لیا،جہاز کو بھی شک کی بنیاد پرحصارمیں لیا گیا تھا، تحویل میں لئے گئے عملے کے ارکان میں کپتان حامد گردیزی، فرسٹ آفیسر ایوب اور دس فضائی میزبان شامل ہیں۔

    ترجمان کے مطابق جہاز اور کِرو کے سامان کی تلاشی کے بعد اسے چھوڑدیا گیا۔ بعد ازاں بارڈر سیکیورٹی فورس نے کیپٹن حامد گردیزی کا پاسپورٹ واپس کردیا گیا۔

    ترجمان کا کہنا ہے کہ تلاشی کا عمل چھ گھنٹے سے زائد جاری رہا، جس کے باعث لندن سے لاہور آنے والی پرواز تاخیر کا شکار ہوئی ، ترجمان کا کہنا ہے برطانوی حکام سےطیارے کو روکنے کے بارےمیں پوچھیں گے۔

    دوسری جانب پی آئی اے کے طیارےسے ہیروئن برآمد ہونے کے معاملہ کے حوالے سے پی آئی اے حکام کا کہنا ہے کہ برطانوی حکام نے تحریری طور پرآگاہ نہیں کیا۔

    ترجمان کا مزید کہنا ہے کہ کسٹم حکام نے تحویل میں لئے گئے افراد کے پاسپورٹ اہنے پاس رکھ کران کے فنگر پرنٹس بھی لے لیے ہیں اور اس کی وجہ سے وہ برطانیہ نہیں چھوڑ سکیں گے۔

    علاوہ ازیں برطانیہ کی نیشنل کرائم ایجنسی نے اس بات کی تصدیق کی ہے کہ پاکستان کی قومی فضائی کمپنی پی آئی اے کے طیارے سے گذشتہ رات لندن ہیتھرو ہوائی اڈے پر ہیروئین برآمد ہوئی تھی۔

    برطانوی نشریاتی ادارے بی بی سی کے مطابق نیشنل کرائم ایجنسی نے بھجوائے گئے ایک بیان میں اس بات کی تصدیق کی ہے۔ ایجنسی نے بیان میں مزید کہا کہ اس حوالے سے کوئی بھی گرفتاری عمل میں نہیں آئی اور تفتیش جاری ہے۔

    پی آئی اے کے ترجمان کے مطابق برطانوی حکام نے ایئرلائن کے جن 13 ملازمین کو پوچھ گچھ کے لیے روکا تھا انہیں بعد میں چھوڑ دیا گیا ، ترجمان کا مزید کہنا ہے کہ برطانوی حکام نے منشیات برآمدگی کے حوالے سے تحریری طور پرآگاہ کرنے کے بجائےاسٹیشن منیجر کو صرف زبانی آگاہ کیا گیا ہے۔

    تازہ ترین اطلاعات کے مطابق برطانوی بارڈرسیکیورٹی فورس نے کیپٹن حامد گردیزی کا پاسپورٹ واپس کردیا ہے، جس کے بعد حامد گردیزی آج لندن سے پی آئی کی پرواز آپریٹ کرینگے۔

  • جدہ : پی آئی اے کا ایک اور طیارہ تباہی سے بچ گیا

    جدہ : پی آئی اے کا ایک اور طیارہ تباہی سے بچ گیا

    جدہ : پی آئی اے کا ایک اور جہاز تباہی سے بچ گیا، جدہ ایئرپورٹ پر پی آئی اے کے بوئنگ 777 کے ایک طیارے میں آگ لگ گئی، پرایئر ٹریفک کنٹرولر نے طیارے سے دھواں نکلتا دیکھ کر فائر بریگیڈ کو اطلاع کردی۔

    تفصیلات کے مطابق جدہ ایئر پورٹ پر ملتان روانگی کیلئے تیار پی آئی اے کی پرواز پی کے 740 سے اچانک دھواں نکلنے لگا.

    پی آئی اے کا عملہ طیارے سے دھواں نکلنے سے لاعلم تھا، پی آئی اے عملے کی لاعلمی کے باوجود ایئر ٹریفک کنٹرولر نے ہنگامی طور پر فائر بریگیڈ کو طلب کر لیا.

    ذرائع کے مطابق پرواز پی کے 740 جدہ سے ملتان کیلئے پہلے ہی 9 گھنٹے سے زائد تاخیرکا شکار تھی۔ خوش قسمتی سے وقوعہ کے وقت جہاز میں کوئی مسافر موجود نہیں تھا.

    پی آئی اے حکام کے مطابق طیارے کا جنریٹر سسٹم میں فنی خرابی ہوگئی تھی اور اے ٹی یو سسٹم بھی کام نہیں کررہا تھا، طیارے کے پرزہ جات کراچی سے جدہ بھیج دیئے گئے ہیں، طیارہ ٹھیک ہوتے ہی پرواز کو ملتان کیلئے روانہ کردیاجائے گا۔