Tag: PIA

پی آئی اے کا مکمل نام پاکستان انٹرنیشنل ایئرلائنز ہے۔ یہ پاکستان کی قومی ایئرلائن ہے اور ملک کی سب سے بڑی ایئرلائن بھی ہے۔ پی آئی اے تقریباً 23 اندرون ملک اور 30 سے زائد بیرون ملک پروازیں چلاتی ہے جو ایشیا، یورپ اور جنوبی امریکہ تک جاتی ہیں۔

پی آئی اے اپنے مسافروں کو مختلف قسم کی سہولیات فراہم کرتی ہے جن میں شامل ہیں:

کوڈ شیئر: دنیا کی کئی بڑی ایئرلائنز کے ساتھ کوڈ شیئر کا معاہدہ کیا ہوا ہے جس سے مسافر دنیا کے مختلف حصوں میں آسانی سے سفر کر سکتے ہیں۔
مختلف کلاسز: اپنے مسافروں کو مختلف کلاسز میں سفر کرنے کی سہولت فراہم کرتی ہے جن میں اکانومی، بزنس اور فرسٹ کلاس شامل ہیں۔
کیمپ اور ہوٹلز: ایئرلائن نے پاکستان کے مختلف شہروں میں کیمپ اور ہوٹلز بھی قائم کیے ہوئے ہیں۔
PIA

پی آئی اے میں ریفرنڈم کا حکم نامہ مسترد، یونین رہنماؤں کی اسلام آباد طلبی

کراچی : پی آئی اے میں نئے ریفرنڈم کے احکامات مسترد کر دیئے گئے، ایئر لیگ کی جانب سے دائر درخواست پر این آئی آر سی نے نیا حکم نامہ جاری کر دیا۔

این آئی آر سی کی جانب سے پہلے جاری کی گئی ججمنٹ کو دوبارہ غور کرنے کا فیصلہ کیا گیا ہے، ایئر لیگ کے کارکنوں کا سی بی اے آفس میں رش لگا ہوا ہے، این آئی آر سی نے 12 فروری کو تمام یونین رہنماؤں کو اسلام آباد طلب کرلیا۔

این آئی آر سی اسلام آباد بینچ کی جانب سے پی آئی اے میں نئے ریفرنڈم نہیں کرائے جاسکے، گزشتہ پیپلزیونٹی کےعہدیداروں نے جنرل مینجر آئی آر راشد ظفر کے دفتر کا گھیراؤ کرلیا تھا، موجودہ سی بی اے ائیرلیگ اورپیپلزیونٹی کے کارکنوں کے درمیان لڑائی کی نوبت تک آگئی تھی۔

پی آئی اے ہیڈ آفس میں دونوں گروپ آمنے سامنے آگئے، پی آئی اے سیکیورٹی اور پولیس کی بھاری نفری طلب کرلی گئی۔

مزید پڑھیں: قانون کے تحت ریفرنڈم کا انعقاد چاہتے ہیں، صدرائیرلیگ

پیپلزیونٹی نے عدالت کے حکم کے مطابق نئے ریفرنڈم کرانے کا مطالبہ کیا، جبکہ جنرل مینجر آئی آر راشد ظفر نئے ریفرنڈم کے احکامات دینے سے گریزاں ہیں۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پرشیئر کریں۔

فروری 8, 2018
پی آئی اے میں جعلسازی کا معاملہ، بدعنوان افسران کیخلاف کاروائی نہ کرنے پر وزیراعظم سیکریٹریٹ کا اظہار برہمی

کراچی : پی آئی اے میں جعلسازی کا معاملہ طول پکڑ گیا، بدعنوان افسران کیخلاف کاروائی نہ کرنے پر وزیراعظم سیکریٹریٹ نے اظہار برہمی کرتے ہوئے یاد دہانی کا دوسرا نوٹیفکیشن ارسال کردیا گیا۔

پی آئی اے میں جعلسازی کا معاملے پر وزیراعظم سیکریٹریٹ کی جانب سے بدعنوانی کیخلاف کاروائی نہ کرنے پر یاد دہانی کا دوسرا نوٹیفکیشن ارسال کردیا گیا، نوٹیفیکیشن میں وزیر اعظم سیکریٹریٹ کیجانب سے شدید اظہار برہمی کرتے ہوئے دریافت کیا گیا ہے کہ بدعنوان افسران کیخلاف کاروائی کیوں عمل میں نہ لائی گئی۔

