کراچی : سول ایوی ایشن اتھارٹی کی عدم توجہی کے باعث سول ایوی ایشن کا ائیر لائنز کی فلائٹ سیفٹی کو مانیٹر کرنے والا محکمہ سربراہ سے محروم ہے، ڈائریکٹر فلائٹ اسٹینڈرڈز کا عہدہ دو سال کا عرصہ گزر جانے کے باوجود تاحال خالی ہے۔
تفصیلات کے مطابق پاکستان اور پی آئی اے پر یورپی یونین اور برطانوی پابندی کے باوجود سول ایوی ایشن اتھارٹی کے عہدیداران کی مسئلے کے حل کیلئے عدم توجہی برقرار ہے۔
سول ایوی ایشن کا ائیرلائنز کی فلائٹ سیفٹی کو مانیٹر کرنے والا محکمہ اپنے سربراہ سے محروم ہے، ڈائریکٹر فلائٹ اسٹینڈرڈز کا عہدہ دو سال کا عرصہ گزر جانے کے باوجود تاحال پر نہیں کیا جاسکا۔
اس حوالے سے ذرائع کا کہنا ہے کہ فلائٹ انسپکٹر افتخار عثمانی کو عارضی طور پر چارج دیا گیا ہے مگر اہلیت نا ہونے کے باعث انہیں مستقل نہیں کیا جارہا۔
اس اہم عہدے کے خالی ہونے پر سول ایوایشن اتھارٹی کے یورپی پابندی اٹھوانے کے اقدامات کی سنجیدگی پر سوالات اٹھ گئے، سول ایوایشن نے خلاف ضابطہ ائیرلائنز میں مختلف عہدوں پر ہم خیال عملے کی تعیناتی کی احکامات بھی جاری کرنا شروع کردیئے۔
سول ایوی ایشن میں انسپکٹرز کی تعداد میں شدید کمی ہے جس سے ائیرلائنز کا کام متاثر ہورہا ہے، مختلف ائیرلائنز کا 130 سے زائد کیبن کریو انسپکٹرز کی کمی کے باعث وقت پر چیک نہ ہونے پر ڈیوٹی سے محروم ہے جس سے ائیرلائنز کو کافی نقصان کا سامنا ہے۔
فضائی عملے کے وقت پر چیک نہ ہونے اور اس کے نتیجہ میں گراونڈ ہونے کے باعث ائیرلائنز کا آپریشن متاثر ہورہا ہے، افتخار عثمانی کی ایماء پر جان بوجھ کر چھٹی کے دن چیک رکھے جاتے ہیں جن سے انسپکٹرز دوگنا الاؤنس وصول کرتے ہیں۔
سول ایوایشن کے پاس پائلٹس کے امتحان اور چیکس کیلئے صرف تین انسپکٹرز ہیں جن میں سے ایک نوکری سے استعفیٰ دے چکا ہے، دوسرا ریٹائرمنٹ پر چلا گیا ہے،600 سے زائد پائلٹس کیلئے صرف ایک انسپکٹر سال کے ہر روز دو چیک فی دن بھی رکھے جائیں تو پورا نہیں ہوتا۔
انسپکٹرز کی کمی اور سربراہ کی غیر موجودگی سول ایوایشن انتظامیہ کی جانب سے فضائی سیفٹی سے متعلق اقدامات پر شدید سوالیہ نشان ہے۔ سول ایوی ایشن اتھارٹی کے ترجمان کے مطابق ڈائریکٹر فلائٹ اسٹینڈرڈ کی بھرتی کیلئے اخبارات میں اشتہارات دیے گئے ہیں۔
22مئی کو اشتہار کے ذریعے امیدواروں کی فہرست شارٹ لسٹ کی گئی تھی جس میں سے کوئی بھی معیار پر پورا نہیں اترا تھا اس لیے دوبارہ سے اشتہار جاری کیا گیا ہے، ڈائریکٹر فلائٹ اسٹینڈرڈ کیلئے افتخار عثمانی بھی امیدوار تھے اوران کا نام بھی شارٹ لسٹ میں تھا۔