وزیر اعظم سیکریٹریٹ نے چیئرمین پی آئی اے اور سی ای او سے وضاحت طلب کرلی۔

پی آئی اے میں فوڈ کی خریداری میں کرپشن کے الزامات سامنے آئے ہیں، وزیراعظم سیکریٹریٹ کی جانب سے جاری کئے گئے خط میں پی آئی اے حکام سے فوری رپورٹ طلب کرنے کے احکامات بھی دینے کیساتھ وضاحت فراہم کرنے میں تاخیر قابل نہ قبول کرنے کا اتنباہ بھی کیا گیا ہے۔

واضح رہے 2013 میں آڈیٹر جنرل نے پی آئی اے کے شعبہ کیٹرنگ لاہور میں303.29ملین روپے کی بے ضابطگیوں کی رپورٹ کی تھی، سات صفحات پر اس رپورٹ میں منیجر پی اینڈ ایل کو بدعنوانی کا ذمہ دار قرار دیا گیا تھا۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

فروری 3, 2018
پی آئی اے کی سینئرسٹیزن اورمعذورافراد کیلئے خصوصی رعایت ختم

کراچی : پی آئی اے کی موجودہ انتظامیہ نے معذور افراد اور سینئر سیٹیزن سے ان کا حق چھین لیا اور اندرون اور بیرون ملک جانیوالی پروازوں پررعایت ختم کردی۔

تفصیلات کے مطابق پی آئی اے کی جانب سے سینئر سٹیزن اور معذور افراد کیلئے اندرون اور بیرون ملک جانیوالی پروازوں پر خصوصی رعایت ختم کردی گئی۔

پی آئی اے انتظامیہ نے ایک خط کے ذریعے اندرون و بیرون ملک پی آئی اے کے تمام اسٹیشنز پر آگاہ کر دیا گیا ہے کہ سینئر سیٹیزن اور معذوروں کو ٹکٹوں پر رعایت نہیں دی جائے گی۔

پی آئی اے نے نوٹیفکیشن کے ذریعے یکم فروری سے تمام سہولت ختم کردی ہے۔

مزید پڑھیں : پی آئی اے کا ملازمین کی طبی سہولیات آؤ ٹ سورس کرنے کا فیصلہ

پی آئی اے سالہ سال سے سینئر سٹیزن کو دس سے بیس فیصد ٹکٹوں پر رعایت دیتی تھی اورمعذور افراد کیلئے چالیس فیصد رعایت تھی۔

ذرائع کے مطابق رعایت ختم ہونے سے سینئر سٹیزن اور معذور افراد میں تشویش کی لہر دوڑ گئی ہے، انھوں نے وزیر اعظم اور صدر مملکت سے اپیل کی ہے کہ معذوروں اور سینئر سٹیزن کا کوٹہ پی آئی اے میں بحال کیا جائے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئرکریں۔

فروری 1, 2018
پی آئی اے کا خسارہ آمدن کے نصف سے تجاوز کرگیا

کراچی: قومی ایئر لائن نے گزشتہ سال کیا کمایا کیا گنوایا‘ منظر عام پر آگیا‘ ایئر لائن نے جتنے پیسے کمائے اس کے آدھے کے نقصان میں رہے‘ خسارے کے سبب تنخواہوں کی ادائیگی بھی خطرے میں پڑگئی ہے۔

اے آروائی نیوز کو موصول ہونے والے ابتدائی اعدادوشمار کے مطابق پی آئی اے نے سال 2017 میں اٹھاسی ارب روپے کا ریونیو حاصل کیا تاہم ایئر لائن کو چھیالیس ارب روپے نقصان کا بھی سامنا کرنا پڑا۔

ذرائع کا کہنا ہے کہ پی آئی اے کی ناقص تجارتی پالیسی اوراضافی اخراجات کی وجہ سے ادارے کو ایک سال میں کل آمدن کے نصف سے زائد کا نقصان برداشت کرنا پڑا ہے۔ پی آئی اے نے پہلی سہہ ماہی میں 21 ارب روپے کمائے اور 11 ارب روپے کا نقصان کیا۔

دوسری سہ ماہی میں ادارے نے22ارب روپے کا روینیو حاصل کیا11.5ارب روپے کا نقصان اٹھایا۔ تیسری سہ ماہی میں پی آئی اے کا ریوینیو 24ارب روپے رہا اور نقصان کا تخمینہ 8ارب روپے لگایا گیا ہے۔

چوتھی سہ ماہی میں اکیس ارب روپے کا روینیو حاصل کیا اور پندرہ ارب روپے سے زائد کا نقصان کیا۔ مجموعی طور پر ادارے نے 88 ارب روپے حاصل کیے اور 46 ارب سے زائد کا نقصان اٹھایا۔

ماہرین کا کہنا ہے کہ پی آئی اے کو گزشتہ سال سب سے زیادہ خسارہ نیویارک اسٹیشن بند کرنے کے سبب ہوا۔ ادارے کا مجموعی خسارہ تین سو ارب روپے سے بھی تجاوز کرچکا ہے۔

یہ بھی بتایا جارہا ہے کہ خزانہ خالی ہونے کی وجہ سے پی آئی اے ملازمین کو رواں ماہ کی تنخواہ کی ادائیگی بھی مشکل میں پڑ گئی ہے۔ یاد رہے کچھ دن قبل ہی پی آئی اے نے اپنے ملازمین کو فراہم کی جانے والی طبی سہولیات کو آؤٹ سورس کرنے کا فیصلہ بھی کیا ہے۔ قومی ایئر لائن اس مد میں ہر سال ساڑھے تین ارب روپے سے زائد خرچ کرتی ہے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

جنوری 30, 2018
اربوں روپے خسارے سے دوچار قومی ایئرلائن کا نئے افسران کی بھرتی کا فیصلہ

کراچی : اربوں روپے خسارے سے دوچار قومی ایئرلائن نے نئے افسران کی بھرتی کا فیصلہ کرلیا ہے اور 100 مینجمنٹ ٹرینی افسران کی بھرتی کے لئے اشتہار بھی جاری کر دیا گیا ہے۔

تفصیلات کے مطابق اربوں روپے خسارے سے دوچار قومی ایئرلائن میں پھر نوازنے کا سلسلہ شروع کردیاگیا، زرائع کے مطابق پی آئی اے میں زائد ملازمین کی موجودگی کے حکومتی دعووں کے باوجود نئے افسران کی بھرتی کا فیصلہ کیا گیا ہے ۔

انتظامیہ کی جانب سے 100 مینجمنٹ ٹرینی افسران کی بھرتی کے لئے اشتہار جاری کیا گیا ہے، افسران طے شدہ حکومتی کوٹے کے تحت بھرتی کئے جائیں گے، افسران کو پے گروپ 5 میں بھرتی کیا جائے گا۔

زرائع کے مطابق پہلے سے موجود اہل افسران کو کھڈے لائن لگا کر نئے افسران کی بھرتیاں کی جا رہی ہیں، ملازمین کو ماہانہ تنخواہوں کی ادائیگی میں تاخیر کے باجود نئی بھرتیاں مزید مالی بوجھ کے مترادف ہیں۔

ترجمان پی آئی اے کا کہنا ہے کہ آئندہ برسوں میں افسران کی ریٹائرمنٹ کے تناظر میں بھرتیاں ناگزیر ہیں۔

مزید پڑھیں : پی آئی اے کا ملازمین کی طبی سہولیات آؤ ٹ سورس کرنے کا فیصلہ

یاد رہے کہ اس سے قبل قومی ایئر لائن کی انتظامیہ نے ملازمین کو فراہم کی جانے والی میڈیکل کی سہولیات کو آؤٹ سورس کرنے کا فیصلہ کیا تھا کہ ملازمین کے طبی سہولیات ادارے کی جانب سے ادا کرنے کے بجائے اسے انشورنس کمپنی سے منسلک کردیا جائے گا ۔

خیال رہے کہ پی آئی اے پہلے ہی اسپتالوں اور میڈیکل کمپنیوں کی نادہندہ ہے جس کے سبب ملازمین طبی سہولیات سے محروم ہیں ۔ بتایا جارہاہے کہ پی آئی اے نے اسپتالوں اور میڈیکل کمپنیوں کو کروڑوں روپے کے واجبات ادا نہیں کیے ہیں جس کی وجہ سے پی آئی اے ملازمین کو نجی اسپتال طبی سہولیات فراہم نہیں کر رہے اور میڈیکل اسٹور نے بھی ملازمین کو ادویات فراہم کرنے سے انکار کردیاہے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

جنوری 29, 2018
پی آئی اے کی سعودی عرب اورچین کے لئے پروازوں کی تعداد میں اضافہ

کراچی : پی آئی اے نئے مقامات کیلئے پروازیں شروع کرنے کی منصوبہ بندی کر رہی ہے جبکہ سعودی عرب اور چین کے لئے پروازوں کی تعداد میں اضافہ کیا جا رہا ہے۔

ترجمان پی آئی اے کے مطابق اس بات کا فیصلہ پی آئی اے کے پروازوں کے نیٹ ورک کا تفصیلی جائزہ لینے کے بعد کیا گیا ہے۔ ترجمان نے بتایا کہ پی آئی اے نے خسارے میں کمی لانے کے لئے ایک جامع بزنس پلان مرتب کیا ہے جس میں اخراجات میں کمی اور ریونیو میں اضافہ کر کے مسافروں کی سہولیات میں بہتری لائی جائے گی۔

ترجمان نے بتایا کہ جلد ہی جدہ کے لئے ہفتہ وار پروازوں کی تعداد 28 سے بڑھا کر31 کی جارہی ہے اسی طرح مدینہ کے لئے ہفتہ وار پروازوں کی تعداد9 سے 10 کی جارہی ہے۔

مستقبل میں سی پیک کی وجہ سے ضروریات کو مدنظر رکھتے ہوئے بیجنگ کے لئے اسلام آباد اور کراچی سے ہفتہ وار پروازوں کی تعداد دو سے بڑھا کر چار کی جارہی ہے۔اسی طرح اندرون ملک پروازوں کے دائرہ کار میں بھی وسعت کی جارہی ہے۔

چین کے مقام گوانگزو، سعودی عرب میں القصیم اور زائرین کی سہولت کے لئے ایران کے شہر مشہد کے لئے بھی پروازیں شروع کی جارہی ہیں۔ اس سلسلے میں پی آئی اے کے بوئنگ 777 طیاروں کی از سر نو تزئین و آرائش کی گئی ہے اور جدید ترین دوران پرواز انٹرٹینمنٹ سسٹم کو فعال کیا جارہا ہے۔

کیبن کریو کی نئی یونیفارم بھی متعارف کرائی گئی ہے جس کو عوام کی جانب سے پسند کیا گیا ہے اسی طرح گراؤنڈ ہینڈلنگ سٹاف کی یونیفارم بھی تبدیل کی جارہی ہے اور ان کو کسٹمرز کیئر کی ٹریننگ بھی دی جارہی ہے۔

ترجمان نے بتایا کہ پروازوں کے شیڈول کا مکمل طور پر جائزہ لینے کے بعد اس بات کا فیصلہ کیاگیا ہے نئے روٹس کے لئے پروازیں شروع کی جائیں ، منافع بخش روٹس پر پروازوں کی تعداد میں اضافہ کیا جائے اور نقصان میں جانے والے روٹس پر پروازوں کو وقتی طور پر بند کر دیا جائے۔

کویت اور سلالہ کے لئے پروازوں کو عارضی طور پر معطل کیا جارہا ہے ان پروازوں کے مسافروں کو متبادل انتظامات کے ذریعے ان کی منزل مقصود تک پہنچایا جائے گا تاہم ان پروازوں کو دوبارہ شروع کرنے کا فیصلہ خالصتاً کاروباری مفاد کو مدنظر رکھ کر کیا جائے گا۔

ترجمان نے بتایا کہ ائر لائن انتظامیہ کی ان مجموعی کاوشوں سے ائر لائن کو دوبارہ سے منافع بخشی کی جانب میں خاطر خواہ مدد ملے گی۔

جنوری 27, 2018
پی آئی اے کے طیاروں کا سیفٹی انڈیکس خطرناک حد تک پہنچ گیا

کراچی : پی آئی اے کے طیاروں کا سیفٹی انڈیکس ایک بار پھر خطرناک حد تک پہنچ گیا ہے، جس کے باعث یورپ اور مشرق وسطیٰ جانیوالی پروازوں پر پابندی لگنے کا خدشہ درپیش ہے۔

تفصیلات کے مطابق قومی ایئر لائن پی آئی اے کا سافا انڈیکس2.31تک تجاوز کرگیا ہے جو کہ بین الاقوامی سیفٹی معیار کے مطابق انتہائی خطرناک ہے، سافا انڈیکس کی رپورٹ اے آروائی نیوز کو موصول ہوگئی ہے۔

ذرائع کا کہنا ہے کہ پی آئی اے کے یورپ جانے والے بوئنگ777طیاروں ،مشرق وسطیٰ جانیوالے طیارے ایئربس320کی دیکھ بھال ،طیارے کی صفائی ستھرائی انتہائی ناقص ہے اور کوئی توجہ نہیں دی جارہی۔

پی آئی اے ترجمان کا کہنا ہے کہ پی آئی اے سافا انڈیکس کو کنٹرول کرنے کیلئے اقدامات کر رہی ہے، پی آئی اے کاسافا انڈیکس 2.1تک جا پہنچا ہے، اوسلو میں پی آئی اے کے طیارے کی رپورٹ بہتر آئی ہے۔

دوسری جانب سافا کے ریمپ انسپیکشن کی جانب سے متعدد بار پی آئی اے کے طیاروں پر اپنے تحفظات کا اظہار کیا ہے۔

ذرائع کا کہنا ہے کہ سافا ریٹنگ میں مسلسل اضافہ ہوا تارہا تو یورپ اور مشرق وسطیٰ جانیوالی پی آئی اے کی تمام پروازوں پر پابندی عائد ہوسکتی ہے۔

ماہر ایوی ایشن کے مطابق طیاروں کے انڈیکس کا تیزی سے بڑھنا خطرے کی گھنٹی ہے، پی آئی اے کے سالانہ 5ملین سے زائد مسافر سفر کرتے ہیں ان کی سیفٹی کو خطرات لاحق ہوسکتے ہیں، بین الاقوامی سیفٹی سافا انڈیکس کی ریٹنگ 1.6 ہونی چاہیے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

جنوری 25, 2018
پی آئی اے : سینئرافسران کی برطرفی میں قوانین کی سنگین خلاف ورزیاں

کراچی : پی آئی اے انتظامیہ نے قوانین کی سنگین خلاف ورزی کرتے ہوئے سینئر افسران کو عہدوں سے ہٹا کر ان کی جگہ جونیئر افسر تعینات کردیئے، متاثرہ افسران نے سی ای او کی برطرفی کیلئے کوششیں شروع کردیں۔

تفصیلات کے مطابق باکمال لوگوں کی لاجواب سروس کے دعویدار ادارے پی آئی اے میں اقرباء پروری اپنے عروج پر پہنچ گئی، ادارے میں قوانین کی سنگین خلاف ورزی کرتے ہوئے سینئر افسران کو ان کے عہدوں سے ہٹانے کا سلسلہ تا حال جاری ہے۔

ذرائع کا کہنا ہے کہ پی آئی اے میں جونیئرافسران کو اہم عہدوں پر تعینات کیا جارہا ہے، سی ای او نے جدہ کے کنٹری منیجر امتیاز بھٹو کو ان کے عہدے سے ہٹادیا، جدہ کے فنانس منیجر افتخار احمد کا بھی تبادلہ کردیا گیا۔

اس کے علاوہ اسٹیشن منیجر جدہ محمد علی کو بھی ہٹا دیا گیا ہے، ذرائع کا مزید کہنا ہے کہ گروپ 7 کے جونیئر افسر محمد اسماعیل عنصر کو جدہ کا کنٹری منیجر کا چارج سونپ دیا گیا جبکہ گروپ سات کے ہی افسر واصف کو جدہ کا اسٹیشن منیجر تعینات کردیا گیا ہے۔

واضح رہے کہ ان تمام عہدوں پرگروپ نو کے افسر کو ہی تعینات کیا جاتا ہے، پی آئی اے میں جونیئر افسر کی تعیناتی پر سینئر افسران میں بے چینی پھیل گئی ہے۔

ذرائع کے مطابق سول ایوی ایشن اتھارٹی کی طرح پی آئی اے میں بھی سینئر افسران کی جانب سے سی ای او کی برطرفی کیلئے بھاگ دوڑ شروع کردی گئی ہے۔

۔’’رائٹ مین آن رائٹ جاب ‘‘ کے فارمولے پرعمل پیراہیں، ترجمان پی آئی اے

اس حوالے سے ترجمان پی آئی اے کا کہنا ہے کہ ایئر لائن انتظامیہ ’’ رائٹ مین آن رائٹ جاب ‘‘ کے فارمولے پر عمل کر رہی ہے اور اسی سلسلے میں مختلف شعبہ جات اور بیرون ملک اسٹیشنوں پر تعینات افسران کی کارکردگی کا جائزہ لے کر از سر نو تعیناتیاں کی جارہی ہیں تا کہ ائر لائن کو جلد از جلد ایک منافع بخش ادارے میں تبدیل کیا جا سکے۔

ترجمان کا مزید کہنا ہے کہ سعودی عرب میں تعینات کنٹری منیجر جدہ کے فنانس منیجر اور اسٹیشن منیجر کو فوری واپس بلا لیا گیا ہے ان کی جگہ نئے افسران کی تعیناتی جلد از جلد کر دی جائے گی جبکہ اس دوران ان کے جونیئر افسران کو ان کے عہدوں کا عارضی چارج دے دیا گیا۔

جنوری 20, 2018
پی آئی اے میں قوانین کی خلاف ورزی، نااہل افسرکی اگلے گروپ میں ترقی

کراچی : باکمال لوگوں کی لاجواب سروس کے دعویدار ادارے پی آئی اے میں اقرباء پروری اپنے عروج پر ہے، سی ای او نے قانون کی خلاف ورزی کرتے ہوئے من پسند افسر کو اگلے گریڈ میں ترقی سے نواز دیا۔

تفصیلات کے مطابق پی آئی اے میں من پسند افسران کو نوازنے کا سلسلہ تاحال جاری ہے، اربوں روپے خسارے میں چلنے والے قومی ادارے پی آئی اے میں قوانین کی دھجیاں اڑا دی گئیں۔

سی ای او نے اختیارات کا ناجائز استعمال کرتے ہوئے خلاف قانون ڈی جی ایم فرحان سمیع اللہ کو گروپ8 سے9 میں ترقی دیدی، فرحان سمیع اللہ کو پروموشن بورڈ نے نااہل قرار دیا تھا۔

سی ای او کی جانب سے خلاف قانون پروموشن بورڈ کی منظوری لیے بغیر فرحان سمیع اللہ کو ترقی دی گئی، پروموشن لیٹر کی کاپی اے آر وائی نیوز نے حاصل کرلی۔

ذرائع کے مطابق فرحان سمیع اللہ کی ترقی کا تقرر نامہ عجلت میں جاری کیا گیا، پروموشن لیٹر میں 19 جنوری کے بجائے 20 جنوری کی تاریخ میں جاری کیا گیا ہے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر ضرور شیئر کریں۔

جنوری 19, 2018
جعلی بلوں کے ذریعے پی آئی اے کو لاکھوں کا نقصان

کراچی: قومی ایئرلائن میں بڑے پیمانے پر بلوں میں بے ضابطگی اور گھپلوں کا انکشاف ہوا ہے‘ مبینہ جعلی بلوں کے ذریعے لاکھوں روپے کی خرد برد کرکے پی آئی اے کے خزانے کو نقصان پہنچایا گیا۔

ذرائع کے مطابق مختلف مد میں جعلی بل تیار کئے گئے ا ور ان کے ذریعے لاکھوں روپے خزانے سے وصول کئے گئے۔ اس مقصد کے لیے پی آئی اے کے دو افسران نے خلافِ ضابطہ اختیارات کا غیر قانونی استعمال کیا گیا۔

پی آئی اے کے ان جعلی بلوں کی کاپی اے آروائی نیوز نے حاصل کرلی۔منیجر کو آرڈنیشن مشیر ہوا بازی نے جعلی بل پی آئی اے سے دباو ڈال کر منظور کرائے اور سی ای او کے منیجر کوآرڈنیشن نے لاکھوں روپے بلوں کی منظوری دی۔جعلی بلوں میں مہنگی اشیاء کی خریداری مختلف نجی فرم اور ہوٹلز کے بل شامل ہیں۔

واضح رہے کہ سی ای او کے منیجر کوآرڈنیشن کے خلاف مبینہ جعلسازی کے حوالے سے پہلے ہی تحقیقات جاری ہیں۔ سی ای او کے منیجر کوآرڈنیشن نے جعلسازی کے ذریعے پی آئی اے میں بھرتی اور ترقی حاصل کی تھی۔ذرائع کے مطابق لاکھوں روپے بلوں کی بھی چیئرمین کی منظوری کے بغیر اختیارات کا ناجائز فائدہ اٹھاتے ہوئے بل کی ادائیگی کی منظوری دی۔م

شیر ہوا بازی کے منیجر کوآرڈنیشن نے پی آئی اے کے افسران پردباو ٔڈال کر بلوں کی فوری ادائیگی کے لیے کہا۔ذرائع کے مطابق پی آئی اے کے محکمہ فنانس نے بلوں کو ادا کرنے سے انکار کردیا تھا اور اس کی منظوری چیئرمین سے مشروط کردی تھی۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

جنوری 17, 2018